1 Wa Absalọm kw'ode ujunungnwa kw'Devid, ọkhaam nnwọkka kw'ikwanạng kw'ujibhi iminava kw'okpen Tamar. K'okpe mạnna gwạnọ, Amnọn kw'ode ujunung nnwa kw'Devid ọkhaam idạdaakha Tamar abẹ.

2 Wa Amnọn ọtạk ettem oge k'Tamar tạrr okhebha ma otto ọkhạmana, ukwuru bẹ́, wa Tamar ujunung tạm nósonga, ukwu ọkhaarẹ-ọkhaarẹ bẹ́, uyima abẹ.

3 Okhenka, wa Amnọn ọkhaam oyok-udikkobh kw'okpen Jonadab, kw'ode nnwa kw'Shimeyi, kw'ode nnwotte kw'Devid. Jonadab ẹma ode ọnạng kw'odongu-odongu k'idaam oyeni. 4 Ọbạbh Amnọn bẹ́, "Ode yạn kw'ọma nnwa kw'ọvaarnọng n'aninga ikwosi-ikwosi k'ekpebha-wu chidede? Tekh-m kadẹ."

Amnọn ọpọhn-ẹ bẹ́, "Tamar kw'ode nnwọkka kw'Absalọm, kw'ande ivotte, ẹwọ n'ọdaakh-m e."

5 Jonadab oben-ẹ bẹ́, "Sọhng ata ayima k'ibhikha, asi nkkari bẹ́, ọmmọ-ọ ọmma. Masẹ atte m'ukwu usi-ọ, ben-ẹ bẹ́, ‘Amma wạra ọdaakh-m bẹ́, nnwotte kwaam Tamar ukwu usi uchiattọhk ọnạng-m e. Tte uninga ma ititikha saam usi pfẹ ọfha n'nse-ẹ, ọbạra ọyạkh-m pfẹ ọyạkha.’ "

6 Ma wọ Amnọn usi nkkari ọta uyima masẹ ọnạng kw'ẹkhạmaana-dim ẹmmẹ-ẹ. Masẹ otte, ọvaar Devid ukwu bẹ́, usi-ẹ, Amnọn oben-ẹ bẹ́, "Amma wạra ọdaakh-m bẹ́, nnwotte kwaam Tamar ukwu usi uchiattọhk f'm'ọdaakh-m ọnạng-m, ọbạra ọyạkh-m pfẹ ọyạkha.

7 Devid o, n'ọtọhmọ abẹ ayeri Tamar k'ọvaarter, oben bẹ́, "Sọhng k'ọchọhm kw'nnwatte Amnọn, ata asi uchiattọhk anạng-ẹ." 8 Mạnna wọ kw'Tamar ofon k'ọchọhm kw'nnwotte Amnọn, kw'okhebh-ẹ s'uyim kha ibhikha. Tamar ọtạkha agwu-buma ọlọhkhọ utima usi brẹd ma akhẹ k'ititikha. 9 Ọtạkha brẹd nwọ oge k'kkoriya ọta ober-ẹ, okhenka, Amnọn nóchera uchi.

Amnọn n'obeni bẹ́, "Aben ọnạng kwidede uyin k'iyaan." Mạnna wọ ọnạng kwidede ubin uyin k'iyaan. 10 Amnọn o, oben Tamar bẹ́, "Dira uchiattọhk mvọ kken-m kha ẹmaanggọ chaam, ọfha atima ọbọhk kwọ oyeni ayạkh-m pfẹ." Tamar udir brẹd nwọ kw'kk'usia, ọnwa k'ẹmaanggọ ch'nnwotte kwẹ Amnọn. 11 Okhenka, masẹ utim uchiattọhk mvọ okken-ẹ bẹ́ uchi o, ọdạbh-ẹ, oben bẹ́, "Nnwotte kwaam, vura kwu antwạn anyima kha ibhikha."

12 Tamar oben-ẹ bẹ́, "Mma o, ọma ade nnwotte kwaam! Khaam k'ẹfa kávạkha! Udik demakwẹ ngwa k'Israẹl tạm núyina o! Ubyibyadik ngwa kási. 13 Amma ọttạra ọma m'annuk yạn ọttạra ọkpạrsia-dik ngwa o? Ọma m'ade masẹ udindingi-nạng wạnọ ma k'Israẹl. Ttọttọkhạn, kpaak ọvaarnạng abẹ, khaam eden mọ́kpa bẹ́, mbọ-ọ." 14 Amnọn khẹ itọhng nọ́khọma, ọvạkh-ẹ uyima abẹ k'ẹfa, ukwuru s'ọkhaam ẹfa ọyọhng-ẹ.

15 Ma wọ Amnọn ọtạm ma uwuna Tamar k'idaam oyeni. K'udik ọkka, wa uwun-ẹ ọyọhnga oche kw'uwa uchi eden ọdaakh-ẹ. Amnọn oben-ẹ bẹ́, "Bina yin k'iyaan afona!"

16 Tamar oben-ẹ bẹ́, "Mma o! De akhubh-m abhạrẹ k'iyaan wọ oter upyibhi ọtạm ọyọhnga udik kw'kk'aam asia maa e."

Okhenka, khẹ itọhng nọ́khọma. 17 Oter oyeri ọtọhmnạng kwẹ, oben bẹ́, "Khubh ikwanạng nwa ma ubin-m k'ititikha, akpạkh-ẹ ukhubh!" 18 Mạnna wọ ọtọhmnạng kwẹ utum-ẹ ọbhạrẹ k'iyaan, ọkpạkh-ẹ ukhubh. Wa Tamar oge iwuru ch'epe akpokha, ch'ede iwuru-khira ch'uwa aminava p'ọvaarnạng p'nạn ajunung tạma násonga n'age. 19 Tamar ọta okpokhu itạtọhng ububha k'echo, ọvạkha iwuru ch'oge ọyaakhẹ. Ọtạkha mbọhk ọtọhkha k'echọ, ọgạma k'ẹrạng-k'ẹrạng ofona.

20 Nnwọkka Absalọm ọbạbh-ẹ bẹ́, "Nnwatte Amnọn, kk'abọ uyima sa? Nnwọkka kwaam kkuma ẹmạng; nnwatte kwọ wọ mạma e. Udik ngwa k'ettem káge." Tamar n'urukhu ikwosi-ikwosi k'ọchọhm kw'nnwọkka Absalọm.

21 Masẹ ọvaar Devid ọbhaang udik ngwọ, ettem ipyibh-ẹ. 22 Absalọm udik gwạnọ-gwạnọ kw'ujibh-ujibh ọbạra ode kw'upyibh-upyibh nọ́kpaakha ọnạng Amnọn ma udik ngwọ. Okhenka, uwun Amnọn k'ọkpạrsia-dik kw'kk'usia ọnạng Tamar, kw'ode nnwọkka kwẹ.

23 Masẹ icho ifa kk'isenga, k'okpe kw'atọhmnạng p'Absalọm, p'n'aphyiri arạkhạmaan aphyạbha aning k'Baal-Hazọr, kw'ọbaanga Ephraim, wa Absalọm obher ajunungva p'ọvaarnạng phyibh bẹ́, abẹ akwu akhebh-ẹ kha. 24 Ma wọ Absalọm ofon ọta okhebha ọvaarnạng oben bẹ́, "Atọhmnạng paam n'aphyiri arạkhạmaam aphyạbha. Totokhạn, tte ọvaarnạng ọttạra atọhmnạng pẹ akwu aninga abamẹ."

25 Ọvaarnạng oben bẹ́, "Mma e, nnwa kwaam, tte amạna phyibh nạngẹ anta khiri akwẹ m'ọdọhbh-ọ kidaam-kidaam." Chibhi s'Absalọm ọkwẹ-ẹ, nóchera bẹ́ ọta, okhenka ọyọhbh-ẹ itta.

26 Ma wọ Absalọm obeni bẹ́, "Ọbạra mákke akwu, totokhạn tte nnwotte kwaam Amnọn ọbọhk ọtwạn mạna abẹ."

Ọvaarnạng ọbạbh-ẹ bẹ́, "K'ayạn kw'ẹma m'ọtwạn abọ o?" 27 Okhenka, Absalọm ofon ororo ọkwẹ-ẹ tạrr ọvaarnạng osenga ma, otte Amnọn ọttạra ajunungva mbọkha pẹ ọbọhk, abẹ atwạn abẹ afona.

28 Masẹ bẹ akpir kha, Absalọm oben atọhmnạng pẹ bẹ́, "Akhọhmọ itọhng! K'okpe kw'Amnọn kk'atwuk ubuma, mben bạnga bẹ́, ‘Abạnga avun Amnọn afhọ,’ afhẹ-ẹ, nạngẹ bạnga ojor khiri amma wọ nnạngẹ bạnga ẹfa. Abạnga akpọhkhọ ifor akhọhkha ijunung. 29 Wa atọhmnạng p'Absalọm asi Amnọn oche kw'Absalọm kk'bẹ ẹfa ọnạnga. Ma wọ ajunungva p'ọvaarnạng abin ata avura k'nnyạnyaang sabẹ arạbh afona.

30 Masẹ abẹ atim aseng k'eden, ẹkkaabha ekhebha Devid bẹ́, "Absalọm kk'ajunungva p'ọvaarnạng ọfha phyibh e, ọnạng wạnọ-wạnọ núrikha." 31 Ọvaarnạng ubina, ọyaakhẹ ẹnya ch'oge k'ifor, uyima k'isisek; atọhmnạng pẹ phyibh ayaakhẹ sabẹ age k'ifor, abạra aninga abẹ ma.

32 Okhenka, Jonadab kw'ode ujunung-nwa kw'Shimeyi, kw'ode nnwotte kw'Devid, oben bẹ́, "Tte aro kwaam nạngẹ ọtạk bẹ́, abẹ afhọ avaar-va phyibh; Amnọn mạnkeni wọ ope e. Ode nttọhna s'Absalọm kk'ọkhạma ochok, tạma k'iwu ch'Amnọn uyim nnwọkka Tamar abẹ k'ẹfa. 33 Aro ọvaar kwaam, ettem nạng-ọ ẹmma ẹphyaangẹ k'ẹkkaabha ch'ikpir-ọ bẹ́, avaar-va phyibh kk'apua. Amnọn mạnkkeni wọ ope."

34 Ayongu ma, Absalọm kk'ọrạbha.

Masẹ utik-ibyi udir achen okkeri k'ororo osẹ anạng k'ọsaabh k'eden, k'ukhubha kw'ọchọhkha-dudon n'udimi, n'asạkha k'okpecho ọkhaan-ọkhaan n'akwu. Utik-ibyi nwọ ofona ọta ọkpaak ọvaarnạng bẹ́, "Attitte, nse ajunung k'ọsaabh p'abin k'ukhubha kw'Horonayim k'okpecho ọkhaan-ọkhaan n'asenga akwu e."

35 Jonadab oben ọvaarnạng bẹ́, "Kker e, ajunungva p'ọvaarnạng kk'akpira ttạng e; akwẹ kk'udia k'oche kw'amma otọhmnạng kwọ mbeni e."

36 Masẹ ọkpaakhẹ udik ngwọ ọsa, ajunungva p'ọvaarnạng akpira, ẹmạng achẹ ka ẹrạng-k'ẹrạng. Wa Ọvaarnạng ọttạra ikhaana sẹ phyibh agba agạma ẹmạng njọ ipyibh-ipyibha.

37 Wa Absalọm ọrạbhọ ọta okhebha Talmayi, ujunungnwa kw'Amihud, kw'ode ọvaarnạng kw'Gẹshur. Okhenka, wa ọvaar Devid utim nkwuna s'nnwa kwẹ Amnọn, k'iwu s'isaabh-ọsaabh.

38 Masẹ Absalọm ọrạbhọ ofona k'Gẹshur, wa uning ma k'icho ittaan. 39 Wa ọvaar Devid utwu-ẹ k'ettem bẹ́, wạra ose Absalọm, ukwuru s'kk'ottem-fokhu ọkhaama k'obo kw'Amnọn.