1 Wa itọhmọ s'Ọvaar Ubinọkpaabyi ibin kha Gilgal, ifona kha Bokim, iben bẹ́, "Amma ntim bạnga mbina k'Ijip, ntima bạnga mfona k'isisek s'uwa nchekhi bẹ́, m'nnạng ab'atte. Mben bẹ́, ‘Amma echekha ch'nkhaam bạnga abẹ mạ́nvọhkhọ. 2 Abạnga echekha kátạkha ọttạra anạng p'arukhu ma isisek nna. Ọkhenka, ọbaan bẹ abạnga avọhkhọ ijabyi sabẹ.’ Tạrr oseng ma, wa abạnga ntọhna saam nátạkha. Abạnga asi yạn asi oche ngwọ? 3 Ma o, amma kk'bạnga mbena bẹ́, ‘Amma anạng mbọ k'abạnga k'ititikha mạ́nkhubh; abẹ m'ade masẹ amma-aruapẹ anạng bạnga, ikha sabẹ m'ibạra ide masẹ oma kw'ọgbạr ọnạng bạnga.’ "

4 Masẹ itọhmọ s'Ọvaar Ubinọkpaabyi kk'anạng p'Israẹl idik nnọ ikpaakha phyibh, anạng mbọ agạma ẹmạng k'ẹrạng-k'ẹrạng. 5 Wa abẹ ayeri ibyi nnọ Bokim*. Abẹ afọhnọ nja ma ibyi nnọ anạng Ọvaar Ubinọkpaabyi.

6 K'okpe kw'Joshua kk'anạng p'Israẹl obena bẹ́ abẹ abhạna, ọnạng kwidede ọbhạna, ọta ọtạkha isisek s'ide okhebh pfẹ. 7 K'akpen p'Joshua phyibh, ọttạra k'okpe kw'uwa adennạng p'uwa arukhu akpen s'Joshua kk'upua, p'abạra ase udik kwidede kw'Ọvaar Ubinọkpaabyi kk'usia ọnạng anạng p'Israẹl, wa anạng p'Israẹl akpobh Ọvaar Ubinọkpaabyi.

8 Wa Joshua kw'ode nnwa kw'Nun, kw'ọbạra ode ọtọhmnạng kw'Ọvaar Ubinọkpaabyi, ope s'ode icho arạbh asen ukuma jobh. 9 Wa abẹ anọhng-ẹ k'isisek s'ide okhebh pfẹ, k'Timnat-Sẹra, k'ukhubha kw'efhondiden ch'okpecho kw'Ephraim, k'ibira-ibira kw'okpecho kw'Gaash.

10 K'okpe kw'ọgbọ mvọ phyibh kk'upua otor ab'otte, ọgbọ ọdwạkh-ọdwạk, f'nạn Ọvaar Ubinọkpaabyi osong, ọttạra idik s'kk'usia ọnạng anạng p'Israẹl, n'ukwu ọmmaana. 11 Wa anạng p'Israẹl asi ibyibyia-dik k'ititikha s'Ọvaar Ubinọkpaabyi, abẹ n'akpobha ikha s'Baal. 12 Abẹ akpa nnạm avạra Ọvaar Ubinọkpaabyi, kw'ode Ubinọkpaabyi kw'ab'otte, kw'uwa utim bẹ ubina k'Ijip. Abẹ n'attạra ayok-ọbaanga akpobha ikha sabẹ. Abẹ agbikhi idwạdwạkhọ s'Ọvaar Ubinọkpaabyi, 13 ukwuru bẹ́, abẹ akpa nnạm avạra Ọvaar Ubinọkpaabyi, n'akpobha ikha s'Baal ọttạra s'Ashtọrẹt. 14 Wa Ọvaar Ubinọkpaabyi oseng k'idwạdwạkhọ, otte anạng p'Israẹl ọbọhk ọnạng awawuna-nạng akhema bẹ. Okpe bẹ ọnạng awawuna-nạng abaabha bẹ age ngekha, p'abẹma oyeni nạn adạkhẹ bẹ nákkia akhubh. 15 Okpe kwidede kw'anạng p'Israẹl ata ekpong, Ọvaar Ubinọkpaabyi n'otte anạng p'Israẹl ọbọhk, ayok akhema bẹ, otor k'echekha ch'kk'ọtạkha. Wa anạng p'Israẹl n'aning k'dạma-dạma kwididen.

16 Wa Ọvaar Ubinọkpaabyi ọnạngẹ anạng p'Israẹl akpaar-aponga, p'akkaan arạbha bẹ k'mbọhk s'anạng p'achi bẹ k'ekpong. 17 Tạrr oseng ma, wa anạng mbọ akpaar-aponga pabẹ itọhng nákhọhma. Okhenkha, abẹ n'asenga akpaanga k'ikha s'anạng mbọ masẹ asaasa, n'akpobha sẹ. Wa anạng p'Israẹl agim-ugim akpa nnạm avạra immaana-dik s'abotte, p'uwa asạk echo anạng akpebhi p'Ọvaar Ubinọkpaabyi. 18 K'okpe kwidede kw'Ọvaar Ubinọkpaabyi usi ọnạng ọkpaar-aponga, n'uninga ọkpaar-aponga nwọ abẹ, ọkkaana ọrạbha bẹ k'mbọhk s'awawuna-nạng pabẹ tạrr, ukpira k'ebowu ch'ọkpaar-aponga nwọ. Wa Ọvaar Ubinọkpaabyi ọyaang idwạdwạkhọ sẹ ọjẹ, ukwuru ẹmạng ch'anạng p'Israẹl agạm k'irem s'awawuna-nang pabẹ n'anạng bẹ. 19 Okhenkha, ode ọkpaar-aponga nwọ ope, anạng p'Israẹl m'akpa adạkhẹ nnạm k'ẹmmaana ch'ipyibhi ẹyọhnga ch'ab'otte pabẹ, ata akpobha ikha, abạra atwunga echo anạng sẹ. Wa abẹ ifor nádia bẹ́, akpa nnạm avạra abyibyia-kpen ọttạra ochokpọhkhọ kwabẹ.

20 Ma wọ Ọvaar Ubinọkpaabyi ọdwạkhẹ mororo otena anạng p'Israẹl, oben bẹ́, "Ukwuru s'ẹkhạma nja kk'echekha ch'kk'ndia nnạng ab'otte avọhkha, ọttạra s'abẹ nạn itọhng nákhọhma anạng-m, 21 amma dạkhẹ idifhon s'Joshua ope urik s'ining bẹ k'ititikha mạ́mbuk. 22 Amma m'ntima idifhon nnọ nnyoma anạng p'Israẹl, ọfha nse de abẹ m'akke-okke aruk ator k'eden ch'Ọvaar Ubinọkpaabyi, k'oche kw'uwa ab'otte arukhu." 23 Wa Ọvaar Ubinọkpaabyi otte idifhon nnọ ọbọhk ininga, sẹ okpe gwạnọ núbukha, s'uwa nạn sẹ ọbọhk núttia ọnạng Joshua.