Nnwẹr s'Akpaar-aponga 21

Anạng p’Israẹl anạngẹ ajunung p’Bẹnjamin ipanạng pabẹ k’ọbada

1 Wa ajunung p’Israẹl kk’echekha atạkha k’Mizpa bẹ́, "Amạna mba aminava pamạna mántạkha annạng ujunung wạnọ-wạnọ kw’ẹkhạma ch’Bẹnjamin k’ọbada."

2 Wa anạng mbọ afon kha Bẹtẹl, ata aninga ẹyạr k’ititikha s’Ọvaar Ubinọkpaabyi, n’agạma k’ottempyibh k’ẹrạng-k’ẹrạng tạrr, iwu ekhebha ma, ẹsa. 3 Abẹ agạm aben bẹ́, "Ọvaar Ubinọkpaabyi, kw’ode Ubinọkpaabyi kw’Israẹl, k’ayạn kw’udik demakwẹ ngwa otto Israẹl o? K’ayạn kw’n’ode bẹ́, ẹkhạma jạnẹ ch’Israẹl kk’idima k’amạna k’ikhaana o!"

4 K’ekpekpebha s’iwu echobh, anạng mbọ asi ijabyi rạnẹ s’abẹ aning asi nnạnga ikạmasẹ ọttạra nnạnga s’ẹmẹm.

5 Ma wọ anạng p’Israẹl abạbhọ bẹ́, "Bạng ẹkhạma ch’Israẹl k’amạna k’ngekha jọ ch’nạn mạna abẹ nétwạna k’okpe kw’wạra antobh k’ititikha s’Ọvaar Ubinọkpaabyi kha Mizpa?" N’ode s’abẹ kk’echekha atạkha bạra k’ititikha s’Ọvaar Ubinọkpaabyi bẹ́, ọnạng kwidede kw’ufhumu kwu-kwu, abẹ m’afhẹ-ẹ.

6 Wa anạng p’Israẹl akhaam ikwosi-ttem atena anạng p’ẹkhạma ch’Bẹnjamin, p’ade ivotte pabẹ, aben bẹ́, "Ẹkhạma jạnẹ k’nkhạma s’Israẹl kk’idima chemma e. 7 M’ansenga yạn annor ipanạng p’m’annạng ayok mbọ p’arikhi-urik, s’kk’echekha antạkha k’eche ch’Ọvaar Ubinọkpaabyi bẹ́, amạna bẹ aminava pamạna k’ọbaada mánnạng o?" 8 Ma wọ, abẹ n’abạbhọ bẹ́, "Bạng ẹkhạma ch’Israẹl jọ ch’nạn mạna abẹ nẹ́twạna k’okpe kw’antobh k’ititikha s’Ọvaar Ubinọkpaabyi kha Mizpa?" Wa abẹ akwu atin bẹ́, ọnạng wạnọ-wạnọ kw’ubin Jabẹsh-Gilead kw’ọta etobha njọ kòde. 9 Masẹ abẹ kk’anạng abhikha bẹ phyibh, abẹ akwu ase bẹ́, ọnạng wạnọ-wạnọ kw’ubin k’Jabẹsh Gilead kòde.

10 Ma wọ abẹ atọhmọ akkemkpa pabẹ, anạng nnọhna arạbh ukuma jobh k’Jabẹsh-Gilead, atọhn bẹ bẹ́, abẹ afhọ ọnạng kwidede, abạr-ọbạr asạkha-ọsạkha. 11 "Abẹ ben bẹ́,"Mama wọ ode udik kw’abạnga m’asi, abạnga m’afhọ ajunung phyibh ọttạra ikwanạng kwidede kw’kk’ujunung osonga." 12 Masẹ abẹ akpir k’Jabẹsh-Gilead, abẹ ase aminava ẹnọhna p’nạn ibyi s’ujunung tạm násonga, abẹ atima bẹ afona k’ibyibhingasẹ kha Shilo, k’ẹkhạma ch’Kenaan.

13 Wa anạng p’Israẹl atọhmọ ẹkkaabha ch’ẹmẹm akkena anạng p’arikhi k’ẹkhạma ch’Bẹnjamin p’uwa arukhu k’ẹtakpa ch’Rimọn. 14 Ma o, anạng p’ẹkhạma ch’Benjamin akpa nnạm abhạna k’abẹ k’ichọhm. Abẹ atạkha aminava mbọ ẹnọhna p’Jabesh-Gilead p’uwa abẹ n’náfha, anạng ajunung mbọ, aba. Okhenkha, wa aminava mbọ ajunung mbọ phyibh nágba.

15 Wa anạng mbọ akhaam ikwosi atena ẹkhạma ch’Bẹnjamin, ukwuru s’uwa Ọvaar Ubinọkpaabyi kk’ẹbhaangẹ ugia k’nkhạma s’Israẹl. 16 Osenga ma, adennạng p’etobha njọ n’abạbhọ bẹ́, "Masẹ abẹ kk’ipanạng p’ẹkhạma ch’Bẹnjamin afha phyibh, m’ansenga yạn annor ipanạng p’m’annạng ajunung p’arikh-urik o? 17 Ọbaan bẹ́ anạng p’ẹkhạma ch’Bẹnjamin akhaama iva p’m’atera echo ch’anạng p’arikh-urik, ọfha abẹ nạng ẹkhạma jạnẹ ch’Israẹl adimi. 18 Bẹ aminava pamạna k’ọbaada mánnạng, ukwuru echekha ch’amạna mba anạng p’Israẹl kk’antạkha bẹ́: ‘Tte ẹmma ẹraakhẹ ọnạng kwidede kw’ọnạngẹ ujunung kw’ẹkhạma ch’Bẹnjamin ikwanạng ọba.’ 19 Akker o, erobha ch’icho kw’Ọvaar Ubinọkpaabyi uning k’Shilo, kw’uning k’ibira-ibira kw’Bẹtẹl, k’ukhubha kw’okpebhadudon n’uyin, kha eden ch’eten k’Bẹtẹl ọttạra k’Shẹkẹm, ọttạra k’ẹrạkha-ẹrạkha kw’Lẹbona."

20 Wa abẹ anạngẹ anạng p’ẹkhạma ch’Bẹnjamin ntọhna aben bẹ́, "Abạnga asọhng ata attubha k’iwonu s’grep 21 atik. Masẹ aminava p’Shilo m’ayin kha bẹ́, abẹ akwu attạra k’ọkhaana kw’utubha, tte ọnạng-ọnạng onemi eden uyin k’iwonu s’grep, ukwu ọvạkha uminanwa wạnọ kw’m’utima usi ikwanạng kwẹ. Abạnga akpa nnạm abhạna k’ẹkhạma ch’Bẹnjamin. 22 Ode ab’otte ọttạra iv’otte pabẹ ajọhmọ bạnga anạngẹ mạna, m’antek bẹ bẹ́, ‘Abạng asi mạna ọphyaam akkaana bẹ, ukwuru bẹ́, wa bẹ ipanạng nánnạnga k’okpe kw’ekpong. Abạnga oponga-pyibh kw’echekha ttạtto mákhaama, ukwuru s’uwa abạnga nạn bẹ aminava pabạnga nánạnga."

23 Mạnna wọ wa ajunung p’Bẹjamin asi. Masẹ aminava mbọ n’atubh ibin, ujunung kwidede ọvạk uminanwa wạnọ utima usi ikwanạng kwẹ. Wa abẹ akpa nnạm abhạna k’isisek s’ide okhebh pfabẹ, abẹ bạra ado ifhon sabẹ, aruk mạma.

24 Ma okpe ngwọ, anạng p’Israẹl ayaangẹ ibyi nnọ ajẹ, abhạna kha nkhạma, ọttạra kha innạmma sabẹ, ọnạng-ọnạng k’okhebh pfẹ.

25 Wa anạng p’Israẹl ọvaarnạng ma okpe ngwọ kàkhaam, ọnạng kwidede urukhu akpen k’oche kw’ọdaakh-ẹ.