1 Wa ekpong ch'iva p'iva p'Saul ọttạra anạng p'Devid, ining tạrr eden ibhir. Wa anạng p'Devid ado ẹfa akhaama-ọkhaama, okhenka, ẹfa efon ororo ẹsa iva p'iva p'Saul.

2 Wa abẹ amaanẹ ajunungva anạng Devid s'urukhu k'Hẹbrọn.

Ochedenwa okpen Amnọn kw'Ahinoam kw'ubin Jẹzrẹl ọmaanẹ;

3 ottong anạng afa okpen Kilẹab, kw'Abigẹl kw'ode opokwa kw'Nabal kw'ubin Kaamẹl ọmaanẹ.

Ottong attaan okpen Absalọm kw'ode nnwa kw'Maaka ọmaanẹ. Maaka wa ode nnwa kw'Talmayi, kw'ode ọvaarnạng kw'Gẹshur.

4 Ottong annebung okpen Adonija kw'ode nnwa kw'Hagit;

ottong asen okpen Shẹphatiya kw'ode nnwa kw'Abital.

5 Ottong asajạnẹ okpen Itreyam kw'ode nnwa kw'Ẹgla ọmaanẹ ọnạng Devid.

Iva mbọ bọ p'uwa abẹ amaanẹ anạng Devid k'Hẹbrọn.

6 K'okpe kw'iva p'iva p'Saul ọttạra anạng p'Devid atim arim-urima, Abnẹr n'utima okpe ngwọma odo ifor sẹ ẹfa gạge k'ikhaana s'iva p'iva p'Saul. 7 Ma okpe ngwọ, Saul kk'oyok ọkhaama kw'okpen Rizpa, kw'ode ọkwanạngnwa kw'Aiya. Wa Ish-Boshẹt obeni Abnẹr bẹ́, "Asi yạn usi bạra ayima oyok kw'otte kwaam abẹ?"

8 Wa ettem ipyibhi Abnẹr, ukwuru udik kw'Ish-Boshẹt ọkpaakhẹ. Ma wọ ubhin bẹ́, "Amma nde ocho kw'ẹpfa ch'n'isi ọtọhm ẹnạng anạng p'Juda sa a? Chemma, amma m'nsạkha echo nnạng atte Saul, ọttạra efona chẹ, ọttạra ayok-ikhaana pẹ. Amma khọ ọbọhk tạm nạ́nttia nnạng Devid. Okhenka, ọma abạrẹ ettem abaar-m udik chemma ukwuru ikwanạng nwa. 9 Tte Ọvaar Ubinọkpaabyi usi amma, Abnẹr oche kw'ọdaakh-ẹ, tte ọbạra usi-m ọttạra-ọttạra, de amma nạn ọttọhk f'Ubinọkpaabyi ochekhi ọnạng Devid nạ́nsia, 10 s'Ubinọkpaabyi obeni bẹ́, m'ọtạkha ẹvaar ch'ọchọhm kw'Saul ọnạng Devid, s'm'utima ẹvaarchi ch'Devid arạnga k'Israẹl ọttạra Juda, tạma k'Dan tạrr ukpira k'Beershẹba." 11 Wa Ish-Boshẹt dạkhẹ Abnẹr udik gwạnọ-gwạnọ nókke ọpọhna, ukwuru s'ọrạbhọ Abnẹr.

12 Ma wọ, wa Abnẹr ọtọhmọ akpaakh-nkkaabha abẹ ata abạbh Devid bẹ́, "Isisek s'anẹ rọ maa? Ọma tạkha echekha amma abẹ, ọfha ntima efhonfhạr ch'Israẹl phyi-phyibh njekha ntor-ọ."

13 Devid ọpọhna bẹ́, "Ujibhi ma, amma kk'echekha ntạkha ọma abẹ. Okhenka, tte mphyem-ọ udik gwạnọ, ọma khaam k'ititikha kábe, kw'oyongu bẹ́, m'atima Mikal, kw'ode ọkwanạngnwa kw'Saul atima akwu ase-m." 14 Ma wọ Devid ọtọhmọ akpaakh-nkkaabha k'Ish-Boshẹt kw'ode nnwa kw'Saul, oben bẹ́, "Abạnga anạng-m ikwanạng kwaam Mikal, kw'ntim mkpatwạr arạbh asen s'aPhilistiya ntạkha."

15 Mạnna wọ Ish-Boshẹt ọnạngẹ ẹfa, abẹ arạbha Mikal k'ọbada kw'Paltiyẹl kw'ode nnwa kw'Laish, atima afona. 16 Okhenka, udim ọtwạnọ abẹ n'ogạma ottor-ẹ nnạm tạrr abẹ akpira Bahurim. Ma wọ Abnẹr oben-ẹ bẹ́, "Ọma kpa nnạm abhạna!" Mạnna wọ ọkpa nnạm ọbhạna.

17 Wa Abnẹr oyeri adecho p'Israẹl oben bẹ́, "Okpe kk'ubhira kw'abạnga n'akhonga bẹ́, adạbh Devid ẹvaar. 18 Okpe kk'obenga ttạng e! Abạnga m'asi oche ngwọ, khiri wa Ọvaar Ubinọkpaabyi ochekhi ọnạng Devid bẹ́, ‘Amma m'nsenga k'ọttọhmnạng kwaam Devid nkkaana anạng paam p'ade Israẹl k'mbọhk s'aPhilistiya, ọttạra k'mbọhk s'awawuna-nạng pabẹ phyibh.’ "

19 Abnẹr ọbạra ọkpaak idik ọnạng anạng p'Bẹnjamin. Ma wọ ubin ofona k'Hẹbrọn bẹ́, ọta ọkpaak Devid udik kwidede kw'anạng p'Israẹl, ọttạra ẹchọhmfhạr ch'Bẹnjamin n'aben bẹ́, asi. 20 K'okpe kw'Abnẹr utim ajunung pẹ otta okhebha Devid k'Hẹbrọn, Devid usi erobha ọnạng Abnẹr ọttạra ajunung pẹ. 21 Ma wọ Abnẹr obeni Devid bẹ́, "Tte mfona mantọmma ọfha nta nttobha anạng p'Israẹl phyibh nchok aro kwaam kw'ode ọvaarnạng, ọfha abẹ atạkha echekha ọma abẹ, ọfha abạra ade ọvaarnạng kw'm'ọdạbh fidede ator k'oche kw'ẹkka chọ ede." Ma wọ, Devid obeni Abnẹr ọbhạna k'idira.

22 Ma okpe nwa ma, anạng p'Devid ọttạra Joab akwuna ekpong, ọttạra ekpo-sabhaada py'abẹ achi. Okhenka, wa Abnẹr dạkhẹ Devid abẹ k'Hẹbrọn núninga, s'uwa Devid kk'e ọtọhma ọbhạna k'idira. 23 Masẹ Joab ọttạra akpongnạng pẹ phyibh akpir, abẹ akpaakh-ẹ bẹ́, Abnẹr kw'ode ujunungnwa kw'Nẹr kk'ukwua k'ọvaarnạng, ọttạra bẹ́, ọvaarnạng kk'ẹ ọtọhma ọbhạna k'idira.

24 Ma wọ Joab ofon okhebha ọvaarnạng ọbạbh-ẹ bẹ́, "Bạng udik gwọ asi maa? Mmaang bẹ́, wạra Abnẹr ukwu maa, ukwuru yạn kw'attiẹ-ẹ ọbọhk ofona? Mantọmma, kk'ofona! 25 Ọma asong ọnạng-khira kw'Abnẹr kw'ode nnwa kw'Nẹr ode ma? Ukwu bẹ́, ukwu ọbọhr-ọ, ọfha osonga osenga kwọ, ọbạra osonga udik kwidede kw'm'asi."

26 Joab ubina urik Devid, ọttọhm akpaakh-nkkaabha abẹ akhubh Abnẹr ọkpa-nnạm. Abẹ avạkh-ẹ k'isipe ch'Sira atim-ẹ akpa nnạm. Okhenka, wa Devid udik ngwọ kósong. 27 Ma o, masẹ Abnẹr ọkpa nnạm k'Hẹbrọn, Joab utim-ẹ ọnwa k'ẹmaanggọ, usi aben bẹ́, n'oben bẹ́ ọkkaabh-ẹ udik. Joab ukhum-ẹ imaana k'ẹfhạr, ope, utima otera obo kw'nnwọkka kwẹ, Asahẹl.

28 Masẹ Devid ọbhaang udik ngwa, oben bẹ́, "K'ititikha s'Ọvaar Ubinọkpaabyi, mbọhk saam ọttạra s'anạng p'amma ndạbhẹ kíde k'obo kw'Abnẹr kw'ode nnwa kw'Nẹr. 29 Tte isẹ s'Abnẹr itwạn Joab abẹ, ọttạra ẹchọhmfhạr chẹ phyibh! Tte ẹchọhmfhạr ch'Joab nạngẹ ọnạng eworu kw'ọkhaam ọyaakha-fhok, ọttạra okpokhora, ọttạra ọnạng kw'n'utima ichi osenga, ọttạra kw'm'ope k'ọkkangkkang-kkro, ọttạra kw'oworu uchiattọhk."

30 (Wa Joab ọttạra nnwọkka Abishayi afhọ Abnẹr, ukwuru s'kk'nnwotte kwabẹ Asahẹl ọfha k'ekpong ch'abẹ arim k'Gibeọn.)

31 Ma wọ Devid obeni Joab ọttạra anạng phyibh p'atwạnọ abẹ bẹ́, "Abạnga ayaakhẹ ọvạra f'abạnga age k'ifor, age ọvạra bina, abạnga atima nkwuna s'Abnẹr." Ọvaar Devid ẹma oseng otor ikwukwur s'itọhk apfura nnạm. 32 Wa abẹ annọhng Abnẹr ma Hẹbrọn. Ọvaar Devid ọgạm ẹmạng k'ẹrạng-k'ẹrạng k'epekwur ch'Abnẹr. Mạnna wọ anạng phyibh agạm.

33 Ọvaar Devid ọkkọhnọ ebomạng ọnạng Abnẹr bẹ́,

"Ma ọbaan kha bẹ́, Abnẹr ope masẹ udindingi-nạng?

34 Abẹ mbọhk sọ nádạbha,

Abẹ khọ mgbakkọhbhọ k'mfhok nákpa,

akwu ape masẹ ọnạng kw'ope k'mbọhk s'abyibyanạng."

Anạng agạma adạkhẹ k'ẹrạng-k'ẹrạng.

35 Ma wọ abẹma phyibh akwu achini Devid bẹ uchi ọttọhk s'iwu itim ining, okhenka, wa Devid ochekhi oben bẹ́, "Tte Ubinọkpaabyi ọfhọ-m, de amma ndạnẹ ọttọhk fidede maa akhaam k'ẹmma bạrasẹ iwu n'ẹsa!"

36 Wa anạng mbọ phyibh p'aning ma age udik ngwọ utum, akwẹ ọbạra orebh bẹ ettem. K'udik ọkka, udik kwidede kw'ọvaarnạng usi, orebhi bẹ ettem. 37 Osenga ma, ma iwu njọ jọ ch'anạng p'Juda phyi-phyibh, ọttạra anạng p'Israẹl phyibh asong bẹ́, ọbọhk kw'ọvaar Devid k'obo kw'Abnẹr kw'ode nnwa kw'Nẹr kòde.

38 Ma wọ ọvaarnạng obeni anạng pẹ bẹ́, "Node bẹ́, abạnga kásong bẹ́, nnwa kw'ọvaarnạng ọttạra ọfanạng kwididen wọ ope chemma k'Israẹl o? 39 Chemma nwa, chibhi s'ode bẹ́, amma wọ nde ọvaarnạng kw'abẹ abyeng ana k'echo, ifor imạm-m o. Ajunung mba p'ade iva p'Zeruya akhaam ẹfa ayọhng-m. Tte Ọvaar Ubinọkpaabyi utwuk ipyibha ch'upyibhanạng otor k'usisi kwẹ!"