1 Wa anạng p'Israẹl abạra asi ibyibyia-dik k'ititikha s'Ọvaar Ubinọkpaabyi, Ubinọkpaabyi otte bẹ ọbọhk ọnạng anạng p'ẹkhạma ch'Midiyan, k'icho isenọfa. 2 Masẹ wa anạng p'Midiyan akhaam ẹfa ayọhnga anạng p'Israẹl, anạng p'Israẹl abin ata asi ibyirukhasẹ sabẹ k'akpecho k'ẹrạng, ọttạra k'atakpamma, ọttạra k'ibyi s'ittubh-uttubha. 3 Okpe kw'idede kw'anạng p'Israẹl atubhu iwonu sabẹ, anạng p'ẹkhạma ch'Midiyan, ọttạra ch'Amalẹk, ọttạra anạng p'nkhạma s'irukhu k'ukhubha kw'okpebha-dudon, n'afona ata arima anạng p'Israẹl abẹ. 4 Anạng mbọ n'abhing mạma akhibhi bẹ iwonu tạrr, akpira Gaza, abẹ anạng p'Israẹl ọttọhk vạnọ-vạnọ f'urukhu akpen, ọbạra ode arạkhạmaan, ọbạra ode ẹbhaam, tạrr oseng k'ẹnyạnyaang, nárikha. 5 Wa abẹ abin attạra itirakpo pyabẹ, ọttạra akkira pyabẹ k'ọsaabh masẹ agwurubhebhe. Wa abẹ ajunung ọttạra akamẹl pyabẹ kákkẹ abhik; abẹ achi ẹkhạma njọ, abạra akhibhi ọttọhk f'idede f'uning mạma. 6 Anạng p'ẹkhạma ch'Midiyan achokhu anạng p'Israẹl k'irem s'okwo tạrr, anạng p'Israẹl agạma ẹkkaana anạng Ọvaar Ubinọkpaabyi.

7 K'okpe kw'anạng p'Israẹl agạm ẹkkaana anạng Ọvaar Ubinọkpaabyi, ukwuru irem s'anạng p'Midiyan achokhu bẹ, 8 ọtọhmọ usi-ẹyaakha ọnạng bẹ, kw'obeni bẹ́, "Mama wọ ode udik kw'Ọvaar Ubinọkpaabyi, kw'ode Ubinọkpaabyi kw'Israẹl obeni, bẹ́: Amma ntima bạnga mbina K'Ijip k'ẹkhạma njọ ch'abạnga aning k'irem. 9 Amma nnengi bạnga k'mbọhk s'anạng p'Ijip, ọttạra k'mbọhk s'anạng phyibh p'achokhu bạnga k'irem, mbạra mbuk bẹ k'ititikha sabạnga, mmạkhẹ ntạkha isisek sabẹ nnạng bạnga. 10 Mbeni bạnga bẹ́, ‘Amma wọ nde Ọvaar Ubinọkpaabyi, kw'ode Ubinọkpaabyi kwabạnga; abạnga ikha s'anạng p'Amọr p'abạnga arukhu k'isisek sabẹ kákpobha.’ Okhenkha, abạnga khaam nábhaanga."

11 Wa, k'iwu jạnẹ, itọhmọ s'Ọvaar Ubinọkpaabyi ibin kha ikwu ikpira k'ofhon kw'Ọphra, ọta uninga ẹyạr k'ichi-rin ch'oak ch'Joash kw'ubin Abiez ọkhaam, k'ibyi s'nnwa kw'Gideọn n'uninga okhok agwu, k'ibyi s'abẹ n'amyạna achidwuk, ọfha anạng p'Midiyan nạngẹ bẹ ase. 12 Masẹ itọhmọ s'Ọvaar Ubinọkpaabyi iyini ikhebha Gideọn, oben bẹ́, "Ọvaar Ubinọkpaabyi uning abọ, ọma urim-ekpong kwididen."

13 Okhenkha, Gideọn ubhin bẹ́, "Ode Ọvaar Ubinọkpaabyi uning mạna abẹ, ode yạn kw'idik nna phyibh n'itto ikhebha mạna o? Ikkukkona-dik sẹ phyibh s'uwa ab'otte pamạna n'akpaak atenẹ-ẹ, aben bẹ́, ‘Wa Ọvaar Ubinọkpaabyi mạna nútima ubina k'Ijip o?’. Okhenkha, mantọhmma Ọvaar Ubinọkpaabyi k'nnạm ọkpa ọvạra mạna, ọbạra ọtạkha mạna oge k'mbọhk s'anạng p'Midiyan."

14 Ọvaar Ubinọkpaabyi ọbhạkhẹ okkeri, oben bẹ́, "Ọma sọhng, ata atima ẹfa ch'akhaam akkaana anạng p'Israẹl k'mbọhk s'anạng p'Midiyan. Amma k'akhaam k'oyeni k'ifor wọ ntọhm-ọ."

15 Okhenkha, Gideọn ọbạbhọ bẹ́, "Aro, amma m'nsenga yạn nkkaana anạng p'Israẹl o? Efonamma chaam ẹjọ ẹsạk ọtạm k'ẹkhạma ch'Manasẹ. Amma wọ mbạra nsạkha ọtạm k'ẹchọhmfạr ch'otte kwaam."

16 Ọvaar Ubinọkpaabyi ubhina bẹ́, "Amma m'nninga abọ, ọma m'abạra afhọ anạng p'Midiyan phyibh aben bẹ́ afhọ ọnạng wạnọ."

17 Gideọn n'ubhin bẹ́, "Ode amma kk'ọphyaam nkhaama k'akhọ k'ititikha, ọma m'anạng-m ẹkhọhkha ch'amma m'ntima nsonga bẹ́ k'udik-ọkka, ọma wọ n'akpaak abamẹ. 18 Totokhạn, ninga mama tikh-m, ttạr mkpa nnạm ẹnạnga chaam achẹ, nkwu njẹ k'akhọ k'ititikha."

Ma wọ Ọvaar Ubinọkpaabyi obeni bẹ́, "Amma m'nninga ntikh-ọ tạrr akpa nnạm."

19 Mạnna wọ Gideọn ofon ọta ọtạkha uvu-nwa ọfhọ, utima usi uchiattọhk, ọbạra ọtạkha abubuma k'ọgbanggbang, utima usi brẹd kw'abẹ n'nạn yist nágia. Ọtạkha uchiattọhk mvọ f'oge k'ikhạrạbaang, ọttạra nten nnọ s'ining k'isọhkha, ọtạkha ọta ober-ẹ ma k'ichirin ch'oak.

20 Itọhmọ s'Ubinọkpaabyi iben-ẹ bẹ́, "Tạkha nten nnọ ọttạra brẹd nwọ kw'abẹ nạn yist nágia nạna k'ẹtakpa nja, atạkha asi p'nten nnọ afona ma k'ẹrạng." Ma wọ Gideọn usi oche ngwọ. 21 Itọhmọ s'Ọvaar Ubinọkpaabyi itim ironẹmma kw'uchikwura kw'itim k'akhẹ k'ọbọhk, utwu nten nnọ ọttạra brẹd kw'abẹ nạn yist nágia. Ekpon iyin ma k'ẹtakpa ichi nten nnọ ọttạra brẹd nwọ. Ma wọ itọhmọ s'Ọvaar Ubinọkpaabyi idạkhẹ idimi. 22 Masẹ Gideọn n'osong bẹ́, itọhmọ s'Ọvaar Ubinọkpaabyi rọ, ọwạmọ oben bẹ́, "O Ọvaar Ubinọkpaabyi kw'Ọyọhng! Amma kk'itọhmọ s'Ọvaar Ubinọkpaabyi ititikha ọttạra ititikha nsia e!"

23 Okhenkha, Ọvaar Ubinọkpaabyi oben-ẹ bẹ́, " Tte ẹmẹm ininga abọ! Nạng-ọ ojor, khiri mápe."

24 Osenga ma, Gideọn usi ijabyi mạma, ọnạng Ọvaar Ubinọkpaabyi, oyeri sẹ, Ọvaar Ubinọkpaabyi Wọ Ode Ẹmẹm. Tạrr ukpira k'iwu ch'chemma, ijabyi nnọ ibe k'ofhon kw'Ọphra, k'ẹkhạma ch'Abiẹz.

25 Ma irunguwu njọ jạnẹ, Ọvaar Ubinọkpaabyi obeni Gideọn bẹ́, "Tạkha ẹbhaam-dim ch'ẹkhaam ẹfa ch'ettong afa k'itirakpo py'atte, ch'ede icho isenọfa. Atima anunu ijabyi nnọ s'atte n'uninga okpobha Baal, abạra akpaara mkpọmmachi s'Ashẹra s'ibe ibaanga sẹ, ajẹ. 26 Asi ijabyi ikkasẹ k'okpecho k'ẹrạng ọttạra nta, anạng amma Ọvaar Ubinọkpaabyi, kw'ode Ubinọkpaabyi kwọ. Tạkha mkpọmmachi nnọ s'Ashẹra s'akpaar, ọttạra ẹbhaam-dim njọ ch'ettong mfa, asi ẹja-ẹkkạmachẹ."

27 Mạnna wọ Gideọn ọtạk atọhmnạng pẹ ncho jobh, ofona ọta usi oche kw'Ọvaar Ubinọkpaabyi ọkpaakh-ẹ. Okhenkha, ukwuru ojora f'ọkhaam otena k'anạng p'ẹchọhmfạr chẹ, ọttạra k'ajunung p'ofon kw'Ọphra, usi ijabyi nnọ k'irungu, s'wạra ọbaan bẹ́ usi k'ẹya.

28 Masẹ ajunung p'ofon ngwọ aphyạbh k'ekpebha, abẹ n'akwu ase bẹ́, ijabyi s'Baal kk'ikhibha, ẹkpọmmachi ch'Ashẹra ch'ebe ẹbaanga sẹ ẹbạra ẹkpaara, abẹ atima adạkhẹ ẹbhaam-dim ch'ettong mfa afọhnọ ẹja ma ijabyi nnọ ibhasẹ.

29 Abẹ abhạkhẹ abạbh ayok bẹ́, "Anẹ wọ usi udik ngwa?"

Masẹ abẹ atạk okpe adwạn udik ngwọ, abẹ akpaak bẹ bẹ́, "Gideọn kw'ode nnwa kw'Joash ẹwọ usi kwẹ e."

30 Ma wọ ajunung p'ofhon ngwọ afon ata aben Joash bẹ́, "Tima ujunungnwa kwọ ayin kha iyaan. Ẹma ọbaan bẹ́ ope, ukwuru bẹ́, ẹma k'ijabyi s'Baal ọvọhkha, ọbạra ọkpaara ẹkpọmmachi ch'Ashẹra ch'ebe ẹbaanga sẹ."

31 Okhenkha, Joash ubhin oyokhanạng-saabha nwọ kw'ubuẹ-ẹ idumsẹ, kw'ọbaabh-ẹ oge ngekha bẹ́, "Abạnga bạra arima irima anạng Baal o? Abạnga n'akhonga bẹ́ abạnga akkaan-ẹ sa? Ọnạng kwidede kw'urim irima ọnạng Baal ọbaan bẹ́ abẹ afhẹ-ẹ k'ekpebha! De Baal ọkhaam ẹfa k'udik-ọkka, tte urima irima chẹ oyeni k'okpe kw'ọnạng ọvọhkhọ ijabyi sẹ kadẹ." 32 Ma o, ma iwu njọ, abẹ n'ayeri Gideọn "Jerub-Baal," aben bẹ́, "Tte Baal urima abẹ," ukwuru s'ọvọhkhọ ijabyi s'Baal.

33 Ma okpe ngwọ, wa ẹkhạma ch'Midiyan, ọttạra ch'Amalẹk, ọttạra nkhạma idwạk-ọdwạk s'irukhu k'ukhubha kw'okpebha-dudon, abẹ afhunu ẹfa ajekha ọraanga kw'Jọrdan, ata abhing kha ipekhuma s'Jẹzrẹl. 34 Ma wọ ọkpaakpa s'Ọvaar Ubinọkpaabyi isạk, inwa Gideọn, oge ẹsa utima oyeri anạng p'Abiez bẹ́, abẹ atwạn abẹ. 35 Ọtọhm atek-nkkaabha k'ẹkhạma ch'Manasẹ phyibh bẹ́, abẹ atima ekpongkpo akwu, ọbạra ọtọhm okkena ẹkhạma ch'Ashẹr, ọttạra ch'Zebulun, ọttạra ch'Naphtali, ọfha abẹ ma attạra avura akhebha bẹ kha.

36 Gideọn o, n'obeni Ọvaar Ubinọkpaabyi bẹ́, "De ọdaakh-ọ bẹ́, asenga k'akhaam k'mbọhk akkaana anạng p'Israẹl k'oche kw'kk'achekha, 37 kkere e, amma m'ntạkha otenkpa kw'ivu nyaan k'ibyi s'abẹ n'akhaan agwu. Ode ipọhrọ itebhi ma k'ottenkpa nwọ mạnkkeni, asẹ k'isek nítebha, amma m'ntima mạma nsonga bẹ́, k'udik-ọkka, ọma m'asenga k'mbọhk saam akkaana anạng p'Israẹl k'oche kw'akpaakhẹ." 38 Oche ngwọ gwọ kw'akwẹ ode. Gideọn ọphyạbh k'ekpebha k'iwu ch'echobh; ọmyạna otenkpa nwọ, asi ayin p'afhu okpobhu-mbọhk.

39 Ma wọ Gideọn obeni Ubinọkpaabyi bẹ́, "Nạng-ọ ọdwạkhọ amma abẹ. Tte amma mbạra mphyem okpe ngwa gwạnọ. Tte-m ọbọhk ma okpe ngwa nsi adạkhẹ eyoma ọttạra otenkpa nwa. Ẹkpa nja, ọma m'asi otenkpa nwọ ugwu-ugwu, ipọhrọ ibubha k'isisek mạnkkeni, irik otenkpa. 40 Ma irungu njọ, Ubinọkpaabyi usi oche ngwọ. Otenkpa mạnkkeni wọ ugwu-ugwu, ipọhrọ ibubha isisek phyibh.