1 Wa Naomi ọkhaam uchimma-nạng wạnọ kw'udim kwẹ kw'okpen Boaz, kw'ubin k'efonamma ch'Ẹlimẹlẹk. Boaz nwọ wa ode ọnạng kw'uyini eche.

2 Wa Rut kw'ubin Moab obeni Naomi bẹ́, "Tte mfona k'iwonu, ọfha ntor anạng nnạm nta mpra arasẹ-khira p'akpen, barli, p'n'atto, ode s'm'nse ọnạng kw'm'usim-m ọphyaam o."

Naomi ubhin-ẹ bẹ́, "Nnwa kwaam, sọhng ata asi oche kw'abeni." 3 Ma wọ Rut ubin ofona k'owonu, ọtạma abarli-mạma pạpra otor anạng p'nasi iphya nnạm. K'oche kw'idik n'ide, Rut wa otera ọta usi ọtọhm k'owonu kw'Boaz kw'ubin k'efonamma ch'Ẹlimẹlẹk.Ọrasẹ-khira kw'okpen, barli

4 Okpe núbhira, Boaz ubina k'Bẹtẹlẹhẹm ukwu ukpira, usima atọhmnạng mbọ bẹ́, "Tte Ọvaar Ubinọkpaabyi odo bạnga!"

Abẹ achera bẹ́, "Tte Ọvaar Ubinọkpaabyi udiọ-ọ!"

5 Boaz ọbạbh okkeri-atọhmnạng pẹ bẹ́, "Uminanwa kwanẹ wọ khạkha?"

6 Okkeri-atọhmnạng ọpọhn-ẹ bẹ́, "Ẹma ode uminanwa kw'ubin Moab, kw'ọtwạnọ Naomi abẹ k'Moab ukwuna ma. 7 Ophyem-m bẹ́, nttie-ẹ ọbọhk otor atọhmnạng mba nnạm ọpra abarli-mạma. S'obobe ọtạma ọtọhm k'ekpebha tạrr ukpira mantọhmma, okhenka okwokha ọyọhng k'okpe nwa sạsạkhẹ k'offo."

8 Ma wọ Boaz obeni Rut bẹ́, "Nnwa kwaam, khọhm-m itọhng. Nạngẹ k'owonu ọdwạkh-ọdwạk afon ata asi ọtọhm o, owonu ngwa ọbọhk kábạra atte o. Ninga ma ọttạra atọhmnạng paam p'ipanạng. 9 Kkeri owonu kw'atọhmnạng n'asi iphya, ator atọhmnạng p'ipanạng nnạm. Kk'ajunung mbọ itọhng ntwạra bẹ́, abẹ nạng-ọ ipyibha asi. De asi adaakh-ọ, sọhng ata agwo k'nsi-jọ s'ajunung mbọ kk'asi atọhra age."

10 Ma o, Rut ọrạkha uttima ititikha k'isisek, oben bẹ́, "Amma nde ukhikhennạng, oseng yạn kw'asi ọphyaam-dema mva anạng-m o?"

11 Boaz ọpọhna bẹ́, "Abẹ kk'aam ijibha chidede ch'kk'asia anạng ọkka-ọmaan-udim kwọ akpaakha e. Tạma s'udim obobe ope, abin arik atte ọttạra akka, ottra anạng pọ, ọttạra ofhon kwọ, akwu aruk anạng p'nạnásong abẹ. 12 Tte Ọvaar Ubinọkpaabyi kw'anạng p'Israẹl, kw'kk'arạbha akwu ajena udiọ-ọ mororo."

13 Rut ọbẹ́, "Aro kwaam, tte ọphyaam f'nkhaam kakhọ ititikha ofona ororo ode pfaam. Kk'aam nttem afokha, abạra akpaakh-m itọhnga s'inạng-m ottembạr, oseng s'nạn mbenga k'ininga ch'atọhmnạng pọ p'ipanạng."

14 K'okpe kw'uchiattọhk chichi, Boaz oben-ẹ bẹ́, "Kwuna njakha. Mekhi brẹd bọhnga k'atwuk p'vinegar chi."

Masẹ Rut kk'ẹyạr uninga ọttạra atọhmnạng abẹ, Boaz ọnạng-ẹ agwu abhaabhapẹ, uchi ọdọhbh, apyẹ ẹbhạkhẹ ebek. 15 Okpe kw'ubin bẹ́, ọta usi ọtọhm, Boaz oben atọhmnạng pẹ bẹ́, "S'ọbạra udwung ukpira k'akhe, abạnga kẹ kásẹkhẹ. 16 Abạnga atera arengi acho bạnọ k'akhe anạng-ẹ, attiẹ-ẹ ọbọhk udwunga, abạnga kẹ káttạbhẹ."

17 Rut usi ọtọhm ma owonu ngwọ tạrr iwu ẹsa. Ọkhaan abarli-mạma p'kk'udwunga tạrr apyẹ n'irikhi sạsạkhẹ ifu ikhạrạbaang sididen. 18 Udira abarli-mạma mbọ ọkpa nnạm k'ọchọhm, ọta ọkhọhkha ọkka-ọmaan-udim. Rut ọbạra ọnạng-ẹ uchiattọhk f'wạra uchi urik s'kk'ọdọhbha.

19 Ọkka-ọmaan-udim ọbọbh-ẹ bẹ́, "Bạng ibyi rọ s'ayini chemma o? Asi ọtọhm mạn? Tte idia ede ch'ọnạng nwọ kw'ugiọ-ọ utum!" Ma wọ Rut ọkpaakhẹ ọkka-ọmaan-udim idik otena k'ujunung kw'usi ọtọhm kakhẹ k'ibyi, ọbẹ́, "Ujunung kw'nsi abẹ ọtọhm chemma, okpen Boaz."

20 Ma wọ Naomi obeni Rut bẹ́, "Tte Ọvaar Ubinọkpaabyi odo Boaz k'idik-jibh chẹ otena anạng p'atim arukhu akpen, ọttạra p'kk'apua. Ujunung nwọ ode uchinạng kwamạna, ọbạra ode ọkkaan-ichimma kwamạna."

21 Ma wọ Rut kw'ubin Moab obeni bẹ́, "Ujunung nwọ oter oben-m bẹ́ nninga atọhmnạng pẹ abẹ tạrr iphya isa."

22 Naomi oben Rut bẹ́, "Nnwa kwaam, ọbaan-ọbaana bẹ́ asi ọtọhm ọttạra atọhmnạng pẹ p'ipanạng, deja, de afon k'owonu kw'ọnạng ọdwạkh-ọdwạk, abẹ akke ma anạng-ọ ẹsẹkha."

23 Ma wọ Rut uning ọgbaara atọhmnạng p'Boaz p'ipanạng, usi ọtọhm ttạrr iphya s'abarli ọttạra s'awit isa. Ma okpe ngwọ phyibh, wa Rut urukhu ọkka-ọmaan-udim abẹ.Ọrasẹ-khira kw'okpen, wit