1 Wa ọkhọhr-nạng mạnna wạnọ uning ma kw'okpen Shẹba, kw'ode ujunungnwa kw'Bikiri, kw'ubin k'ẹkhạma ch'Bẹnjamin. Wa oge ẹsa, owon bẹ́,

"Amạna mba okhebh k'Devid kánkhaam,

amạna okhebh k'nnwa kw'Jẹsẹ kánkhaam!

Anạng p'Israẹl o, ọnạng-ọnạng ofona k'akhẹ k'ọchọhm e!"

2 Mạnna wọ kw'anạng p'Israẹl phyibh afhumu Devid, ator Shẹba kw'Bikiri ofhonu. Okhenka, anạng p'Juda atoru ọvaarnạng kwabẹ, tạma k'ọraanga kw'Jọrdan tạrr ukpira k'Jẹrusalẹm.

3 Masẹ Devid ukwun k'ọvaarter kwẹ k'Jẹrusalẹm, ọtạk ayok pẹ ncho jobh p'kk'ofona urik bẹ́ abẹ akkeri ọvaarter, ochok k'ọchọhm gwạnọ, ọtạkha anạng ochok bẹ́ abẹ akkeri bẹ. Wa n'ọnạng bẹ fidede f'abẹ aroru, okhenka, bẹ abẹ núyima. Wa ipanạng mbọ aning ma ibyi nnọ rạnẹ masẹ apokwa tạrr abẹ akhebha ma, ape.

4 Wa ọvaarnạng obeni Amasa bẹ́, "Tima iwu ittaan yeri aJuda ọttạra ọma oyeni, abạnga akwu." 5 Okhenka, masẹ Amasa ofon bẹ́, ọta oyeri aJuda o, okponga ma tạrr okpe kw'ọvaarnạng ugi-ẹ oseng.

6 Ma wọ Devid obeni Abishayi bẹ́, "Kker e, igbaan s'uwa Shẹba kw'ode nnwa kw'Bikiri usi mạna, m'iyọhnga s'uwa Absalọm usi e. Tima ajunung p'aro kwọ khubh-ẹ, deja, m'oror ifhon-diden s'ikhaam ẹfa ọta uttubha, ọnnaanga mạna." 7 Mạnna wọ kw'ajunung p'Joab ọttạra anạng p'Kẹrẹt ọttạra anạng p'Pẹlẹt, ọttạra akkemkpa phyibh, atoru k'ntọhna s'Abishayi kw'ode odecho, afona. Wa abẹ abin k'Jẹrusalẹm akhubh Shẹba, kw'ode nnwa kw'Bikiri.

8 Masẹ abẹ aning k'ẹtakpa chididen k'Gibeọn, Amasa ukwu okhebha bẹ ma. Wa Joab oge ekpong-nya, ọtạkha ọmaananwa kw'ọjaabhẹ nnạm mfa kw'oge k'ọpa, ọdạbh k'udikpa kw'ọkpa k'irin.

9 Joab oben Amasa bẹ́, "Nnwotte kwaam, usi-ọ yạn?" Joab utima udimbọhk kwẹ ọvạkha Amasa k'agba-phyạbha s'n'oben bẹ́ ọbaakh-ẹ ọbaakha. 10 Amasa utum k'imaana s'Joab utim k'ọbọhk núgia. Joab orengi imaana nnọ ukhum-ẹ okpe ngwọ gwạnọ ma ẹfhạr bẹ́ dwạrr, tạrr afhạrọ ayin atto k'isisek. Amasa ope. Ma wọ Joab ọttạra nnwotte Abishayi akhubhu Shẹba kw'ode nnwa kw'Bikiri.

11 Wa ọnạng wạnọ k'ikhaana s'anạng p'Joab obe utuma apfura p'Amasa oben bẹ́, "Ọnạng kwidede kw'obe Joab ọttạra Devid abẹ, tte otor Joab!" 12 Amasa ọrạn k'isẹ sẹ ma eden-ttem. Ujunung nwọ n'ose bẹ́, akpongnạng phyibh n'ata abe ma, akker-ẹ. Masẹ ode bẹ́ ọnạng kwidede kw'ukpir ma ibyi s'Amasa uning n'obe ma, ukwu ọtwạr-ẹ ubina k'eden, urur-ẹ k'owonu gwạnọ, ọtạkha ivạra ububh-ẹ. 13 Masẹ abẹ kk'Amasa adira abina k'eden o, okpongnạng kwidede otor Joab abẹ akhubh Shẹba kw'ode nnwa kw'Bikiri.

14 Shẹba ọkpaang nkhạma s'Israẹl phyi-phyibh tạrr ukpira k'Abẹl Bẹt-Maka, ọbạra ọkpaanga ẹkhạma ch'anạng p'Bikiri p'uwa atobh ifor sabẹ atwạn Shẹba abẹ. 15 Akpongnạng phyibh p'atwạnọ Joab abẹ, akwu abaabha Shẹba age ngekha k'Abẹl Bẹt-Maka. Abẹ atubh okhomakpa atima avạkha iyaan-iyaan kw'udimokpon kw'efhon-diden. Abẹ n'akhonga bẹ́, avọhkhọ udimokpon nwọ. 16 Okhenka, ikwanạng wạnọ kw'odongu-odongu uyin ma efhon-diden n'ọwạmọ bẹ́, "Akhọhmọ itọhng e! Abạnga akhọhmọ itọhng! Ayeri Joab akken-m mkpaakh-ẹ udik." 17 Joab osenga okhebh-ẹ, ikwanạng nwọ ọbạbh-ẹ bẹ́, "Ọma wọ akpen Joab?"

Ubhina bẹ́, "Uwe e, amma wọ."

Ikwanạng nwọ oben-ẹ bẹ́, "Khọhmọ itọhng abhaanga udik kw'amma ọtọhmnạng kwọ n'mben bẹ́, mkpaak."

Oben-ẹ bẹ́, "N'nka nkhọhmọ itọhng."

18 Ikwanạng nwọ oben-ẹ bẹ́, "Wa abẹ n'akpaak ẹtạma bẹ́, ‘Sọhng ata atạkha ntọhna k'Abẹl,’ brasẹ udik ngwọ n'ọkhaam echo. 19 Amạna mba ande anạng p'ẹmẹm, ambạra ande anạng p'akhaam nnạm-phyiphye k'Israẹl. Ọma n'akhonga bẹ́, adimi efhon-diden ch'ede ẹrạnga ch'Israẹl. Usi yạn kw'n'aben bẹ́, adimi ofhon kw'Ọvaar Ubinọkpaabyi o?"

20 Joab ubhina bẹ́, "Ubinọkpaabyi káchera! Ubinọkpaabyi káchera, bẹ́ amma m'nkhibhi, ọbạra ode bẹ́ m'ndimi ofhon ro! 21 Mesese, akwẹ oche ngwọ mòde. Ode bẹ́ ẹ, ujunung wạnọ kw'okpen Shẹba, kw'Bikiri kw'ubin k'akpecho p'Ephraim ofhonu, ẹma wọ ọyaanẹ ọbọhk kwẹ bẹ́, uvun ọvaar Devid. Anạng-m ujunungnwa wạnọ, amma m'ntte efhon-diden njama ọbọhk otte."

Ikwanạng nwọ n'obeni Joab bẹ́, "M'ammạrẹ echo chẹ k'ọbaakha ukhubha annạng-ọ."

22 Ikwanạng nwọ o, n'utim adongada mbọ pẹ ọta okhebha anạng phyibh, abẹ akpaara Shẹba kw'Bikiri ofhonu echo, abhạrẹ Joab k'ọbaakha ukhubha. Ma wọ Joab oge ẹsa utima oben anạng pẹ phyibh atte efhon-diden njọ ọbọhk, ọnạng-ọnạng ọkpa nnạm k'akhẹ k'ọchọhm. Wa Joab ọgba ọkpa nnạm okhebha ọvaarnạng kha Jẹrusalẹm.

23 Wa Joab wọ ode odecho kw'akpongnạng p'Israẹl bẹ́ wạạmm; Bẹnaya kw'Jehoyada ofhonu, wọ ode odecho kw'akpongnạng p'Kẹrẹt, ọttạra akpongnạng p'Pẹlẹt. 24 Adoniram ode ocho kw'atọhmnạng. Jẹhosaphat kw'Ahilud ofhonu ode ọkkẹrẹ kw'idik s'kk'ittia. 25 Sheva ode ọkkẹrẹ; Zadọk ọttạra Abiyata ade afọhnẹja. 26 Wa Ira, kw'ubin Jair ode ọfọhnẹja kw'Devid.