Ɓǝsǝlǝki Nggurcau 18

Apagir ace apǝris andǝ amǝ’lawi

Musa banggi amǝ Isǝrayila ama:

1 Apǝris, mana yia kat à nda a tàu mala Lawi ka, à pànǝ kum ɓekǝ nzali liɓala ko kǝ bare mana à kasǝia wia ɓǝ̀ duk girkuma malea aɓa Isǝrayila ka ɗàng. Yià ka à nǝ̀ lì apagir girlina mǝnana aɓwana yinǝia ace Yahweh ka. 2 À pà nǝ̀ kum ɓè kǝgìr liɓala atà amǝ’eambia ɗàng. Yahweh ka nda gìr’liɓala malea, kǝla mana bangŋǝnia wia ka.

3 Lang aɓwana yinǝ agir’nkila kǝla jamnda, ko nzur andǝ mbulpǝndǝa ka, abare nyama mǝnana nda ace apǝris ka, à nda ka: nkpamtari, andǝ atakiri ɓari, andǝ agir-bumi. 4 Aɓǝlagir mǝdǝmbe mala mǝssa ma’wun, andǝ bǝsa mùr-anap ma’wun, andǝ bǝsa mùrú olif ma’wun, andǝ nyang nzur mana wu tita mwe arǝ anzur ma’wun ngga, wun nǝ̀ pè pǝris. 5 Yahweh Ɓakuli ma’wun ngga tarna Lawi, andǝ amuni, andǝ amǝkè aɓalǝ atau mala amǝ Isǝrayila kat, ace mǝnana ɓǝà duk amǝ’lidǝmba nǝ aɓwana a ban-peri, aɓa lullǝ Yahweh a koya pwari ka.

6 Ɓǝ̀ Ɓwa’Lawi nying là male aɓalǝ alá mana aɓa Isǝrayila, sǝ earce nǝ̀ ká a koya là mǝnana kat Yahweh nǝ̀ tàr ka, 7 yì ka nǝ̀ gandǝ pak túróperi aɓa lullǝ Yahweh Ɓakuli male, kǝla mana aɓî amǝ’Lawi mǝnana akano à kǝ pak túróperi aɓadǝm Yahweh ka. 8 Yì ɗǝm ngga, nǝ̀ gandǝ kum kāmbe mǝmwashati atà aɓî, mala gìr mǝnana nǝ̀ lì ka, kat andǝ amani ama kumǝna boalo aɓa makki agirkuma mala tárria ka.

Nunkiru arǝ pakkiagir mala amǝ’kpata-alú

Musa pǝlǝa banggi amǝ Isǝrayila ama:

9 Lang wu yina, wu kutina a nzali mana Yahweh Ɓakuli ma’wun kǝ pà wun ngga, pà wun nǝ̀ kànì pàkkiagir ɓeami mala aɓwapǝndǝa mala anzali mǝno ka ɗàng. 10 Ɓǝà kǝa kum kǝɓwa aɓalǝ wun mana nǝ̀ kánǝ muni muna-ɓwabura ko muna-ɓwama ɓǝà pisǝi a bǝsa ace pagìr, ko mǝ’ɓángnǝ́-ɓángna, ko mǝ’sǝna nǝ bangŋo mala akukwar, ko mǝ’na gìr mǝnana nǝ̀ kumban ngga, ko mǝ’pàkki agir nggár, 11 ko mǝ’pàkki aɓuri, ko mǝ’tunǝ akukwar, ko mǝ’monzǝo, ko mǝɗikalú ka ɗàng. 12 Ɓwa mǝnana kat kǝ pak amǝnia yì agir ka, ɓwe dumǝna gìr’ɓeami aban Yahweh. Nda atàcau mala pàkki amǝnia yì agir’ɓeami malea ka, sǝ Yahweh Ɓakuli ma’wun nǝ̀ bwala wun kàm, wun nǝ̀ pǝr aɓwapǝndǝa mǝno ka, à nǝ̀ nyingga wun nzali. 13 Sǝama, dumǝna púp wun nǝ̀ duk amǝ’ɗwanyicau arǝu aban Yahweh Ɓakuli ma’wun. 14 Aɓwapǝndǝa mǝnana wun nǝ̀ ak nzali arǝia ka, à kǝ kpata acau mala amǝ’pakki agir nggár, andǝ ɓángnǝ́-ɓángna. Sǝama wun ngga, Yahweh Ɓakuli ma’wun eara wun ama ɓǝ̀ wu pàk anggo ɗàng.

Bǝsa mǝɓangnǝa kǝla Musa

15 Yahweh Ɓakuli ma’wun nǝ̀ loasǝ ɓwa aɓalǝ wun, ɓè mǝɓangnǝa kǝla mim, akǝ ɓalǝ aɓwana ma’wun, amǝ Isǝrayila. Dumǝna púp wun nǝ̀ oki wi. 16 Mǝnia ka nda gìr mǝnana wu ɗice aban Yahweh Ɓakuli ma’wun, a Horep ka, a pwari ramba abanɓwáná lang wu bang ama, <<Ɓǝ̀ sǝm kǝa ok gi Yahweh Ɓakuli ma’sǝm ɗǝm, ko ɓǝ̀ sǝm ɓǝsǝlǝ sǝn nggea bǝsa mǝnia ɗǝm ɗàng, ɓǝ̀ ana raka sǝm nǝ̀ wǔ.>>

17 Pǝlǝa Yahweh banggam ama, <<Cau mǝno à ne ka, ceni ka ɓoaro. 18 Mǝ nǝ loasǝia wia mǝɓangnǝa kǝla we, àkǝ ɓalǝ aɓwana malea, yia amǝ Isǝrayila, sǝ mǝ nǝ tsǝk acau mem a kúni, sǝ nǝ̀ banggia wia gìr mǝnana kat mǝ nǝ ne wi nǝma, ɓǝ̀ banggi wia ka. 19 Ɓwa mǝnana kat ɓinǝ kpata acau mem mǝnana mǝɓangnǝa man nǝ̀ bang aɓa lullǝàm ngga, mim nǝ nggearǝam, mǝ nǝ tsǝì ɓǝ̀ banggam tǝr ɓinǝ okiru male. 20 Sǝama, mǝɓangnǝa mǝnana twalî ɓamúrì nǝ̀ nacau aɓa lullǝàm, cau mana mǝ nda ǝn tasǝi ɓǝ̀ ne raka, ko nacau aɓa lullǝ aɓea aɓakuli ka, mǝno yì mǝɓangnǝa ka dumǝna púp ɓǝà wal-luí.>>

Musa pǝlǝa banggi amǝ Isǝrayila ama:

21 Yakǝla wun nǝ̀ ɗì ɓamur rǝ wun ama, <<Lang sǝ sǝm nǝ̀ sǝlǝ ama, cau mana mǝɓangnǝa na ka, pur nǝban Yahweh ɗàng?>> 22 Ɓǝ̀ mǝɓangnǝa nacau aɓa lullǝ Yahweh, sǝ ceni yiu yi lumsǝ ɗang, ko duk mǝsǝcau raka, wun nǝ̀ sǝlǝa ma Yahweh, nama kǝ cau anggo ɗàng. Lǝmdǝ ama, mǝno yì cau mǝɓangnǝa na ka twalkicau mala ɓamúrì na, acemani ka, wu kǝa ɓanggi wi ɗàng.