2 Samuel 12

Ɓakuli Yahweh gim Murǝm Dauda

1 Yahweh túr Natan mǝɓangnǝa aban Dauda. Lang Natan yina aban Dauda ka, bang ama, <<Aburana nakam ɓari aɓa ɓè nggea-là, mwashat ka mǝkume na sǝ ɓì ka mǝ’tǝ̀r na. 2 Mǝkume ka ndanǝ andá andǝ anzur pas, 3 sǝ mǝ’tǝ̀r ka pànǝ kǝgìr ɗàng she kǝ mǝ-nzur mǝnana kúrrô lǝsǝì gul andǝ amuni ka. Mǝnia yì muna-nzur ka kǝ lili aɓa kwar mǝ’mwashati andǝ mǝtale, kǝ nù mùr aɓa kwar nû mùr male, sǝ pak ka mǝtale nǝ̀ nongsǝì a byalí. Mǝnia yì muna-nzur a baní ka nda kǝla ɓoarnsarile.

4 <<A ɓè pwari ka, bǝri yipì mǝkume a ɓala male. Mǝkume ka earce ama nǝ̀ wàl mwashat atà agirkusǝu male nǝ̀ pak girlina ace bǝri mǝnana sulǝ a baní ka ɗàng; a kún mani ka, wario kya bwal kǝ muna-nzur mwashat mala mǝ’tǝ̀r man wàlì, lambǝî bǝri male.>>

5 Bum Dauda lul kǝ̀rkǝ́r arǝ mǝkume man. Kángìr aban Natan ama, <<Mbak-kàngkàng Yahweh nakam ngga, ɓwa mǝnana pak mǝnia yì gìr ka ɓoaro ɓǝà wal-luí! 6 Dumǝna púp nǝ̀ mbwekî mǝ’tǝ̀r man anzur ine a kúnì mwashat, ace mǝnia yì gìr pè ka, acemǝnana pànǝ sǝn mǝsǝswatǝr ɗàng.>>

7 Natan ne Dauda ama, <<A nda kǝ ɓwe! Yahweh Ɓakuli mala Isǝrayila na ama: <Ən ɗārǝo a duk murǝm amur Isǝrayila, sǝ ǝn amsǝo a ɓabù rǝcandǝa mala Sawul. 8 Ən po ɓala mala mǝtala-ɓala mò andǝ amāmí aɓata yálban mò. Ən po ɓala mala Isǝrayila andǝ mala Yahuda. Sǝ ɓǝ̀ mǝnia kat ka karǝo raka, ɓǝ́n pano mǝnana kútì ka. 9 Ace mana sǝ a būrǝce cau mala Yahweh, ace pàk gìr mǝnana mǝɓike na ka a mǝsǝì? A wal-lú Yuriya ɓwa’Hitti nǝ nggeabyau mala amǝ’Amon, sǝ a twal māmí ɓǝ̀ duk mô. 10 Twal ado aban ká a dǝmba ka, ɓala mò pà nǝ̀ usǝlǝi lú mala aɓwana kam mǝnana à nǝ̀ walia nǝ nggeabyau ka ɗàng, acemǝnana a ɓǝsǝkiam, sǝ a twal mālá Yuriya ɓǝ̀ duk māmó.>

11 <<Yahweh bang ama: <Ace man yì gìr a pe ka, Mǝ nǝ tsǝk zunggǝliban ɓǝ̀ lo arǝò a ɓala mò. Akǝ mǝsǝo Mǝ nǝ twal amāmó Mǝ nǝ pe ɓè ɓwa mǝnana nda a bano tù ka; nǝ̀ nongnǝia a ɓaɓwa bwāng. 12 A pê aɓa sǝmbǝrǝa, sǝ Mim ngga, Mǝ nǝ tsǝk mǝnia yì gìr ka ɓǝ̀ yi pa nǝ pwari a kùli, a ɓamǝsǝ amǝ Isǝrayila kat.> >>

13 Pǝlǝa Dauda banggi Natan ama, <<Ən pangŋǝ́nì Yahweh cauɓikea.>>

Sǝ Natan eari wi ama, <<Yahweh twalǝno banì. A pà nǝ̀ wù ɗàng. 14 Sǝama acemǝnana a pakce Yahweh ɓà nǝ mǝno yì gìr a pe ka, muna mǝnana à ɓǝ̀lô ka nǝ̀ wú.>> 15 Pǝlǝa Natan nyare o a ɓala male.

Sǝ Yahweh tsǝk muna mǝnana mālá Yuriya ɓǝlî Dauda ka bwal nǝ rǝkwana. 16 Dauda zǝmbî Yahweh ace munê. Gilmùr sǝ kya kútí a ɓala, mal dù kat ndaban nongŋo a nzali. 17 Aɓwana-mǝgule mala ɓala male yiu abani ace loasǝe ɓǝ̀ loapi nzali ɓǝ̀ li girlina andǝia, sǝama ginǝe. 18 A tongno-nong-ɓaria nongŋo ka, munê paklú. Ɓangciu pàkki amǝ’túró-ɓala mala Dauda arǝ banggi wi ama munê pàngŋǝ̀nà-lú, acemǝnana à pakɗenyicau ama, <<Lang munê ndanǝ yilǝmu piu ka, sǝm ne wi cau sǝ kwakikiri arǝ sǝm ɗàng. Lang ado sǝ sǝm nǝ̀ ne wi ama munê wuna? Earka, nǝ̀ pàkki ɓamurì gìr mǝɓane.>>

19 Sǝama lang Dauda sǝn amǝ’túró-ɓala male naban sherǝki-acau arǝarǝia ka, yi sǝlǝ ama munê wuna. Nda Dauda ɗia ama, <<Mune wuna le?>>

À ear ama, <<E, wuna.>>

20 Pǝlǝa Dauda loapi nzali, sǝ sussǝo, hasǝ mùrú, sǝ nggaɗi agir-nggūrǝu male. Sǝ o a ɓala mala Yahweh kya peri. Osso nyare yiu a ɓala male sǝ bang ama ɓǝà pe wi girlina; à yinǝi wi nǝ girlina sǝ lìli.

21 Pǝlǝa amǝ’túró-ɓala mala Dauda ɗì ama, <<Mana man a pàk ka? A gilmùr sǝ a pak-bumkiɗikea ace munio lang ndanǝ yilǝmu ka, sǝama lang munê wuna ka, a lo sǝ a li girlina.>>

22 Dauda ear ama, <<Lang munê na nǝyilǝmu piu ka, ǝn gilmùr sǝ ǝn pak-bumkiɗikea acemǝnana ǝn pakɗenyicau ama, <Yana sǝlǝa ko ear ka Yahweh nǝ̀ ɓwamuram, sǝ nǝ̀ nying munê nǝyilǝmu?> 23 Sǝama ado ka, munê wuna; palang sǝ mǝ nǝ gilmùr? Mǝ nǝ gandǝnǝ nyesǝ munê ɗǝm le? Mǝ nǝ ká abaní. Yì ka pà nǝ̀ nyar abanam ɗàng.>>

Ɓǝlban mala Solomon

24 Dauda giriki māmí Basheba, sǝ kútí abani, nong nǝi. Basheba ɓǝl muna-ɓwabura, sǝ tunǝi ama Solomon. Yahweh earce munê, 25 sǝ tasǝ cau nǝban Natan mǝɓangnǝa ama ɓǝà tunǝ munê ama *12:25 Jedidia ka ɓālǝi nda ɓwa mana Yahweh earce ka.Jedidia.

Masǝlǝata lwa nǝ amǝ’Amon

26 Aɓa mǝno anggo ka Jowap narǝ munǝ arǝ Rabba, nggea-là mala amǝ’Amon, sǝ angŋǝna kanggǝrang-ban mala murǝm malea. 27 Jowap pǝlǝa tasǝ amǝ’na-túrbân aban Dauda nǝ cau ama, <<Ən munǝna arǝ Rabba, sǝ ǝn angŋǝna máɗí-mùr malea arǝia. 28 Ado ka, ramba acilia amǝ’lwa abanɓwáná sǝ wu gumbǝli nggea-lê wu e; ɓǝ̀ ana raka, mǝ nǝ e, sǝ à nǝ̀ tunǝi nǝ lullǝam.>>

29 Nda Dauda ramba amǝ’lwa kat abanɓwáná, sǝ wari a Rabba, munǝ arǝ nggea-lê sǝ e ka. 30 Sǝ ak mbulan-murǝm mǝnana a ɓamur murǝm*12:30 Ko a ɓamur Milkom, ɓakuli mala amǝ’Amon; Milkom gbal ka à tunǝi ama Molek. malea ka, sǝ à oasǝì Dauda a ɓamuri. Mbulan-murǝmì ka à pè nǝ bolo-njengǝlan sǝ à nbákí nǝ amǝsǝ tali-gǝna; dǝmbǝrya male na talent mwashat.*12:30 talent mwashat ko tyang lumi-tàrú-nong-ine. Dauda pwan gǝna-lwa kpǝm a nggea-lê. 31 Ɗǝm ngga, Dauda pusǝ aɓwana mǝnana aɓa nggea-lê ka, sǝ tsǝia púp arǝ atúró mǝcandǝe ɓǝà pea nǝ byau zanzǝki nggun, andǝ asoro bolo-candǝa, andǝ abero bolo-candǝa. Sǝ tsǝia ɗǝm aɓa túró ɓak tobali. Pàkkî anggea-là mala amǝ’Amon amǝnia yì gìr ka kat. Pǝlǝa Dauda andǝ amǝ’lwa kat nyar a Urǝshalima.