Ɓǝsǝlǝki Nggurcau 2

Purî gya-gāli a ɓabondo

Musa lidǝmba nǝ cau ama:

1 Pǝlǝa sǝm pǝlǝ nǝnzǝ́m sǝm, sǝm twal gya aɓa pǝɗanban, a njargula ká Nggeamùr Nzuno, kǝla mana Yahweh banggam ngga. Sǝm twal anongŋo pas sǝm ndaban gumbǝli nzali múr ankono mala Seyir. 2 Pǝlǝa Yahweh banggam ama:

3 Banì sauwuna mana wu camarǝ gumbǝli ban mǝnia yì nzali múr ankono ka, kārǝ́na anggo. Adyan ngga, wu pǝlǝ múr wun nǝ njar-nza. 4 Bangcau nǝ aɓwe, pea wia mǝnia yì nzongcau ka, ama, <<Wun ndo wun nǝ̀ kútí nǝɓa nzong-nzali mala aɓǝla ma’wun, yì amǝ’Edom, amǝkà Isǝwa, mana à ndanǝdo a Seyir ka. Yia ka ɓangciu nǝ̀ pàkkia wia arǝ wun. Ace mani ka, wu tsǝkir wun. 5 Wu kǝa na ama wun nǝ̀ altacau, wun nǝ̀ munǝo arǝia ɗàng, acemǝnana pà mǝ nǝ pà wun ɓekǝ ban aɓa nzali malea ɗàng, ko ɓǝ̀ nda bǝti kǝla tangŋa mala ɓakusǝu mwashat ka. Acemǝnana ǝn panì Isǝwa mǝnia yì nzali múr ankono mala Seyir ka, dumǝna male. 6 Wun ngga, wun nǝ̀ kúr girlina mǝnana wun nǝ̀ lǐ, andǝ mùr mana wun nǝ̀ nu ka a buia nǝ bolo-azǝrfa.>>

7 Yahweh Ɓakuli ma’wun ngga tsǝ̀ngŋǝ́nà wun bù amur túró mana kat wu tsǝk abu wun amurí ka. Yì ka sǝlǝnace gya ma’wun nǝɓa nggea pǝɗanban mǝnia ka. Aɓalǝ apǝlǝa mǝno lumi-ine (40) ka, Yahweh Ɓakuli ma’wun na atà wun bà; yàle ko wu ɗwanyi kǝgir ɗàng.*2:7 Ɓalli gbal aɓa: Nggur 8:2-4; 29:5; Nehe 9:21.

8 Ace mǝno ka, sǝm yi kútì nzong-nzali mala aɓǝla ma’sǝm, amǝkà Isǝwa mana à ndanǝdo a Seyir ka, sǝm mgbàllì njargula Araba a ɓè bù sǝm ɓǝ̀ ɓwa pur a Elat andǝ Eziyon-Geba ka. Sǝm twal gya aban ká a pǝɗanban mala amǝ’Mowap.

9 Pǝlǝa Yahweh banggam ama, <<Wu kǝa na ama wun nǝ̀ altacau arǝ amǝ’Mowap ama wun nǝ̀ kánǝ lwa arǝia ɗàng, acemǝnana pà mǝ nǝ pà wun ɓekǝ ban aɓa nzali malea ama ma’wun na ka ɗàng. Mǝnia ka nda acemǝnana ǝn panì amǝkà Lotu nzali Ar, dumǝna girkuma malea.>>

10 (Amǝ’Emit nda mǝnana à duk kam ɗiɗyal ka. Yià amǝ Emit ka, à làkkì sǝ à ndanǝ rǝcandǝa. Aɓwana amǝ’dāh’rike na, kǝla amǝ’Anak. 11 Amǝ’Emit andǝ amǝ’Anak kǝm ngga aɓwana súrǝ̀ia ama amǝ’Refa, sǝama amǝ’Mowap kǝ tunǝia ama amǝ’Emit. 12 Ɗiɗyal ka, amǝ’Hor nda mana à do a nzali Seyir ka, sǝ amǝkà Isǝwa mana à tunǝia ama amǝ’Edom ngga, à yi pǝria, à wal-luia sǝ à ak nzalinì arǝia, à duk kam, kǝla mana amǝ Isǝrayila pangnǝ aɓwana a nzali mǝnana Yahweh pea wia ɓǝ̀ duk malea ka.)

Musa lidǝmba nǝ banggi amǝ Isǝrayila cau ama:

13 Sǝ Yahweh bangga sǝm ama, <<Adyan ngga wu lo, wu yàlî myalmúr Zeret.>>

Anggo gbal sǝm lo, sǝm yàlî myalmúr Zeret. 14 Lo ma’sǝm mana sǝm nying Kadesh-Baniya, sǝm twal gya sǝ sǝm yi yàlî myalmúr Zeret ka, twal sǝm apǝlǝa lumi-tàrú bwamdǝ tongno-nong-tàrú (38). Aɓa mǝno anggo ka aburana mǝnana kat à nda ka amǝ’lwa a nza mǝno ka, à wukina puppup, kǝla mana Yahweh Ɓakuli kángìr ama nǝ̀ twaltea ka. 15 Yàle bu Yahweh Ɓakuli nǝ nggearǝì, nda mana pǝlǝ arǝia nǝ̀ máliǎ, she ɓǝ̀ teà twalna ka.*2:15 Ɓalli gbal aɓa: 1Kor 10:1-5; Yahu 5.

16 Lang aburana, amǝ’lwa kat, teà twalna, sǝ à wukina aɓalǝ aɓwana ka, 17 Yahweh banggam ama, 18 <<Yalung ngga, wun nǝ̀ kàr nǝ nzong-nzali mala amǝ’Mowap a Ar. 19 Sǝama lang wu gbàshìnà nzong-nzali mala amǝkà Amon ngga, wu kǝa na ama wun nǝ̀ lulbumia, ko wun nǝ̀ altacau arǝia, mǝnana nǝ̀ tsǝia ɓǝà lo munǝo arǝ wun ngga ɗàng. Mǝnia ka nda acemǝnana pà mǝ nǝ pà wun kǝ ban aɓa nzali mala amǝ’Amon ɓǝ̀ duk ma’wun ngga ɗàng. Ən panì amǝkà Lotu nzalinì, dumǝna malea na.>>

20 (Mǝnia yì nzali ɗiɗyal ka, amǝ’Refa, mǝnana amǝ’Amon tunǝia ama amǝ’Zamzum ngga, à nda ka aɓwana mana à duk kam ngga. 21 Yià gbal ka aɓwana amǝcandǝe na, à làkkì pas, sǝ à dāh’rikya kǝla amǝ’Anak. Sǝama Yahweh bwalì amǝ’Amon kàm, à wal-luia pas, sǝ à tsǝk acilia à nying nzalî. Nda sǝ amǝ’Amon ak nzali pǝlǝ malea, sǝ à duk kam ngga. 22 Kǝgìr mǝmwashati na Yahweh pè ace amǝ’Edom, yì amǝkà Isǝwa, mana à ndanǝdo a Seyir ka. Yahweh bwalì amǝ’Edom kàm, à wal-lú amǝ’Hor pas, acilia ka à pǝria, à ak nzali arǝia, sǝ à duk kam bà yalung. 23 Ma mala amǝ’Avit mana à duki arǝ amuna-là, tù aban nggea-là Gaza ka, amǝ’Kafto mǝnana à pur a Kafto ka, à nda à yi twaltea, sǝ à yi do a nzali malea ka.)

Musa lidǝmba nǝ cau ama:

24 Yahweh bangga sǝm ama:

Wu lo, wu bwal-njar! Wu yàllî ɓangŋaban Arnon. Wu sǝni, ǝn pana wun Sihon, ɓwa’Amor, Murǝm Heshbon andǝ nzali male. Wu kyarǝì nǝ lwa, wu ak nzali male ɓǝ̀ duk ma’wun. 25 Twal a yalung ngga, mǝ nǝ tsǝk aɓwana a ɓanza kat, ɓǝà dum nǝ ɓangciu sǝ múrià ɓǝ̀ kàrria arǝ wun. Acemana à nǝ̀ okce wun, ǝn’ò nǝ̀ bwalia sǝ rǝia nǝ̀ ɓǝla nǝ ɓangciu ace wun.

À gandǝ Sihon murǝm Heshbon a lwa

Musa lidǝmba nǝ ne amǝ Isǝrayila cau ama:

26 Nda ǝn loasǝ amǝ’na-túrbân a pǝɗanban Kedemot, ɓǝà kya aban Murǝm Sihon, ɓwa Heshbon nǝ mǝnia yì cau do-rǝpwala ka, ama:

27 Eara sǝm, ɓǝ̀ sǝm kútí nǝɓa nzali mô. Sǝm nǝ̀ kútí kporong amur njargula. Pà sǝm nǝ̀ kyanggî múr njargula ɗang. 28 Wu makka sǝm girlina mana sǝm nǝ̀ li, andǝ mùr mana sǝm nǝ̀ nu ka; sǝm nǝ̀ kúria nǝ bolo-azǝrfa ma’sǝm. Kǝgìr mǝnana sǝm earkiyice ka, nda mǝnana ama wu eara sǝm ɓǝ̀ sǝm kùtí nǝɓa nzali mô nǝ kusǝ sǝm, 29 kǝla mana amǝkà Isǝwa, mǝnana à do a Seyir, andǝ amǝ’Mowap mǝnana à do a Ar, à eara sǝm, sǝm kútí nǝɓa nzali malea ka. Sǝm nǝ̀ kutio she sǝm kat ka sǝm yàlǝ́nì Nggeasala Jodan, sǝm kutina a nzali mǝnana Yahweh Ɓakuli ma’sǝm kǝ pà sǝmi ka.

30 Sǝ Murǝm Sihon, ɓwa Heshbon ngga ɓinǝe; ko eara sǝm ɓǝ̀ sǝm kútí nǝɓa nzali male ɗàng. Mǝnia ka nda acemǝnana Yahweh Ɓakuli ma’wun tǝrna ɓabumi sǝ múrí candǝna ace mǝnana ɓǝ̀ tasǝì a ɓabù wun, ɓǝ̀ wu gandǝi a munǝo, kǝla mǝno yalung pàk ka.

31 Pǝlǝa Yahweh banggam ama:

Sǝni, Ən tinatà pà Murǝm Sihon andǝ nzali male a bù wun. Wu tita kyan nǝ lwa arǝì wu lì nzali male, sǝ wu e ɓǝ̀ duk ma’wun!

32 Pǝlǝa Murǝm Sihon andǝ amǝ’lwa male puro ace yinǝ munǝo arǝ sǝm a Jahaz. 33 Sǝ Yahweh Ɓakuli ma’sǝm tasǝia a ɓabù sǝm, nda sǝm gandǝi andǝ amuna-burana male, sǝm kiɗiki andǝ aɓwana male kat. 34 A bákuì mǝno ka, sǝm ak alá male, sǝm kiɗikia kat, sǝ sǝm twalta aɓwana kat, aburana andǝ amamǝna, andǝ amuna mǝkeke. Ko sǝm nying kǝɓwa nǝyilǝmu ɗang. 35 Kǝ agirkusǝu na sǝm gbǝwia kǝla kume-lwa ace ɓamur rǝ sǝm, andǝ gǝna-lwa mana sǝm pwan arǝ alá mana sǝm ea ka.

36 Tite amur nggea-là Aruwa, mana nda a kún Ɓangŋaban Arnon, andǝ là mǝnana aɓa ɓangŋaban aban ká nzong-nzali mala amǝ Gilǝyat ka, sǝm limurǝm amúrià nǝ lwa. Ɓekǝ nggea-là pà kàm mǝnana gandǝ sǝm a lwa ka ɗàng; Yahweh Ɓakuli ma’sǝm tasǝia a ɓabu sǝm. 37 Kǝ nzali mala amǝ’Amon nda mana sǝm gbàshì banià raka, yì kún Nggeasala Jabok, andǝ anggea-là mala nzali múr ankono andǝ abân mǝnana kat Yahweh Ɓakuli ma’sǝm tsǝka sǝm nzongcau ama, ɓǝ̀ sǝm nyia, ɓǝ̀ sǝm kǝa jea raka.