1 Wa Devid ọbạbhọ bẹ́ "Ọnạng utim urikhi kha ẹchọhmfhạr ch'Saul kw'm'nsi ọphyaam nnạng k'ẹcho ch'Jonatan yeri?" 2 Wa ọkhaam ọtọhmnạng kw'n'okkeri ẹchọhmfhạr ch'Saul kw'okpen Ziba, kw'abẹ ayeri anạng Devid. Ọvaar Devid ọbạbh-ẹ bẹ́, "Ọma wọ akpen Ziba?"

Ubhina bẹ́, "Uwe e, amma ọtọhmnạng kwọ wọ e."

3 Ọvaarnạng ukwu ọbạbh bẹ́, "Ọnạng wạnọ-wạnọ utim urikhi kha ẹchọhmfhạr ch'Saul, kw'amma m'nsi ọphyaam f'Ubinọkpaabyi nnạng o?"

Ziba ubhina ọvaarnạng bẹ́, "Ujunungnwa wạnọ kw'Jonatan utim urikhi kha, okhenka ọphyạkhẹ mkpẹtẹ."

4 Ọvaarnạng ọbạbh bẹ́, "Ẹma oyeni uning mạn?"

Ziba ubhina bẹ́, "Uning k'Lo-Dẹba, k'ọchọhm kw'Makir, kw'Amiyẹl ofhonu."

5 Ma o, ọvaar Devid ọtọhm anạng k'Lo-Dẹba, k'ọchọhm kw'Makir, kw'Amiyẹl ofhonu bẹ́, abẹ ata atim-ẹ akwu.

6 Masẹ Mẹphiboshẹt, kw'ode nnwa kw'Jonatan, kw'Saul ofhonu ukpir, ọrạkha ọnạng Devid ikpukpobha.

Devid oyer-ẹ bẹ́, "Mẹphiboshẹt!"

Ochera bẹ́, "Aro kwaam, amma ọtọhmnạng kwọ wọ ẹ."

7 Devid oben-ẹ bẹ́, "Nạng-ọ ojor, amma m'nsi ọphyaam nnạng-ọ k'echo ch'atte Jonatan. M'mbạra mkpa nnạm ntạkha abibini p'atte kw'ididen Saul phyi-phyibh nnạng-ọ. Ọma bạra n'achi uchiattọhk amma abẹ k'okpe kw'idede."

8 Mẹphiboshẹt ọrạkha k'ikpukpobha oben bẹ́, "Amma ọtọhmnạng kwọ mgba kha mbạng o, kw'asi ọphyaam-dema mva anạng ẹpfa-bukhu masẹ akhaam?"

9 Ma wọ ọvaarnạng oyeri Ziba kw'ode ọtọhmnạng kw'Saul, ọkpaakh-ẹ bẹ́, "Amma kk'ọttọk fidede f'Saul, kw'ode aro kwọ, ọttạra ẹchọhmfhạr chẹ phyibh ọbọhk nttia nnạng nnwa-mfhona kw'aro kwọ. 10 Ọma ọttạra ajunungva pọ, ọttạra atọhhmnạng pọ mạna atubh owonu anạng-ẹ, ọfha uchiattọhk uninga f'nnwa-mfona kw'aro kwọ m'n'uchi. Mẹphiboshẹt kw'ode nnwa-mfona kw'aro kwọ m'n'uchi uchiattọhk amma abẹ." (Wa Ziba ofhonu ajunungva chi, ọbạra ọkhaama atọhmnạng ẹrạbh.)

11 Wa Ziba obeni ọvaarnạng bẹ́, "Amma ọtọhmnạng kwọ m'nsi fidede f'aro kwaam kw'ode ọvaarnạng obeni." Mạnna wọ Mẹphiboshẹt uchi ọttọhk ọttạra Devid masẹ nnwa wạnọ kw'ọvaarnạng.

12 Wa Mẹphiboshẹt ọkhaam udikkobh-nwa wạnọ kw'okpen Mika. Anạng p'ẹchọhmfhạr ch'Ziba phyibh abạra ade atọhmnạng p'Mẹphiboshẹt. 13 Ma wọ Mẹphiboshẹt urukhu k'Jẹrusalẹm ukwuru s'uwa n'uchi ọttọhk ọvaarnạng abẹ k'okpe kwidede. Ẹma wa ọphyạkhẹ mkpẹtẹ.