1 Pǝlǝa Jesǝwa tunǝ amǝ’tàu mala Ruben, andǝ amǝ’tàu mala Gad, andǝ gauwa-tsùrú mala amǝ’tàu mala Manasa, 2 sǝ banggia wia ama, <<Wu bwalǝna anzongcau mǝnana kat Musa guro mala Yahweh pà wun ngga, sǝ wu kpanatà agir mǝnana kat ǝn bangga wun ngga. 3 Anonggio pas mǝnia ba yalung ngga, wu bwakibu wun arǝ amǝ’eam wun, amǝ Isǝrayila ɗàng. Wu lùmsǝ̀nà túró mǝnana Yahweh Ɓakuli ma’wun tsǝka wun nzongcau arǝì ama ɓǝ̀ wu pè ka. 4 Sǝ adyan ngga Yahweh Ɓakuli ma’wun pànî amǝ’eam wun usǝlǝo, kǝla mǝnana pàcau abania ka. Acemani ka, wu nyare wu o arǝ alá ma’wun aɓa nzali mǝnana Musa, yì guro mala Yahweh pà wun, ɓǝ̀ duk girkuma ma’wun a nkaring Jodan ngga. 5 Sǝama wu tsǝkir wun pepè arǝ kpata anzongcau andǝ anggurcau mana Musa, guro mala Yahweh tsǝka wun ngga; wu earce Yahweh Ɓakuli ma’wun, wu gya arǝ anjar male kat, sǝ wu kpata anzongcau male; wu bwal Yahweh Ɓakuli ma’wun pepè, sǝ wu kpate nǝ ɓabum wun kat andǝ yilǝmi wun kat.>>* 6 Nda Jesǝwa tsǝkia wia bù, sǝ tasǝia à nyare à o arǝ alá malea ka.

7 Musa angŋa dǝmba pànî ɓè gauwa-tsùrú mala amǝ’tàu mala Manasa nzali liɓala a Bashan, sǝ cili gauwa-tsùrú mala amǝ’tàu mala Manasa ka, Jesǝwa pea wia nzali liɓala a nkanggari nzali mala amǝ’eambia a njar-nzali mala Jodan. Sǝ lang Jesǝwa tasǝia ɓǝà o arǝ alá malea ka, tsǝkia wia bù, 8 nea wia ama, <<Wu nyare arǝ alá ma’wun nǝ gǝna kpǝm andǝ adomwan mǝgulke mala agirkusǝu, nǝ bolo-azǝrfa, andǝ bolo-njengǝlan, andǝ bolo-bángŋá, andǝ bolo-candǝa andǝ agir-nggūrǝu pas. Wu gau agǝna-lwa mǝnana wu pwani arǝ aɓiwun-amǝbura ka wunǝ amǝ’eam wun.>> 9 Nda amǝ’tàu mala Ruben, andǝ amǝ’tàu mala Gad, andǝ gauwa-tsùrú mala amǝ’tàu mala Manasa nying acili amǝ Isǝrayila a Shilo, mǝnana nda aɓa nzali Kan’ana ka, sǝ à bwal njar aban ká ace nyare arǝ alá malea, a nzali Gilǝyat, yì nzali girkuma malea mǝnana à é duk malea nǝ kpata nzongcau mala Yahweh mǝnana bangŋi nǝ kún Musa ka.

10 Sǝ lang amǝ’tàu mala Ruben, andǝ amǝ’tàu mala Gad, andǝ gauwa-tsùrú mala amǝ’tàu mala Manasa, yi bik Gelilot, mǝnana nda a bù njar-nzali mala Jodan aɓa nzali Kan’ana ka, à ɓak kaɓa gyangŋan a ban mǝno a nkanggari Jodan. 11 Sǝ acili amǝ Isǝrayila ok ama, <<Wu sǝni, amǝ’tàu mala Ruben, andǝ amǝ’tàu mala Gad, andǝ gauwa-tsùrú mala amǝ’tàu mala Manasa ɓangŋǝna gyangŋan a bankutio aɓa nzali Kan’ana, a Gelilot, a nkanggari Jodan, a buì mǝnana mala amǝ Isǝrayila na ka.>> 12 Nda ɓinala amǝ Isǝrayila puppup ramba a Shilo ace kánǝ munǝo arǝia.

13 Pǝlǝa amǝ Isǝrayila túr Finehas muna-ɓwabura mala Eleaza, yì pǝris aban amǝ’tàu mala Ruben andǝ amǝ’tàu mala Gad andǝ gauwa-tsùrú mala amǝ’tàu mala Manasa, a nzali Gilǝyat. 14 Finehas wari atārǝia andǝ amúrû lum mala amǝ Isǝrayila, ɓwa mwashat a koya tàu. Koyan ateà ka ɓwamǝgule na amur mwashat atà aɓala-kàu mala Isǝrayila. 15 Sǝ à yiu aban amǝ’tàu mala Ruben, andǝ amǝ’tàu mala Gad, andǝ gauwa-tsùrú mala amǝ’tàu mala Manasa, a nzali Gilǝyat, sǝ à nea wia ama, 16 <<Ɓinala puppup mala Yahweh kǝ bang ama, <Palang sǝ wu mgbikî Ɓakuli mala amǝ Isǝrayila kiru, mǝnana yalung ngga wu pǝlǝ nzǝm wun arǝ kpata Yahweh ka? Wu ɓakkî ɓamurǝ wun gyangŋan yalung ace mgbicau arǝ Yahweh.* 17 *Cauɓikea mǝnana à pè a Piyor ka, gìr mǝkyauwe na aban sǝm le? Yi pur a yalung sǝm nggǝ tanni piu atàcau mala mǝno yì cauɓikea ka, kat andǝ amani ama kwánó-twàl-là yiu amur ɓwabundǝa mala Yahweh ka! 18 Sǝ ado ka wun ndarǝ pǝlǝì Yahweh nzǝm wun le?

<< <Ɓǝ̀ wu mgbicau arǝ Yahweh yalung ngga, li ka bumi nǝ̀ lúllô arǝ ɓwabundǝa mala Isǝrayila puppup. 19 Ɓǝ̀ nzali girkuma ma’wun ngga pǝndǝkina ka, wu yiu a nzali mala Yahweh, ban mǝnana Taragula male cam kam ngga, wu yi do atà sǝm. Sǝama wu kǝa mgbicau arǝ Yahweh, ko arǝ sǝm, nǝ ɓak ɓè gyangŋan mana nda ɗàng andǝ gyangŋan mala Yahweh Ɓakuli ma’sǝm ngga ɗang. 20 Lang Akan, mǝkà Zera, dumnǝ ɗwanyi-mǝsǝcau arǝ agir mǝnana à tària ka,* bumlulla mala Yahweh sulǝ amur ɓwabundǝa mala amǝ Isǝrayila kat re? Sǝ yì na nǝmurǝi wǔ atàcau mala cauɓikea male ka ɗàng.> >>*

21 Pǝlǝa amǝ’tàu mala Ruben, andǝ amǝ’tàu mala Gad, andǝ gauwa-tsùrú mala amǝ’tàu mala Manasa nyesǝi amúrû mala aɓala-kàu mala Isǝrayila cau ama, 22 <<Mǝ’rǝcandǝa, Ɓakuli, nda Yahweh! Mǝ’rǝcandǝa, Ɓakuli, nda Yahweh! Yi ka súrǝ́nà rǝ mǝsǝcau;* sǝ Isǝrayila ka ɓǝ̀ sǝlǝa: Ɓǝ̀ mǝnia yì gìr sǝm pè ka, nda ace mgbicau ko mgbikiru aban Ɓakuli ka, wu kǝa nying sǝm ɓǝ̀ sǝm au yalung ɗàng! 23 Ɓǝ̀ sǝm ɓangŋǝna gyangŋan ace ɓamurǝ sǝm ace mǝnana sǝm nǝ̀ pǝlǝ nzǝm sǝm arǝ kpata Yahweh; ko ace apagir mala pisǝe kǝring, ko apagir mala mǝsǝsa, ko apagir mala dotarǝu, amurí ka, ɓǝ̀ Yahweh nǝ ɓamurǝì mbwe sǝm akúnì. 24 Awo, sǝm pè ace ɓangciu ama ear ka a dǝmba ka, amuna ma’wun nǝ̀ banggi amuna ma’sǝm ama, <Mana kpapi wun wunǝa Yahweh, Ɓakuli mala amǝ Isǝrayila? 25 Acemǝnana Yahweh tsǝ̀ngŋǝ̀nà Jodan nda nzong-nzali mana gau nre sǝm sǝnǝa wun, wun amǝ’tàu mala Ruben, andǝ amǝ’tàu mala Gad. Wu pànǝ kāmbe aɓa Yahweh ɗàng.> Anggo ka, amuna ma’wun nǝ̀ tsǝk amuna ma’sǝm nǝ̀ nying peri aban Yahweh. 26 Acemani ka sǝm bang ama, <Ɓǝ̀ sǝm ɓak gyangŋan, sǝ pà ace pàgir mala pisǝe kǝring ko pà gìr’nkila ɗàng, 27 sǝama nda ace mǝnana ɓǝ̀ duk girnakun anre sǝm sǝnǝa wun,* sǝ a nre ka anza mǝnana à kǝ̀ yiu anzǝm sǝm ngga, ace mǝnana sǝm nǝ̀ peri aban Yahweh a ɓadǝmbi nǝ apagir mala pisǝe kǝring, andǝa pà gìr’nkila andǝ apagir mala dotarǝu. Sǝ a dǝmba ka amuna ma’wun pà nǝ̀ gandǝ ne amuna ma’sǝm ama, <<Wu pànǝ kāmbe aɓa Yahweh ɗàng.>> > 28 Sǝ sǝm pàk ɗenyicau ama, <Ɓǝ̀ à bangga sǝm ko à banggi amuna ma’sǝm a ɓè pwari anggo ka, sǝm nǝ̀ bang ama, <<Wu sǝn ulang gyangŋan mala Yahweh mǝnana aká sǝm ɓè, sǝ pà ace apagir mala pisǝe kǝring, ko pà gìr’nkila ɗàng, sǝama nda ace mǝnana ɓǝ̀ duk girnakun anre sǝm sǝnǝa wun ngga.>> > 29 Ɓǝ̀ sappi ban sǝm ama sǝm nǝ̀ mgbicau arǝ Yahweh, sǝ sǝm nǝ̀ nying kpata Yahweh yalung nǝ ɓak gyangŋan ace pàgir mala pisǝe kǝring, ko pàgir mala mǝsǝsa, ko pà gìr’nkila ka. Pà sǝm nǝ̀ ɓak ɓè gyangŋan ɗàng shekǝ gyangŋan mala Yahweh Ɓakuli ma’sǝm mǝnana came aɓadǝm Taragula male ka!>>

30 Lang Finehas pǝris andǝ aɓwana-mǝgule mala ɓwabundǝa, yì amúrû mala aɓala-kàu mala Isǝrayila mǝnana à waria atè, ok acau mana amǝ’tàu mala Ruben, andǝ amǝ’tàu mala Gad, andǝ amǝ’tàu mala Manasa bang ngga, kara banɓoaria wia arǝ cê. 31 Pǝlǝa Finehas muna-ɓwabura mala Eleaza, yì pǝris, banggi amǝ’tàu mala Ruben, andǝ amǝ’tàu mala Gad andǝ amǝ’tàu mala Manasa ama, <<Yalung ngga sǝm sǝlǝna ama Yahweh na aɓalǝ sǝm, acemǝnana pà ace mgbikî Yahweh kiru sǝ wu pàk man yì gìr ka ɗàng. Adyan ngga wu amsǝna amǝ Isǝrayila a ɓabù Yahweh.>> 32 Pǝlǝa Finehas muna-ɓwabura mala Eleaza, pǝris, andǝ aɓwana-mǝgule nying amǝ’tàu mala Ruben, andǝ amǝ’tàu mala Gad a nzali Gilǝyat, sǝ à nyare a nzali Kan’ana. À yì ne amǝ Isǝrayila cau mǝnana à kya ok ka. 33 Sǝ banɓoaria amǝ Isǝrayila arǝ cau mǝnana à yì banggia wia ka. Pǝlǝa amǝ Isǝrayila ɓwangsǝ Ɓakuli, sǝ à nyare à na cau mala kánǝ lwa ace kiɗiki anzali mǝnana amǝ’tàu mala Ruben andǝ amǝ’tàu mala Gad ndanǝdo kam ngga ɗàng.

34 Amǝ’tàu mala Ruben andǝ amǝ’tàu mala Gad tsǝki gyangŋanì lullǝ ama Nakún, acemǝnana à bang ama, <<Mǝnia ka nakún na anre sǝm, ama Yahweh ka Ɓakuli na.>>