1 Lang wu puro wun nǝ̀ o a lwa arǝ aɓiwun amǝbura, sǝ wu sǝn apǝr, andǝ awaru-pǝr, andǝ amǝ’lwa mǝnana à lakkì à kútì ma’wun ngga, cè ɓangciu pàkka wun arǝia ɗàng; acemǝnana Yahweh Ɓakuli ma’wun mana pusǝ wun wu purî ɓá Masar ka, nda atà wun. 2 Kaniama wun nǝ̀ o a munǝo ka, pǝris nǝ̀ puro nǝ̀ cam aɓadǝm amǝ’lwa sǝ nǝ̀ banggia wia cau. 3 Nǝ̀ bang ama, <<Wu kwakikir wun, wun amǝ Isǝrayila, yalung ngga wu nda wu kǝ sung aban ká munǝo arǝ aɓiwun amǝbura ka; cè ɓabum wun ɓungi ɗang, ɓangciu ɓǝ̀ kǝa pakka wun ɗàng, sǝ wu kǝa dǝurǝo ko múr wun kàr wun acea ɗàng. 4 Yahweh Ɓakuli ma’wun ngga, nda mana nda atà wun nǝ̀ munǝo ace wun arǝ aɓiwun amǝbura, ace pà wun limurǝm ngga.>>

5 Pǝlǝa amǝ’pagara mala amǝ’lwa nǝ̀ banggi amǝ’lwa cau ama:

Ɓǝ̀ kǝɓwa kàm aɓalǝ wun ɓak bǝsa ɓala sǝ malaká pè Ɓakuli a buì raka, ɓwê ɓǝ̀ nyare ɓǝ̀ o a là. Pà nǝ̀ ɓoaro wu wú sǝ ɓeɓwa ɓǝ̀ yi kútí aɓa bǝsa ɓala mò ɗàng.

6 Ɓǝ̀ kǝɓwa pandǝ anggun anap sǝ malaká lì ɓǝle raka, ɓǝ̀ nyare ɓǝ̀ o a là, ace mana ɓǝkǝa wǔ a kún munǝo sǝ ɓeɓwa nǝ̀ yia lì ɓǝle ka ɗàng.

7 Ɓǝ̀ kǝɓwa purna’amur ɓwama sǝ malaká isǝi raka, ɓǝ̀ nyare ɓǝ̀ o a là, ace mana ɓǝkǝa wǔ a kún munǝo sǝ ɓeɓwa nǝ̀ yia twali ka ɗàng.

8 Amǝ’pagara mala amǝ’lwa nǝ̀ lidǝmba nǝ banggi amǝ’lwa cau ama:

Ɓǝ̀ ɓangciu kǝ pakkì kǝɓwa ko ɓabumi ɓungi ka, ɓǝ̀ ɓwê nyare ɓǝ̀ o a là, ace mǝnana ɓǝkǝa ɓungi ɓabum acili amǝ’lwa kǝla male ɗàng.

9 Lang amǝ’pagara mala amǝ’lwa malna ne amǝ’lwa amǝnia yì acau ka, pǝlǝa à nǝ̀ twal amǝ’sàrǝ̀ban mǝnana à nǝ̀ dupî amǝ’lwa a dǝmba ka.

10 Lang wu bwalna là mǝnana wu kǝ oa munǝo arǝì ka, wu tite nǝ tasǝia wia cau ɓǝà nongsǝmúrià aɓata wun ace dotarǝu. 11 Ɓǝ̀ à eare à nongsǝmúrià aɓata wun sǝ à mǝmba wun kún nggea-là malea ka, aɓwana mǝnana kat a lě ka, à nǝ̀ duk aguro ma’wun. 12 Sǝ ɓǝ̀ à ginǝ nongsǝmúrià aɓata wun aɓa dotarǝu, sǝ a kún mani ka à nǝ̀ lo ace yiu arǝ wun a munǝo ka, wu gumbǝli mǝno yì nggea-là ka nǝ amǝ’lwa ma’wun. 13 Sǝ lang Yahweh Ɓakuli ma’wun pana wun mǝno yì nggea-là a ɓabù wun, wu angŋǝ́nì ka, wu wal-lú koya ɓwabura mǝnana aɓalǝi ka. 14 Sǝama amamǝna, andǝ amuna mǝkeke, andǝ agirkusǝu, andǝ agir mǝnana kat aɓa mǝno yì nggea-là ka, wu pwania ɓǝà duk kume-lwa ace ɓamur wun. Wu ok ta banɓoarnado mala gǝna-lwa mǝnana wu pwani arǝ aɓiwun amǝbura ka. Yahweh Ɓakuli ma’wun pana wunì. 15 Anggo sǝ wun nǝ̀ pangnǝ anggea-là mǝnana kat à nda kuko nǝ wun, à pà aɓalǝ anggea-là mala aɓwapǝndǝa mana akani raka.

16 Sǝ mala anggea-là mala aɓwana mǝnia mana Yahweh Ɓakuli ma’wun kǝ pa wunia ɓǝà duk gir liɓala ma’wun ngga, pà wun nǝ̀ ɗeki ɓè kǝgir mǝnana kǝ lin’ueo ka ɓǝ̀ au ɗàng; 17 wu tària ace twaltea kat-kat: amǝ’Hitti, andǝ amǝ’Amor, andǝ amǝ’Kan’ana, andǝ amǝ’Periz, andǝ amǝ’Hivi, andǝ amǝ’Jebus, kǝla mana Yahweh Ɓakuli ma’wun tsǝka wun ama ɓǝ̀ wu pè ka. 18 Ɓǝ̀ wu ɗekia nǝyilǝmu ka, à nǝ̀ kania wun kpata agir ɓeami mǝnana kat à kǝ pe aɓa peri aban aɓakuli malea ka; sǝ anggo ka wun nǝ̀ pak cauɓikea aban Yahweh Ɓakuli ma’wun.

19 Lang wu gumbǝli nggea-là nǝ munǝo, sǝ ko ɓǝ̀ sau lang wu nda aban munǝo arǝ nggea-lê ace mana wun nǝ̀ é ka, wu kǝa kútí arǝ anggun mala nggea-lê nǝ abero aban kasǝkia ɗàng. Wun nǝ̀ gandǝ tūki aɓǝla anggunì ace lia, sǝama, wu kǝa makkia ɗàng. Anggun aɓa patal ka aɓwapǝndǝa na le, mana wun nǝ̀ ká arǝia nǝ gumbǝliban mala lwa ka? 20 Anggun mǝnana wu sǝlǝ ama à kǝ pa ɓǝlea ɗàng sǝ à kǝ lia raka, kǝ à nda wun nǝ̀ gandǝ kasǝkia ace gballì anggun-eauwe andǝ abancame mǝ’dāhre ace eauwe amur sheran mala nggea-là mǝnana wu gumbǝli nǝ lwa sǝ kǝ munǝ arǝ wun ngga, she ɓǝ̀ kpana ka.