1 Wa Abija ọtạm ẹvaar dạdạbh k’Juda, k’cho kw’ottong chi-khanttaan kw’u Jẹroboam kw’ode nnwa kw’Nẹbat kk’ẹvaar ọdạbha k’Israẹl. 2 Wa Abija ọdạbhẹ ẹvaar k’Jẹrusalẹm k’ícho ittaan. Ọkka kwẹ okpen Maaka, kw’ode ọkwanạng-nwa kw’Abishalọm.

3 Ẹma wa usi mpyibha sidede s’ab’otte kk’asia. Wa ettem phyibh nútima ọtwạn Ọvaar Ubinọkpaabyi, kw’ode Ubinọkpaabyi kwẹ abẹ, oche kw’uwa Devid kw’ode otte kwideden kk’usia. 4 Okhenka, ukwuru Devid, Ọvaar Ubinọkpaabyi kw’ode Ubinọkpaabyi, ọnạng-ẹ ọyaanttaana k’Jẹrusalẹm, s’oseng k’nnwa kwẹ otera echo chẹ, ọbạra usi Jẹrusalẹm ọkpọhkhọ. 5 Wa Devid kk’idik s’itor-otor usia k’ititikha s’Ọvaar Ubinọkpaabyi ọttạra bẹ́, ipina kọ́khaam k’nnyina s’Ọvaar Ubinọkpaabyi k’akpen pẹ phyibh, oyonga udik kw’Uriya kw’ubin Het.

6 Wa k’akpen p’Abija phyi-phyibh, Abija ọttạra Rẹhoboam n’arima mkpong ayok abẹ. 7 Idik idwạkh-ọdwạk s’iten k’ẹvaar ch’Abija, ọttạra idik phyibh s’usi, abẹ akkerẹ sẹ k’nnwẹr s’idik s’ẹtạma s’avaar p’Juda. Wa Abija ọttạra Jẹroboam n’arima mkpong. 8 Abija ope otor ab’otte, abẹ annọhng-ẹ k’ẹfhondiden ch’Devid. Asa kw’ode nnwa kwẹ, n’ukwu ode ọvaarnạng.

9 Wa Asa ọtạm ẹvaar dạdạbh k’Juda k’cho kw’ottong ẹrạbh kw’Jẹroboam kk’ẹvaar ọdabha k’Israẹl. 10 Wa Asa ọdạbhẹ ẹvaar k’Jẹrusalẹm k’icho arạbh afa ukuma wạnọ. Wa ọkka kwideden okpen Maaka, kw’ode nnwa kw’Abishalọm.

11 Wa Asa usi idik s’itor-otor k’ititikha s’Ọvaar Ubinọkpaabyi, oche kw’uwa otte Devid kk’usia. 12 Wa ukhubhu asasa-junung k’akhapa p’isek nnọ, ọbạra ukhibhi akpatava p’uwa ab’otte kk’asia. 13 Wa ọgba ọsạkha Maaka kw’ode ọkka kwideden ininga, masẹ ọkka kw’ọvaarnạng, ukwuru akpatava p’Ashẹra p’usi, p’ikpukhu anạng bẹ́ abẹ akpobha. Wa Asa ọkkọhbhọ Ashẹra nwọ ọjẹ, ukwu ọkkạmọ wẹ k’ipekhuma s’kidron. 14 Okhenka, wa Asa ikpukpobha-byi s’ọyaankpa núkhibha, utim ettem k’ubungu ọtwạn Ọvaar Ubinọkpaabyi abẹ, k’akpen pẹ phyibh. 15 Ọtọhk asilva ọttạra gol ukwu ọttạra k’nnạnga idwạkh-ọdwạk s’ẹma ọttạra otte kk’ọbọhhk attia anạng Ubinọkpaabyi, ochok k’ọchọhm kw’Ọvar Ubinọkpaabyi.

16 Wa Asa ọttạra Baasha kw’ode ọvaarnạng k’Israẹl, arim ekpong k’okpe phyi-phyibh kw’abẹ adạbhẹ ẹvaar. 17 Baasha kw’ode ọvaarnạng kw’Israẹl ofon ọta urima Juda abẹ, ọbạra ọkpa k’Rama, ọfha anạng nạngẹ k’iyaan ayini, abẹ nạngẹ k’ẹtaanga abạra anwa, k’ẹkhạma ch’Juda kw’Asa ode ọvaarnạng.

18 Ma o Asa n’ọtạk silva ọttạra gol p’arikhi k’ikwurukpa ch’ọchọhm kw’Ọvaar Ubinọkpaabyi, ọttạra k’ikwurukpa ch’ọvaarchọhm kwẹ, ọnạng atọhmnạng pẹ bẹ́, abẹ akkena Bẹn-Hadad kw’ode nnwa kw’Tabrimọn. Wa Tabrimọn ode nnwa kw’Hẹziyọn, kw’ode ọvaarnạng kw’Aram, kw’uwa ọdạbhẹ Damaskọs. 19 Oben bẹ́, "Tte antạkha echekha annạng ayok oche kw’uwa ab’otte pamạna atạk. Kkeri, amma n’ntọhm ẹnạnga ch’silva ọttạra gol nken-ọ e. M’avọhkhọ echekha ch’atạk ọttạra Baasha kw’ode ọvaarnạng kw’Israẹl, ọfha otte ẹkhạma chaam ọbọhk."

20 Bẹn-Hadad ochera ọnạng ọvaar Asa, ukwu ọtọhm atimeden p’akpongnạng pẹ, abẹ ata arima ifhon s’Israẹl abẹ. Ma wọ okhem ifhon s’Ijọn ọttạra s’Dan ọttạra s’Abẹl-Bẹt-Maaka, ọttạra s’Kinẹrẹt phyi-phyibh, ọttạra ẹkhạma ch’Naphtali kubungu. 21 Masẹ Baasha ọbhaang udik ngwọ, ukuma ọtọhm f’ofhon kw’Rama sisi, ọtwạr ọkpa nnạm k’Tirza. 22 Ma wọ ọvaar Asa ọnạngẹ anạng p’Juda phyi-hyibh ẹfa, ọnạng núrikha, bẹ́ abẹ ata adira ata ọttạra mkpaakha s’iwa Baasha utim usi ọtọhm k’Rama. Ọvaar Asa utima pyẹ usi Gẹba k’Bẹnjamin, ọbạra utima usi Mizpa.

23 Idik idwạkh-ọdwạk s’iten k’ẹvaar ch’Asa, ọttạra idik phyi-phyibh s’ọkhaam, ọttạra idik phyi-phyibh s’usi, akwu attạra k’ifhondiden s’usi, abẹ akkerẹ sẹ k’nnwẹr s’idik s’ẹtạma s’avaar p’Juda. Ayongu ma, wa n’ọkhaam ọkhạmana k’mfhok-kpatwạkhọ sẹ. 24 Wa Asa ope otor ab’otte, abẹ annọhng-ẹ k’efhondiden ch’otte Devid, k’ibyi sabẹ annọhng ab’otte. Wa Jẹhoshaphat kw’ode nnwa kwẹ n’ukwu ode ọvaarnạng.

25 Wa Nadab kw’ode nnwa kw’Jẹroboam, ukwu ode ọvaarnạng kw’Israẹl, k’cho kw’ottong afa kw’Asa kk’Juda ọdạbha. Ọdạbhẹ Israẹl k’icho ifa. 26 Otoru ntwạkhọ s’otte, usi ipyibha k’ititikha s’Ọvaar Ubinọkpaabyi. Usi ipyibha-khira njọ ch’otte utim anạng p’Israẹl eden, abẹ asi.

27 Wa Baasha kw’ode nnwa kw’Ahija kw’ubin k’ẹkhạma ch’Isaka, ọkhaam nttọhna-pyibha otena abẹ. Mạnna wọ ọfhẹ-ẹ kha Gibeton, kw’ode ofhon gwạnọ k’ẹkhạma ch’aPhilistiya, kˈokpe kw’Nadab ọttạra anạng p’Israẹl phyibh abaabhẹ Gibeton age ngekha. 28 Wa Baasha ọfhọ Nadab, k’icho kw’ottong ittaan kw’ọvaar Asa kk’Juda ọdạbha. Mạnna wọ Baasha oter echo ch’Nadab masẹ ọvaarnạng k’Israẹl.

29 Oche ngwọ kw’ọtạm ẹvaar dạdạbh bẹ́ ẹ, ọfhọ ẹnạmma ch’Jẹroboam phyi-phyibh. Ọnạng wạnọ-wạnọ k’ẹnạmma ch’Jẹroboam ọbọhk núttia uruk akpen, ọfhọ bẹ phyibh, otor k’ọtọhnga kw’uwa kw’Ọvaar Ubinọkpaabyi kk’osenga k’ọtọhmnạng kwẹ Ahija kw’ubin Shilo, ọnạng ẹyaakha. 30 Wa akwẹ ode oche ngwọ ukwuru mpyibha s’Jẹroboam kk’usia, ọttạra s’utim anạng p’Israẹl eden abẹ asi, akwu attạra k’oche kw’ugbikhi idwạdwạkhọ s’Ọvaar Ubinọkpaabyi, kw’ode Ubinọkpaabyi kw’Israẹl.

31 Idik idwạkh-ọdwạk s’iten k’ẹvaar ch’Nadab, ọttạra idik phyibh s’usi, abẹ akkẹrẹ sẹ k’nnwẹr s’idik s’ẹtạma s’avaar p’Israẹl. 32 Wa Asa ọttạra Baasha kw’ode ọvaarnạng kw’Israẹl, n’arima ekpong k’okpe phyibh kw’abẹ adạbhẹ ẹvaar.

33 Wa Baasha kw’ode nnwa kw’Ahija, ọtạm ẹvaar k’Israẹl phyibh dạdạbh k’cho kw’ottong ittaan kw’Asa kk’ẹvaar ọdạbha k’Juda.Wa Baasha ọdạbhẹ ẹvaar k’Tirza icho ẹrạbh ukuma innebung. 34 Otoru ntwạkhọ s’otte, usi ibyibyia-dik k’ititikha s’Ọvaar Ubinọkpaabyi. Usi ipyibha-khira njọ ch’Jẹroboam utim anạng p’Israẹl eden abẹ asi.