1 Ma okpe ngwọ, Ahija kw'ode ujunungnwa kw'Jẹroboam otto ọkhạmana. 2 Jẹroboam ukwu oben ikwanạng kwẹ bẹ́, "Sọhng ata afhona ifor sọ , ọfha anạng nạng-ọ atini masẹ ikwanạng kw'amma Jẹroboam. De kk'asia oche ngwọ, asọhng afona kha Shilo, k'ibyi s'Ahija kw'ode usi-ẹyaakha uning, kw'uwa ọkpaakh-m bẹ́, amma m'ndạbh anạng mba. 3 Tạkha abrẹd-dwuk jobh, ọttạra igbugbo, ọttạra k'igbạre s'ọkhọhn, atima ata asẹ-ẹ. Ẹma m'ọkpaakh-ọ udik ọkpaak kw'm'uyin udikkobh-nwa nwọ." 4 Wa ikwanạng kw'Jẹroboam usi oche kw'udim oben-ẹ, ukwu ofona k'ọchọhm kw'Ahija kha Shilo. Wa ma okpe ngwọ, Ahija dạkhẹ iyaan kidaam kạnóse, ukwuru s'kk'ọtạma. 5 Okhenka, Ọvaar Ubinọkpaabyi kk'Ahija ọkpaakha bẹ́, "Ikwanạng kw'Jẹroboam ukwuma ukwu ọbạbh-ọ udik otena k'ọkhạmana f'nnwa kwẹ. Ọma kpaakh-ẹ udik kw'mkpaakh-ọ. De ukpir maa, m'usi nkkari bẹ́, ode ọnạng ọdwạkh-ọdwạk."

6 Masẹ Ahija ọbhaang ntwạkhọ sẹ k'ọmmakhubh, oben bẹ́, "Ikwanạng kw'Jẹroboam kwu kha ẹtaanga, nkkari nnọ, sa mbạng nọ o? Abẹ anạng-m ẹkkaabha-tạma bẹ́ mkpaakh-ọ. 7 Sọhng ata akpaak Jẹroboam bẹ́ maa wọ ode udik kw'Ọvaar Ubinọkpaabyi, kw'ode Ubinọkpaabyi kw'Israẹl ọkpaakhẹ: ‘Wa amma ntekh-ọ k'ikhaana s'anạng mbọ, nsi-ọ ọdạbhẹ kw'anạng paam Israẹl. 8 Ntạk ofhon ngwọ k'ẹchọhmfhạr ch'Devid nnạng-ọ. Okhenka, ọma nádia masẹ ọtọhmnạng kwaam Devid, kw'ochokhu nnyina saam, ọbạra utima ettem phyibh ọtwạn abamẹ, usi idik s'itor-otor mạnkkeni k'ititikha saam. 9 Ọma kk'ipyibha asia ch'ẹyọhng ch'anạng phyibh p'kk'ọ eden achia aruk. Ọma kk'akha asia anạng ọma oyeni; atima agbikhi idwạdwạkhọ saam, abạra akpa nnạm avạr-m.

10 " ‘Ukwuru udik ngwa, amma m'ntte ipyibha ọbọhk ikhebha ẹchọhmfhạr ch'ọma Jẹroboam. Amma m'ndimi akpen p'akponga-nnạm-va p'ujunung kwidede kw'Jẹroboam k'Israẹl, ode ubira, ubira núdia. Amma m'nkkạmọ ẹchọhmfhạr ch'Jẹroboam phyibh masẹ ọnạng ọkkạmọ abhera, tạrr apyẹ ẹsa phyibh. 11 Mpfa rọ m'ichi apfura p'anạng p'Jẹroboam, p'm'ape k'efhondiden, ọnọhn f'ẹrạng m'uchi apfura p'ayok p'm'ape ma ẹkhạma njọ. Ọvaar Ubinọkpaabyi kk'ọkpaakha!’

12 "Ọma sọhng abhạna. De akpir k'ẹfhondiden bẹ́ gwọọ, udikkobh-nwa nwọ m'opope. 13 Anạng p'Israẹl phyibh m'agạm-ẹ, abạra annọhng-ẹ. Ẹma mạnkkeni wọ ode nnwa kw'Jẹroboam kw'm'ọkhaama epekwur, ukwuru bẹ́, ẹma mạnkkeni wọ ubin k'ẹchọhmfhạr ch'Jẹroboam kw'Ọvaar Ubinọkpaabyi, kw'ode Ubinọkpaabyi kw'Israẹl kk'udik kw'ujibh-ujibh usia.

14 "Ọvaar Ubinọkpaabyi m'otekha ọnạng otekha ọnạng ẹma oyeni kw'm'ode ọvaarnạng kw'anạng p'Israẹl, kw'm'udimi ẹnạmma ch'Jẹroboam. Udik ngwa m'otto chemma, ọbạra mantọmma wọ. 15 Ọvaar Ubinọkpaabyi m'ọnạng Israẹl irem, tạrr abẹ bạra akhera asạsaarẹ p'afhobhu k'asi ibir-ibir. Ẹma m'ukhubh Israẹl k'isek nnọ ikkasẹ s'uwa ọnạngẹ ab'otte pabẹ, m'ọbạra usi abẹ araama tạrr abẹ ayongu Ọraanga kw'Euphrates, ukwuru sabẹ agbikhi idwạdwạkhọ s'Ọvaar Ubinọkpaabyi, k'akpatava p'Ashẹra p'abẹ asi. 16 Ẹma m'ọkpa nnạm ọvạra Israẹl ukwuru ipyibha ch'Jẹroboam kk'usia, s'utima anạng p'Israẹl asi ipyibha."

17 Wa ikwanạng kw'Jẹroboam ubin ofona, otena k'Tirza. Masẹ ọbyạrẹ ma ẹkpọmmachi ch'ọchọhm bẹ́ ẹ , udikkobh-nwa nwọ ope. 18 Abẹ annọhng-ẹ, anạng p'Israẹl phyibh agạm-ẹ, k'oche kw'Ọvaar Ubinọkpaabyi utim Ahija kw'ode usi-ẹyaakha kwẹ, ọkpaak.

19 Idik idwạkh-ọdwạk s'iten k'ẹvaar ch'Jẹroboam, ọttạra mkpong s'urim, ọttạra ukhira kw'ọdạbhẹ ẹvaar, abẹ akkerẹ sẹ k'nnwẹr s'idik s'ẹtạma s'avaar p'Israẹl. 20 Wa Jẹroboam ọdạbhẹ ẹvaar k'icho ẹrạbh ukuma ifa, ope otor ab'otte. Nadab kw'ode nnwa kwẹ, n'ukwu ode ọvaarnạng.

21 Wa Rẹhoboam kw'ode nnwa kw'Sọlọmọn ode ọvaarnạng k'Juda. Wa ode icho arạbh afa ukuma wạnọ k'okpe kw'ọdạbhẹ ẹvaar, ọdạbhẹ ẹvaar k'icho chi-khamfa k'Jẹrusalẹm, kw'ode ẹfhondiden ch'Ọvaar Ubinọkpaabyi kk'otekha, k'nkhạma s'Israẹl bẹ́, abẹ akpobha eche chẹ. Wa ọkka kwẹ okpen Naama, ubin Ammọn.

22 Wa anạng p'Juda asi ibyibyiadik k'ititikha s'Ọvaar Ubinọkpaabyi. Mpyibha sabẹ asi, igbikhi ottemma kw'Ubinọkpaabyi k'idwạdwạkhọ, iyọhnga s'uwa ab'otte kk'asia. 23 Wa abẹ abạra asi akhapa k'ikpukpobha-byi k'ọyaankpa anạng abẹma oyeni, abẹ abạra asi mkpọmmachi s'awurada, ọttạra akpatava p'Ashẹra k'okpecho kwidede kw'ogor-ogoru, ọttạra k'ichirin chidede ch'irin-urina. 24 Wa abẹ akhaam akhapa p'asasa p'ajunung ma isek nnọ; wa idik s'anạng mbọ n'asi ide idik s'ikpukhu anạng ukpukhu, s'idifhon s'uwa Ọvaar Ubinọkpaabyi kk'ukhubha k'ititikha s'anạng p'Israẹl, ọbhạrẹ.

25 K'cho kw'ottong isen kw'Rẹhoboam kk'ẹvaar ọdạbha, ẹwọ kw'Shishak kw'ode ọvaarnạng kw'Ijip urim Jẹrusalẹm abẹ. 26 Utim ẹkkakpo py'ọchọhm kw'Ọvaar Ubinọkpaabyi, ọttạra ẹkkakpo py'ọvaarter ofona. Ọtạk ọttọhk f'idede tạrr ukpira k'akhọhnkpa p'gol phyi-phyibh p'uwa Sọlọmọn kk'usia. 27 Ma wọ Ọvaar Rẹhoboam utim brons usi akhọhnkpa utima otera mbọkha. Ọtạkha pyẹ ọnạng adecho p'n'atik ibyi, p'aning k'ọtọhm k'ẹbaakhamma ch'ọvaarter. 28 Okpe kwidede kw'ọvaarnạng ọta k'ọchọhm kw'Ọvaar Ubinọkpaabyi, atik-ibyi mbọ n'ata adira akhọhnkpa mbọ, de abẹ kk'asia, abẹ akpa nnạm ata achok kha ẹmaanggọ ch'ekpong-kpo.

29 Idik idwạkh-ọdwạk s'iten k'ẹvaar ch'Rẹhoboam, ọttạra idik sidede s'usi, abẹ akkerẹ sẹ k'nnwẹr s'idik s'ẹtama s'avaar p'Juda. 30 Wa Rẹhoboam ọttạra Jẹroboam n'afona ororo arima ayok abẹ. 31 Rẹhoboam o, ope otor ab'otte, abẹ annọhng-ẹ k'ẹfhondiden ch'Devid. Wa ọkka kwẹ okpen Naama, kw'ubin Ammọn. Abija kw'ode nnwa kwẹ n'ukwu ode ọvaarnạng.