2 Samuyila 20

Sheba mgbicau arǝ Dauda

1 Ɓè ɓwabura *20:1 Sǝni aɓa: Nggur 13:13.mǝ’ɓealɓana na kam, lullǝi ama Sheba, muna-ɓwabura mala Bikǝri, a tàu mala Benjami. Yì ka, ɓua njawe sǝ bang ama,

<<Sǝm pànǝ kǝ kāmbe aɓa Dauda ɗàng,

Sǝ sǝm pànǝ kǝ nzali liɓala aɓa muna-ɓwabura mala Jeshi ɗàng.

Isǝrayila, koyanale ka ɓǝ̀ nyar a gumli male!>>

2 Nda aburana mala Isǝrayila kat nying Dauda, sǝ à kpata Sheba muna-ɓwabura mala Bikǝri ka. Sǝama aburana mala Yahuda lanzǝ atà murǝm malea, twal a Jodan aban ká Urǝshalima.

3 Lang Murǝm Dauda nyar a ɓala male a Urǝshalima ka, pwan amā-twala male lum mǝnana nyia ace ɗenyinǝ ɓala ka, tsǝia a ɓè ɓala, sǝ tamsǝ amǝ’yálban ɓǝà kǝ yália. Kǝ pea wia gìr mǝnana kat à paktǝle ka, sǝama pak-ɓwama nǝia ɗàng. À kasǝkunia a ɓala ba pwari lú malea, à do kǝla amā-lú.

4 Pǝlǝa murǝm banggi *20:4 Ɓalli gbal aɓa: 2Sam 17:25; 19:13.Amasa ama, <<Rambam aburana mala Yahuda abanɓwáná aɓa nongŋo tàrú, sǝ wu yiu wunǝia.>> 5 Nda Amasa puro ace ká tunǝ aburana mala Yahuda abanɓwáná ka, sǝama banì sauwa kútì anonggio mǝnana murǝm kasǝi wi ka.

6 Sǝ Dauda banggi Abishai ama, <<Adyan ngga, Sheba muna-ɓwabura mala Bikǝri nǝ̀ pàkka sǝm gìr mǝɓane nǝ̀ kútì mǝnana Absalom pàk ka. Twal aburana mem, sǝ wu ɓangŋa atè, ɓǝ̀ ana raka nǝ̀ kumbi ɓamúrì akanggǝrang anggea-là, sǝ nǝ̀ ɓwar arǝ sǝm.>>

Jowap wal-lú Amasa

7 Nda aburana mala Jowap andǝ amǝ’Keret andǝ amǝ’Pelet andǝ akanggǝrang amǝ’lwa kat purî ɓá Urǝshalima, aɓata sàrǝ̀ban mala Abishai, sǝ à oa pǝrta Sheba muna-ɓwabura mala Bikǝri.

8 Lang à yi bik ban tali mǝgule a Gibiyon ngga, Amasa yi kumia. Jowap ka, ndanǝ adaura-murǝm male mala amǝ’lwa arǝì, nǝ nggeabyau aɓa ndè mǝnana marǝ nggurrì a taɓuni ka. Lang Jowap sungŋo nǝ̀ ká a ban Amasa ka, nggeabyaunì swárô kpa a nzali.

9 Jowap ɗì Amasa ama, <<Mǝ’eambǝam, a nda jam le?>> Pǝlǝa bwal Amasa a mbotokuni nǝ bui-mǝli, ace mǝnana nǝ̀ kùrrì zǝp, mala makkun ngga. 10 Sǝ Amasa ka, sǝn byau mǝnana a bù Jowap ka ɗàng. Nda Jowap zuɓi Amasa nǝ byau a bumi, sǝ amuna-lungŋe solǝ a nzali. Amasa wǔ, nǝ zuɓiban mwashat ɓǝ̀rɓǝ̀r.*20:10 Sǝni gbal aɓa: 1Amur 2:5. Pǝlǝa Jowap andǝ mǝ’eambi Abishai pǝrta Sheba muna-ɓwabura mala Bikǝri. 11 Mwashat aɓalǝ alaggana mala Jowap cam amur lú Amasa, sǝ loasǝ gì na ama, <<Ɓwa mǝnana kat earmúr Jowap, sǝ ɓwa mǝnana kat nda anzǝm Dauda ka, ɓǝ̀ kpata Jowap!>> 12 Amasa nongŋo aban mgbangtǝki aɓa nkila male a tsùrú mala njargula, sǝ koya mǝ’lwa mǝnana yiu a banì ka, go kusǝi came. Sǝ lang lagga man sǝni ama koyan mǝnana yiu a ban Amasa ka, cam piu ka, nda sungsǝki Amasa ɓǝ̀ gǝshì múr njargula, warinǝi a ɓawan, sǝ kùmsǝi wi kungtung amurí ka. 13 Lang à gǝshina lú Amasa nyingŋǝ̀nà múr njargula ka, aɓwana kat o atà Jowap ace pǝrta Sheba, muna-ɓwabura mala Bikǝri.

14 Sheba gya atà atau mala Isǝrayila kat yi pur a Abel-Bet-Ma’aka, andǝ ɓá bù-nzali mala amǝ’Beri puppup; à ramba abanɓwáná, sǝ à o atè. 15 Amǝ’lwa mala Jowap kat yiu sǝ à gumbǝli nggea-là Abel-Bet-Ma’aka sǝ Sheba na aɓa nggea-lê. Pǝlǝa à ɓak mgbangban mǝnana eau a kuli aban ká arǝ nggea-lê, sǝ kya cam nǝ nza arǝ kanggǝrang tali mǝnana nggea-lê cam amurí ka. Sǝ aɓwana mǝnana kat atà Jowap ka, à kùtí a tǝmgi kusǝ sheranî, ace mǝnana à nǝ̀ me a nzali ka. 16 Pǝlǝa ɓè ɓwama mǝ’sǝlǝe tunǝban nǝɓa nggea-lê ama, <<Wu kwakikir wun! Wu kwakikir wun! Ida, wu ne Jowap ama ɓǝ̀ yiu kani ace mǝnana mǝ bangcau nǝi ka.>> 17 Lang Jowap sung tù aban ɓwame ka, ɓwame ɗi ama, <<A nda Jowap le?>>

Jowap ear ama, <<E, mǝ nda.>>

Pǝlǝa ne wi ama, <<Kwakikiro arǝ cau mǝnana guro mò nǝ̀ banggo ka.>>

Jowap eari wi ama, <<Mǝ nda ǝn nggǝ oeo ka.>>

18 Pǝlǝa ɓwame nacau, ama, <<A pwarian ngga aɓwana kǝ̀ bang ama, <Wu alta kwarkiru a Abel,> sǝ anggo sǝ à gilǝki cau. 19 Sǝm nda aɓalǝ aɓwana mana à earce dorǝpwala andǝ domǝsǝcau a Isǝrayila ka. Wun ndarǝ alte ama wun nǝ̀ wal-lú nggea-là mǝnana nggeau na a Isǝrayila ka. Palang sǝ wun nǝ̀ kiɗiki nzali liɓala mǝnana mala Yahweh na ka?>>

20 Jowap pe wi eare ama, <<Ɓǝ̀ sappi banam, ɓǝ̀ sappi banam mǝnana ama mǝ pisǝì ko mǝ bǝbbǝriki ka. 21 Cê pa anggo ɗàng. Ɓè ɓwabura na ǝn alkiyite ka, lullǝi ama Sheba muna-ɓwabura mala Bikǝri, ɓwa nzali múr-ankono mala Ifǝrem. Yì ka loasǝ bui aɓa mgbicau arǝ murǝm, nggearǝ murǝm Dauda. Wu pa mǝnia yì ɓwabura ka, sǝ mǝ nǝ nying nggea-lê.>>

Ɓwame ne Jowap ama, <<Sǝni, sǝm nǝ̀ túrò ɓamuri amúr sheran.>>

22 Pǝlǝa ɓwame wari nǝ kwaro male aban aɓwana mǝnana kat aɓa nggea-lê ka. À kasǝ ɓamur Sheba muna-ɓwabura mala Bikǝri, sǝ à túrì Jowap. Nda Jowap twang njawe, sǝ aburana male mesǝe, à nying nggea-lê, koyan ngga nyar a là male ka. Pǝlǝa Jowap nyar a Urǝshalima aban murǝm.

Amǝgulo mala Dauda

23 * 20:23 Sǝni aɓa: 2Sam 8:16-18; 1Amur 4:3-6.Jowap nda gbani amur amǝ’lwa mala Isǝrayila kat;

Benaya muna-ɓwabura mala Jehoyada nda mǝ’sàrǝ̀ban amur amǝ’Keret andǝ amǝ’Pelet,*20:23 amǝ’Keret andǝ amǝ’Pelet ka à nda ka amǝ’yáltà murǝm.

24 Adoniram nda ɓwamǝgule amur aɓwana mana à tsǝia aɓa túró púp ka,

sǝ Jehoshafat muna-ɓwabura mala Ahilud nda mǝ’twalcau aɓa malǝmce;

25 Sheva nda mǝgilǝgir,

sǝ Zadok andǝ Abiyata ka, à nda ka apǝris,

26 sǝ Ira ɓwa’Jayir gbal ka, pǝris mala Dauda na.