Akas 20

Lwa mala Isǝrayila arǝ tàu mala Benjami

1 Pǝlǝa amǝ Isǝrayila puppup puro, twal a bu-nzali Dan aban ká Biya-Sheba, kat andǝ *20:1 nzali Gilǝyat ka nda bu takuli mala Nggeasala Jodan.nzali Gilǝyat. Ɓwabundǝa yi ramba kǝla ɓwa mwashat aban Yahweh a Mizpa. 2 Aɓwana-mǝgule mala aɓwe kat, andǝ atau mala Isǝrayila kat, à yi twal bancame malea a ban ramba mala aɓwana mala Ɓakuli, mǝnana làkkì malea ka amǝ’lwa á-gbǝman-ine (400,000) na, mǝnana à nda aɓa kùrrǝu nǝ anggeabyau ka. 3 Amǝ’tàu mala Benjami ok ama Isǝrayila umǝna a Mizpa. Sǝ amǝ’Isǝrayila bang ama, <<Wu bǝla sǝm lang sǝ gìr mǝɓike man kumban?>> 4 Pǝlǝa Ɓwa’Lawi, bura ɓwame mǝnana à wal-lui ka, ear ama, <<Mim sǝnǝ mā-twala mem sǝm yiu a Gibiya a bu-nzali Benjami, ace mǝnana sǝm nǝ̀ nongŋo abanì ka. 5 Aɓa bu-dù mǝno ka, aburana mala Gibiya lo arǝàm, à gumbǝli ɓala mana sǝm sulǝ kam ngga. À earce ama à nǝ̀ wal-luem, sǝama a kún mani ka, à gbárí mā-twala mem, gandǝa wǔ. 6 Ən twal lú mā-twala mem sǝ ǝn kasǝki arǝ abare mwashat-mwashat, sǝ ǝn túrban nǝ abare arǝ abân aɓa nzali liɓala kat mala Isǝrayila, acemǝnana à pàngŋǝ̀nà ɓealɓikea andǝ ɓwaɓana mala pa-kǝsǝkya a Isǝrayila. 7 Ado ka, wun amǝ Isǝrayila kat, wu na mana nda kwarkiru ma’wun andǝ gìr mǝnana ɓoaro ɓǝà pè amúr cau man ngga.>>

8 Pǝlǝa aɓwana kat lo gǝu kǝla ɓwa mwashat ama, <<Kǝɓwa atà sǝm pà nǝ̀ o a ɓala male ɗàng, sǝ kǝɓwa atà sǝm pà nǝ̀ nyar a là male ɗàng! 9,10 Mǝnia ka, nda gìr mǝnana sǝm nǝ̀ pàkkî Gibiya ka: aɓa koya tàu mala Isǝrayila ka, sǝm nǝ̀ twal aburana lum aɓa gbǝman, gbǝman-mwashat aɓa á-mwashat, sǝ á-mwashat aɓa á-gbǝman-mwashat, ɓǝà yinǝ girlina ace amǝ’lwa. Sǝ sǝm nǝ̀ bwal-shishar ace tàr aburana mǝnana à nǝ̀ ká arǝ Gibiya a bu-nzali Benjami nǝ lwa ka. Sǝ lang à warina ka, ɓǝà mbwe ka amǝ Gibiya a kúnì ɓwaɓana mala pa-kǝsǝkya mǝnana à pè a Isǝrayila ka.>> 11 Nda aburana mala Isǝrayila kat ram rǝia ace kánǝ lwa arǝ nggea-lê, sǝ à kpapimúrià kǝla ɓwa mwashat ka.

12 Atau mala Isǝrayila túr aburana arǝ abân aɓa bu-nzali mala tàu mala Benjami puppup nǝ cau ama, <<Mana nda man yì ɓealɓikea mǝnana kumban aɓalǝ wun ngga?*20:12 Ɓalli aɓa: Nggur 13:14-15. 13 Adyan ngga, wu pusǝki amǝ’ɓealɓana mǝnana aɓalǝ wun a Gibiya ka, ace mǝnana ɓǝ̀ sǝm wal-luia, sǝ ɓǝ̀ sǝm esǝki ɓealɓikea a Isǝrayila.>> Sǝama amǝ’tàu mala Benjami ɓinǝ kwakikiria arǝ gi ka amǝ’eambia, amǝ Isǝrayila. 14 Pǝlǝa amǝ’tàu mala Benjami purki arǝ anggea-là, sǝ à yi ram rǝia abanɓwáná a Gibiya ace oa munǝo arǝ amǝ Isǝrayila. 15,16 A pwari mǝno ka, amǝ’tàu mala Benjami ramba amǝ’lwa á-lumi-ɓari nǝ á-tongno-nong-mwashat (26,000) mǝnana à purki arǝ anggea-là malea, sǝ à kùrna rǝia nǝ anggeabyau ka. Tsǝa amur amǝnia ka, amǝ’do aɓa Gibiya tàrki aburana gbǝman-tongno-nong-ɓari (700) mana anggaro na ka; koyan atea ka nǝ̀ gandǝ túr tali nǝ ntamso arǝ mǝsǝ nyang mwashat sǝ pà nǝ̀ pǝ́tì ɗàng. 17 Pǝlǝa cili aburana mala Isǝrayila (mana tàu mala Benjami pà aɓalǝia raka) ram rǝia, amǝ’lwa á-gbǝman-ine (400,000) mǝnana à kùrna rǝia nǝ anggeabyau ka; yià kat ka akanggǝrang amǝ’lwa na.

18 Aburana mala Isǝrayila lo sǝ à wari a Betel, *20:18 Sǝni gbal aɓa: Ɓal 27:21; Akas 18:5; 1Sam 14:37; 1Acau 14:10sǝ à ɗì Ɓakuli ama, <<Ya tàu nani nǝ̀ aka sǝm dǝmba kánǝ munǝo arǝ amǝ’tàu mala Benjami?>> Sǝ Yahweh earia wia ama, <<Tàu mala Yahuda na nǝ̀ tita ká ka.>>*20:18 Ɓalli gbal aɓa: Akas 1:1.

19 Pǝlǝa amǝ Isǝrayila lo nǝ dǝmbari sǝ à kya tsǝk kàttì malea a nkanggari Gibiya. 20 Sǝ à pur ace soa munǝo arǝ amǝ’tàu mala Benjami; à tsǝk amǝ’lwa malea à cam a nzong ban-je munǝo a Gibiya. 21 Amǝ’tàu mala Benjami purî ɓá Gibiya, sǝ à yi wal-lú aburana mala amǝ’Isǝrayila á-lumi-ɓari nǝ á-ɓari (22,000) a kun-munǝo a pwari mǝno.

22,23 Amǝ’Isǝrayila wario à kya ɓua aɓadǝm Yahweh bà pwarikpǝra. Pǝlǝa à ɗì Yahweh ama, <<Ɓǝ̀ sǝm kyan ɗǝm nǝ munǝo arǝ amǝ’eam sǝm amǝ’tàu mala Benjami le?>> Yahweh earia wia ama, <<Wu kya arǝia ɗǝm.>>

Aburana, amǝ’lwa mala amǝ’Isǝrayila kum ɓabumcandǝa, sǝ à kya cam a nzong ban-je munǝo, a kǝ̀ ban mǝnana à cam kam a dǝmbe ka.

24 Anggo sǝ amǝ’Isǝrayila wari arǝ amǝ’tàu mala Benjami a ɓaria nongŋo. 25 Lang amǝ’lwa mala tàu mala Benjami purî ɓá Gibiya sǝ à soa munǝ arǝ amǝ’Isǝrayila, a ɓaria pwari ka, à wal-lú aburana á-lum-bwamdǝ-tongno-nong-tàrú (18,000) mala amǝ’Isǝrayila. Yia mǝno kat ka, aburana amǝ’lwa nǝ nggeabyau na.

26 Pǝlǝa amǝ’Isǝrayila kat, yì amǝ’lwa malea puppup, à eauwe sǝ à yiu a Betel, sǝ à ɓua. À do abanì aɓadǝm Yahweh, sǝ à gilmùr a pwari mǝno ka, bà pwarikpǝra. À pàgir mala pisǝe kǝring andǝ pàgir mala dotarǝu aɓadǝm Yahweh. 27,28 (A bàkú mǝno ka, Akwati Kùrcau mala Ɓakuli na kanó, sǝ Finehas muna-ɓwabura mala Eleaza, mǝ’kà Haruna ka, nda mǝnana pàkkiyi túró-pǝris aɓadǝmbi ka.) Amǝ Isǝrayila ɗì Yahweh ama, <<Ɓǝ̀ sǝm kyan nǝ munǝo ɗǝm arǝ amǝ’eam sǝm amǝ’tàu mala Benjami le, ko ɓǝ̀ sǝm tamsǝ munǝo?>>

Yahweh nea wia ama, <<Wu kyane, acemǝnana liwi ka, Mǝ nǝ̀ pà wunia a ɓabù wun.>>

29 Nda Isǝrayila tsǝk aburana à kùmsǝó, à kàrì Gibiya. 30 Pǝlǝa Isǝrayila wari arǝ amǝ’tàu mala Benjami a tàruia pwari, sǝ à twal bancame malea ace soa munǝo kǝla mana à pè aɓalǝ anonggio mana à kutiki ka. 31 Pǝlǝa aburana mala tàu mala Benjami puro ace je-munǝo andǝia, sǝ Isǝrayila nunia à upi nggea-là. Sǝ kǝla mǝnana à pè arǝ aɓea apwari ka, amǝ’tàu mala Benjami tita walkia sǝ à wal-lú aɓea aɓwana ateà amur anjargula: mana umnǝ Betel ka andǝ mana umnǝ Gibiya ka, sǝ aɓa ɓawan. À wal-lú amǝ’Isǝrayila kǝla aɓwana lumi-tàrú. 32 Nda amǝ’tàu mala Benjami bang ama, <<Sǝm ndarǝ gandǝia kǝla mana atadǝmbe ka.>> Sǝ amǝ’Isǝrayila ka, à na ama, <<Ɓǝ̀ sǝm ɓangŋa sǝ ɓǝà pǝrta sǝm ɓǝ̀ sǝm nunia ɓǝà upi nggea-là ɗār amúr anjargula.>> 33 Sǝ koya ɓwabura mala Isǝrayila ka loapi ban male sǝ dǝshi Ba’al-Tamar, ban mǝnana à kya ram rǝia kàm ngga. Sǝ aburana mala Isǝrayila mana à kumsǝ ka, à purki pat arǝ abân kumsǝó malea a ɓawan mana kàrì Gibiya ka. 34 Nda amǝ’lwa á-lum, aburana mana à kwar aɓa lwa ka, purî ɓá Isǝrayila kat, sǝ à dǝshi Gibiya, sǝ munǝo yi candǝ kǝ̀rkǝ́r. Sǝ amǝ’tàu mala Benjami ka, à sǝlǝ ama gir’murmwana naban yiu amúrià ɗàng. 35 Sǝ Yahweh gandǝ amǝ’tàu mala Benjami aɓadǝm Isǝrayila, mǝnana tsǝa amǝ’Isǝrayila wal-lú amǝ’lwa mala tàu mala Benjami, aɓwana á-lumi-ɓari-bwamdǝ-tongno nǝ gbǝman-mwashat (25,100), a pwari mǝno, sǝ yià mǝno kat ka amǝ’lwa nǝ nggeabyau na.

36 Nda amǝ’tàu mala Benjami sǝni ka amǝ’Isǝrayila gandǝnia.

Amǝ’Isǝrayila nyar nǝtea arǝ ká arǝ amǝ’tàu mala Benjami, acemǝnana à gūlì arǝ aburana malea mana à tsǝ̀ngŋǝ̀nia à kùmsǝ̀nà a nkanggari Gibiya ka. 37 Pǝlǝa aburana mana à kumsǝ ka, à latti arǝ nggea-là Gibiya, sǝ à mesǝ amurí; à pàktúró nǝ kún anggeabyau malea sǝ à wal-lú koyan mǝnana aɓalǝi ka. 38 Gir’lǝmdǝa mǝnana à earna amurí anre ka aburana mala Isǝrayila andǝ aburana mana à kumsǝ ka, nda mǝnana ama à nǝ̀ loasǝ nggea yele aɓa nggea-là aban o a kuli. 39 Sǝ lang mǝno pángŋǝ̀nà ka, aburana mala Isǝrayila nǝ̀ wulio arǝ amǝ’lwa mala tàu mala Benjami nǝ munǝo.

Sǝama kaniama mǝno yi kumban ngga, amǝ’lwa mala tàu mala Benjami walna-lú atà aburana mala Isǝrayila kǝla lumi-tàrú. Sǝ à nani arǝarǝia ama, <<Ɓafo, sǝm ndarǝ gandǝia kǝla mana aɓa munǝo mǝdǝmbe ka.>> 40 Sǝ lang gupi mala yele tita lo aɓa nggea-là aban o a kuli ka, amǝ’lwa mala tàu mala Benjami pǝlǝ mǝsǝia anzǝmia sǝ à sǝni ka, yele angŋa nggea-lê puppup aban o a kuli. 41 Pǝlǝa aburana mala Isǝrayila wulio, sǝ amǝ’lwa mala tàu mala Benjami ka, ɓangciu bwalia sǝ à gǝggǝli kǝ̀rkǝ́r acemǝnana à sǝni ka, gir’murmwana sulǝna amúrià. 42 Acemani ka, à pǝlǝ nzǝmia arǝ aburana mala Isǝrayila sǝ à tsǝkmuria nǝ njargula ɓabondo, sǝ kat andǝ amani ka, à apî munǝo ɗang. Amǝ Isǝrayila mǝnana à purki aɓalǝ anggea-là ka, à kùtí a wal-luia aɓalǝia. 43 À gumbǝli amǝ’tàu mala Benjami aɓalǝu, sǝ à pǝrtea, twal a Noha*20:43 twal a Noha ko <<usǝlǝo pa kàm ɗàng>> sǝ à yi ɓākia aban ká ɗār a nkāɓe Gibiya a bù takuli. 44 Amǝ’lwa á-lum-bwamdǝ-tongno-nong-tàrú (18,000) mala amǝ’tàu mala Benjami kpa, sǝ yià mǝno kat ka, akanggǝrang amǝ’lwa na. 45 Acilia wulio sǝ à ɓangŋa aban o nǝ ɓabondo, à tsǝkmuria aban ká tali mala Rimon. Sǝama amǝ’Isǝrayila wal-lú aɓwana atea á-tongno (5,000) amúr anjargula. À pìtea aban ká Gidom, sǝ à kya wal-lú aɓea aburana kàm á-ɓari. 46 A pwari mǝno ka, tàu mala Benjami ɗwanyi akanggǝrang amǝ’lwa á-lumi-ɓari-bwamdǝ-tongno (25,000) a munǝo; sǝ yià mǝno kat ka amǝ’lwa nǝ nggeabyau na. 47 Sǝama aburana gbǝman-tongno-nong-mwashat (600) auwa sǝ à ɓangŋa à umnǝ ɓabondo aban ká a tali mala Rimon, sǝ à ue kano a tali mala Rimon zongŋo ine. 48 Pǝlǝa aburana mala Isǝrayila nyar arǝ aɓwana mala tàu mala Benjami, sǝ à wal-lú koya ɓwa andǝ girkusǝu mǝnana à kumi nǝyilǝmu aɓa nggea-lê ka puppup. Sǝ koya là na à kumi ka, à soaki wi bǝsa.