1 Wa Sọlọmọn oseng iyok ọttạra ọvaar Phero kw'Ijip, osenga ma ọtạkha nnwa kw'Phero k'ọbada. Utim-ẹ ukwuna k'Efhondiden ch'Devid tạrr, okkera ọtọhm f'ọvaarchọhm, ọttạra Ọchọhm kw'Ọvaar Ubinọkpaabyi, ọttạra ọbaakha kw'ọbaabh Jẹrusalẹm sisi. 2 Wa anạng mbọ n'afọhnọ nja k'ijabyi s'ikpukpobha k'ọyaankpa, ukwuru s'uwa abẹ nạn Ọchọhm kw'eche ch'Ọvaar Ubinọkpaabyi tạm násia. 3 Sọlọmọn ọkhọhk idạdaakha sẹ s'Ọvaar Ubinọkpaabyi, uruk akpen otor k'ntọhna s'otte Devid ọnạng-ẹ, kw'oyongu bẹ́, wa ẹma ọfọhnọ nja, ọbạra ọkkạmọ insẹns k'ọyaankpa k'ijabyi s'ikpukpobha.

4 Wa ọvaarnạng n'ọta ọfọhnọ nja k'Gibeọn, ukwuru bẹ́, ma wọ wa ode ijabyi s'ikpukpobha s'ibạrẹ udik ọtạm. Wa Sọlọmọn ọnạngẹ nnạnga ikkạmasẹ nnọhna mfa ukuma arạbh jobh, ma ijabyi nnọ s'ikpukpobha. 5 Ọvaar Ubinọkpaabyi uyin Sọlọmọn abẹ k'irungu k'idachen k'Gibeọn. Ubinọkpaabyi oben bẹ́, "Phyem ọttọhk fidede f'aroru bẹ́, nnạng-ọ."

6 Sọlọmọn ubhina bẹ́, "Ọma kk'ijibha-bạrada asia anạng otte kwaam Devid, kw'ode ọtọhmnạng kwọ, ukwuru s'uwa ẹma ophye nnạm ka akhọ, ọbạra otor-otor, ọkhaama ettem ọkkachẹ. Ọma afon ororo asi ijibha-bạrada nja anạng-ẹ, anạng-ẹ ujunungnwa bẹ́, ọtạkha ẹvaar chẹ tạrr ukpira maa.

7 "Chemma, o Ọvạar Ubinọkpaabyi, kw'ode Ubinọkpaabyi kwaam, ọma kk'amma ọtọhmnạng kwọ, ọvaarnạng asia bẹ́, ntera echo ch'otte kwaam Devid. Okhenka, amma ntim nde nnwannwa, amma oche kw'm'nsi itọhmbọhk saam kạ́nsong. 8 Amma ọtọhmnạng kwọ nning k'ngekha s'anạng p'kk'atekha, anạng-bạrada p'asaabhẹ ayọhnga oche kw'ọnạng nạmókke ubhik. 9 Ma o, nạng amma ọtọhmnạng kwọ ekkoji k'ettem ch'm'ntima ndạbh anạng pọ. Mbạra ntima chẹ nkhọhkha odenkhạmọ k'udik kw'otor-otor, ọttạra ipina. Ọnạng kw'm'okke anạng-bạrada mba pọ ọdạbh kòde e."

10 Wa Ọvaar Ubinọkpaabyi orebhi ettem Sọlọmọn abẹ k'udik kw'kk'ophyema. 11 Mạnna wọ kw'Ọvaar Ubinọkpaabyi oben-ẹ bẹ́, "Mase ọma ayaang akpen p'adum-udum, ọttạra ẹkhaama, ọttạra obo kw'awawuna-nạng pọ ajẹ, akwu aphyem ekkoji ch'm'atima asi iponga ikkasẹ, 12 amma m'nnạng-ọ f'aphyemi ọnạng. M'nnạng-ọ ettem ch'ekkoji, ọttạra esonga, tạrr ukpira k'oche kw'ode bẹ́, ọnạng kòde kw'uwa kk'udia masẹ akhọ, ọnạng mọ́bạra uninga kw'm'ode masẹ akhọ. 13 Oyongu ma, amma m'nnạng-ọ f'aphyemi, ọttạra ẹkhaama, ọttạra abạrada, ọfha ode bẹ́, k'akpen pọ phyibh, ọvaarnạng kw'm'obenga abọ kòde. 14 De asạk echo anạng-m, abạra achok akpebhi ọttạra nnyina saam oche kw'uwa atte Devid ochokhu, amma m'nnạng-ọ akpen p'adum-udum." 15 Sọlọmọn ogbe ọphyạbha, ukwu osonga bẹ́, idachen rọ.

Ọkpa nnạm k'Jẹrusalẹm, ọta obe k'ititikha s'Ikwukwur s'Echekha ch'Ọvaar Ubinọkpaabyi, ọfọhnọ nja s'nnạnga ikkạmasẹ, ọttạra s'nnạnga s'ẹmẹm. Ukwu usi adạkhẹ erobha ọnạng atọhmnạng pẹ phyibh.

16 Wa asaasa afa ayini akwu abe ọvaarnạng k'ititikha. 17 Oyok wạnọ oben bẹ́, "Attitte kwaam, totokhạn, ikwanạng nnwa ọttạra amma annukhu ọchọhm gwạnọ. Amma mmaanẹ nnwa k'okpe kw'uning abaamẹ ma ọchọhm. 18 Ukwu ukpira iwu ittaan s'mmaanẹ nnwa kwaam, ikwanạng nnwa ọbạra ọmaan nnwa. Amạna mba anạng afa mạnkkeni bọ anning k'ọchọhm, ọnạng ọdwạkh-ọdwạk kw'uning ma ọttạra mạna kòde.

19 "Ikwanạng nnwa uyim ọkpẹkhẹ nnwa kwẹ k'irungu, nnwa kwẹ ope. 20 Ma wọ ọphyạbh ma irungu, udira nnwa kwaam kw'uyim ọbaakh-m s'n'nttaabha ọda. Ọtạkha nnwa kwaam ururu k'ẹba, ọtạkha upfura-nwa kwẹ ururu-m k'ẹba. 21 Masẹ iwu echobh, mbina bẹ́, nnạk nnwa kwaam, n'nse bẹ́, kk'upua. Masẹ ndi-ẹ utum nge k'ekpebha, nkwu nse bẹ́ nnwa kw'mmaanẹ sạ́ng ma."

22 Ikwanạng nwọkha oben bẹ́, "Mma aro! Nwọ kw'urukhu akpen wọ ode kwaam, ubukhu ode kwọ."

Okhenka, ocheden-kwanạng ofona ororo oben bẹ́, "Mma! Ubukhu ode kwọ, kw'urukhu akpen ode kwaam ro." Ma wọ abẹ asi ẹkhaanga ma ititikha s'ọvaarnạng.

23 Ọvaarnạng oben bẹ́, "Oyok nnwa ọbẹ, ‘Kw'urukhu akpen ode kwaam, ubukhu ode kwọ.’ Oyok nwọkha ọbẹ́, ‘Mma aro! Ubukhu ode kwọ, kw'urukhu akpen ode kwaam.’ "

24 Ma wọ ọvaarnạng obeni bẹ́, "Abạnga anạng-m ọkkangkkang-kkro." 25 Ọvaarnạng ọnạng ẹfa bẹ́, "Akhebh nnwa kw'urukhu akpen akpokha afa, atạkha ikpokha anạng oyok wạnọ, abạra atạkha ikpokha anạng oyok nwọkha."

26 Ikwanạng kw'ọkhaam nnwa kw'urukhu akpen osenga k'idạdaakha s'ọkhaam nnwa kwẹ abẹ, uchini ọvaarnạng oben bẹ́, "Attitte kwaam, totokhạn, nạng-ẹ nnwa kw'urukhu akpen! Kẹ káfhọ!"

Okhenka, ikwanạng nwọkha oben bẹ́, "Ọnạng kw'm'ọkhaam-ẹ k'ikhaana samạna mba anạng afa kòde. Khebh-ẹ ibyi ifa!"

27 Ma wọ ọvaarnạng ọkpaar iponga oben bẹ́, "Anạng ocheden-kwanạng nnwa kw'urukhu akpen. Abạnga kẹ káfhọ, khiri ẹma wọ ode ọkka."

28 Okpe kw'anạng p'Israẹl phyibh n'abhaang iponga nnọ s'ọvaarnạng ọkpaar, ọvaarnạng n'ojor bẹ ojora, ukwuru sabẹ ase bẹ́, utim ekkoji ch'Ubinọkpaabyi usi iponga s'itor-otor.