Akas 21

Amamǝna ace aburana mala tàu mala Benjami

1 Aburana mala Isǝrayila kánagìr a Mizpa ama, <<Kǝɓwa pà atà sǝm nǝ̀ pà muna-ɓwama male ɓǝ̀ al ɓwabura a tàu mala Benjami ɗàng.>> 2 Nda amǝ Isǝrayila yiu a Betel, sǝ à dumnǝdo abanì a ɓadǝm Ɓakuli bà kpa mala pwari, sǝ à loasǝ già à ɓua, ɓua mǝkwanbanì. 3 À bang ama, <<We Yahweh Ɓakuli mala Isǝrayila, palang sǝ mǝnia yì gìr ka kumban a Isǝrayila, ama yalung ngga à nǝ̀ ɗwanyi tàu mwashat a Isǝrayila?>>

4 Lang ban fana ka, à lo nǝ dǝmbari ɗiɗyal, sǝ à ɓak gyangŋan abanì. À pàgir mala pisǝe kǝring andǝ pàgir mala dotarǝu. 5 Sǝ à bang ama, <<Ya tàu na atà atau mala Isǝrayila yiu a ramba-banɓwáná aɓadǝm Yahweh ɗàng?>> Acemǝnana à kanǝna nggea kángìr amúr ɓwa mana yiu a ramba-banɓwáná aɓadǝm Yahweh a Mizpa raka, ama, <<Mbak-kàngkàng à nǝ̀ wal-lui.>> 6 Amǝ Isǝrayila pàk bumkiɗikea nǝ gìr mǝnana kum amǝ’tàu mala mǝ’eambia, Benjami ka, sǝ à bang ama, <<Yalung ngga sǝm ɗwanyini tàu mwashat aɓalǝ atau ma’sǝm. 7 Lang sǝ sǝm nǝ̀ kum amamǝna ace aburana mana à ueo nǝyilǝmu a tàu mala Benjami ngga? Sǝm kánagìr aɓa lullǝu Yahweh ama, pà sǝm nǝ̀ pea wia amuna-mamǝna ma’sǝm ɓǝà alia ɗàng.>> 8 Nda à ɗìban ama, <<Ya tàu na aɓalǝ atau mala Isǝrayila mǝnana yiu a ramba-banɓwáná aɓadǝm Yahweh a Mizpa raka?*21:8 Sǝni a: Akas 21:5. Sǝ à yi sǝni ka, kǝɓwa pà kàm a *21:8 Ɓalli gbal aɓa: 1Sam 11:1; 31:11-13.Jabesh-Gilǝyat mǝnana yiu a kàttì mala ramba-banɓwáná ka ɗàng.>> 9 Lang à ɓalkiban ngga, à yi sǝni ka, kǝ ɓwa pà kàm atà amǝ’do a Jabesh-Gilǝyat a banì ɗàng. 10 Nda ɓwabundǝa tasǝ akanggǝrang amǝ’lwa malea á-lum-nong-ɓari (12,000) sǝ à sà’arǝia ama, <<Wu kyane wu wal-lú aɓwana mǝnana à ndanǝdo a Jabesh-Gilǝyat ka nǝ kún nggeabyau, kat andǝ amamǝna andǝ amuna-mǝkeke. 11 Wu pàk mǝnia ka: koya ɓwabura, andǝ koya ɓwama mana súrǝ́nà ɓwabura ka, wu twaltea kat-kat.>> 12 Sǝ à yi kum atà aɓwana mana à ndanǝdo a Jabesh-Gilǝyat ka, alo-ɓwa ansarina gbǝman-ine, mǝnana à malaká súrǝ̀ ɓwabura raka; sǝ à yinǝia a kàttì a Shilo, mǝnana nda aɓa nzali Kan’ana ka.

13 Pǝlǝa ɓwabundǝa puppup túrban nǝ cau aban amǝ’tàu mala Benjami mǝnana à nda a *21:13 Ɓalli gbal aɓa: Akas 20:47.tali mala Rimon ngga, sǝ à hambia wia dorǝpwala. 14 Nda aburana mala tàu mala Benjami nyare a bákú mǝno, sǝ à pea wia amamǝna mǝnana à amsǝia nǝyilǝmu aɓalǝ amamǝna mala Jabesh-Gilǝyat ka. Sǝama amamǝne karǝa amúrià ɗàng.

15 Aɓwana mala Isǝrayila pàk bumkiɗikea ace gìr mǝnana kum amǝ’tàu mala Benjami ka; acemǝnana Yahweh gbakǝrina atau mala Isǝrayila. 16 Nda aɓwana-mǝgule amur ɓwabundǝa bang ama, <<Amamǝna mala tàu mala Benjami ka, à twalnatea. Mana ado sǝm nǝ̀ pa ace kum amamǝna ace acili aburana mana à ue ka?>> 17 À na ama, <<Dumǝna púp ama acili aɓwana mala Benjami mana à au ka, ɓǝà kum malea amǝ’liɓala, ace mana ɓekǝ tàu a Isǝrayila ɓǝ̀ kǝa ɓwar raka. 18 Sǝama pà sǝm nǝ̀ gandǝ pea wia amamǝna atà aɓoarnsarile sǝm ɗang, acemǝnana amǝ Isǝrayila kánagìr ama, <Ɓwa mǝnana kat pè ɓwa’Benjami ɓwama ka, ɓǝ̀ suban sulǝo amur ɓwe!> >> 19 Nda à bang ama, <<Wu sǝni, lamsan mala Yahweh mǝnana à kǝ pê koya pǝlǝa a Shilo ka malanǝ̀ yiu.>> (Shilo ka nda a njar-nza mala Betel, a njar-kunmur mala Lebona, sǝ a takuli mala njargula mǝnana anre Betel andǝ Shekem ngga.) 20 À ne amǝ’tàu mala Benjami ama, <<Wu kyane wu kùmsǝ aɓalǝ aɓaban-anap, 21 sǝ wun nǝ̀ tsǝk mǝsǝ wun. Ɓǝ̀ wu sǝni ansarina mala Shilo purna ace tàki-anggwam ngga, pǝlǝa wun nǝ̀ purî ɓalǝ aɓaban-anap, sǝ koya ɓwa atà wun ngga ɓǝ̀ gbami male yì ɓwama ace ɓamurì aɓalǝ ansarina mala Shilo, sǝ wu o a nzali Benjami. 22 Sǝ nǝ̀ ya do ama atárrià ko amǝ’eambǝia nǝ̀ yiu ace lǝmdǝ ɓua malea aban sǝm, sǝ sǝm nǝ̀ banggia wia ama, <Wu ɓwamur sǝm acea, acemǝnana sǝm gandǝnǝ kúmbi koyan atea ka male yì ɓwama a kun-munǝo ɗàng. Sǝ wun gbal ka, wu pea wia ɗàng, ɓǝ̀ ana raka ado ka wun nǝ̀ duk amǝ’kumcau.> >> 23 Aburana mala tàu mala Benjami pè kǝla mǝnana à banggia wia ka. À twalki amamǝna kǝla mana làkkì malea pàk ka, aɓalǝ amǝ’tà-nggwam sǝ à umnǝia. Pǝlǝa à nyare à o a nzali liɓala malea, sǝ à kya ɓǝsǝlǝ-ɓakki alá, sǝ à do aɓalǝia. 24 Nda amǝ’Isǝrayila mesǝì ban mǝno a pwari mǝno; à o arǝ atau andǝ anggurkwar malea, sǝ koya ɓwa ka nyar a nzali liɓala male.

25 A bàkú mǝno ka, murǝm pà kàm a Isǝrayila ɗàng. Koyan ngga pàk gìr mǝnana sǝni ɓoari wi a mǝsǝi ka.*21:25 Ɓalli gbal aɓa: Akas 17:6; 18:1; 19:1.