1 Wa abẹ akpaakhẹ Joab bẹ́, "Ọvaarnạng ọgạm ẹmạng kạkha e, ọbạra utima nkwuna s'obo kw'Absalọm." 2 Ma iwu njọ, akpongnạng n'ayaang erobha ch'ekhema chabẹ ajẹ, abẹ n'abhạkhẹ atima nkwuna sabẹ abhaang bẹ́ ọvaarnạng utim nkwuna s'nnwa kwẹ kw'ope. 3 Ma iwu njọ, ajunung mbọ abẹkh-ọbẹk ata anwa k'efhon-diden masẹ anạng p'ekpong ipyibh iwu bạra abẹ arạbh mkpạr asẹ akwuna. 4 Ọvaarnạng ububha mbọhk k'ititikha n'ọgạma k'ẹrạng-k'ẹrạng bẹ́, "O nnwa kwaam Absalọm! Absalọm e! Nnwa kwaam e! O nnwa kwaam!"

5 Ma o, Joab ọta ọnwa k'ọchọhm kw'ọvaarnạng oben-ẹ bẹ́, "Chemma kk'akpongnạng pọ phyibh mkpạr arenga, p'ade anạng p'akkaan akpen pọ, ọttạra akpen p'ajunungva ọttạra p'apanạngva pọ, ọttạra p'ipanạng pọ, ọttạra p'ayok pọ. 6 Atera akhọhkha awawunanạng pọ idạdaakha, awun anạng p'akhọhkh-ọ idạdaakha. Chemma, kk'akhọhkha bẹ́, adecho p'akpongnạng, ọttạra akpongnạng pabẹ, ọttọk nápua kakhọ k'ititikha. Amma oyeni kk'nsia k'iwu ch'chemma bẹ́, wạra m'orebh-ọ de wạra amạna mba phyibh ampe, Absalọm uruk akpen. 7 Nemi eden bina ata age anạng pọ nttem. Amma nchekhi k'eche ch'Ọvaar Ubinọkpaabyi bẹ́, ode nạn k'iyaan náchera ayin, bạrasẹ iwu echobha, ujunung wạnọ-wạnọ máse kw'm'ọbạra uninga abọ. Udik ngwọ m'upyibh ọyọhnga ipyibha chidede ch'kk'ittia ekhebh-ọ k'akpen, tạma k'idikkobh chọ kpira mantọmma."

8 Ma wọ ọvaarnạng ubin ọta uninga ẹyạr k'ẹbaakhamma. Masẹ abẹ n'akpaakhẹ anạng mbọ bẹ, ọvaarnạng uning kha ẹbhaakhamma, abẹma phyibh abina ata akhebh-ẹ kha.

Ma okpe ngwọ, anạng p'Israẹl kk'arạbha afona k'abẹ k'ichọhm. 9 K'nkhạma s'Israẹl phyi-phyibh abaabha ọbaabha, anạng n'akhaanga ayok idik aben bẹ́, "Ọvaarnạng wọ wa ọkkaan mạna k'mbọhk s'awawuna-nạng pamạna. Ẹma wọ wa ọbạra ọrạbha mạna k'mbọhk s'aPhilistiya. Okhenka, kk'ọrạbha urik ofhon ukwuru Absalọm. 10 Absalọm oyeni kw'uwa ambyeng ana k'echo bẹ́, ọdạbh mạna, kk'upua. Usi yạn bạra nạn udik tạm námkpaakha k'oche wạra ọvaar Devid m'ọkpa nnạm o?"

11 Ọvaar Devid ukwu ọtọhm ẹkkaabha ọnạng Zadọk ọttạra Abiyata p'ade afọhnẹja bẹ́, "Abạnga abạbh adennạng p'Juda bẹ́, Abạnga n'akhibhi okpe asi mbạng, kw'abạnga nạn kạnákwu akwu atạkha ọvaarnạng ọkpa nnạm k'akhẹ k'ọvaarter o, ‘Abhaang idik sabẹ n'akpaak abaabha Israẹl kk'ọvaarnạng oyeni ittia k'itọhng. 12 Abạnga ade afona-nạng paam, p'isẹ rạnẹ isi. Ukwuru yạn kw'abạnga m'ade akponga-nnạm p'm'akwu bẹ́, akwu atima ọvaarnạng abhạna o?’ 13 Abạnga aben Amasa bẹ́, ‘Ọma ande isẹ rạnẹ. Tte Ubinọkpaabyi usi-m oche kwidede kw'ọdaakhẹ, ode nạn khọ odecho kw'akpongnạng paam nạ́nsia k'akpen pọ phyibh, ntima ntera echo ch'Joab.’ "

14 Ma wọ Devid odebhi nttem s'aJuda, usi abẹ akhaama ẹkka jạnẹ. Abẹ atọhm ẹkkaabha anạng ọvaarnạng aben bẹ́, "Ọma ọttạra atọhmnạng pọ phyibh, akpa nnạm." 15 Mạnna wọ ọvaarnạng ọkpa nnạm, ukwu ukpira k'Ọraanga kw'Jọrdan.

Ma okpe ngwọ, akpongnạng p'Juda kk'kpikpira akpira k'Gilgal bẹ́, akwu akhebha ọvaarnạng ma, ọfha abẹ atima abẹ ajekha Jọrdan. 16 Shimeyi kw'ode nnwa kw'Gera, kw'ubin Bahurim, k'ẹkhạma ch'Bẹnjamin, utim akpongnạng p'Juda ubina ẹbhạr-ẹbhạr ọta okhebha ọvaar Devid. 17 Anạng p'uwa atwạnọ ọvaar Devid abẹ, p'abin Bẹnjamin ade anạng nnọhna mfa ukuma arạbh jobh, ọttạra Ziba kw'uwa ode ọtọhmnạng kw'ẹchọhmfhạr ch'Saul, ọttạra ajunungva pẹ chi, ọttạra atọhmnạng pẹ ẹrạbh. Wa abẹ adwuk-udwukha asạkha k'Jọrdan akhebha ọvaarnạng kha. 18 Abẹ atim ẹchọhmfhạr ch'ọvaarnạng asenga k'ibyi s'anạng n'akwu ajekha, ajekha k'ukhubha. Abẹ abạra asi udik kwidede kw'ọvaarnạng ororu.

Masẹ ọvaarnạng n'odo ifor bẹ́ ojekha Jọrdan, Shimeyi kw'Gera ofhonu, n'otto ukhubha k'ikpukpobha ma ititikha s'ọvaarnạng, 19 oben-ẹ bẹ́, "Aro kwaam o, totokhạn, mpina saam kásaana o. Nchin-ọ uchini, mpina s'amma ọtọhmnạng kwọ nsi k'okpe kw'uwa abin k'Jẹrusalẹm kájima. Tte udik ngwọ ọsa ọvaarnạng k'ettem, 20 khiri amma ọtọhmnạng kwọ nsong kha bẹ́ kk'ipyibha nsia. Okhenka, amma kk'nkwua chemma masẹ ocheden-nạng kw'ubin k'nkhạma s'Josẹph bẹ́, nkwu nkhebha aro ọvaar kwaam."

21 Ma wọ Abishayi kw'Zẹruya ofhonu obeni bẹ́, "Shimeyi ọbaan k'obo ma udik ngwa ma e. Ẹma ọta unnukhu ọnạng kw'ọvaar Ubinọkpaabyi kk'ana obyenga k'echo."

22 Devid ubhina bẹ́, "Abạnga ma iva p'Zeruya, osengi bạnga yạn maa udik ngwa? Abạnga ẹfa jạnẹ-jạnẹ kákham bẹ́, abạnga age ẹmma ma udik ngwa. Ọbaan ma bẹ́, abạnga afhọ ọnạng ma Israẹl chemma o? Amma oyeni nsong kha bẹ́, amma wọ nde ọvaarnạng kw'Israẹl chemma nwa." 23 Ma wọ ọvaarnạng ochekhi ọnạng Shimeyi bẹ́, "Ọma mápe e."

24 Wa Mẹphiboshẹt kw'ode nnwa-mfhona kw'Saul, ọbạra ọta okhebha ọvaarnạng. Mfhok sẹ nókpobha, agba-phyạbha nọ́bra uphyira, ọvạra f'ifor nókpobha, tạma k'iwu ch'ọvaarnạng ofon k'Jẹrusalẹm, tạrr ukpira k'iwu ch'ọkpa nnạm k'idira. 25 Masẹ ubin k'Jẹrusalẹm ukwu okhebha ọvaarnạng, ọvaarnạng ọbạbh-ẹ bẹ́, "Mẹphiboshẹt, ukwuru yạn kw'uwa nạn abamẹ nátwạna afona?"

26 Ọpọhn-ẹ bẹ́, "Aro ọvaar kwaam, masẹ amma ọtọhmnạng kwọ nphyạkhẹ mkpẹtẹ, mbeni ọtọhmnạng kwaam bẹ́ okken-m ẹnyạnyaang chaam, mvura nnyạar, ọfha ntwạn ọvaarnạng abẹ. Wa Ziba kw'ode ọtọhmnạng kwaam wọ ọbọhr-m, khaam nókkena. 27 Kk'amma ọtọhm-nạng kwọ idik ọbọhma ọnạng ọma aro kwaam. Ọma aro ọvaar kwaam ade masẹ oseng-eden kw'Ubinọkpaabyi. Si oche kw'ọbaan bẹ́, asi. 28 Wa ọnạng kòde kw'ubin k'ẹnạmma ch'otte kwaam kwididen, kw'nạn k'obo nọ́baana k'mbọhk s'ọvaarnạng kwaam. Okhenka, ater anạng amma ọtọhmnạng kwọ ininga k'ikhaana s'anạng p'n'achi ọttọhk k'okpokkro kwọ. Amma nkhaam bạng ẹfa ch'm'mfona ororo mbạbh adạkhẹ ọvaarnạng ọttọhk?"

29 Ọvaarnạng oben-ẹ bẹ́, "Tte mạnna ma udik ngwọ. Amma kk'ọma ọttạra Ziba ẹfa nnạnga bẹ́, abạnga ata akhebh ekpo py'Saul anạng abạngama oyeni."

30 Mẹphiboshẹt oben ọvaarnạng bẹ́, "Masẹ aro kwaam kk'ukwuna k'idira, tte ẹma Ziba ọtạkha ekpo phyibh."

31 Wa Bazilayi kw'ubin k'ẹkhạma ch'Gilead ọbạra ubina k'ofhon kw'Rogẹlim ukwu, ọfha ọtwạn ọvaarnạng abẹ ojekha Jọrdan, ọfha ọbạra urikh-ẹ k'eden. 32 Wa Bazilayi kk'ọtạma mororo, s'uwa n'ode icho arạbh annebung. Wa ọbạra ode ọnạng ọkka kw'uwa n'okkeri ọvaarnạng k'okpe kw'uning k'Mahanayim. 33 Ọvaarnạng oben Bazilayi bẹ́, "Twạn-m abẹ anjekha k'Jẹrusalẹm. Amma m'nkker-ọ okkeri."

34 Okhenka, Bazilayi ubhin ọvaarnạng bẹ́, "Amma m'nnuk adạkhẹ mkpira yạn, kw'm'ntwạn ọvaarnạng abẹ mfona k'Jẹrusalẹm? 35 Amma n'nde icho arạbh annebung. Maa, s'm'nsonga adạkhẹ udik kw'ujibhi ujibh ọttạra kw'nạnújibh o? Amma erobha ọttạra ọkhạmana dạk kạ́nsong. Amma ọtọhmnạng kwọ orebh f'ichiakpo ọttạra f'atwuk dạk kạ́mmaang. Mmạng s'akkọhn-mmạng s'ajunung ọttạra s'ipanạng dạk kạ́mmaang. Ka yạn kw'amma ọtọhmnạng kwọ n'abạra nkwu nttạra ọma aro ọvaar kwaam ẹtọhkha o? 36 Amma kk'ẹtaam nja ch'ọvaarnạng nạ́mbaana. Amma ọtọhmnạng kwọ m'nkhenka ntwạn ọmma ọvaarnạng abẹ njekha k'Jọrdan, nnikh-ọ k'oden-khuma. 37 Tte amma ọtọhmnạng kwọ mkpa nnạm, ọfha mpe k'akhaam k'ofhon mbaanga apekwur p'otte, ọttạra ọkka kwaam. Okhenka, kkeri ọtọhmnạng kwọ Kimham maa. Tte ẹma nwọ ọtwạn aro ọvaar kwaam abẹ ojekha k'ukhubha. Si fidede f'akkẹ bẹ́ m'asi anạng-ẹ."

38 Ọvaarnạng oben bẹ́, "Kimham m'ojekha abamẹ ojekha. Amma m'nsi fidede f'nkkẹ, nnạng-ẹ. Fidede f'ọma abạra aror, m'nsi-usi nnạng-ọ."

39 Ma wọ anạng phyibh attạr ọvaarnạng ajekha k'Jọrdan. Ọvaarnạng o, ukwu ọbaakha Bazilayi, ọbạra ọyọhbh-ẹ itta. Bazilayi ọkpa nnạm ọbhạna k'akhẹ k'ofhon.

40 Masẹ ọvaarnạng ojek k'ukhubha kw'Gilgal, Kimham ọtwạnọ abẹ ojekha. Akpongnạng phyibh p'Juda, ọttạra ibhaakha s'akpongnạng p'Israẹl kk'ọvaarnạng atima ajekha k'ukhubha.

41 Okpe núbhira, ajunung phyibh p'Israẹl akwu k'ọvaar Devid akwu aben-ẹ bẹ́, "Ode yạn kw'ivotte pamạna p'Juda afu ọvaarnạng atim-ẹ ọttạra ẹchọhmfhạr chẹ, ọttạra akpongnạng pẹ phyibh ajekha Jọrdan afona o?"

42 Wa ajunung p'Juda phyibh abhin ajunung p'Israẹl bẹ́, "Wa ansi oche ngwọ ukwuru bẹ́, ọvaarnạng ọttạra amạna mba ande anạng bạnọ. Mbạng vọ ode ottempyibh kw'abạnga? Amạna kk'ọttọhk vạnọ-vạnọ f'ọvaarnạng antạkha anchi? Amạna kk'ọttọhk vạnọ-vạnọ antạkha annạng amạna mba oyeni?"

43 Ma wọ ajunung p'Israẹl n'abhin ajunung p'Juda bẹ́, "Amạna-mba ankhaam nkhạma jobh ma ẹvaar nja, ẹgwọ usi ankhaam Devid ọtạm anyọhnga bạnga. Abạnga asi yạn asẹkhẹ mạna oche ngwa ma o? Amạna-mba sạng p'uwa anchi eden amben bẹ́, oyonga ọvaarnạng kwamạna m'ọkpa nnạm?"

Mạnna wọ kw'ajunung p'Juda afon ororo ajẹ ẹkhọhr ma udik ngwọ.