1 Ọvaar Ubinọkpaabyi ọtọhmọ Natan ọta okhebha Devid. Masẹ okhebh-ẹ, oben bẹ́, "Wa ọkhaam ajunung mạnna afa p'abin ofhon gwạnọ. Oyok wạnọ ujibh-ẹ ujibh, nwọkha otto okpor. 2 Oyok kw'ujibh-ẹ ujibh ọkhaam arạkhạmaan ọttạra mmaam k'ọsaabh. 3 Okhenka, ukpukpora nwọ ọttọhk kọ́khaam, oyonga ọrạkhạmaan-kwa kw'isạsạkhẹ, awẹma-awẹma kw'kk'odebha. Ọgwạkhọ wẹ tạrr awẹ ọbạr, ọttạra iva p'ujunung nwọ. Ọrạkhạmaan nwọ n'uchi ọttọhk ujunung nwọ abẹ, ọbạra ogwo asi k'nkkọbh kw'ujunung nwọ, ọbạra ọttaabha ugi-ẹ ma k'mbọhk. Wa ọrạkhạmaam-nwa nwọ n'ode masẹ ọkwanạngnwa ọnạng-ẹ.

4 "Wa ukhikhen-nạng mạnna wạnọ ukwu ọsạkha oyok nwọ kw'ujibh-ẹ ujibh, nwọ kw'ujibh-ẹ ujibh ufhum bẹ́, ọtạkha arạkhạmaan pẹ, ọbạra ode mmaam sẹ bẹ́, utima usi uchiattọhk ọnạng ukhikhen-nạng kw'kk'ẹ ọsạkha. Uttu kw'm'usi oche ngwọ, otera ọta ọtạkha ọrạkhạmaan-kwa nwọ wạnọ kw'ukpukpora, utima usi uchiattọhk ọnạng ukhikhen-nạng kw'kk'ẹ ọsạkha."

5 Udik ngwọ ọdwạkhọ Devid tạrr oben Natan bẹ́, "Oche ngwọ kw'Ọvaar Ubinọkpaabyi urukhu akpen, ọnạng nwọ kw'usi udik demakwẹ ngwọ ọbaan bẹ́, ope echomajạnẹ! 6 Ẹma nwọ ọbaan bẹ́ utwuk ọrạkhạmaan-kwa nwọ k'ikpe innebung, ukwuru bẹ́, ikwosi kọ́khaam k'udik kw'usi ma."

7 Ma wọ Natan obeni Devid bẹ́, "Ọma wọ ade ujunung nwọ e! Maa wọ ode udik kw'Ọvaar Ubinọkpaabyi, kw'ode Ubinọkpaabyi kw'Israẹl, ọkpaakhẹ: ‘Amma mbyeng-ọ ana k'echo, nsi-ọ ọvaarnạng kw'Israẹl, mbạra nkkaan-ọ, nneng-ọ k'mbọhk s'Saul. 8 Amma ntte ẹchọhmfhạr ch'aro kwọ ọbọhk nnạng-ọ, mbạra ntạkha ipanạng pẹ nnạng-ọ. Nnạng-ọ ẹvaar ch'Israẹl ọttạra ch'Juda. Wạra ode bẹ́, idik nna khọ níbenga, wạra m'nnạng-ọ nyọhnga ma. 9 Ode yạn kw'afhumu ọkpaakha-dik kw'Ọvaar Ubinọkpaabyi, ata asi ubyibya-dik demakwẹ ngwa, k'ititikha sẹ o? Ọma atim ọkkangkkang-kkro afhọ Uriya kw'ubin Het, abạra atạkha ikwanạng kwẹ aba. Ọma atim ọkkangkkang-kkro kw'anạng p'Ammọn afhẹ-ẹ. 10 M'osenga ma, ọkkangkkang-kkro ẹchọhmfhạr chọ ọbọhk mótte, ukwuru s'afhumu ọkpaakha-dik kwaam, afona ata atạkha ikwanạng kw'Uriya kw'ubin Het aba.’

11 "Maa wọ ode udik kw'Ọvaar Ubinọkpaabyi obeni: ‘Amma m'ntọhm ẹkhọngkwuru k'ẹchọhmfhạr chọ. M'ntạkha ipanạng pọ nnạng oyok-ọbaanga kwọ. Ẹma nwọ m'uyima ipanạng pọ abẹ k'ọyaankpa. 12 Ọma asi udik ngwa idubh-idubha, okhenka amma m'nsi kwẹ k'ọyaankpa k'ititikha s'anạng p'Israẹl phyibh.’ "

13 Ma wọ Devid obeni Natan bẹ́, "Amma kk'ipyibha nsia k'ititikha s'Ọvaar Ubinọkpaabyi."

Natan ọpọhna bẹ́, "Ọvaar Ubinọkpaabyi kk'ubina ọnạng-ọ k'ipyibha chọ. Ọma dạk mápe. 14 Okhenka, ukwuru s'kk'awọhkha bẹ́, awawuna-nạng p'Ọvaar Ubinọkpaabyi annukh-ẹ, nnwa nwọ kw'abẹ amaanẹ anạng-ọ akpen múruk."

15 Masẹ Natan kk'ọbhạna k'akhẹ k'ọchọhm, Ọvaar Ubinọkpaabyi usi nwa nwọ kw'ikwanạng kw'Uriya ọmaanẹ ọnạng Devid otto ọkhạmana. 16 Wa Devid uchini Ubinọkpaabyi k'echo ch'nnwa nwọ. Uyim okwo, ọbạra oge ọvạra-bina uyima k'isisek k'nnuguwu s'isaabh-ọsaabh. 17 Adennạng p'ẹchọhmfhạr chẹ akhonga k'oche kw'abẹ m'avạkh-ẹ ubina k'isisek, nóchera, ọbạra ufhum uchiatọhk chichi bẹ abẹ.

18 Ottong iwu isenọfa, nnwa nwọ ope. Atọhmnạng p'Devid ojoru bẹ k'oche kw'abẹ m'akpaakh-ẹ bẹ́, nnwa nwọ kk'upua, sabẹ akkẹ bẹ́, "Yeyema s'nnwa nwọ utim urukhu akpen, de amkpaakhẹ Devid udik, mạna itọhng mọ́khọhmọ. Masẹ nnwa nwa n'ope maa, m'ansenga yạn amkpaakh-ẹ o? Okke-okke usi f'nạn ichen nánchokha e."

19 Masẹ Devid ose bẹ́, atọhmnạng pẹ n'akkaabha ayok idik, ukwu utin bẹ́ nnwa nwọ kk'upua. Ma wọ ọbạbhọ bẹ́, "Nnwa nwọ kk'upua o?"

Abẹ abhin-ẹ bẹ́, "Uwe-e, kk'upua e."

20 Ma wọ Devid ubin k'isek ọta okpobha asi, ọfọhnọ ana, ọbạra ofhona ẹnya. Ukwu ofona k'ọchọhm kw'Ọvaar Ubinọkpaabyi, ọta okpobh-ẹ. Ubina ma, ofona k'akhẹ k'ọchọhm, oben abẹ anạng-ẹ uchiattọhk, uchi.

21 Atọhmnạng pẹ abạbh-ẹ bẹ́, "Ọma n'asi yạn maa o? K'okpẹ kw'nnwa nwọ utim uning akpen, ayima okwo, abạra afhobh asẹn. Masẹ nnwa n'ope, ma wọ n'atera abina achi ọttọhk!"

22 Ubhina bẹ́, "K'okpe kw'nnwa nwọ utim urukhu akpen, nnyim okwo, mbạra mfhobh asẹn ukwuru s'nkkẹ bẹ́, "Ọvaar Ubinọkpaabyi m'ọkhaama abamẹ ikwosi, otte nnwa nwọ ọbọhk uruk akpen. 23 Okhenka, masẹ kk'upua, bạra mfona ororo nninga okwo fa mbạng o? Amma s'm'nkke ntima abẹ mkpa nnạm k'akpen? Amma wọ m'ntera nkhebh-ẹ kha, ẹma sạng m'ọbạra ọkpa nnạm okebha amma kha."

24 Ma wọ Devid ofokhu ikwanạng kwẹ Batshẹba nttem, ọta uyima abẹ, ọmaan-ẹ ujunungnwa, abẹ akpẹ-ẹ Sọlọmọn. Nnwa nwọ ọdaakhẹ Ọvaar Ubinọkpaabyi; 25 ukwuru idạdaakha nnọ, Ọvaar Ubinọkpaabyi ọtọhmọ Natan kw'ode usi-ẹyaakha bẹ́, ọta ukpẹ-ẹ bẹ́, Jedidiya*.

26 Ma okpe ngwọ, wa Joab urim ekpong ọttạra ofhon kw'Raba, kw'ẹkhạma ch'Ammọn abẹ, ọvạk bẹ ọvaar-fhon kwabẹ ọna. 27 Joab ọtọhmọ akpaakh-nkkaabha ata akhebha Devid akpaakh-ẹ bẹ́, "Amma Joab kk'Raba abẹ nnima, mbạra ntạkha asipe pẹ. 28 Atobha akpongnạng p'arikhi ẹbhạr-ẹbhạrẹ, abẹ ata abaabha efhon-diden ngwọ age ngekha, atạkha kwẹ k'ẹfa, deja, amma m'nvạkha bẹ efhon-diden ngwọ nna, mkpe kwẹ mmina k'akhaam."

29 Mạnna wọ Devid otobh akpongnạng phyibh utima ofona k'Raba, urima bẹ abẹ tạrr okhema bẹ. 30 Wa Devid ọwạr ọvaarnạng kw'abẹ ikpo, abẹ atạkha akhubha ẹma Devid. Adọhbh p'ikpo nnọ ikpir talẹn wạnọ kw'gol, abẹ abạra akpạna sẹ ata-jibha. Wa Devid ọkhaankẹ uchi bẹ ekpo k'ọsaabh ma ekpong njọ ch'efhon-diden. 31 Ọtạkha anạng p'ofhon ngwọ, ọnạng itọhm sabẹ m'atima uyọhngkpọ ọttạra mgbikhiri asi, ọttạra s'mbạr, ọttạra s'ọtọhkhọ f'mbaanga, ọttạra s'mbạr, ọbạra utima bẹ usi itọhm s'ata p'adọhngọ rạrạbha. Wa Devid usi udik ngwọ ọbaabha ifhon s'Ammọn phyi-phyibh. Ma wọ Devid ọttạra akpongnạng pẹ phyibh akpa nnạm abhạna k'Jẹrusalẹm.