1 Wa ọvaar Devid kk'ọtạma mororo, chibhi sabẹ abubh-ẹ nnọhmakpa, ekhok kẹ ọbọhk níttia. 2 Ma wọ atọhmnạng pẹ aben-ẹ bẹ́, "Tte annor uminanwa wạnọ kw'm'uninga ọvaarnạng abẹ, kw'm'ọbạra okker-ẹ. Uminanwa nwọ m'uyima ọbaang-ẹ, ọfha ekhok ette aro kwamạna ọbọhk."

3 Mạnna wọ kw'abẹ aroru uminanwa kw'ujibhi ọyọhnga ayok k'Israẹl, abẹ ata atạkha Abishag kw'ubin Shunam akkena ọvaarnạng. 4 Wa uminanwa nwọ ujibhi iminava mororo. N'okkeri ọvaarnạng, ọbạra uninga abẹ. Okhenka, wa ọvaarnạng abẹ núyima.

5 Wa Adonija kw'ode nnwa kw'Hagit ọttạra Devid, utim ifor sẹ usi ẹmma, oben bẹ́, "Amma wọ n'nde ọvaarnạng e." Ma wọ ofon ọta ọtạkha ijaar s'nnyạnyaang nitwạr, ọttạra ayaar-nnyạnyaang, ukwu ọttạra k'ajunung arạbh afa ukuma jobh p'n'achi-ẹ eden. 6 (Wa okpe kòde kw'otte ọkpẹ-ẹ eden ọbạbh-ẹ bẹ́, "Ọma asi yạn asi oche ngwọ?" Wa ẹma nwọ ujibhi idikkobh mororo, ọbạra otor Absalọm nnạm k'otte.)

7 Wa Adonija ukwu ọkhaama nttọhna ọttạra Joab kw'ode nnwa kw'Zeruya, ọttạra Abiyata kw'ode ọfọhnẹja, p'abuẹ-ẹ k'nnạm. 8 Okhenka, Zadọk kw'ode ọfọhnẹja, ọttạra Bẹnaya kw'ode nnwa kw'Jẹhoyada, ọttạra Natan kw'ode usi-ẹyaakha, ọttạra Shimeyi, ọttạra Reyi, ọttạra ọbaabhẹ kw'Devid, abẹ Adonija abẹ nátwạna.

9 Adonija utim arạkhạmaan, ọttạra mmaam, ọttạra mmaamva adimpẹ p'ajibhi ifor ọfọhnọ nja k'ẹta ch'Zohẹlẹt, ọbaanga Ẹn-Rogẹl. Obher ivotte pẹ phyibh p'ade ajunungva p'ọvaarnạng, ọttạra ikhaana s'ọvaarnạng phyi-phyibh p'abin Juda. 10 Okhenka, wa Natan kw'ode usi-ẹyaakha nóbhera. Bẹnaya, ọttạra abaabhẹ akkapẹ, tạrr oseng k'Sọlọmọn kw'ode nwotte, nọ́bạra obhera.

11 Ma wọ Natan obeni Batshẹba kw'ode ọkka kw'Sọlọmọn bẹ́, "Ọma tạm nábhaanga bẹ́, Adonija kw'ode nnwa kw'Hagit kk'ọvaarnạng udia o? Okhenka, aro kwamạna kw'ode Devid, udik ngwọ kósong. 12 Ma o, tte ntọhn-ọ eden ch'm'asenga akkaana akpen pọ oyeni ọttạra p'nnwa kwọ Sọlọmọn. 13 Sọhng mantọmma ata akhebha ọvaar Devid aben-ẹ bẹ́, ‘Aro ọvaar kwaam, ọma sạng achekhi anạng amma ọtọhmnạng kwọ bẹ́: "K'udik ọkka, nnwa kwaam Sọlọmọn wọ m'ọtạkha ẹvaar chaam, ọbạra uninga ẹyạr k'ẹvaarchi chaam?’ Ka yạn wọ kw'Adonija node ọvạarnạng o?’ 14 Amma m'nkwu-ukwu masẹ m'akpaak ọvaarnạng udik ngwọ, ọfha nkwu nge ẹmma ma udik kw'n'akpaak."

15 Ma wọ Batshẹbha ofon ọta okhebha ọvaar Devid kw'kk'ọtạma kha ẹmaanggọ chẹ ẹtaanga, s'Abishag kw'ubin Shunam n'okker-ẹ. 16 Batshẹba ọrạkha, uttima ititikha k'isisek k'ikpukpobha, ọnạng ọvaarnạng.

Ọvaarnạng ọbạbh-ẹ bẹ́, "Mbạng vọ aroru?"

17 Ọpọhn-ẹ bẹ́, "Ọma oyeni wọ atim eche ch'Ọvaar Ubinọkpaabyi, kw'ode Ubinọkpaabyi kwọ, achekhi anạng-m bẹ́: ‘K'udik ọkka, nnwa kwaam Sọlọmọn wọ m'ọtạkha ẹvaar chaam, ọbạra uninga ẹyạr k'ẹvaarchi chaam.’ 18 Okhenka, ọma aro ọvaar kwaam, kásong bẹ́, Adonija kk'ọvaarnạng udia o? 19 Ẹma kk'mmaam, ọttạra mmaamva adimpẹ, ọttạra arạkhạmaan k'ọsaabh ọtạkha, utima ọfọhnọ ẹja. Obheri ajunungva p'ọvaarnạng phyi-phyibh, ọttạra Abiyata kw'ode ọfọhnẹja, ọttạra Joab kw'ode odecho kw'akpong-nạng. Okhenka, Sọlọmọn kw'ode ọtọhmnạng kwọ, nóbhera. 20 Aro ọvaar kwaam, achen p'anạng p'Israẹl phyibh n'akkeri ọma bẹ́, akpaak bẹ ọnạng kw'm'otor-ọ nnạm, kw'm'uninga ẹyạr k'ẹvaarchi ch'ọma aro ọvaar kwaam. 21 Nạn mạnna núdia, de aro ọvaar kwaam ope ma, abẹ annọhng-ẹ otor ab'otte, abẹ m'atạkha amma ọttạra nnwa kwaam Sọlọmọn, asi ọgbaan aben bẹ́ ande ariribha e."

22 Masẹ utim ọkpaakhẹ ọvaarnạng udik ngwọ, Natan kw'ode usi-ẹyakha ukpira. 23 Wa abẹ akpaakhẹ ọvaarnạng bẹ́, "Natan kw'ode usi-ẹyaakha uning mama e." Ma wọ ofon okhebha ọvaarnạng, ọrạkha uttima ititikha k'isisek k'ikpukpobha.

24 Natan ọbẹ́, "Kkọhm khẹ, ọma ọvaar kwaam kk'ẹyaakha asia bẹ́, Adonija wọ m'ọtạkha ẹvaar chọ, ọbạra uninga ẹyạr k'ẹvaarchi chọ? 25 Ẹma kk'ofona ọta ọtạkha mmaam saabhada, ọttạra mmaamva adimpẹ, ọttạra arạkhạmaan. Kk'ajunungva p'ọvaarnạng phyi-phyibh obhera, ọbạra obher adecho p'akpong-nạng, ọttạra Abiyata kw'ode ọfọhnẹja. Abẹ aning abẹ kha mantọmma n'achi, abạra agwọ, n'aben bẹ́, ‘Tte ọvaar Adonija uruk akpen p'adum-udum!’ 26 Okhenka, amma ọtọhmnạng kwọ, ọttạra Zadọk kw'ode ọfọhnẹja, ọttạra Bẹnaya kw'ode nnwa kw'Jẹhoyada, ọttạra ọtọhmnạng kwọ Sọlọmọn, nóbhera. 27 Node bẹ́, udik kw'aro ọvaar kwaam usi gwọ ma, kw'nạn núsia amạna ansonga ọnạng kw'm'ọtạkha ẹvaar chẹ, kw'm'ọbạra uninga ẹyạr k'ẹvaarchi ch'aro ọvaar kwaam o?"

28 Wa ọvaar Devid obeni bẹ́, "Ayeri Batshẹba ọnnwa okhebh-m kha." Mạnna wọ ọnnwa okhebha ọvaarnạng kha ẹtaanga, ọta ubuẹ-ẹ k'ititikha.

29 Ma wọ ọvaarnạng n'ọtạk echekha oben bẹ́, "Oche ngwọ kw'Ọvaar Ubinọkpaabyi urukhu akpen, kw'ọkkaan ọrạbh-m k'ọmmaphyaange kwidede, 30 chemma, amma m'nsi udik kw'uwa nchekhi k'eche ch'Ọvaar Ubinọkpaabyi, kw'ode Ubinọkpaabyi kw'Israẹl, bẹ́: Nnwa kwaam Sọlọmọn wọ m'ọtạkha ẹvaar chaam, ẹma wọ m'ọbạra uninga k'ẹvaarchi chaam, k'ọvaarter kwaam."

31 Ma wọ Batshẹba ọrạk uttima ititikha k'isisek k'ikpukpobha, oben ọvaarnạng bẹ́, "Tte aro ọvaar kwaam, Devid, uruk akpen tạrr ipimanitor."

32 Ọvaar Devid oben bẹ́, "Ayeri Zadọk kw'ode ọfọhnẹja, ọttạra Natan kw'ode nnwa kw'Jẹhoyada, anạng-m." Masẹ abẹ akwu ayin ọvaarnạng k'ititikha, 33 ọvaarnạng oben bẹ bẹ́, "Abạnga atạkha atọhmnạng p'aro kwabạnga abẹ atwạn bạnga abẹ. Aben nnwa kwaam Sọlọmọn ọyaar ẹnyạnyaang chaam, atim-ẹ afona kha Gihọn. 34 Ma wọ kw'Zadọk kw'ode ọfọhnẹja, ọttạra Natan kw'ode usi-ẹyaakha m'abyeng-ẹ ana k'echo, asiẹ-ẹ ọvaarnạng kw'Israẹl. Abạnga age ubukpọhng, abạra anạng ẹyaakha bẹ́, ‘Ọvaar Sọlọmọn m'uruk akpen p'adum-udum!’ 35 Abạnga atwạn abẹ akpa nnạm, ọfha ukwu uninga ẹyạr k'ẹvaarchi chaam, ọbạra ọdạbh ẹvaar chaam. Amma kk'ẹ ntekha bẹ́, ode ọvaarnạng kw'Israẹl ọttạra kw'Juda."

36 Bẹnaya kw'ode nnwa kw'Jẹhoyada ubhin ọvaarnạng bẹ́, "Tte akwẹ ode oche ngwọ! Tte Ọvaar Ubinọkpaabyi, kw'ode Ubinọkpaabyi kw'aro ọvaar kwaam, ọnạng ẹyaakha ch'udik ngwa. 37 Oche ngwọ kw'uwa Ọvaar Ubinọkpaabyi uning aro ọvaar kwaam abẹ, tte ọbạra uninga Sọlọmọn abẹ, ọfha usi ẹvaar chẹ ẹbạr ọtạm ẹyọhnga ẹvaar ch'aro ọvaar kwaam, Devid!"

38 Mạnna wọ kw'Zadọk kw'ode ọfọhnẹja, ọttạra Natan kw'ode usi-ẹyaakha, ọttạra Bẹnaya kw'ode nnwa kw'Jẹhoyada, ọttạra anạng p'Kẹrẹt, ọttạra p'Kẹlẹt, abin ata akpoma Sọlọmọn kw'ọyaarẹ k'ẹnyạnyaang ch'ọvaar Devid, abẹ afona kha Gihọn. 39 Zadọk kw'ode ọfọhnẹja ọtạkha ubhik kw'ana p'abin k'ukkira kw'awurada, obyenga Sọlọmọn ana k'echo. Mạnna wọ kw'abẹ age ubukpọhng, anạng phyibh abạra anạng ẹyaakha k'ẹrạng-k'ẹrạng bẹ́, "Tte ọvaar Sọlọmọn uruk akpen p'adum-udum!" 40 Anạng phyibh n'ator-ẹ nnạm, abẹ age ẹsa, abạra atima erobha chididen ch'abẹ asi tạrr, isek inyengi.

41 Wa Adonija ọttạra akhikhennạng phyi-phyibh p'aning abẹ, abhaang udik ngwọ k'okpe kw'abẹ n'aben bẹ́ akkera ininga chabẹ. Masẹ Joab ọbhaang ubukpọhng kw'anạng mbọ age, n'ọbạbh-ọ bẹ́, Ẹkhọhr-khira njọ k'efhondiden, iyini yạn o?"

42 Masẹ utim ọkpaakhẹ udik ngwọ, Jonatan kw'ode nnwa kw'Abiyata kw'ode ọfọhnẹja ukwu ukpira. Adonija oben bẹ́, "Nwa kha ẹtaanga. Ujunung ọkkọkka masẹ akhọ, m'utima ẹkkaabha ọkkachẹ ukwu."

43 Jonatan ubhina Adonija bẹ́, "Akwẹ oche ngwọ núdia e! Aro ọvaar kwamạna Devid, kk'Sọlọmọn ẹvaar ọdạbha e. 44 Ọvaarnạng kk'Zadọk kw'ode ọfọhnẹja, ọttạra Natan kw'ode usi-ẹyaakha, ọttạra Bẹnaya kw'ode nnwa kw'Jẹhoyada, ọttạra anạng p'Kẹrẹt, ọttạra p'Pẹlẹt ọtọhma bẹ́, abẹ atwạn abẹ, ọyaar k'ẹnyạnyaang ch'ọvaarnạng ọkpa nnạm. 45 Zadọk kw'ode ọfọhnẹja, ọttạra Natan kw'ode usi-ẹyaakha kk'ẹ ana abyenga k'echo asiẹ-ẹ ọvaarnạng kha Gihọn. Abẹ kk'abina kha, orebhada awẹ, kw'n'utim ẹkhọhr ukwu k'efhondiden. Ẹkhọhr njọ jọ n'abhaanga mạma e. 46 Oyongu ma, Sọlọmọn kk'ẹyạr uninga k'ẹvaarchi e. 47 Atọhmnạng p'ọvaarnạng kk'abạra akwua bẹ́, akwu asima aro ọvaar kwamạna, Devid, aben bẹ́, ‘Tte Ubinọkpaabyi kwọ usi Sọlọmọn uyin eche ọyọhng-ọ, ọbạra usi ẹvaar chẹ ẹbạr ẹyọhnga chọ!’ Ma wọ ọvaarnạng ọrạk ma ibhikha chẹ k'ikpukpobha, 48 oben bẹ́, ‘Tte ẹtọhnga iyima ẹnạng Ọvaar Ubinọkpaabyi kw'ode Ubinọkpaabyi kw'Israẹl, kw'kk'usia bẹ́, ntima achen paam afa nse ọnạng kw'ọtạk ẹvaar chaam chemma.’ "

49 Osenga ma, akhikhennạng p'Adonija abina k'opoma, ininga ipfura. 50 Okhenka, Adonija ubina, ukwuru ojora f'Sọlọmọn, ọta ọvạkha k'abhik p'ijabyi. 51 Ma wọ abẹ akpaakhẹ Sọlọmọn bẹ́, "Ọvaar Sọlọmọn ojor Adonija ojora, kw'usi ọta ọvạkha k'abhik p'ijabyi. Ukwu oben bẹ́, ‘Tte ọvaar Sọlọmọn ochekhi ọnạng-m chemma bẹ́, ọkkangkkang-kkro mútima ọfhọ amma ọtọhmnạng kwẹ.’ "

52 Sọlọmọn ubhina bẹ́, "De usi ẹmmaana ọkkachẹ, usisira-naanga kwẹ kw'm'otto k'isek kòde. De ọkhạmọ ipyibha, m'opope." 53 Ma wọ ọvaar Sọlọmọn ọtọhmọ anạng abẹ ata achaar-ẹ k'ijabyi atima akwu. Adonija o, ukwu ọrạkha k'ititikha s'ọvaar Sọlọmọn, kw'oben-ẹ bẹ́, "Sọhng abhạna kakh-ọ k'ọchọhm."