1 Wa ettem ẹbạra ipyibh Ọvaar Ubinọkpaabyi etena anạng p'Israẹl ọttạra p'Juda. Osenga akwẹma akwẹ ọchọhma Devid ọta usi bẹ abẹ ẹkhọhr, oben bẹ bẹ́, "Asọhng ata atạkha ọnạng-mik kw'Israẹl ọttạra kw'Juda."

2 Ma wọ ọvaarnạng obeni Joab ọttạra adecho p'akpongnạng p'aning abẹ bẹ́, "Asenga abaabha nnạmma s'Israẹl, atạma k'Dan tạrr akpira k'Beershẹba, abhik akpongnạng, ọfha nsonga ubhik kw'abẹ ade."

3 Joab ubhina ọvaarnạng bẹ́, "Tte Ọvaar Ubinọkpaabyi, kw'ode Ubinọkpaabyi kwọ, ọttạra ọnạng-mik kw'akpongnạng ikpe arạbh asen oyong-oyongu. Tte aro ọvaar kwaam utima achen pẹ afa ose. Bạng ọttọhk vọ usi aro ọvaar kwaam n'oben bẹ́ usi udik demakwẹ ngwọ o?"

4 Wa ọkpaakhadik kw'ọvaarnạng ọkpọhkhọ ọyọhnga kw'Joab ọttạra kw'adecho p'akpongnạng. Ma wọ abẹ abin arik ọvaarnạng, ata abhik akpongnạng p'Israẹl.

5 Masẹ abẹ kk'Jọrdan ajekha, abẹ abhingi abaanga Aroẹ, k'ẹrạkh-ẹrạkha kw'ofhon kw'usi ẹkpẹmẹ. Abẹ asenga k'Gad afona k'Jaza. 6 Abẹ aseng afona k'Gilead, ọttạra k'ẹkhạma ch'Tatim Hodshi, afona k'Dan Jaan, atena k'Sidon. 7 Abẹ n'asengi atena k'ibyittubhasẹ s'Tyrẹ, ọttạra k'ifhon s'aHiv, ọttạra s'aKenaan phyi-phyibh. Abẹ n'akpong nnạm afona k'Beershẹba kw'uning k'Nẹgẹv, k'ẹkhạma ch'Juda.

8 Masẹ abẹ kk'asenga abaabha isisek nnọ phyibh k'aphye sọnẹrạbh, abẹ akpa nnạm k'Jẹrusalẹm.

9 Joab ọkpaakhẹ ọvaarnạng ọnạng-mik kw'akpongnạng. Ọnạng-mik kw'afanạng p'Israẹl ode nnọhna arạbh asen p'akke ọkkangkkang-kkro vạvạkha. Ọnạng-mik kw'Juda ode nnọhna arạbh attaan ukuma arạbh afa ukuma jobh.

10 Masẹ Devid kk'akpongnạng ubhikha phyibh, ẹttem ẹphyaang-ẹ ẹmma tạrr n'obeni Ọvaar Ubinọkpaabyi bẹ́, "Amma kk'ipyibha chididen nsia maa udik ngwa. Tọtọkhạn o, Ọvaar Ubinọkpaabyi, bina ma nạng ipina ch'amma ọtọhmnạng kwọ. Amma kk'idindingi-dik nsia e."

11 Brasẹ Devid n'ọphyạbh k'ekpebha, ọkpaakha-dik kw'Ọvaar Ubinọkpaabyi kk'Gad kw'ode usi-ẹyaakha, kw'ọbạra ode ichen s'Devid ukpira bẹ́: 12 "Sọhng ata akpaak Devid bẹ́, ‘Maa wọ ode udik kw'Ọvaar Ubinọkpaabyi ọkpaakhẹ: Amma njọ-ọ idik ittaan k'ititikha bẹ́, atekha gwạnọ kw'm'ntima mkpaara iponga sọ.’ "

13 Mạnna wọ Gad ọta okhebha Devid, oben-ẹ bẹ́, "Maa s'm'ọdaakh-ọ bẹ́, okwo fididen uninga k'isisek sọ k'icho ittaan o? S'm'ọbạra ọdaakh-ọ bẹ́, arạbh abhạrkpa p'awawuna-nạng pọ m'akhubh bạnga k'aphye attaan? M'ọdaakh-ọ bẹ́, ọkhạnkhạmọ kwididen otto maa k'isisek nna k'iwu ittaan yeri? Bạbh ettem chọ tena ma idik nnọ mantọmma, atekh-m oche kw'akkẹ, ọfha nta mkpaak ọnạng kw'ọtọhm-m."

14 Wa Devid obeni Gad bẹ́, "Ettem ẹphyaang-m ẹmma o. Uttu kw'm'antto k'mbọhk s'ayokhanạng, tte antera antto k'mbọhk s'Ọvaar Ubinọkpaabyi kw'ikwosi sẹ ibạrẹ-ọbạr."

15 Mạnna wọ kw'Ọvaar Ubinọkpaabyi ọtọhmọ ọkhạnkhạmọ kwididen k'Israẹl, kw'ọtạm k'ekpebha tạrr ukpira k'iwu ch'abẹ age. Wa anạng nnọhna arạbh asenọttaan ukuma chi ape, tạma k'Dan tạrr ukpira Beershẹba. 16 Masẹ oseng-eden kw'Ubinọkpaabyi onemi ọbọhk bẹ́ udimi Jẹrusalẹm echomajạnẹ, Ọvaar Ubinọkpaabyi ofhona ettem otena k'ọkhạnkạmọ nwọ. N'obeni oseng-eden kwẹ bẹ́, "Tte mạnna! Twạr ọbọhk kwọ." Wa oseng-eden nwọ kw'Ọvaar Ubinọkpaabyi n'ọta uninga k'ibyi sabẹ n'aninga ayuk agwu-mạma, s'Arawuna kw'ubin Jẹbus ọkhaam.

17 Masẹ Devid ose oseng-eden nwọ kw'n'ọfhọ anạng, oben Ọvaar Ubinọkpaabyi bẹ́, "Amma kk'ipyibha nsia e; amma okkeri-arạkhạmaan, kk'ipina nsia e. Abẹma mbọ akhenka ade masẹ arạkhạmaan. Abẹ ajẹ bạng udik? Tte ọkhạnkhạmọ ọkpẹkhẹ amma ọttạra ẹchọhmfhạr chaam kadẹ."

18 Ma iwu njọ, Gad ọta okhebha Devid oben-ẹ bẹ́, "Vura, asọhng ata asi ijabyi anạng Ọvaar Ubinọkpaabyi k'ibyi sabẹ n'aninga ayuk agwu-mạma, k'ochọhm kw'Arawuna kw'ubin Jẹbus." 19 Mạnna wọ kw'Devid uvur, otor k'oche kw'Ọvaar Ubinọkpaabyi kk'Gad utima oben-ẹ bẹ́, usi. 20 K'okpe kw'Arawuna n'ose s'ọvaarnạng ọttạra ayok-ikhaana pẹ n'asenga ator-ẹ, uyin k'iyaan ọta ọrạkha uttima ititikha k'isek ma ititikha s'ọvaarnạng.

21 Arawuna ọbạbh bẹ́, "Ode yạn kw'aro ọvaar kwaam n'oror amma ọtọhmnạng kwẹ o?"

Devid ubhina bẹ́, "Nkwu bẹ́, nkwu ndebh ibyi sọ sabẹ n'aninga ayuk agwu-mạma, ọfha nsi ijabyi maa nnạng Ọvaar Ubinọkpaabyi, ọfha ọkhạnkhạmọ kw'otto okhebha anạng mbama ukuma."

22 Arawuna oben Devid bẹ́, "Tte aro ọvaar kwaam ọtạkha ọttọhk fidede f'ọdaakh-ẹ, utima usi ẹnạnga. Kkeri mmaam s'ẹnạnga ẹkkạmachẹ maa, ọttạra otegba f'abẹ n'atima ayuk agwu-mạma, ọttạra ayagba p'mmaam p'm'atima masẹ ommeni. 23 K'ẹvaar chọ, amma Arawuna kk'ekpo mbya phyibh ntạkha nnạng ọma ọvaarnạng. Tte Ọvaar Ubinọkpaabyi, kw'ode Ubinọkpaabyi kwọ, ọtạkha ẹja chọ."

24 Okhenka, ọvaarnạng ubhin Arawuna bẹ́, "Mma e, amma ọdaakh-m bẹ́, nnạng akpokha ma ekpo mbya e. Amma ẹja ẹkkạmachẹ ch'nạn khaam ọttọhk nípua, mạ́mfọhnọ nnạng Ọvaar Ubinọkpaabyi, kw'ode Ubinọkpaabyi kwaam."

Ma wọ Devid odebhi ibyi nnọ sabẹ n'aninga ayuk agwu-mạma, ọttạra mmaam, k'ashẹkẹl p'silva arạbh afa ukuma jobh.

25 Wa Devid usi ijabyi mạma ọnạng Ọvaar Ubinọkpaabyi. Ọfọhnọ ẹja ẹkkạmachẹ ọttạra ẹnạnga ch'idira ma. Ma wọ, Ọvaar Ubinọkpaabyi ọbhaang njọhm sẹ otena k'isisek nnọ. Ọkhạnkhạmọ kw'otto Israẹl ukuma.