Jesǝwa 16

Nzali mana à kasǝî atau mala Ifǝrem andǝ Manasa ka

1 Nzali mǝnana à kasǝî tàu mala Yisǝfu ka, tite a Nggeasala Jodan, nǝ takuli mala amgbeaɗe-mùr mala Jeriko, kya kútí nǝɓa pǝɗanban, sǝ kútí aɓa nzali múr-ankono aban ká Betel. 2 Lo a Betel kya bwal Luz, sǝ kutio bik nzong-nzali mala amǝ’Arkit a Atarot. 3 Pǝlǝa dìlì nǝ njar-nzali aban ká a nzong-nzali mala amǝ Jafǝlet, sǝ kutio wari a nzong ban Bet-Horon mǝnana a ɓangŋaban ngga, kya bwal Geza, sǝ kya masǝlǝa a kún nggeamùr.

4 Amǝkà Yisǝfu, yì atau mala Manasa andǝ Ifǝrem kum nzali man yi duk nzali liɓala malea.

5 Mǝnia ka nda bu-nzali mǝnana à gapì tàu mala Ifǝrem arǝ anggurkwar malea ka: Nzong mala nzali liɓala malea nǝ njar-takuli ka, lo a Atarot-Addar aban ká Bet-Horon mǝnana a mgbangban ngga, 6 sǝ sarǝa umnǝ nggeamùr. Lo a Mikmetat a njar-nza, pǝlǝ nǝ takuli aban ká a Ta’anak-Shilo, pǝlǝa kútí a dǝmba nǝi aban ká Januwa, nǝ takuli. 7 Lo a Januwa kya sulǝ aban ká Atarot andǝ Na’ara, kya je Jeriko, sǝ yi masǝlǝa a kún Nggeasala Jodan. 8 Lo a Tapuwa ka, nzong-nzalinì kùtí nǝ njar-nzali aban ká a muna-mùr Kana, sǝ kya masǝlǝa a kún nggeamùr. Mǝnia ka nda nzali liɓala mǝnana à kasǝî tàu mala Ifǝrem arǝ anggurkwar malea ka, 9 kpapi andǝ anggea-là mǝnana à tària ace aɓwana mala Ifǝrem aɓa nzali liɓala mala amǝkà Manasa ka; anggea-là mǝno kat andǝ amuna-là malea. 10 Sǝama yià ka à pǝr amǝ’Kan’ana mǝnana à ndanǝdo aɓa Geza ka ɗàng; acemani ka, amǝ’Kan’ana do aɓalǝ aɓwana mala Ifǝrem ba yalung, sǝama, à tsǝia púp ɓǝ̀ à kǝ pakkia wia atúró mǝkwane.