1 K'okpe kw'uwa asi-aponga adạbhẹ Israẹl, wa okwo fididen uning ma isisek nnọ. Ujunung wạnọ kw'ubin Bẹtẹlẹhẹm k'ẹkhạma ch'Juda, ubin ọttạra ikwanạng kwẹ, ọttạra ajunungva pẹ afa, abẹ ata aruk k'isisek s'Moab. 2 Ujunung nwọ okpen Ẹlimẹlẹk, ikwa okpena Naomi, ajunungva pẹ afa akpena Malọn ọttạra Kiliyọn. Wa abẹma phyibh ade ammaana p'Ẹphrat p'arukhu k'ofhon kw'Bẹtẹlẹhẹm k'ẹkhạma ch'Juda. Wa abẹ abin ata aruk k'Moab.

3 Ẹlimẹlẹk, kw'ode udim kw'Naomi ukwu ope, urik ẹma ọttạra ajunungva pẹ afa. 4 Ajunungva mbọ atạk ipanạng ma Moab. Ikwanạng wạnọ okpen Ọpa, nwọkha okpena Rut. Abẹ aruk maa, ukpira masẹ icho jobh 5 tạrr Malọn ọttạra Kiliyọn abạra ape, kw'usi Naomi dạkhẹ udim ọttạra iva kọ́khaam.

6 Okpe kw'Naomi uning k'Moab ọbhaanga bẹ́, Ọvaar Ubinọkpaabyi kk'ạnạng pẹ ọkkaana ọnạng bẹ uchiattọhk, Naomi ọttạra ipanạng p'iva pẹ ado ifor bẹ́, akpa nnạm abhạna. 7 Mạnna wọ kw'Naomi ubin ọttạra ipanạng p'iva pẹ afa, atạma osenga afona k'ẹkhạma ch'Juda.

8 Masẹ abẹ n'afona ma o, Naomi n'obeni ipanạng p'iva pẹ bẹ́, "Ọnạng-ọnạng, sọhng abhạna k'akka k'ọchọhm. Tte Ọvaar Ubinọkpaabyi usi bạnga ọphyaam, k'oche kw'abạnga kk'asia anạng apfuranạng pabạnga ọttạra amma. 9 Tte Ọvaar Ubinọkpaabyi ọnạng, ọnạng-ọnạng ẹyọhng-kwokha k'ọchọhm kw'udim kwẹ ọbhakwẹ."

Mạnna wọ kw'Naomi oseng ọbaakha bẹ, abẹ agạma k'ẹrạng-k'ẹrạng, 10 abẹ aben-ẹ bẹ́, "Mma e, amạna m'antwạn abọ amkpa nnạm antọr anạng pọ."

11 Ma o, Naomi ọbẹ́, "Iva paam, akpa nnạm abhạna kabạnga k'ofhon! Mbạng vọ abạnga m'asenga apfẹ ator-m o? Ma abạnga akkẹ bẹ́, s'm'mmaan ajunungva dạkhẹ p'm'akwu ade adim pabạnga o? 12 Iva paam o, akpa nnạm abhạna e. Amma kk'nttạma nyọhnga idimba. Ọbạra mba udim ma irungu, mmaan ajunungva, 13 abạnga s'm'aninga atik bẹ́, abẹ abạr o? Ma, abạnga bạra akpa abạngama oyeni idimba o? Mma e, iva paam. Akwẹ ọmma amma ọyọhnga abạnga ma e, ukwuru bẹ́, Ọvaar Ubinọkpaabyi kk'nnạm ọkpa ọvạr-m!"

14 Ma o, abẹ agạma adạkhẹ. Ọpa ọbaakha ọkka-ọmaan-udim kwẹ, ọkpa nnạm otor anạng pẹ. Okhenka, Rut ọkpạna bẹ́, ẹma m'ọtwạn Naomi abẹ.

15 Ma wọ Naomi obeni Rut bẹ́, "Kkeri oche kw'oyok-ọfhạbha kk'nnạm ọkpa k'anạng pẹ ọttạra k'akha pẹ. Ọma tor-ẹ abạnga akpa nnạm."

16 Rut ọpọhn-ẹ bẹ́, "Kaam kákwa bẹ́, mkpa nnạm. Ibyi sidede s'afon, ẹrọ m'mfona. Ibyi sidede s'ayim, erọ m'nyima. Ubinọkpaabyi kw'akpobh, ẹwọ m'mbạra mkpobha. 17 Ibyi s'apẹ, m'mpe ma, abẹ m'anọhng-m ma. Tte Ọvaar Ubinọkpaabyi ọnạng-m irem, k'oche kw'ọdaakh-ẹ, óde nạn obo mạnkeni núdia m'ọbhaangẹ amma ọma abẹ."

18 Okpe kw'Naomi osong bẹ́, Rut kk'ifor udia bẹ́, ọtwạn abẹ, uttiẹ-ẹ ọbọhk. 19 Ma o, abẹma ncho mfa asenga akpira k'Betẹlẹhẹm. Okpe kw'abẹ akpir k'Bẹtẹlẹhẹm, anạng p'ofhon ngwọ phyibh awur ẹmạng, ipanạng abạra abạbh bẹ́, "Naomi wọ ma yeri?"

20 Naomi oben bẹ bẹ́, "Abạnga kaam Naomi káyeri, ayer-m Mara*, ukwuru bẹ́, Ọvaar Ubinọkpaabyi kw'Ẹfa phyibh kk'akpen paam usia apyẹ ejobhu. 21 Mbin mama k'ọsaabh, Ọvaar Ubinọkpaabyi kk'aam utima ukwuna mbọhk-mbọhk. Abạnga m'asi yạn ayer-m, Naomi, s'Ọvaar Ubinọkpaabyi kw'Ẹfa phyibh kk'nnạm ọkpa ọvạr-m o?"

22 Ma wọ Naomi utim Rut kw'ubin Moab, kw'ọbạra ode ikwanạng kw'nnwa kwẹ, ubina k'Moab ọkpa nnạm k'Bẹtẹlẹhẹm k'okpe kw'iphya s'ọrasẹ-khira kw'okpen, barli.Abẹ asi iphya