Juízes 11

Jefta duk Kasǝla mala Isǝrayila

1 A bàkú mǝno ka, Jefta*11:1 Jefta Ɓalli gbal aɓa: 1Sam 12:11; Ib 11:32. ɓwa Gilǝyat ka, nggea kanggǝrang mǝ’lwa na, sǝama yi ka, muna mala mā-gyatarǝu na. Gilǝyat nda tár Jefta. 2 Mālá Gilǝyat ɓǝlî Gilǝyat amuna-burana. Sǝ lang amuna-burana mala māmí gulkina ka, à pǝ̀r Jefta, sǝ à banggi wi ama, <<A pà wunǝ kum liɓala aɓa ɓala mala tár sǝm ɗàng, acemǝnana a nda muna mala ɓè ɓwama ɗàng.>> 3 Pǝlǝa Jefta ɓanggi amǝ’eambi, sǝ kya do a nzali Top,*11:3 Top Ɓalli gbal aɓa: 2Sam 10:6,8. sǝ aɓwana-mǝɓane na mǝnana à ram rǝia à kǝ pur gya andǝi ka.

4 Ɓè pwari yiu mǝnana amǝ’Amon yinǝ munǝo arǝ Isǝrayila ka. 5 Sǝ lang amǝ’Amon soa munǝo arǝ Isǝrayila ka, aɓwana-mǝgule mala Gilǝyat wari a nzali Top ace yinǝ Jefta. 6 À banggi Jefta ama, <<Yiu yi duk múr sǝm, ace mǝnana ɓǝ̀ sǝm munǝ arǝ amǝ’Amon ngga.>> 7 Sǝ Jefta ne aɓwana-mǝgule mala Gilǝyat ama, <<Wun nda mǝnana wu lǝmdǝam ɓinǝmǝsǝu, sǝ wu pǝram ǝn purì ɓala mala tárrám ngga re? Palang sǝ wu yiu abanam ado mǝnana wu kutina aɓa tanni ka?>>

8 Pǝlǝa aɓwana-mǝgule mala Gilǝyat earî Jefta ama, <<Nda gìr mǝnana tsǝa sǝ sǝm nyar a bano ado ka. Yiu atà sǝm ace munǝo arǝ amǝ’Amon, sǝ awu nǝ duk múr sǝm, sǝm kat a Gilǝyat.>>

9 Pǝlǝa Jefta banggi aɓwana-mǝgule mala Gilǝyat ama, <<Ɓǝ̀ wu nyesǝam ace munǝo arǝ amǝ’Amon, sǝ Yahweh tsǝa à kpa a ɓabuam ngga, mǝ nǝ duk múr wun.>>

10 Sǝ aɓwana-mǝgule mala Gilǝyat earî Jefta ama, <<Yahweh ɓǝ̀ duk mǝ’nakún anre sǝm, ɓǝ̀ sǝm pak kǝla mǝnana a na raka.>> 11 Anggo sǝ Jefta o andǝ aɓwana-mǝgule mala Gilǝyat, sǝ à kya tsǝi duk múrû, sǝ mǝ’sàrǝ̀ban amúrià. Sǝ Jefta ɓǝsǝlǝ bang acau male kat*11:11 acau male kat mala eare mǝnia ka aɓadǝm Yahweh a Mizpa.

12 Pǝlǝa Jefta tasǝ amǝ’na-túrbân aban murǝm mala amǝ’Amon nǝ cau ama, <<Mana ǝn pakko, sǝ a yiu ama a nǝ munǝ arǝ nzali mem?>>

13 Sǝ murǝm mala amǝ’Amon earî amǝ’na-túrbân mala Jefta ama, <<Nda acemǝnana lang Isǝrayila purî Masar aban yiu ka, ak nzali mem, twal a Nggeasala Arnon, kya bik Nggeasala Jabok, sǝ sárǝ́ aban ká a Nggeasala Jodan; acemani ka, nyesǝi aɓa do-jam.>>

14 Jefta pǝlǝa tasǝ amǝ’na-túrbân ɗǝm aban murǝm mala amǝ’Amon, 15 sǝ à kya ne wi ama, <<Jefta bang ama: Isǝrayila ak nzali mala amǝ’Mowap ko nzali mala amǝ’Amon ɗàng. 16 Lang Isǝrayila purî Masar ka, kútí nǝɓa pǝɗanban, aban ká a Nggeamùr Nzuno, sǝ yiu a Kadesh. 17 Isǝrayila pǝlǝa tasǝ amǝ’na-túrbân aban murǝm mala amǝ’Edom, ama <Ida, eara sǝm ɓǝ̀ sǝm kùtí nǝɓa nzali mô.> Sǝ murǝm Edom ngga kwakikiri ɗàng. Ɗǝm ngga, à tasǝ cau aban murǝm mala amǝ’Mowap, sǝ yi gbal ka wakí cê. Nda Isǝrayila ueo a Kadesh ka.*11:17 Kadesh Ɓalli aɓa: Ɓal 20:14-21. 18 Pǝlǝa à twal gya nǝɓa pǝɗanban, sǝ à kàrìban arǝ nkanggari nzong-nzali mala amǝ’Edom andǝ mala amǝ’Mowap. À kya bik bù takuli mala nzali mala amǝ’Mowap, sǝ à yi duk kàttì a nkaring Nggeasala Arnon; à kùtí aɓa bu-nzali mala amǝ’Mowap ɗàng, acemǝnana myalmur Arnon ngga, nda nzong-nzali mala amǝ’Mowap. 19 Isǝrayila pǝlǝa tasǝ amǝ’na-túrbân aban Sihon, murǝm mala amǝ’Amor, murǝm mala Heshbon, nǝ cau ɓǝà banggi wi ama, <Ida, eara sǝm ɓǝ̀ sǝm kùtí nǝɓa nzali mô aban ká a là ma’sǝm.> 20 Sǝ Sihon ngga, earnǝ Isǝrayila ama ɓǝ̀ kùtí nǝɓa nzong-nzali male ɗàng; nda Sihon ramba aɓwana male kat abanɓwáná, à yi tsǝk kàttì a Jahaz, sǝ warinǝ munǝo arǝ Isǝrayila ka.

21 <<Pǝlǝa Yahweh, Ɓakuli mala Isǝrayila pà Sihon andǝ amǝ’lwa male puppup a ɓabu Isǝrayila, sǝ Isǝrayila gandǝia. Anggo sǝ Isǝrayila ak nzali Amor kat, arǝ aɓwana mǝnana à dukam ɗiɗyal ka. 22 Isǝrayila ak nzalinì twal a Nggeasala Arnon kya bik Nggeasala Jabok, sǝ twal aɓa Pǝɗanban, kya bik Nggeasala Jodan.

23 <<Ado mǝnana Yahweh, Ɓakuli mala Isǝrayila angŋǝna nzali arǝ amǝ’Amor sǝ pǝrnia à purni ɓadǝmba amǝ Isǝrayila, aɓwana male ka, a ndarǝ ɓariki awu nǝ ak nzalinì arǝia le? 24 Ɓǝ̀ Kemosh ɓakuli ma’wun, pà wun gìr ka, pà nǝ̀ duk girkuma ma’wun re? Anggo gbal gìr mǝnana kat Yahweh, Ɓakuli ma’sǝm pǝr aɓwana sǝ pà sǝmi ka, dumǝna ma’sǝm. 25 Nggeari ka, a kútì *11:25 Sǝni aɓa: Ɓal 22:2; Jes 24:9; Mik 6:5Balak muna-ɓwabura mala Zippor, murǝm mala amǝ’Mowap le? Yi ka, kutia ɓekǝ makgir andǝ Isǝrayila a kǝ fara le? Sǝ wari nǝ lwa arǝia a kǝ fara le? 26 Twalna Isǝrayila apǝlǝa gbǝman tàrú (300) nda ban do a Heshbon andǝ amuna-là male, sǝ a Aruwa andǝ amuna-là male, sǝ arǝ anggea-là mǝnana kat à nda a kún Nggeasala Arnon ngga. Ɓǝ̀ mbak-kàngkàng nzalinì ka ma’wun na, wun amǝ’Amon ngga, palang sǝ wu ak anggea-lê aɓalǝ apǝlǝkia mǝno ka ɗàng? 27 Acemani ka, mim ngga, ǝn pakko cauɓikea ɗàng; a nda mǝnana a kǝ pàkkam mǝɓane nǝ yiu mô arǝàm nǝ munǝo ka. Ado ka, ɓǝ̀ Yahweh, mǝɓashi,*11:27 mǝɓashi Ɓalli gbal aɓa: Tite 18:25; Ayu 9:15; 23:7; Ang 7:11; 50:6; 75:7; Isha 33:2. kasǝ-ɓashi yalung anre ka amǝ Isǝrayila andǝ amǝ’Amon.>>

28 Kat andǝ mani anggo ka, murǝm mala amǝ’Amon tsǝkiri arǝ acau mǝnana Jefta túrìbani ka ɗàng.

Pàcau mala Jefta mǝnana yinǝì wi nǝ bumkiɗikea ka

29 A bàkú mǝno ka, Bangŋo mala Yahweh yiu amur Jefta, sǝ twal gya kútí nǝɓa Gilǝyat andǝ Manasa, sǝ kya kútí aban ká a Mizpa mala Gilǝyat, sǝ purî Mizpa mala Gilǝyat ka, kútí aban ká aban amǝ’Amon. 30 Pǝlǝa Jefta pàcau nǝ-shambum*11:30 pàcau nǝ-shambum Ɓalli gbal aɓa: Tite 28:20; Ɓal 30:2; 1Sam 1:11. aban Yahweh, bang ama, <<Ɓǝ̀ mbak-kàngkàng awu nǝ pà amǝ’Amon a ɓabuam ngga, 31 ɓǝ̀-mana pur a kún ɓala mem aban yiu a kulliǎm, lang ǝn nyarǝnì ban amǝ’Amon aɓa limurǝm ngga, nǝ̀ duk mala Yahweh, sǝ mǝ nǝ pana gir’nkila mala pisǝe kǝring nǝi.>>

32 Nda Jefta yàl a nkaring aban o a munǝo arǝ amǝ’Amon ngga, sǝ Yahweh tsǝa à kpa a ɓabui. 33 Sǝ kiɗiki anggea-là lumi-ɓari nǝ kiɗikiban mǝgule, twal a Aruwa aban ká ɗār arǝ abân mǝnana à kàrì nggea-là Minit, sǝ kya bwal ɗār a ban nggea-là Abel-keramim ngga. Anggo sǝ amǝ Isǝrayila ɓùn*11:33 Ɓalli gbal aɓa: Akas 3:30; 8:28; 1Sam 7:13; 1Acau 20:4; 2Acau 13:18; Ang 106:42. amǝ’Amon aɓatea.

34 Pǝlǝa Jefta nyar a ɓala male, a Mizpa, sǝ mǝnia ka nda gìr mǝnana sǝn ngga: ɓoarnsarile puro aban ká a kúllè nǝ wal karata-bu andǝ ta’nggwam. Yì nda kǝ muni ɓǝ̀rɓǝ̀r; ɓǝ̀ yì na raka, panǝ ɓekǝ muna-ɓwabura, ko muna-ɓwama ɗàng. 35 Sǝ lang sǝni ka, kara bwal daura male sannì,*11:35 kara bwal daura male sannì ko <<kara bumkiɗikea bwali kǝ̀rkǝ́r>> sǝ bang ama, <<Oi ɓoarnsarilem! A ɓunǝnam a nzali amúr ankūnǝam, sǝ a dumǝna tǝ́r bumkiɗikea mǝgule abanam. Acemǝnana ǝn panacau aban Yahweh, sǝ pà mǝ nǝ nggaɗi kunam ɗàng.>> 36 Sǝ earî wi ama, <<Dâ, ɓǝ̀ a angŋa-dǝmba a panacau aban Yahweh, sǝ ado mǝnana Yahweh pano limurǝm amur aɓio-amǝbura, amǝ’Amon ngga, pàngnǝ mim kǝla mǝnana a pacau ka.>> 37 Pǝlǝa banggi tárrí ama, <<Pakkam mǝnia yì gìr ka: ɗekiam ace mǝnana mǝ o a ɓua do-nsari mem sǝnǝ aɓiam, amur ankono, ba azongŋo ɓari.>>

38 Sǝ tarrí earî wi ama, <<Kyane.>>Pǝlǝa tasǝi ɓǝ̀ o, yì andǝ aɓî, sǝ à kya ɓua do-nsari male amur ankono ba azongŋo ɓari. 39 Sǝ a masǝlǝata azongŋo ɓari ka, nyar aban tárrí, sǝ tárrí pàngnǝi kǝla mana pàcau nǝ-shambum ngga; sǝ yì muna-ɓwame ka súrǝ̀ kǝ ɓwabura ɗang. Pǝlǝa cê duk kuncau a Isǝrayila 40 ama koya pǝlǝa ka amuna-mamǝna mala amǝ Isǝrayila nǝ̀ twal anonggio ine ace o a ɓua ace muna-ɓwama mala Jefta, ɓwa Gilǝyat.