1Avaarnạng 5

Efordia s’Ọchọhm kw’Ubinọkpaabyi sisi

1 Wa ọvaar Hiram kw’Taya n’ọsạkha echo ọnạng oyokh-udikkobh kwẹ Devid k’okpe kwidede. Masẹ n’ọbhaang bẹ́, abẹ kk’Sọlọmọn kw’ode nnwa kw’Devid ana abyenga k’echo bẹ́, ode ọvaarnạng ọbhakwẹ kw’Israẹl, Hiram ọtọhm ikhaana sẹ bẹ́, abẹ ata asim-ẹ. 2 Ma wọ Sọlọmọn ọtọhmọ ẹkkaabha okkena Hiram oben bẹ́,

3 "Ọma asong ka bẹ́, wa Devid kw’ode otte kwaam Ọchọhm kw’Ubinọkpaabyi nókke usi ọnạng eche ch’Ọvaar Ubinọkpaabyi, kw’ode Ubinọkpaabyi kwẹ kw’ikpukpobha, ukwuru mkpong-saabhada s’urim ọttạra nkhạma s’ibaabhẹ. Wa ọchọhm ngwọ nókke usi tạrr Ọvaar Ubinọkpaabyi usi-ẹ okhema awawunanạng pẹ. 4 Okhenka, Ọvaar Ubinọkpaabyi, kw’ode Ubinọkpaabyi kwaam kk’aam ẹmẹm ọnạnga k’eden chidede. Amma awawunanạng kạ́nkhaam, udik kwidede n’ujibh-ujibh ọnạng-m. 5 Ẹgwọ usi n’ndo ifor s’m’nsi Ọchọhm kw’Ubinọkpaabyi kw’m’ntima nnạng eche ch’Ọvaar Ubinọkpaabyi kw’ode Ubinọkpaabyi kwaam, oche kw’uwa Ọvaar Ubinọkpaabyi obeni otte kwaam, Devid, k’okpe kw’oben-ẹ bẹ́, ‘Nnwa kwọ kw’m’ntima ntera echo ch’ẹvaar chọ, wọ m’usi Ọchọhm kw’amma Ubinọkpaabyi, utima ọnạng eche chaam ikpukpobha.’

6 Totokhạn, nạng ẹfa bẹ́, abẹ akpaara nchi s’Lebanọn anạng-m. Tte ajunung paam ọbọhk abẹ asi ọtọhm ajunung pọ abẹ. Amma m’nnạng ajunung pọ okpokha-bhik kwidede kw’ọtọhm fabẹ ope.

7 Masẹ Hiram ọbhaang ẹkkaabha ch’Sọlọmọn, ettem erebh-ẹ tạrr, oben bẹ́, "Ẹtọhnga iyim ẹnạng Ọvaar Ubinọkpaabyi kw’ọnạngẹ Devid okkoji-nnwa bẹ́, ode ọvaarnạng kw’ẹkhạma-bạrạda ch’Israẹl."

8 Ma wọ, Hiram ubhin sọlọmọn bé:

"Amma kk’ẹkkaabha chọ mmaanga e, mnạng-ọ nchi ọnạng oche kw’aroru. Amma m’nnạng-ọ nchi ọttạra nchi s’siprẹs ọnạng. 9 Atọhmnạng paam m’atima nchi utima sabẹ adạbhe k’akhe, k’akpecho p’Lẹbanọn, afona k’Ọraanga kwididen. M’annyaar sẹ ma ọraanga ọkhaan-ọkhaan antima amfona k’ibyi sidede s’m’atekha. Ma wọ m’anchaarẹ akhẹ mbọ annạng-ọ nchi. Ọma m’anạng-m uchiattọhk f’ẹchọhmfhạr chaam m’ichi."

10 Mạnna wọ kw’Hiram ọnạngẹ Sọlọmọn nchi s’sida ọttạra s’siprẹs oche kw’ororu. 11 Sọlọmọn n’ọnạng Hiram akpobhu-mbọhk nnọhna arạbh jobh-kamfa ukuma jobh p’wit, masẹ uchiattọhk f’ẹchọhmfhạr chẹ. Nọnạng-ẹ adạkhẹ ogbạre nnọhna arạbh jobh-kanttaan ukuma chi f’ana p’oliv p’abẹ amyạn-ọmyạna. 12 Wa Ọvaar Ubinọkpaabyi ọnạngẹ Sọlọmọn ekkoji oche kw’ochekhi. Mạnna wọ kw’uwa Hiram ọttạra Sọlọmọn atạk echekha ch’ẹmẹm anạng ayok.

13 Wa ọvaar sọlọmọn otek atọhmnạng nnọhna arạbh attaan ukuma chi k’Israẹl. 14 K’ophye kwidede, n’ọtọhm anạng k’ẹkhaan-k’ẹkhaan, anạng nnọhna ẹrạbh ukuma nsen, k’oche kw’ujunung kwidede m’uninga ophye wạnọ k’Lẹbanọn, aphye afa k’ọchọhm. Adoniram wọ wa ode ocho kw’atọhmnạng mbọ. 15 Sọlọmọn ọbạra otekha atọhmnạng p’n’atọhkha ekpo, anạng nnọhna arạbh asenọttaan ukuma chi, ọttạra anạng nnọhna arạbh jobh p’n’akpaara nta k’ẹkhạma ch’akpecho, 16 ọttạra adecho p’ọtọhm p’Sọlọmọn, anạng nnọhna sọwạnọ p’n’akkeri ọtọhm. 17 K’ẹfa ch’ọvaarnạng, akpaar-nta atumu nta, abạra akpaara pyẹ ọkkakwẹ atima attima ọgbaarẹ kw’Ọchọhm kw’Ubinọkpaabyi. 18 Atọhmnạng p’abin k’efhondiden ch’Gẹbal, akkaan amengkka p’Sọlọmọn ọttạra p’Hiram, abẹ adokha nchi ọttạra nta s’Ọchọhm kw’Ubinọkpaabyi.