1 K'okpe kw'uwa ọvaar Devid kk'ẹyạr ọvạkha k'akhẹ k'ọvaarter, Ọvaar Ubinọkpaabyi ọbạra usi ẹ uruk k'ẹmẹm ọttạra awawunanạng pẹ phyibh p'abaabh-ẹ ọbaabha. 2 Wa ọvaarnạng obeni Natan kw'ode usi-ẹyaakha kw'Ubinọkpaabyi bẹ́, "Kker e, amma nnukhu k'ọvaarchọhm kw'abẹ atim mkpaakha s'sida asi k'okpe kw'Ikwukwur s'Echekha ch'Ubinọkpaabyi itim ining k'ukkira."

3 Natan ubhina ọvaarnạng bẹ́, "Fona ororo si udik kwidede kw'ubin-ọ k'ettem, khiri Ọvaar Ubinọkpaabyi uning abọ ma."

4 Ma irunguchẹ njọ, ọkpaakha-dik kw'Ọvaar Ubinọkpaabyi ukpir Natan, oben bẹ́,

5 "Sọhng ata akpaak ọtọhmnạng kwaam Devid bẹ́, ‘Amma Ọvaar Ubinọkpaabyi mbeni bẹ́ ọma sạng kw'm'asi ọchọhm kw'amma m'nnuk e. 6 Amma k'ọchọhm tạm nạ́nnukha tạma k'iwu ch'ntim anạng p'Israẹl mbina k'Ijip, tạrr ukpira maa iwu ch'chemma. Amma n'nnuk k'ibyi-k'ibyi k'ukkira m'asẹ ọchọhm kwaam. 7 Wa nnạngẹ adạbhẹ p'nkhạma s'Israẹl ẹfa bẹ́, abẹ atima anạng pabẹ eden masẹ akkeri-arạkhạmaan atim arạkhạmaan pabẹ eden. Amma kk'bẹ abẹ nsenga k'ibyi-k'ibyi, mbạra mming bẹ abẹ k'akkira. Bạng okpe gwọ kw'uwa amma kk'adạbhẹ mbọ mbena bẹ́ udik kw'abẹ nạn ọchọhm kw'mkpaakha s'sida násia anạng-m?’ "

8 "Ma wọ m'akpaak ọtọhmnạng kwaam Devid bẹ́, ‘Ọvaar Ubinọkpaabyi kw'Ẹfa phyibh obeni bẹ́, amma ntạkhọ k'ekpa s'n'akkeri itirakpo, nkwu nsi-ọ ọdạbhẹ kw'anạng paam, Israẹl. 9 Amma kk'abọ nninga k'ibyi sidede s'kk'ata, mbạra nnạbh-ọ k'mbọhk s'awawunanạng pọ phyibh p'n'arima abọ. Ma wọ nkwu nsi-ọ ayin eche masẹ eche ch'anạng p'ayini eche ọtạm maa k'ọyagbin. 10 Amma nnạngẹ anạng paam Israẹl ibyi, mbạra nttima bẹ arạnga, ọfha abẹ asenga ma akhaama ibyirukhasẹ sabẹ, ọfha ọnạng nạngẹ adạkhẹ bẹ ẹmma ọphyaangẹ. Abyibyanạng dạkhẹ bẹ irem mánạng k'oche kw'uwa abẹ n'asi bẹ kanạma, 11 ọttạra k'okpe kw'ntek asi-aponga p'anạng paam, Israẹl. Amma m'mbạra nsi-ọ aninga k'ẹmẹm ọttạra awawunanạng pọ phyibh.

" ‘Ọvaar Ubinọkpaabyi ọyaakhẹ bẹ́ ẹma Ọvaar Ubinọkpaabyi oyeni wọ m'uttima ẹchọhmfhạr chọ arạnga ọnạng ọ. 12 K'okpe kw'iwu sọ kk'ittonga maa ọyagbin, ata akwokha ọyọhng ọttạra ab'otte pọ, m'nnengi nnwa wạnọ k'ikhaana s'iva pọ, kw'ode isẹ sọ oyeni, mbạra nttima ọvaarfhon kwẹ arạnga. 13 Ẹma wọ m'usi ọchọhm ọnạng-m. Amma m'mbạra nttima ẹvaar ch'ọvaarfhon kwẹ arạnga tạrr ipimmanitor. 14 Amma wọ m'nde otte kwẹ, ẹma m'ọbạra ode nnwa kwaam. K'okpe kw'usi ipina, m'mvun-ẹ uchi-nwa, mbạra ntima ayokhanạng nnạng-ẹ irem. 15 Okhenka, ọnạng kòde kw'm'ọtạkha idạdaakha s'nkhaam abẹ, oche kw'uwa ntạk sẹ k'Saul, kw'uwa mvạkh-ẹ ẹvaar nna kabạnga k'ititikha. 16 Ọchọhm kwọ ọttạra ọvaarfhon kwọ m'uttima arạnga tạrr ipimmanitor.’ "

17 Ma wọ wa Natan ọkpaakhẹ Devid idik s'eyaakha njọ phyibh.

18 Wa ọvaar Devid ọnwa k'ukkira ọta uninga ẹyạr k'ititikha s'Ọvaar Ubinọkpaabyi, oben bẹ́,

"O Ọvaar Ubinọkpaabyi kw'Ọyọhng, amma nde anẹ, ẹchọhmfhạr chaam ẹgba kha mbạng, kw'adir-m anạna k'ibyi-demasẹ nna o? 19 O Ọvaar Ubinọkpaabyi kw'Ọyọhng, akwẹ ma nókponga. Ọma kk'ẹyaakha asia ch'eten k'ẹvaar ch'ọttọhmnạng kwọ k'okpe kw'oro. O Ọvaar Ubinọkpaabyi kw'Ọyọhng, nttọhna nna ide s'ayokhanạng o?

20 "O Ọvaar Ubinọkpaabyi kw'Ọyọhng, bạng udik gwọ kw'amma Devid m'mbạra mkpaakh-ọ, s'atạm k'etạma asonga ọtọhmnạng kwọ o? 21 Asengi echekha chọ ọttạra ẹkka ọkkachẹ chọ achẹ, asi ẹyaakha anạng amma ọtọhmnạng kwọ.

22 O Ọvaar Ubinọkpaabyi kw'Ọyọhng, kk'abạra e! Onạng kòde kw'ode masẹ akhọ. Ubinọkpaabyi ọdwạkh-ọdwạk kòde kw'obeng abọ, otor k'oche kw'kk'atọhng pamạna antima ammaanga. 23 Bạng anạng bọ ade masẹ anạng pọ Israẹl? Ofhon gwạnọ-gwạnọ maa ọyagbin kòde kw'ode masẹ ofhon kw'Israẹl, kw'Ubinọkpaabyi ọta obhek ọnạng ẹma oyeni, osenga ma ọkhaama eche, ọbạra usi ikkukkona-dik, ọttạra idik s'ipe anạng ifor k'okpe kw'ukhubhu idifhon nnọkha, ọttạra ikha sabẹ ma ititikha s'anạng pọ, p'abhekhi k'Ijip. 24 Ọma kk'anạng p'Israẹl arạnga attima, masẹ anạng pọ oyeni. Ọma Ọvaar Ubinọkpaabyi kk'Ubinọkpaabyi kwabẹ akwu adia tạrr ipimmanitor.

25 "Ma wọ, O Ọvaar Ubinọkpaabyi, chok echekha ch'kk'asia ukwuru amma ọtọhmnạng kwọ, ọttạra ẹchọhmfhạr chẹ tạrr ipimmanitor. Si oche kw'kk'achekha, 26 ọfha eche chọ ẹbạr ipimmanitor. Ma wọ anạng n'abạra aben bẹ́, ‘Ọvaar Ubinọkpaabyi kw'Ẹfa phyibh wọ ode Ubinọkpaabyi kw'Israẹl e!’ Ẹchọhmfhạr ch'amma ọtọhmnạng kwọ Devid m'ittima arạnga k'ititikha sọ.

27 "O Ọvaar Ubinọkpaabyi kw'Ẹfa phyibh, kw'ode Ubinọkpaabyi kw'Israẹl, ọma kk'eyaakha nja asia anạng amma ọtọhmnạng kwọ, aben bẹ́, ‘Amma Ọvaar Ubinọkpaabyi m'nsi ọchọhm nnạng-ọ.’ Ma wọ amma ọtọhmnạng kwọ kk'ottembạr nkhaama bẹ́, nse njọhm nna ọnạng-ọ. 28 O Ọvaar Ubinọkpaabyi kw'Ọyọhng, ọma wọ ade Ubinọkpaabyi! Echekha chọ ede udik ọkka. Ọma kk'idik nna abạra achekha anạng amma ọtọhmnạng kwọ. 29 Tte ettem erebh-ọ bẹ́, idia ch'ado iva p'iva paam, ininga efona ororo k'ititikha sọ tạrr ipimmanitor; otor k'oche kw'ọma Ọvaar Ubinọkpaabyi kw'Ọyọhng kk'akpaakha. M'osenga k'idia chọ, iva p'iva p'amma ọtọhmnạng kwọ akhaama idia tạrr ipimmanitor."