1 Masẹ Ish-Boshẹt kw'ode nnwa kw'Saul ọbhaang bẹ́, Abnẹr kk'upua k'Hẹbrọn, ẹfa ẹsẹ-ẹ. Efhonfhạr ch'Israẹl phyibh ininga k'ojora. 2 Wa nnwa kw'Saul ọkhaam ajunungva afa p'uwa ade adecho p'arim-ekpong. Wa oyok wạnọ okpen Baana, nwọkha okpena Rekab. Wa abẹ ade iva p'Rimọn kw'ubin Berot, k'ẹkhạma ch'Bẹnjamin. Wa abẹ n'atạkha Berot attạra k'ifhon s'isi ẹkhạma ch'Bẹnjamin, 3 ukwuru s'uwa anạng p'Berot arạbhọ afona k'Gittayim, ata aruk mạma masẹ akhikhennạng tạrr ukpira k'iwu ch'chemma.

4 (Wa Jonatan kw'ode nnwa kw'Saul ọkhaam ujunungnwa kw'ọphyạkhẹ mkpẹtẹ. Nnwa nwọ wa ode icho isen k'okpe kw'abẹ atim ẹkkaabha ch'obo kw'Saul ọttạra Jonatan k'Jẹzrẹl akwu. Wa ọrạrạkha kwẹ udir-ẹ bẹ́, utima abẹ ọrạbh. Okhenka, masẹ n'udwukha bẹ́ utim-ẹ ofona o, nnwa nwọ ọnnaang-ẹ otto, ọphyạkhẹ mfhok. Wa okpen Mẹphiboshẹt.)

5 Ma wọ Rekab ọttạra Baana p'ade iva p'Rimọn p'abin Berot, abin afona k'ọchọhm kw'Ish-Boshẹt. Wa abẹ akpir kha k'ọyakpattem k'okpe kw'Ish-Boshẹt n'okwokha ọyọhng. 6 Abẹ anwa k'ọchọhm etaanga aben bẹ́ abẹ ata awit tạtạkha, abẹ akhum-ẹ imaana k'ẹfhạr, afhẹ-ẹ. Rekab ọttạra nnwọkka Baana arạbh afona.

7 Masẹ abẹ kk'anwa k'ọchọhm, abẹ afona k'ẹmaanggọ ch'Ish-Boshẹt akhebh-ẹ s'utim uyim k'ibhikha, akhum-ẹ afhọ. Abẹ akpaar-ẹ echo atima chẹ asenga k'ukhubha kw'Araba ma irungu njọ afona. 8 Abẹ atạk echo ch'Ish-Boshẹt akkena Devid k'Hẹbrọn, aben ẹma ọvaarnạng bẹ́, "Kkeri echo ch'Ish-Boshẹt maa kw'ode nnwa kw'ọwawuna-nạng kwọ kw'ode Saul, kw'ọkhạmọ bẹ́, ọfhọ-ọ. Chemma, Ọvaar Ubinọkpaabyi kk'udik ngwa utwukha k'Saul ọttạra iva p'iva pẹ k'echo ch'aro kwaam, kw'ode ọvaarnạng."

9 Okhenka, Devid ọpọhn Rekab ọttạra nnwọkka Baana p'ade iva p'Rimọn, kw'ubin Berot bẹ́, "K'oche Ọvaar Ubinọkpaabyi kw'ọrạbh-m k'dạma-dạma kwidede urukhu akpen, 10 okpe kw'ọnạng ukwu otekh-m bẹ́, Saul kk'upua, s'ọkkẹ bẹ́, ọnạng-m ẹkkaabha ọkkachẹ, wa mvạkh-ẹ mfhọ k'ofhon kw'Ziklag. Ẹtaam ch'uwa nsi-ẹ k'ẹkkaabha chẹ jọ ma! 11 M'ntera nsi nyọhng-ọyọhnga, k'okpe kw'abyibyanạng akhebh ọnạng kw'otor-otor k'ibhikha, k'akhẹ k'ọchọhm, afhọ. Ọbaan bẹ́, nnor isẹ s'ọnạng nwọ mbạbh bạnga, mbạra ndimi bạnga ma ọyagbin nwa!"

12 Ma wọ Devid ọnạngẹ anạng pẹ ẹfa bẹ́, abẹ afhọ bẹ. Wa abẹ akpaar mbọhk ọttạra mfhok sabẹ, atạkha sẹ akpạna abaanga isipe ch'Hẹbrọn. Okhenka, wa abẹ atạk echo ch'Ish-Boshẹt atta annọhnga k'epekwur ch'Abnẹr kha Hẹbrọn.