Jesǝwa 13

Nzali mǝnana ueo à malaká lì raka

1 Lang Jesǝwa ena kutsuk sǝ apǝlǝa male lakkina ka,*13:1 Ɓalli gbal aɓa: Jes 14:10; 23:1. Yahweh banggi wi ama, <<A ena kutsuk sǝ apǝlǝa mò lakkina kǝ̀rkǝ́r sǝ cili nzali nakam kpǝm mǝnana ueo à malaká é raka. 2 Mǝnia ka nda nzali mǝnana ue ka:

Abu-nzali mala amǝ Filisti kat, andǝ abu-nzali mala amǝ’Geshur kat; 3 (lo a Nggeasala Shihor a njar-takuli mala Masar aban ká nzong-nzali mala Ekǝron a njar-nza ka, à kǝ̀ ɓalli atà anzali mala amǝ’Kan’ana, kat andǝ amani ama amurǝma tongno mala amǝ Filisti a Gaza, andǝ Ashdot, andǝ Ashkelon, andǝ Gat, sǝ Ekǝron na à yálmúrí ka); Bu-nzali mala amǝ’Avit 4 a njar-kunmur; nzali mala amǝ’Kan’ana kat twal a Meara mala amǝ Sidon aban ká Afek, aban ká nzong-nzali mala amǝ’Amor; 5 andǝ nzali mala amǝ Gebal;*13:5 Gebal ko Bibǝlos andǝ Lebano kat nǝ takuli, twal a Ba’al-Gad a kusǝ Nkono Hamon aban ká Lebo-Hamat.

6 Sǝ mala aɓwana mǝnana kat à ndanǝdo a nzali múr-ankono, twal a Lebano aban ká Misrefot-Mayim, yià amǝ Sidon kat ka, Mim nǝ ɓamúràm, Mǝ nǝ pǝria aɓadǝm amǝ Isǝrayila. Dumǝna púp awu nǝ gakki nzalinì amur amǝ Isǝrayila ɓǝ̀ duk nzali liɓala malea, kǝla mana Ən banggo ka. 7 Ado ka gapi atau tongno-nong-ine andǝ gauwa-tsùrú mala tàu mala Manasa nzali man, ɓǝ̀ duk nzali liɓala malea.>>

Gau nzali liɓala a takuli mala Jodan

8 Cili gauwa-tsùrú mala amǝ’tàu mala Manasa, andǝ amǝ’tàu mala Ruben, andǝ amǝ’tàu mala Gad ka,*13:8 Ɓalli gbal aɓa: Jes 12:6; Ɓal 32:33. à kumǝna nzali liɓala malea, mǝnana Musa pea wia a nkaring mala Nggeasala Jodan a takuli, kǝla mǝnana Musa guro mala Yahweh angŋa dǝmba pania wia ka.

9 Nzong-nzali malea tite a Aruwa (a kún Ɓangŋaban mala Arnon), andǝ nggea-là mana a tsùrú mala ɓangŋabanì ka, andǝ ɓawan-mgbangban mala Medeba puppup aban ká Dibon, 10 andǝ anggea-là kat mala Sihon murǝm mala amǝ’Amor, mǝnana yálmúr aɓwana a Heshbon, aban ká nzong-nzali mala amǝ’Amon;

11 kat andǝ Gilǝyat, yì bu-nzali mala amǝ’Geshur andǝ amǝ’Ma’aka, andǝ Nkono Hamon andǝ Bashan kat, aban ká Saleka, 12 mǝnana nda domurǝm kat mala Og a Bashan, yì mǝnana yálmúr aɓwana ɗiɗyal a Ashtarot andǝ Edǝri ka. (Yì Og ka, nda kǝ ɓwa Refa mǝnana ue ka.) Yià mǝno kat ka, Musa gandǝia a lwa sǝ ak nzali malea. 13 Sǝama amǝ Isǝrayila gandǝ pǝr amǝ’Geshur andǝ amǝ’Ma’aka ɗàng, acemani ka à lidǝmba nǝdo aɓalǝ amǝ Isǝrayila bà yalung.

14 Kǝ tàu mala Lawi nǝmurǝì nda mǝnana Musa pea wia nzali liɓala raka;*13:14 Ɓalli gbal aɓa: Jes 14:3-4; Ɓal 18:20-32. gìr’liɓala malea ka, à nda ka aɓoro mǝnana aɓwe yinǝia ace pàgir nǝ bǝsa aban Yahweh, Ɓakuli mala amǝ Isǝrayila ka, kǝla mǝnana Yahweh pàcau abania ka.

Bu-nzali mana à pè amǝ’tàu mala Ruben ngga

15 Mǝnia ka nda nzali liɓala mǝnana Musa pè amǝ’tàu mala Ruben arǝ anggurkwar malea ka:

16 Bù-nzali malea tite a Aruwa, a kún Ɓangŋaban Arnon, andǝ nggea-là mǝnana a tsùrú mala ɓangŋaban mǝno, andǝ ɓawan-mgbangban kat mala Medeba;

17 Heshbon, andǝ anggea-là male kat, mǝnana à kàrì aɓa ɓawan-mgbangban ngga;

Dibon, andǝ Bamot-Ba’al, andǝ Bet-Ba’al-Meyon, 18 andǝ Jahaz, andǝ Kedemot, andǝ Mefaat, 19 andǝ Kiriyatem, andǝ Sipma, andǝ Zeret-Shahar amúr mgbangban mala ɓangŋabanì;

20 andǝ Bet-Piyor, andǝ bum-nkono Pisga andǝ Bet-Jeshimot;

21 alá mǝnana kat amur ɓawan-mgbangban, andǝ nzali-murǝm kat mala Sihon, murǝm mala amǝ’Amor, mǝnana yálmúr aɓwana a Heshbon, mǝnana Musa limurǝm amurí andǝ amúrû mala amǝ Midiyan, yià Evi, andǝ Rekem, andǝ Zur, andǝ Hur, sǝ Reba, amǝ’tamurǝm mana à camata Sihon, sǝ à ndanǝdo a nzali mǝno ka.

22 Bil’am muna-ɓwabura mala Beyor mǝ’ɓángnǝ́-ɓángna gbal ka, nda aɓalǝ aɓwana mana amǝ Isǝrayila wal-luia a munǝo, nǝ kún nggeabyau ka.

23 Nzong-nzali mala amǝ’tàu mala Ruben ngga, nda kún Nggeasala Jodan. Mǝno ka nda nzali liɓala mala amǝ’tàu mala Ruben arǝ anggurkwar malea, nǝ anggea-là andǝ amuna-là malea.

Bu-nzali mana à pè amǝ’tàu mala Gad ka

24 Mǝnia ka nda nzali liɓala mǝnana Musa pè amǝ’tàu mala Gad arǝ anggurkwar malea ka.

25 Nzong-nzali malea ka nda Jaza, andǝ anggea-là mala Gilǝyat kat, andǝ gauwa-tsùrú mala nzali Amon, aban ká Aruwa, mǝnana nda a takuli mala Rabba ka; 26 sǝ twal a Heshbon aban ká Ramat-Mizpe andǝ Betonim, sǝ lo a Mahanayim aban ká bu-nzali Debir; 27 sǝ aɓa ɓangŋaban ngga Bet-Haram, andǝ Bet-Nimra, andǝ Sukkot andǝ Zafon, yì cili nzali-murǝm mala Sihon, murǝm mala Heshbon, bù-nzali mǝnana a takuli mala Nggeasala Jodan, aban ká masǝlǝata kún Nggeamùr Chineret.*13:27 Nggeamùr Chineret ko Nggeamùr Galili. 28 Mǝno ka nda nzali liɓala mala amǝ’tàu mala Gad arǝ anggurkwar malea, nǝ anggea-là andǝ amuna-là malea.

Bù-nzali mana à pè tàu mala Manasa ka

29 Mǝnia ka nda nzali liɓala mǝnana Musa pè gauwa-tsùrú mala amǝ’tàu mala Manasa arǝ anggurkwar malea ka.

30 Bù-nzali malea tite a Mahanayim, sǝ kpapi andǝ Bashan, nzali-murǝm puppup mala Og, murǝm mala Bashan, andǝ anggea-là lumi-tongno-nong-mwashat kat mala Jayir mǝnana à nda a Bashan ngga; 31 andǝ gauwa-tsùrú mala nzali Gilǝyat, andǝ Ashtarot, andǝ Edǝri, yì anggea-là mala nzali-murǝm mala Og a Bashan. Abân mǝnia ka à nda mǝnana à kasǝî aɓwana mala Makir, muna-ɓwabura mala Manasa, ace gauwa-tsùrú mala amuna mala Makir arǝ anggurkwar malea ka.

32 Amǝno ka à nda ka nzali liɓala mǝnana Musa gakia a ɓawanban mala nzali Mowap, a nkaring Nggeasala Jodan nǝ njar-takuli ka. 33 Sǝama tàu mala Lawi ka, Musa pea wia kǝ nzali liɓala ɗàng; Yahweh Ɓakuli mala amǝ Isǝrayila ka, nda gìr’liɓala malea, kǝla mǝnana Yahweh banggia wia ka.