1 Wa Devid otobh akpongnạng p'aning abẹ, usi ayok bạnọ adecho p'akpongnạng nnọhna-nnọhna, bạnọ ade adecho p'akpongnạng arạbh asen-asen. 2 Devid ọbhaangẹ akpongnạng mbọ k'ikhaana ittaan, usi Joab odecho kw'ikhaana rạnẹ. Usi Abishayi kw'ode nnwa kw'Zẹruya, kw'ọbạra ode nnwotte kw'Joab odecho kw'ikhaana rạnẹ. Usi Ittayi kw'ubin Git odecho kw'ikhaana rạnẹ. Wa ọvaarnạng obeni ajunung mbọ bẹ́, "Amma oyeni m'mbạra ntwạn bạnga abẹ."

3 Okhenka, ajunung mbọ abeni bẹ́, "Aro o, nọ́baana bẹ́ ọma atwạn mạna abẹ e. De awawunanạng akhubh mạna amạna annạbh, bẹ udik mókhera. Ọbạra ampe amkpira anạng ibhaakha, bẹ udik-udik mókhera. Okhenka, ọma abạrẹ udik ayọhnga amạna mba anạng nnọhna ẹrạbh ukuma asen. Ẹgwọ usi ọbaan-ọbaana bẹ́ aninga ma efhon-diden n'age mạna ẹfa."

4 Wa ọvaarnạng n'ọpọhn bẹ́, "Amma m'nsi fidede f'ujibhi bạnga e."

Ma wọ wa ọvaarnạng obe k'ọbaakha ọkhaan-ọkhaan, s'akpongnạng mbọ abin, tạma k'ikhaana s'arạbh asen-asen, ọttạra ikhaana nnọhna-nnọhna, afona. 5 Wa ọvaarnạng ọtwạrọ Joab ọttạra Abishayi ọttạra Ittayi itọhng bẹ́, "Abạnga asenga amma abẹ akkobha udikkobh nwọ Absalọm okkobh o." Wa akpongnạng phyi-phyibh abhaang s'ọvaarnạng n'ọtwạr adecho itọhng ukwuru Absalọm.

6 Wa akpongnạng mbọ ayini k'efhon-diden k'ọsaabh ata arima anạng p'Israẹl abẹ. Wa ekpong njọ irim k'ẹkpa ch'Ephraim. 7 Ma wọ wa ajunung p'Devid akhem akpongnạng p'Israẹl. Anạng p'ape ma iwu njọ asaabhẹ akpira nnọhna arạbh afa ukuma jobh. 8 Wa irima njọ ẹnyaamẹ ẹbaabha ẹkhạma njọ phyibh. Ọnạng-mik kw'uwa ope k'ẹkpa, ọyọhng kw'ope k'ọkkangkkang-kkro.

9 Wa Absalọm ọttạm akpongnạng p'Devid abẹ. Wa n'ọyaar ẹnyạnyaang chẹ. Masẹ ẹnyạnyaang n'esenga bẹ́, eyongu k'isekhisek kw'ichi jạnẹ chididen ch'oak, ch'abọhkha pẹ akpa-ọkpa, isisira s'Absalọm ikwu igbaama k'ichi njọ. Ma wọ n'ọwọhn k'iyokhu, ẹnyạnyaang chẹ ẹrạbh efona.

10 Ma wọ ujunung wạnọ kw'ose udik kw'kk'uttia, ofon ọta ọkpaak Joab bẹ́, "Nse s'Absalọm ọwọhn k'ichi ch'oak e!"

11 Joab oben ujunung kw'ọkpaakh-ẹ udik ngwọ bẹ́, "Abẹ́? Ase-ẹ k'udik-ọkka? Ka yạn kw'nạn khẹ náfha abhạrẹ ma isek echomajạnẹ? Njanna wạra kk'ọ ashẹkẹl jobh p'asilva ọttạra udikhikpa kw'okkemkpa nnạnga."

12 Okhenka, ujunung nwọ ubhin Joab bẹ́, "Ọbạra age-m ashẹkẹl nnọhna mfa ukuma arạbh jobh ma mbọhk, amma nnwa kw'ọvaarnạng ọbọhk mạ́ntwu e. Anning ma ammaanga s'ọvaarnạng ọtwạrọ ọma ọttạra Abishayi ọttạra Ittayi itọhng bẹ́, ‘Abạnga asenga amma abẹ akkobha udikkobh nwọ Absalọm okkobh o.’ 13 De wạra kk'Absalọm mfha, nge akpen paam k'ọmmaphyaangẹ s'udik nạn nóde kw'ọvaarnạng nạn kạnósonga, bẹ́ njanna wạra kk'arạbha arikh-m."

14 Joab oben bẹ́, "Amma dạkhẹ abọ okpe mạ́nkhibhi." Onemi eden ọtạkha akhọhn attaan ọta ukhum Absalọm k'ittemmạma s'utim ọgwạkhọ ọyọhng ma ichi ch'oak. 15 Atim-ekpong-kpo p'Joab, anạng jobh abaabh Absalọm age ngekha, akker-ẹ avun afhọ.

16 Ma o, Joab ukwu oge ẹsa, utima oben akpongnạng p'Devid bẹ́ abẹ akuma akpongnạng p'Israẹl khukhubh. 17 Abẹ adira apfura p'Absalọm ata abhạrẹ k'ipekhuma s'idong-odong kha ẹkpa, atạkha ọtakpa-kwung abubh-ẹ. Ma okpe ngwọma, anạng p'Israẹl phyibh arạbhọ afona k'ichọhm sabẹ.

18 K'okpe kw'Absalọm utim urukhu akpen, wa ọtạk ẹta uttima ebebe k'Ipekhuma s'Ọvaarnạng masẹ ijima ọnạng ifor sẹ, s'uwa ọkkẹ bẹ́, "Amma ujunungnwa kạ́nkhaam kw'm'usi eche chaam ininga efona ororo." Wa oyeri ẹta njọ ubhina k'eche chẹ. Ẹta njọ ekpen Ijima ch'Absalọm, tạrr ukpira k'iwu ch'chemma.

19 Wa Ahimaz kw'ode nnwa kw'Zadọk obeni bẹ́, "Tte nnạbh nta mkpaak ọvaarnạng ẹkkaabha nja bẹ́, Ọvaar Ubinọkpaabyi kk'ẹ ọrạbha k'mbọhk s'awawunanạng pẹ."

20 Joab oben-ẹ bẹ́, "Chemma sạng kw'm'ata akpaak ẹkkaabha njọ. M'ata iwu ẹdwạkh-ọdwạk, chemma káta, ukwuru bẹ́, nnwa kw'ọvaarnạng kk'upua."

21 Ma wọ Joab oben ọnạng wạnọ kw'ubin Kush bẹ́, "Sọhng ata akpaak ọvaarnạng udik kw'kk'asia." Ọnạng nwọ ọrạkha ọnạng Joab ikpukpobha, ukwu ọrạbh ofona.

22 Ahimaz kw'ode nnwa kw'Zadọk ọbạra oben bẹ́, "Ọkwọhn ode, totokhạn, tte nnạbh ntor ayi nwọ kw'ubin Kush nnạm."

Oseng ma, Joab ubhin bẹ́, "Nnwa kwaam, ode yạn kw'n'aben bẹ́ m'agba afona, s'nạn ẹkkaabha jạnẹ-jạnẹ akhaam ch'm'ẹnạng-ọ ẹtaam?"

23 Ahimaz ọbẹ́, "Ọkwọhn ode, amma m'nttima ẹbhạr mfona."

Ma o, Joab oben bẹ́, "Rạbh afona khẹ!" Mạnna wọ Ahimaz ọrạbhọ oseng k'ukhubha kw'ukhubha kw'usi ẹkpẹmẹ, n'uchi ọnạng kw'ubin Kush eden.

24 Masẹ Devid uning ẹyạr k'ottemkwẹ kw'ẹbaakhamma ch'iyaan ọttạra ch'ẹtaanga, utik-ibyi uvur k'ipakhọhnga s'udimokpon kw'ẹbaakhamma. Masẹ okkeri k'iyaan, n'ose ujunung kw'n'uttima ẹbhạr mạnkkeni. 25 Utik-ibyi oyeri ọvaarnạng otek!

Ọvaarnạng oben bẹ́, "De oseng mạnkkeni, songa bẹ́ utim ẹkkaabha ọkkachẹ." Ujunung nwọ ttạng utim ẹbhạr kha ukwu, n'ofor-ofora.

26 Utik-ibyi nwọ ọbạra ose s'ọnạng ọdwạkh-ọdwạk n'ọrạbh ukwu. Oyeri utik-ẹbhaakhamma oben bẹ́, "Kkeri oche kw'ujunung ọdwạkh-ọdwạk n'ọrạbh ukwu kha mạnkkeni!"

Ọvaarnạng oben bẹ́, "Nudusi, ẹma ọbạra utima ẹkkaabha ọkkachẹ."

27 Utik-ibyi oben bẹ́, "Okher-m bẹ́ ocheden nwọ n'ọrạbh masẹ Ahimaz kw'Zadọk ofhonu."

Ọvaarnạng oben bẹ́, "Ẹma ode ọnạng ọkka. Utim ẹkkaabha ọkkachẹ."

28 Ma wọ Ahimaz oyeri ọvaarnạng oben bẹ́, "Attitte, kk'ujibha ọnạng mạna e!" Ọrạkha uttima ititikha k'isisek ọnạng ọvaarnạng ikpukpobha oben bẹ́, "Ẹtọhnga iyim ẹnạng Ọvaar Ubinọkpaabyi, kw'ode Ubinọkpaabyi kwọ! Ẹma kk'anạng p'arim aro ọvaar kwaam abẹ okhema."

29 Ọvaarnạng ọbạbh bẹ́, "Udikkobh-nwa nwọ, Absalọm, uning ọkkakwẹ kạkha o?"

Ahimaz ubhina bẹ́ "Nse dạma-dạma kwididen s'Joab n'oben bẹ́ ọtọhm amma ọtọhmnạng kwọ, ọttạra ọtọhmnạng kw'ọvaarnạng ẹkkaabha. Okhenka, dạma-dạma nwọ khaam nọ́ttaana."

30 Ọvaarnạng oben bẹ́, "Be maa ọkhaan-ọkhaan kanse." Mạnna wọ ọtwạkhọ obe.

31 Ma okpe ngwọ, ọnạng nwọ kw'ubin Kush ukwu ukpira, oben bẹ́. "Aro ọvaar kwaam, bhaanga ẹkkaabha ọkkachẹ! Ọvaar Ubinọkpaabyi kk'ọ orạbha k'mbọhk s'awawuna-nạng pọ phyibh e."

32 Ọvaarnạng ọbạbh oKush-nạng nwọ bẹ́, "Udikkobh-nwa nwọ Absalọm uning ọkkakwẹ kạkha o?"

OKush-nạng nwọ ubhina bẹ́, "Tte awawuna-nạng p'aro ọvaar kwaam, ọttạra anạng phyibh p'akhạmọ bẹ́, asi-ẹ ipyibha, ade masẹ udikkobh-nwa nwọ."

33 Ma wọ ifor ikwu ibhạkhẹ ọvaarnạng. Ubina uvura k'ẹmaanggọ ẹrạng-ẹrạng, ch'ining k'ẹbaakhamma, ofona ọta ọgạma. Masẹ n'ofona, n'oben bẹ́, "O nnwa kwaam Absalọm! Absalọm kwaam e! Uttu wạra ọma m'ape, amma wọ wạra m'ntera mpe e! O nnwa kwaam Absalọm! Nnwa kwaam e! Nnwa kwaam!"