2 Samwẹl 10

Devid okhem anạng p’Ammọn

1 Ukwu ukpira k’okpe ma, ọvaarnạng kw’anạng p’Ammọn ukwu ope. Ujunungnwa kwẹ kw’okpen Hanun ukwu ọdạbh ẹvaar chẹ. 2 Devid oben bẹ́, "Amma m’nsi ọphyaam nnạng Hanun, kw’ode nnwa kw’Nahas, k’oche kw’uwa otte kwẹ usi ọphyaam ọnạng-m." Ma wọ Devid ọtọhmọ anạng bẹ́, abẹ ata adema Hanun abẹ k’obo kw’otte. Masẹ atọhmnạng p’Devid akpir k’ofhon kw’Ammọn, 3 adecho p’Ammọn aben Hanun kw’ode aro kwabẹ bẹ́, "Ọma akkẹ bẹ́ ikpukpobha rọ s’Devid ọkhọhk k’obo kw’atte s’ọtọhmọ ajunung mbọ bẹ́, abẹ akwu adema abọ? Nákka bẹ́, ọtọhmọ bẹ bẹ́, abẹ akwu abaana ofhon ngwa, ọfha osonga nden s’m’utima urima akwẹ okhema o?" 4 Ma wọ Hanun ọvạk anạng mbọ p’Devid ọtọhmọ, ugwu agba-phyạbha ukhubha gwạnọ, ọbạra ọvạkha anọhma-baba pabẹ ọyaakhẹ k’ayạrạba, ukhubh bẹ abhạna.

5 Masẹ Devid obhaang udik ngwọ, ọtọhm atọhmọ pẹ bẹ abẹ ata akhebha anạng mbọ, sabẹ kk’bẹ ẹsẹkha-bạrada njọ anạnga. Ọvaarnạng n’obeni bẹ́, "Abạnga aninga k’Jẹriko tạrr agba-phyạbha pabạnga amen, bạrasẹ abạnga n’akwun."

6 Masẹ anạng p’Ammọn n’atini bẹ́, abẹ kk’asia ettem ipyibh Devid otena bẹ abẹ, abẹ abher akpongnạng p’Aram p’aseng k’mfhok, nnọhna arạbh afa ukuma jobh, p’abin k’ẹkhạma ch’Bẹt-Rehob ọttạra Zoba. Wa ajunung nnọhna mfa ukuma arạbh jobh abạra afona k’ọvaarnạng kw’Maaka. Nnọhna ẹrạbh ukuma jobh afona k’ẹkhạma ch’Tob.

7 Masẹ Devid ọbhaang udik ngwa, ọtọhm Joab utima akpongnạng pẹ phyibh p’akke irima ofona. 8 Wa akpongnạng p’Ammọn ado ifor ayin k’iyaan ata abe k’ẹbaakhamma ch’efhon-diden, abẹ age okpong-baakha. Akpongnạng p’Aram, p’nkhạma s’Zoba, ọttạra s’Rehob, ọttạra s’Tob, ọttạra s’Maaka, anyaangẹ atobha k’ọyaankpa kw’ọbaang ma.

9 Masẹ Joab osẹ bẹ́, abẹ kk’ẹ okpong-baakha agia abaabh-ẹ, ma wọ n’otek akkedim bạnọ p’ekpong k’Israẹl bẹ́, abẹ ata arima akpongnạng p’Aram abẹ. 10 Wa ọtạk akpongnạng mbọkha p’arikhi otte ọbọhk ọnạng nnwọkka Abishayi, utima bẹ ọta urima akpongnạng p’Ammọn abẹ. 11 Joab oben bẹ́, "De anạng p’Aram akpọhkhọ ayọhng-m, ọma kwu ikkaan-m o. Okhenka, de anạng p’Ammọn akpọhkhọ ayọhnga ọma, amma m’nkwu-ukwu, nkwu nkkaan-ọ. 12 Ọma kpọhkhọ ifor annima irima nja ẹkkam-ẹkkam k’ncho s’anạng pamạna, ọttạra s’ifhon-diden s’Ubinọkpaabyi kwamạna. Ọvaar Ubinọkpaabyi m’usi oche kw’ọdaakh-ẹ."

13 Ma wọ Joab ọttạra akpongnạng pẹ afon ata arima anạng p’Aram abẹ, anạng p’Aram arạbh ma k’abẹ k’ititikha. 14 Masẹ anạng p’Ammọn ase bẹ́, anạng p’Aram nạnka arạbh, abẹ arạbh arik Abishayi annwa k’efhon-diden. Ma wọ Joab ukum anạng p’Ammọn abẹ ririma, ọkpa nnạm ọbhạna k’Jẹrusalẹm.

15 Masẹ akpongnạng p’Aram n’ase bẹ́, akpongnạng p’Israẹl kk’bẹ akhema, abẹ afona adạkhẹ ata ado ayok atobha. 16 Wa Hadadẹzẹr ofon ọta ọtạkha akpongnạng p’Aram tạma k’Ọraanga ukhubha kw’Yupharetes tạrr ukpira k’Hẹlam. Shobak kw’ode odecho kw’akpongnạng p’Hadadẹzẹr, utima bẹ eden.

17 Masẹ Devid ọbhaang udik ngwa, otobha anạng p’Israẹl phyibh, utima bẹ ojekha Jọrdan afona k’Hẹlam. Wa anạng p’Aram age okpong-baakha atik Devid k’oche kw’abẹ m’arima abẹ. 18 Okhenka, aSiriya arạbhọ ma ititikha s’anạng p’Israẹl. Wa Devid ọfhọ ayaar-akpaar p’nnyạnyaang n’itwạr enọhna ukuma arạbh chi, ọttạra akpongnạng p’aseng k’mfhok nnọhna arạbh asen. Wa ọbạra uvun Shobak kw’ode odecho kw’akpongnạng pabẹ, ọfhọ. 19 Masẹ avaar phyibh p’aning k’isekhisek kw’Hadadẹzẹr ase bẹ́, anạng p’Israẹl kk’bẹ akhema, abẹ afona ata asi ẹmẹm ọttạra anạng p’Israẹl, abẹ abạra aninga k’isekhisek kwabẹ.

Wa ojora ọvạk anạng p’Aram bẹ́, abẹ abạra ata akkaana anạng p’Ammọn.