1 Masẹ ọvaarnạng kw'ikwanạng kw'ubin Shẹba ọbhaang oche kw'Sọlọmọn uyini eche, ọttạra ikhaana s'ẹma ọttạra Ọvaar Ubinọkpaabyi, ukwu ndwạna s'ikpọhkhọ-ọkpọhkhọ asẹ bẹ́, ukwu oyoma Sọlọmọn. 2 Wa ukpir k'Jẹrusalẹm ọttạra ẹkhaan ch'afanạng, ọttạra akamẹl p'atọhk ekpo py'erebhi iruk, ọttạra gol k'ọsaabh, ọttạra ata akkapyẹ k'ukhira-k'ukhira. Masẹ okhebh Sọlọmọn, ọkpaakh-ẹ udik kwidede kw'uning-ẹ k'ettem. 3 Sọlọmọn ubhin-ẹ ndwạna phyibh s'ọbạbh-ẹ; wa udik gwạnọ-gwạnọ kw'ọkhaarẹ ọvaarnạng ọkhaarẹ bẹ́, ubhin-ẹ kòde. 4 Masẹ ọvaarnạng nwọ kw'ikwanạng kw'ubin Shẹba ose ekkoji-dema ch'Sọlọmọn ọkhaam, ọttạra ọvaarter kw'kk'usia, 5 ọttạra uchiattọhk f'ọnạn k'okpokkro kwẹ, ọttạra oche kw'anạng p'ikhaana sẹ aning ẹyạr, ọttạra atọhmnạng pẹ ọttạra nnya sabẹ age, ọttạra anạng p'n'anạng-ẹ atwuk, ọttạra nnạnga ikkạmasẹ s'usi k'ọchọhm kw'Ọvaar Ubinọkpaabyi, ifor ipẹ-ẹ.

6 Oben ọvaarnạng bẹ́, "Ẹkkaabha ch'amma mmaang k'ẹkhạma chaam otena idik s'asi, ọttạra ekkoji chọ, ede udik ọkka. 7 Okhenka, wa amma nkhaang idik nnọ tạrr, n'nkwu ntima achen paam nse sẹ. K'udik ọkka, abẹ khaam ibhaakha s'idik nna nákpaakha; ekkoji chọ ọttạra ẹkhaama chọ ẹbạrẹ ẹyọhnga ẹkkaabha ch'amma mmaang. 8 Anạng pọ n'akhaama ottennebh! Ottennebh ọbạra uyima ọnạng anạng pọ, p'n'aninga k'ititikha sọ k'okpe kwidede abhaanga ekkoji chọ! 9 Ẹtọhnga iyim ẹnạng Ọvaar Ubinọkpaabyi, kw'ode Ubinọkpaabyi kwọ, kw'kk'ottennebh ọtạkha kakhọ, ọbạra ọtạkh-ọ ochok ẹyạr k'ẹvaarchi ch'Israẹl. Ubin k'idạdaakha s'Ọvaar Ubinọkpaabyi s'nạn ekponga ikhaam, s'ọkhaam ọttạra anạng p'Israẹl, usi-ọ ọvaarnạng bẹ́, ọma m'n'akpaara aponga k'eden ọkkachẹ, ch'ẹbạra etor-otor."

10 Wa ọnạngẹ ọvaarnạng atalẹn arạbh asajạnẹ p'gol, ọttạra ekpo py'erebhi iruk k'ọsaabh, ọttạra ata akkapẹ k'ukhira-k'ukhira. Wa ekpo py'erebhi iruk, py'ẹsaabhẹ eyongu py'ọvaarnạng nwọ kw'ikwanạng kw'ubin Shẹba utim okkena ọvaar Sọlọmọn kède.

11 (Wa ijaar s'Hiram s'asi ibin kha Ophir ikwu ittạra gol; abẹ abạra atọhkha ekpo k'ọsaabh py'ichi ch'almug, ọttạra ata akkapẹ k'ukhira-k'ukhira abina kha akwu. 12 Wa ọvaarnạng utim ichi njọ ch'almug usi achidaak p'Ọchọhm kw'Ọvaar Ubinọkpaabyi, ọttạra k'ọvaarter, ọbạra utima usi abukpọhng, ọttạra agimangim ọnạng akkọhn-mmạng. Tạma ma iwu njọ, abẹ ichi ch'almug k'ọsaabh oche ngwọ tạm násia, bạra node bẹ́, abẹ m'adebh atima akwu.)

13 Wa ọvaar Sọlọmọn ọnạngẹ ọvaarnạng nwọ kw'ikwanạng kw'ubin Shẹba ọttọhk fidede f'ororu, ọttạra f'ọbạbh-ẹ, oyongu ekpo py'kk'ẹ ọnạnga bạra k'ọvaarchọhm kwẹ. Ma wọ utim anạng pẹ k'ẹkhaan ọkpa nnạm ọbhạna k'ẹkhạma chẹ.

14 Wa adọhbh p'gol kw'Sọlọmọn n'ọtạkha k'cho ade adọhbh p'atalẹn ẹnọhna ukuma arạbh jobh-kanttaan ukuma asajạnẹ, 15 de arạbh p'ọtạk k'mbọhk s'anạng p'n'asenga mphya, ọttạra ntuma s'avạar p'Arabiya, ọttạra s'adạbhẹ-nkhạma n'anạng-ẹ.

16 Wa ọvaar Sọlọmọn utim gol udwuk akhọhnkpa p'abạrẹ ẹkpa; utima ashẹkẹl p'gol ẹnọhna ukuma arạbh jobh usi ọkhọhnkpa wạnọ. 17 Wa ọbạra utima gol udwuk akhọhnkpa arạbh chi p'asạk ẹkpa, utima amina attaan p'gol usi ọkhọhnkpa wạnọ. Ọvaarnạng ọtạkha pyẹ ochok k'Ọchọhm kw'Ẹkpa ch'Lebanọn.

18 Ọvaarnạng usi ẹvaarchi chididen ch'utim ekpo masẹ nnyi-sa odokha, ọbạra utima gol ọkkakwẹ ọfhạrọ wẹ. 19 Wa ẹvaarchi njọ ẹkhaam ibyạrẹ-mfhok nsajạnẹ sabẹ n'asenga avura k'nnạm s'ẹvaarchi njọ, abẹ asi ibyi s'ide iriringi s'm'ọnạna echo. Wa ẹvaarchi njọ ẹkhaam mbọhk-nạna mfa, abẹ agwa nkke s'ibe ibaanga k'udimbọhk ọttạra k'ọkwabọhk. 20 Nkke jobh-kamfa sabẹ agwa ibe ma k'ibyạrẹ-mfhok nnọ nsajạnẹ, ikkeri ayok ititikha. Ẹkhạma jạnẹ-jạnẹ ch'kk'oche ngwọ isia kède. 21 Wa atwuk-gbạre p'ọvaar Sọlọmọn phyibh ade gol, ekpo-bhaakha phyi-phyibh py'ọchọhm kw'Ẹkpa ch'Lebanọn ẹbạra ede gol akkapẹ. Ọttọhk vạnọ-vạnọ f'abẹ atim silva asi kòde, ukwuru s'uwa silva nạn ọttọhk núpua k'okpe kw'Sọlọmọn. 22 Wa ọvaar Sọlọmọn ọkhaam ijaar sididen s'asi k'ọsaabh k'ọraanga kwididen, ọttạra k'ijaar s'Hiram. Wa ijaar nnọ s'Tarshish n'ita osenga ikwuna, okpe gwạnọ k'icho ittaan. Asẹ n'itọhkha gol, ọttạra asilva, ọttạra ekpo masẹ nnyi-sa, ọttạra ajijankkọhm, ọttạra nnyobha.

23 Wa ọvaar Sọlọmọn ọkhaam ẹkhaama chididen ọttạra ekkoji ọyọhnga avaar mbọkha p'iyagbin phyibh. 24 Iyagbin bẹ́ wạạm n'ikwu ikhebha Sọlọmọn, ọfha abẹ abhaanga ekkoji ch'Ubinọkpaabyi kk'ẹ ọnạnga. 25 Cho kwidede, ukhikhennạng kwidede kw'ukwu n'utima ẹnạnga ch'silva, ọttạra gol, ọttạra ọvạra, ọttạra ekpongkpo, ọttạra ekpo py'erebhi iruk, ọttạra nnyạnyaang, ọttạra nnyạnyaang s'akhira adwạkh-ọdwạk.

26 Wa Sọlọmọn ọkhaam ijaar s'nnyạnyaang n'itwạr, ọttạra nnyạnyaang k'ọsaabh. Wa ọkhaam ijaar s'nnyạnyaang n'itwạr nnọhna nttaan ukuma arạbh jobh, ọttạra nnyạnyaang nnọhna arạbh afa ukuma jobh s'ochokhu k'ifhondiden s'ijaar s'nnyạnyaang n'itwạr, ọttạra kha Jẹrusalẹm kw'ọvaarnạng urukhu. 27 Ọvaar Sọlọmọn usi asilva asaabh k'Jẹrusalẹm masẹ ata, ọbạra usi nchi s'sida isaabh masẹ nchi s'sikamọr p'akpechorin. 28 Wa Sọlọmọn odebhi nnyạnyaang sẹ k'Ijip, ọttạra k'Kuwe, wa asenga-mphya p'ọvaarnạng adebhi sẹ kha Kuwe ator k'oche kw'ẹphya ede ma okpe ngwọ. 29 Wa abẹ adebhi ọkpaar kw'nnyạnyaang n'itwạr k'ashẹkẹl p'asilva, ẹnọhna ukuma arạbh jobh k'Ijip, ọttạra ẹnyạnyaang k'ashẹkẹl arạbh asenọfa ukuma jobh. Abẹ abạra atọhm pyẹ akkena avaar p'Het, ọttạra p'Aram.