1 የይፕ ጉየ፥ ዙፋናይል አፋ በቴዛይ ኡሻች ኩሻይድ ጋንጨራኔ አፋር ጻፍንቲ ላፑን ማታመር ጎርድንቴዝ ጻ ማጻፍቶ ታ በኤዛ።✝5:1 ኢዝቀ. 2:9 2 ፐቲ ምኖ ኪታንቻይ ፋ ቃላ ቅ ኡዲ፥ «ማታማ ብሎዳይስኔ ማጻፍቶ ዶዮዳይስ ቤዝዛይ ኦኖ?» ዬጊ አዋጆዳር በኤዛ። 3 ዝን ሳሎ ማቅን ሳአ ዎይ ሳአፕ ኦሞ ማቅን የ ጻ ማጻፍቶ ዶዮዳይስኔ ጋንጫ በአዳይስ ዳንዳኤዝ ኦንካ ባያ። 4 ጻ ማጻፍቶ ዶዮዳይስኔ እ ጋንጫ በአዳይስ ቤዝዛ አስ ቤዝ ግሾስ ታ ኢታ ዬኬዛ። 5 የ ዎደ፥ ጭምታይፕ ፐታይ ታኮ፥ «ዬክፐ! ይሁዳ ዘረ ማቄዝ ጋማይ፥ ዳዉተ ሼሻይ፥ ላፑን ማታምታ ብሎዳይስኔ ማጻፍቶ ዶዮዳይስ ዳንዳኤዛ» ዬጌዛ።✝5:5 መ. 49:9፤ ኢሳ. 11:1

6 የይፕ ጉየ፥ ዙፋናይል ኦይዲ መተታይስኔ ጭምታይስ ጋንጨ፥ ሹክንቴዝ ዱር ጋርክ ኤቄዛና ታ በኤዛ። ኤስ ላፑን ካጭታይኔ ላፑን ኣፍታይ የዛ። የይትታይ ሳአ ኡባይል ኪትንቴዝ ጾስ አያና ላፑንታ።✝5:6 ኢሳ. 53:7፤ ዛክ. 4:10 7 የ ዱራይ ይኢ፥ ዙፋናይል አፋ በቴዛይ ኡሻች ኩሸፕ ጻ ማጻፍቶ ኤኬዛ። 8 ኤ የ ጻ ማጻፍቶ ኤኬዝ ዎደ ኦይዲ መትታይኔ ላታማኔ ኦይዲ ጭምታይ ዱራይ ቲናይድ ጉጲንጌዛ። ኡንቲ ፐታይ ፐታይ ዲኔ ጌሽታይ ዎሳ ማቄዝ እጻኔ ኩሜዝ ዎርቃ ሻተ አይኬዛ።✝5:8 ማዝ. 141:2 9 ኡንቲ፥

«ጻ ማጻፍቶ ኤኮዳይስ፥

ማታመ ብልኦዳይስ ኔስ ቤዝዛ።

✝ 5:9 ማዝ. 33:3፤ 98:1፤ ኢሳ. 42:10 አብስ ጊኮ፥ ኔኒ ሹክንቴዛያ፤

ዘረ ኡባይፕ፥ ዱማ ዱማ ዶናፕ፥

ያርታይፐኔ ካተት ኡባይፕ፥

ነ ሱይር ጾሳይስ ዎዜዛ።

10 ኑ ጾሳይስ ካተትኔ ቄሰ ማቃዳይ ጋርክ ኡዴዛ

ኡንቲ ቢታል አፋ ካዉቶዳ።

ኡንትካ ጋደ ኡባ ሞዶዳይ»

ዬጊ ኦሮ ማዝሙረ የጼዛ።✝5:10 ከስ 19:6፤ ዋን. ቆን. 1:6

11 ታ በአዳር ዙፋናይ፥ ኦይዲ መትታይኔ ጭምታይ ዩሻይድ ጋመ ኪታንችታይ የዛ። ኡ ጋመትይ ሙኩሎ ቶኬ ሙኩሎኔ ታጲ ሙኩሎ ቶኬ ታጲ ሙኩሎ ማቄዝ ጊር ስኤዛ።✝5:11 ዳነ. 7:10 12 የ ኪታንችታይ ቅ ጌዝ ቃላር፥

«ሹክንቴዝ ዱራይ ዎልቃ፥ ዱረት፥

ኤጨትኔ ምኖት፥ ቦንቾ፥ ሳባኔ

አንጆ ኤኮዳይስ ቤዝዛ»

ዬጌዛ።

13 የይፕ ጉየ፥ ሳአ፥ ሳሎ፥ ሳአፕ ኦሞራኔ አባ ጋንጨ የዝ መት ኡባይ፥

«ዙፋነል አፋ በቴዛይስኔ ዱራይስ፥

ጋላታ፥ ቦንቾ፥ ሳባኔ ዎልቃ

መፐ መናስ ማቆ»

ዬጊ የጾዳር ስኤዛ።

14 ኦይዲ መትታይካ፥ «አምንኤ» ዬጌዛ፤ ማ ጭምታይካ ጹጉኒ ጎይኔዛ።