Musa lidǝmba nǝ ne amǝ Isǝrayila cau ama:

1 Mǝnia ka à nda ka anê andǝ akasǝcau mǝnana dumǝna púp wun nǝ̀ tsǝkir wun, wun nǝ̀ kpatea a do ma’wun aɓa nzali mǝnana Yahweh Ɓakuli mala aká wun pana wun ɓǝ̀ duk ma’wun ba do ma’wun a ɓanza ka. 2 Aɓwapǝndǝa mala anzali mǝnana wun nǝ̀ ak nzali arǝia ka, wu kiɗiki abân mana à kǝ peri kàm aban aɓakuli malea ka, amúr ankono andǝ amgbangban, andǝ tǝrta koya nggun mǝpwale. 3 Wu kwarki agyangŋan malea. Wu arki akúnamúrú malea, sǝ wu pisǝ atondong peri aban Ashera,*12:3 atondong peri aban Ashera: anggun mǝsake mǝnana à shària ace pángŋǝ̀nà-túró nǝia lang à nǝ̀ peri aban Ashera, yì mā-ɓakuli malea ka. a bǝsa. Wu tsauwiki aɓǝ̀nzál mala aɓakuli malea mǝnana à shària ka, sǝ wu esǝki lullǝia ɓǝà kǝa ɗenyinǝia ɗǝm arǝ abân mǝno ɗàng.

4 Pà wun nǝ̀ peri aban Yahweh Ɓakuli ma’wun ulang pě malea ɗàng. 5 Wu alta ban mǝnana Yahweh Ɓakuli ma’wun nǝ̀ tàrrì aɓalǝ atau ma’wun kat, ace mǝnana ɓǝ̀ tsǝk lùllǝì kàm ɓǝ̀ duk bando male ka; a banì sǝ wun nǝ̀ ká. 6 A banì sǝ wun nǝ̀ kánǝ apagir ma’wun mala pisǝe kǝring andǝ agir’nkila ma’wun, akāmbe mwashat aɓa lum mala akume ma’wun, andǝ akāmbe mala aɓoro mǝnana wun nǝ̀ pa, andǝ apagir mala lùmsǝ apacau nǝ-shambum ma’wun, andǝ apagir ma’wun mala eare mala ɓabum wun, andǝ amuna-dǝmba mala andá andǝ mala ambul andǝ mala anzur ma’wun. 7 Akanó aɓadǝm Yahweh Ɓakuli ma’wun, wun wunǝ amǝɓala ma’wun, wun nǝ̀ lì girlina, sǝ wun nǝ̀ pàk banɓoarnado arǝ atúró mala bù wun, acemǝnana Yahweh Ɓakuli ma’wun tsǝ́ngŋǝ̀nà wun bù.

8 Pà wu nǝ̀ pǎ kǝla mǝnana kat sǝm nggǝ pak kani yalung ngga ɗàng. Yalung ngga koya ɓwa ka kǝ pak gìr mǝnana ɓoari wi a mǝsǝi ka. 9 Mǝnia ka nda acemǝnana wu malaká kútí peatu a ban mǝnana wun nǝ̀ usǝlǝ kam, andǝ ban liɓala mǝnana Yahweh Ɓakuli ma’wun kǝ pà wun ngga ɗàng. 10 Sǝama lang wu yalnì nkaring Nggeasala Jodan, sǝ wu dumǝna a nzali mǝnana Yahweh Ɓakuli ma’wun kǝ pà wun ace liɓala, sǝ lang pàna wun usǝlǝo aban aɓiwun amǝbura mǝnana kat à kàrì wun, ace mǝnana ɓǝ̀ wu do aɓa rǝpwala ka, 11 Yahweh Ɓakuli ma’wun nǝ̀ tàr bando ace lùllǝì. A banì sǝ wun nǝ̀ yinǝ agir mǝnana kat ǝn bangga wun cau acea ama ɓǝ̀ wu yinǝia ka: apagir ma’wun mala pisǝe kǝring andǝ agir’nkila ma’wun, akāmbe mwashat aɓa lum mala akume ma’wun, andǝ aɓoro mǝnana wu tària wun nǝ̀ pa, andǝ agir nggea-mǝɓoarne mǝnana kat wu pàcau nǝ-shambum ama wun nǝ̀ pè Yahweh ka. 12 Sǝ a banì sǝ wun nǝ̀ pàk banɓoarnado aɓadǝm Yahweh Ɓakuli ma’wun, wun wunǝ amuna ma’wun aburana andǝ amamǝna, andǝ amǝ’túró-ɓala ma’wun aburana andǝ amamǝna; wun nǝ̀ pè atarǝ wun wunǝ amǝ’kà Lawi mǝnana à do arǝ alá ma’wun ngga, acemǝnana yià ka à pànǝ kǝ nzali ace liɓala ko kǝ bare ace ɓamuria kǝla wun ɗàng. 13 Wu tsǝkir wun wu kǝa pà apagir ma’wun mala pisǝe kǝring a koya ban mǝnana wu sǝn ngga ɗàng. 14 Ban mǝnana Yahweh nǝ̀ tàrì aɓa nzali mala ɓè tàu ma’wun ngga, akanó sǝ wun nǝ̀ pà apagir ma’wun mala pisǝe kǝring, sǝ akanó sǝ wun nǝ̀ pak agir mǝnana kat ǝn bangga wun ngga.

15 Kat andǝ amani ka, wun nǝ̀ gandǝ pwanmyal agirkusǝu ma’wun sǝ wun nǝ̀ shak nyamia aɓa komǝye atà alá ma’wun, kǝla mana kat wu earkiyice, sǝ kǝla mana Yahweh Ɓakuli ma’wun nǝ̀ tsǝka wun bù arǝ alá ma’wun kat ka. Koɓǝ̀ ɓwa ka nda aɓa ɓeami ko aɓa ɓoarnsari ka, nǝ̀ gandǝ shak nyame, kǝla mana wun nǝ̀ shak nyam ɓwacembe ko keran ngga. 16 Sǝama wu kǝa lì nkila ɗàng; wu ɗārǝí a nzali kǝla mùr. 17 Pà wun nǝ̀ lì kāmbe mwashat aɓa gauwe lum mala mǝssa ma’wun, ko mala bǝsa mùr-anap ma’wun, ko mala mùrú olif ma’wun aɓalǝ alá ma’wun ɗàng. Anggo gbal, koya ndǎ ko mbul ma’wun mǝnana tita puro a bum ngge, ko koya gìr mana kat wu pàcau ace nǝ-shambum ama wun nǝ̀ pè Yahweh, ko aɓoro mala eare mala ɓabum wun, ko amǝnana wu tària wun nǝ̀ pà gbal ka, wu kǝa liǎ ɗàng. 18 Amǝno yì aɓoro kat ka, aɓadǝm Yahweh Ɓakuli ma’wun sǝ wun nǝ̀ liǎ, a ban mǝnana Yahweh Ɓakuli ma’wun nǝ̀ tàrî ɓamúrì ka. A kàm sǝ wun, wunǝ amuna ma’wun aburana andǝ amamǝna, andǝ amǝ’túró-ɓala ma’wun aburana andǝ amamǝna, andǝ amǝ’kà Lawi mǝnana arǝ alá ma’wun ngga, wun nǝ̀ lì. Akǝ ban mǝno wun nǝ̀ pàk banɓoarnado aɓadǝm Yahweh Ɓakuli ma’wun nǝ koya gir mana kat túró ma’wun kumba wun ngga. 19 Wu tsǝkir wun, wu kǝa ɗwanyi falǝ nǝ amǝ’kà Lawi a do ma’wun kat aɓa nzali ma’wun ɗàng.

20 Lang Yahweh Ɓakuli ma’wun tangsǝna nzong-nzali ma’wun, kǝla mana pàcau ama nǝ̀ pè, sǝ nzal nyama wal wun, wu na ama wu earce shak nyama ka, wun nǝ̀ gandǝ shak nyama kǝla mana kat wu earce shě ka. 21 Ɓǝ̀ ban mǝnana Yahweh Ɓakuli ma’wun nǝ̀ tàrì ace tsǝk lùllǝì ka, ɓiki sappì ban mǝnana wu ndakam ngga, wun nǝ̀ gandǝ wal ndá ko mbul mǝnana Yahweh pà wun ngga, kǝla mǝnana ǝn bangga wun ngga, sǝ wu shak nyame a là ma’wun a pwari mǝnana kat wu earce ka. 22 Kǝla mana wun nǝ̀ shak nyam ɓwacembe ko keran ngga, anggo sǝ wun nǝ̀ shak nyame. Koɓǝ̀ ɓwa ka nda aɓa ɓeami ko aɓa ɓoarnsari ka, yia kǝm à nǝ̀ gandǝ shak nyame. 23 Sǝ wu tsǝkir wún wu kǝa lì nkila ɗàng, acemǝnana yilǝmu ka nda aɓa nkila sǝ dumǝna ama, pà wu nǝ̀ shak nyama andǝ yilǝmu ɗang. 24 Wu kǝa lì nkila ɗàng; wu ɗārǝi a nzali kǝla mùr. 25 Pà wun nǝ̀ lì nkile ɗàng, ace mǝnana wun wunǝ amuna ma’wun ngga, ɓǝ̀ agir kat ɓoara wun, sǝ anggo gbal ka wu pàngŋǝ̀nà gìr mǝnana nda jik ka, aɓadǝm Yahweh. 26 Sǝama agir mǝnana wu tària ace Ɓakuli andǝ agir mǝnana wu pàcau acea nǝ-shambum ama wun nǝ̀ pè Yahweh ka, wu umnǝia a ban mǝnana Yahweh nǝ̀ tàrì ka. 27 Wu pà apagir ma’wun mala pisǝe kǝring, nyama andǝ nkila kǝm, amur gyangŋan mala Yahweh Ɓakuli ma’wun. Nkila mala agir’nkila ma’wun ngga wun nǝ̀ solǝi amúr gyangŋan mala Yahweh Ɓakuli ma’wun, sǝama nyame ka, wun nǝ̀ gandǝ shè. 28 Wu tsǝkir wun, wu kpata mǝnia yì angguracau ǝn nggǝ pà wun ngga. Lang wu pàk mǝno ka, wun nda aban pak gir mǝnana nda jik aɓadǝm Yahweh Ɓakuli ma’wun ngga. Sǝ anggo ka wun wunǝ amuna ma’wun andǝ amǝkà wun ngga agir nǝ̀ kyanba wun pepè tàtǝ́k.

Musa ne amǝ Isǝrayila ama:

29 Yahweh Ɓakuli ma’wun ngga nǝ̀ kìɗìki aɓwapǝndǝa mala anzali mǝnana wun nda aban ká ak nzali arǝia ka. Sǝ lang wu pǝrnia, wu dumǝna a nzali malea ka, 30 wu tsǝkir wun wu kǝa kpa aɓa gbǝ́lî mala kànì anjar malea, anzǝm mana à kìɗìkìnia ka ɗàng. Wu kǝa kútiá ɗìbancau amur aɓakuli malea ama, <<Lang sǝ aɓwapǝndǝa man kǝ kpata aɓakuli malea, ace mǝnana sǝm nǝ̀ pàk ulang malea ka>> ɗàng. 31 Wu kǝa peri aban Yahweh Ɓakuli ma’wun kǝla mana à kǝ peri aban aɓakuli malea ka ɗàng, acemǝnana koya gìr’ɓeami mǝnana Yahweh ɓinǝce ka nda à pàkkiyi aban peri aban aɓakuli malea ka. Yià ka à kǝ gandǝ pisǝ amunia a bǝsa ace pà gir’nkila aban aɓakuli malea.

32 Wu kpata anzongcau andǝ akanìgìr mǝnana kat ǝn nggǝ pà wun ngga, sǝ wu peǎ nǝ tsǝkiru; cè wu tsǝk ɓè amurí ko wu amsǝ ɓè aɓalǝi ɗàng.