1 Samuyila 31

Lú mala Sawul andǝ amuna-burana male

1 Adyan ngga amǝ’Filisti naban munǝo arǝ amǝ’Isǝrayila; sǝ amǝ’lwa mala Isǝrayila ɓangŋa aɓadǝm amǝ’Filisti; à wal-lú amǝ’Isǝrayila amúr Nkono Gilbowa. 2 Amǝ’Filisti pǝrta Sawul andǝ amuna-burana male, à kya kasǝmurià, sǝ à wal-lú amuna-burana male, yià Jonatan, andǝ Abinadap, andǝ Malkishuwa. 3 Munǝo yi candǝ arǝ Sawul; amǝ’sǝlǝ túr mundi ta Sawul nǝ mundi, à tsǝki wi penye kǝ̀rkǝ́r.

4 Sawul ne mǝ-bwali-wi agirmunǝo male ama, <<Pusǝ nggeabyau mô sǝ wu zuɓiam nǝi, ɓǝ̀ ana raka, amǝ ɗwanyi kasǝ-ɓatau man nǝ̀ yia zuɓiam sǝ à nǝ̀ ɓangginǝ mim.>> Sǝama mǝ-bwali-wi agirmunǝo male ɓinǝe, acemǝnana ɓangciu pàkki wi kǝ̀rkǝ́r. Nda Sawul twal nggeabyau male sǝ kpa amurí ka. 5 Lang mǝ-bwali-wi agirmunǝo male sǝni Sawul wuna ka, kara yì gbal ka kpa amúr nggeabyau male sǝ wù atà Sawul. 6 Anggo sǝ Sawul andǝ amuna-burana male tàrú, andǝ mǝ-bwali-wi agirmunǝo male andǝ aburana male mǝnana atè kat ka, à wù akǝ pwari mǝ’mwashati.

7 Lang amǝ’Isǝrayila mǝnana à nda a buì njar-nza mala Ɓangŋaban Jezǝril andǝ amana a takuli mala Nggeasala Jodan sǝni ama, aburana mala amǝ’Isǝrayila ɓangŋǝna, sǝ Sawul andǝ amuna-burana male wukina ka, à ɓangŋa à nying alà malea; sǝ amǝ’Filisti yiu à yi do aɓalǝia.

8 Lang ban fana ka, amǝ’Filisti yiu ace pwan agirbura mala aɓwana mana à wuna ka, kara à yi kum lú Sawul andǝ alú amuna-burana male tàrú amúr Nkono Gilbowa. 9 À kasǝ ɓamur Sawul, sǝ à swár agirmunǝo male. À tasǝ amǝ’na-túrbân aɓa nzali mala amǝ’Filisti kat ɓǝà hamnǝ bǝsacê a ndàmǝgule mala ankúl malea, sǝ aban aɓwana malea. 10 À tsǝk agirmunǝo mala Sawul a ndàmǝgule mala *31:10 Sǝni aɓa: Akas 16:23-24.Ashterot, sǝ à gyar luí arǝ sheran mala Bet Shan.

11 Lang aɓwana mǝnana nǝdo a Jabesh-Gilǝyat ok gìr mǝnana amǝ’Filisti pàkki Sawul ka, 12 kara akanggǝrang amǝ’lwa malea kat lo, sǝ à gya aɓa dù mǝno kat. À kya twal lú Sawul andǝ alú amuna-burana male mǝnana arǝ sheran mala Bet Shan ngga, sǝ à yiu a Jabesh, à kya pisǝia kàm. 13 À pwan amuia, sǝ à lumsǝia a tǝrta nggun zāmbo a Jabesh; sǝ à gilmùr anonggio tongno-nong-ɓari.