1 Ukwu ukpira k'okpe ma, Absalọm ọtạkha ọkpaar kw'nnyạnyaang n'itwạr, ọttạra nnyạnyaang, ukwu ọttạra k'ajunung arạbh afa ukuma jobh bẹ́, abẹ achiẹ-ẹ eden. 2 Wa n'ọpạm-ọpạm ọta obe k'eden ọkhaan-ọkhaan ch'eten k'ẹbaakhamma ch'efhon-diden. Okpe kwidede kw'ọnạng utim iponga bẹ́, ọta okhebha ọvaarnạng ọfha ọttọhnọ, Absalọm m'oyeri ọnạng nwọ ọbạbh-ẹ bẹ́, "Ọma abin bạng ofhon?" Ọnạng nwọ m'ubhina bẹ́, "Amma ọtọhmnạng kwọ mbin k'ẹkhạma jạnẹ ch'Israẹl." 3 Ma wọ, Absalọm m'oben-ẹ bẹ́, "Kker e, iponga nna ijibhi ọma, ibạra itor-otor, okhenka ode bẹ́, ọnạng kw'm'ọkhọhm-ọ itọhng k'echo ch'ọvaarnạng kòde e." 4 Absalọm m'ọttạra bẹ́, "Wạra abẹ n'asi-m ọkpaar-aponga ma isek nna o! Ọnạng kwidede kw'ọkhaam udik kw'ọphyaangẹ-ẹ ẹmma, ọbạra ode iponga, m'ukwu okhebh-m, wạra m'n'mkpaara iponga s'm'irebh ọnạng kwidede ettem."

5 Okpe kwidede kw'ọnạng oseng ofora Absalọm k'ifor bẹ́, ọrạkha uttima ititikha k'isisek usim-ẹ, Absalọm m'onemi ọbọhk ọvạkh-ẹ ubina, ọbaakh-ẹ. 6 Wa Absalọm n'usi oche ngwọ ọnạng anạng p'Israẹl phyi-phyibh p'atim iponga akwu bẹ́, ọvaarnạng oponga ọnạng bẹ. Osenga ma, odebh nttem s'anạng p'Israẹl.

7 Masẹ icho innebung kk'isenga, Absalọm oben ọvaarnạng bẹ́, "Tte nta k'Hẹbrọn, ọfha nta nnạng ẹyaakha ch'echekha ch'uwa ntạk nnạng Ọvaar Ubinọkpaabyi. 8 Masẹ wa ọtọhmnạng kwọ urukhu k'Gẹshur k'ẹkhạma ch'Aram, wa ntạk echekha bẹ́, ‘De Ọvaar Ubinọkpaabyi utim-m ọkpa nnạm k'Jẹrusalẹm, amma m'mkpobha Ọvaar Ubinọkpaabyi k'Hẹbrọn.’ "

9 Ọvaarnạng oben-ẹ bẹ́, "Sọhng k'idira." Mạnna wọ kw'Absalọm osengi ofona k'Hẹbrọn.

10 Wa Absalọm ọtọhmọ abaan-ibyi k'nkhạma s'Israẹl phyi-phyibh bẹ́, abẹ ata aben bẹ́, "De abạnga abhaang sabẹ age ẹsa bẹ́ ẹ, annemi eden awạmọ k'ẹrạng-k'ẹrạng bẹ́, Absalọm kk'ọvaarnạng udia k'Hẹbrọn e!" 11 Wa ajunung arạbh jobh p'abin k'Jẹrusalẹm bọ atwạnọ Absalọm abẹ. Obheri bẹ masẹ anạng p'akwu udik kw'abẹ nạnásong. 12 Masẹ Absalọm n'ọfọhnọ nja, wa ọbạra ọtọhm abẹ ayeri Ahitophẹl kw'ubin Gilo, kw'n'ọnạng Devid ntọhna, ubina k'Gilo kw'ode ofhon kwẹ ukwu. Ma wọ nttọhna-pyibha s'Absalọm ido ikpọhkhọ-ọkpọhkhọ, ikhaana sẹ ido isaabh-ọsaabh.

13 Wa itọhmọ rạnẹ ikwu ikpaak Devid bẹ́, "Nttem s'anạng p'Israẹl ining k'Absalọm e."

14 Ma wọ Devid obeni atọhmnạng pẹ p'aning abẹ k'Jẹrusalẹm bẹ́, "Akwu annạbh o, deja, ọnạng wạnọ-wạnọ kw'm'ọnnaanga k'mbọhk s'Absalọm kòde e. Ọbaan bẹ́, ambina amfona ẹbhạr-ẹbhạr, deja, m'ọta ọkhạbhọ mạna oro udimi mạna, ọbạra utima ọkkangkkang-kkro ọfhọ anạng p'efhon-diden."

15 Ikhaana s'ọvaarnạng ibhin-ẹ bẹ́, "Atọhmnạng pọ kk'ifor adia atik bẹ́, asi fidede f'aro ọvaar kwamạna obeni."

16 Mạnna wọ ọvaarnạng ubin osenga, anạng p'ẹchọhmfhạr chẹ phyibh abẹ. Okhenka, wa ubin urik ayok pẹ ncho jobh bẹ́, abẹ aninga akkeri ọvaarter. 17 Wa ọvaarnạng utim anạng phyibh p'atwạnọ abẹ, abẹ asenga tạrr abẹ ata abe k'efhon-diden ọkhaan-ọkhaan. 18 Wa atọhmnạng pẹ phyibh achiẹ-ẹ eden aseng. Ajunung p'Kẹrẹt ọttạra p'Pẹlẹt, ọttạra ajunung p'Git p'akpir ẹnọhna ukuma arạbh jobh p'atwạnọ ọvaarnạng abẹ abina k'Gat abạra achiẹ-ẹ eden.

19 Ọvaarnạng n'obeni Ittayi kw'ubin Git bẹ́, "Ode yạn kw'atwạnọ mạna abẹ? Ọma ade ukhikhennạng kw'ọrạbhọ ibira k'ofhon kwọ. Kpa nnạm ata aninga ọvaar Absalọm abẹ. 20 Chạnachẹ-chạnachẹ wọ kw'akwu. M'nsi yạn ntte-ọ ọbọhk awena mạna abẹ, s'amma oyeni nạn ibyi nsong s'n'anten-otena? Tima anạng pọ phyibh kpa nnạm. Tte Ọvaar Ubinọkpaabyi usi bạnga ọphyaam, ọbạra ọkhọhkha bạnga idạdaakha."

21 Okhenka, Ittayi n'ubhin ọvaarnạng bẹ́, "K'oche kw'Ọvaar Ubinọkpaabyi urukhu akpen, ọttạra k'oche kw'aro ọvaar kwaam ọbạra uruk akpen, ibyi sidede s'aro ọvaar kwaam uning, ode obo, ode akpen, amma ọtọhmnạng kwọ m'mbe abọ ma."

22 Devid oben Ittayi bẹ́, "Fona ororo k'osenga kwọ." Mạnna wọ kw'Ittayi kw'ubin Git ubin osenga ọttạra ajunung pẹ, ọttạra ichọhmfhạr s'ining abẹ.

23 Wa anạng phyibh p'ẹkhạma njọ agạm mmạng k'ẹrạng k'okpe kw'anạng mbọ n'asenga ayongu bẹ. K'okpe kw'ọvaarnạng n'ojekha Ipekhuma s'Kidrọn, ikhaana sẹ phyibh itwạnọ abẹ, abẹ asenga atena k'ukhubha kw'anạng nạnárukha.

24 Wa Zadọk ọgba uninga ma, ọttạra aLẹvi phyi-phyibh p'n'adira Ikwukwur s'Echekha ch'Ubinọkpaabyi. Wa abẹ aber Ikwukwur nnọ s'Echekha ch'Ubinọkpaabyi k'isisek. Abiyata ọfọhnọ nja tạrr anạng mbọ atte efhon-diden njọ ọbọhk phyibh.

25 Ma o, ọvaarnạng oben Zadọk bẹ́, "Tima Ikwukwur s'Echekha ch'Ubinọkpaabyi akpa nnạm k'efhon-diden. De amma nkhaam ọphyaam k'ititikha s'Ọvaar Ubinọkpaabyi, m'utim-m utima ọkpa nnạm maa. M'ọbạra usi-m nse Ikwukwur nna, ọttạra ibyirukhasẹ sẹ. 26 Okhenka, de obeni bẹ́, ‘Ettem khaam nérebha ọttạra abọ,’ amma kk'ifor ndia; tte usi-m oche kw'ọdaakh-ẹ."

27 Wa ọvaarnạng ọbạra oben Zadọk kw'ode ọfọhnẹja bẹ́, "Akwẹ khọ nọ́ttaana o? Tạkha idia chaam kpa nnạm k'efhon-diden. Tima Ahimaz kw'ode nnwa kwọ, ọttạra Jonatan kw'ode nnwa kw'Abiyata kpa nnạm. Ọma ọttạra Abiyata, abạnga atima iva mbọ afa pabạnga akpa nnạm. 28 Amma m'nninga k'ibyi s'anạng n'asenga ajekha afona k'ibyi s'anạng nạnárukha, tạrr ẹkkaabha chọ ikpir-m." 29 Mạnna wọ wa Zadọk ọttạra Abiyata atim Ikwukwur s'Echekha ch'Ubinọkpaabyi akpa nnạm, ata aninga k'Jẹrusalẹm.

30 Okhenka, wa Devid ofon ororo uvura Okpecho kw'Oliv. Wa ububh ọttọhk k'echo, utima mfhok eje n'ọgạma ẹmạng utima osenga. Anạng p'ator-ẹ, abạra abubha ekpo k'echo n'agạma avura okpecho ator-ẹ nnạm. 31 Masẹ abẹ kk'Devid akpaakha bẹ́, "Ahitophẹl ọgba ọttạra k'ikhaana s'anạng p'Absalọm n'utima okkobha ikwung e," ma wọ Devid ose njọhm oben bẹ́, "O Ọvaar Ubinọkpaabyi, si ntọhna s'Ahitophẹl ibhạkhẹ idindingi."

32 Masẹ Devid ukpir k'okpecho k'ẹrạng, k'ibyi s'anạng n'aninga akpobha Ubinọkpaabyi, Hushayi kw'ubin Ark utim ọnọhma kw'kk'ọyaakha k'ifor, abubuma abẹ kha echo. 33 Devid oben-ẹ bẹ́, "De m'atwạn-m abẹ, m'ade ẹtọhkha anạng-m e." 34 Okhenka, de akpa nnạm k'efhon-diden ata aben Absalọm bẹ́, ‘Aro ọvaar, amma nde ọtọhmnạng kwọ. Wa nde ọtọhmnạng kw'atte, mantọmma, n'nde ọtọhmnạng kwọ.’ Ma wọ m'akkaan-m, akhibhi ntọhna s'Ahitophẹl. 35 Zadọk ọttạra Abiyata p'ade afọhnẹja m'aninga abọ ma. Kpaak bẹ udik kwidede kw'abhaang k'ọvaarter. 36 Ajunungva afa pabẹ p'ade: Ahimaz kw'Zadọk ofhonu, ọttạra Jonatan kw'Abiyata ofhonu, aning abẹ ma. De abhaang udik kwidede, tọhm bẹ abẹ akwu atekh-m.

37 Ma o, Hushayi kw'ode oyok-udikkobh kw'Devid ukpir k'Jẹrusalẹm k'okpe kw'Absalọm n'ọnwa k'efhon-diden.