2 Samwẹl 11

Devid ọttạra Batshẹba

1 Ma ọyaabhakpe kw’avaar n’afona ekpong, Devid ọtọhmọ Joab ọttạra atọhmnạng p’ọvaarnạng ọttạra akpongnạng p’Israẹl phyi-phyibh ekpong. Abẹ ata afhọ anạng p’Ammọn, abạra abaabha ofhon kw’Raba age ngekha; Devid oyeni uninga k’Jẹrusalẹm.

2 K’ẹchọhkhawu mạnna jạnẹ, ovaar Devid ubin k’ibhikha ọta osenga k’ọvaarchọhm ẹrạng-ẹrạng. Uninga kha ose ikwanạng wạnọ kw’n’okpobha asi. Ikwanạng nwọ wa ọkhaankẹ ujibh iminava. 3 Devid ọtọhm ọnạng bẹ́, ọta oror osonga ọnạng kw’ikwanạng nwọ ode. Ọnạng nwọ ọkpaakh-ẹ bẹ́, "Batshẹba kw’Eliyam ofhonu, ọbạra ode ikwanạng kw’Uriya kw’ubin Het, ẹwọ ma e." 4 Devid o, ukwu ọtọhm akpaakh-nkkaabha bẹ́, abẹ ata atạkh-ẹ akken-ẹ. Ukwu ukpira, uyima abẹ, bạrasẹ ikwanạng nwọ n’ọkpa nnạm ọbhana k’akhẹ k’ọchọhm. (Okpe tạm núbhira kw’ikwanạng nwọ okker immaana-dik s’ifor ttutto usi.) 5 Ikwanạng nwọ o ophye okpong-ẹ, ọtọhm ẹkkaabha ọnạngẹ Devid bẹ́, "Amma ophye kk’aam okponga e."

6 Ma wọ Devid ọtọhmọ ẹkkaabha ọnạng Joab bẹ́, "Tọhm Uriya kw’ubin Het nạng-m." Mạnna wọ Joab ọtọhm-ẹ ọnạng Devid. 7 Masẹ Uriya n’okhebh-ẹ, Devid ọbạbh-ẹ oche kw’Joab uning kha, ọttạra oche kw’akpongnạng ode bẹ, ọttạra oche kw’ekpong ede. 8 Ma wọ Devid obeni Uriya bẹ́, "Sọhng ata akpobhu mfhok k’akhọ k’ọchọhm." Uriya ubina ma k’ọvaarchọhm ofona, abẹ atima ẹtaam ch’ọvaarnạng ọnạng-ẹ ator-ẹ nnạm. 9 Okhenka, wa Uriya okpong ma uyima k’ẹbaakhamma ch’ọvaarter ọttạra akpongnạng p’aro kwẹ, k’ochọhm kwẹ nọ́ta.

10 Masẹ abẹ akpaakhẹ Devid bẹ́, "Uriya k’ọchọhm kwẹ nọ́bhạna ẹ." Ma wọ Devid ọbạbhọ Uriya bẹ́, "Bẹ napra abina eden-ibhir akwu maa? Ode yạn kw’nạn k’akhọ ọchọhm nábhạna o?"

11 Uriya oben Devid bẹ́, "Ikwukwur s’Echekha, ọttạra anạng p’Israẹl, ọttạra p’Juda ayim k’ukkira, Joab kw’ode aro kwaam, ocho kwaam ọttạra atọhmnạng, ọttạra akpongnạng p’ọma ọvaarnạng kwaam abhingi kha ọyaankpa. Ukwuru yạn kw’amma n’abạra mmạna k’akhaam k’ọchọhm bẹ́, nta nchi, mbạra ngwo, mbạra nyima ikwanạng kwaam abẹ o? Oche ngwa kw’ọma arukhu akpen, amma udik demakwẹ gwọ mạ́nsi!"

12 Ma wọ Devid n’oben-ẹ bẹ́, "Khenka ninga maa chemma, uphyini amma m’ntọhm-ọ akpa nnạm." Wa Uriya ubhingi ma Jẹrusalẹm ma iwu njọ, ọttạra iwu ch’echobh ma. 13 Devid oyer-ẹ, ukwu uchi ọttọhk, ọbạra ogwo atwuk abẹ. Wa Devid ọnạng-ẹ atwuk tạrr ubuma. Okhenka, ma ẹchọhkha, Uriya utim uwurukpa kwẹ ọta otor atọhmnạng p’aro kwẹ abẹ ayima. K’ọchọhm kwẹ nọ́bhạna.

14 K’ekpebha Devid ọkkẹr ẹkkaabha k’ọnnwẹrkpa ọnạng Uriya bẹ́, okkena Joab. 15 Ma ọnnwẹrkpa nwọ, ọkkẹrẹ bẹ́, "Chok Uriya k’akpong-chen, k’ibyi s’irima ẹkhạm-ọkhạm mororo, anyaangẹ arikh-ẹ, ọfha abẹ attẹ-ẹ, afhọ."

16 Ma o, masẹ Joab kk’efhon-diden ọbaabha oge ngekha, ọtạkha Uriya ochok k’ukhubha kw’osong bẹ́, akkemkpa p’awawuna-nạng pabẹ aning. 17 Masẹ ajunung p’efhon-diden ngwọ ayini k’iyaan bẹ́, abẹ akwu arima Joab abẹ, ma wọ abẹ afhọ Uriya kw’ubin Het, ọttạra akpongnạng bạnọ p’Devid. 18 Wa Joab otọhmọ ẹkkaabha otek Devid udik kwidede kw’uyini k’ekpong njọ. 19 Ọtọhnọ ọkpaakh-ẹkkaabha nwọ bẹ́, "De kk’ọvaarnạng atekha oche kw’ekpong ede, 20 de ọvaarnạng ọdwạkh-ẹ, ọbạbh-ọ bẹ́, ‘Abạnga asi yạn ata arima ekpong abaanga k’efhon-diden oyeni? Wạra abạnga kásong bẹ́, abẹ akkokke aninga k’ọbaakha n’atta ayuk? 21 Anẹ wọ wa ọfhọ Abimẹlẹk kw’Jerub-Bẹshẹt ofhonu? Ikwanạng sạng uning k’ọbaakha ubingi ẹtakpa ch’ẹfhẹ-ẹ k’Tẹbẹz? Abạnga asi yạn ata arima afora k’ọbaakha?’ Kpaakh-ẹ bẹ́, ‘Ayongu ma, Uriya kw’ubin Het, kw’ode ọtọhmnạng kwọ ọgba ope ẹ.’ "

22 Ma wọ ọkpaakh-ẹkkaabha ubin ofona. Masẹ ukpir, ọkpaakh-ẹ idik phyibh s’Joab kk’ẹ ọtọhma bẹ́ ọkpaak Devid. 23 Ọkpaakh-ẹkkaabha nwọ oben Devid bẹ́, "Akpongnạng mbọ ayọhng mạna mkpaam e. Abẹ ayini k’iyaan akwu arima mạna abẹ k’ọyaankpa, okhenka, ankhubhu bẹ tạrr abẹ akpa nnạm k’ẹbaakhamma ch’efhon-diden kwabẹ. 24 Ma wọ akkedim p’ayuk-ttạtta aning k’ọbaakha n’atta akpongnạng pọ ayuk, osenga ma, anạng bạnọ p’ọvaarnạng ape. Ayongu ma, Uriya kw’ode okpongnạng kwọ kw’ubin Het kk’upua."

25 Devid oben ọkpaakh-ẹkkaabha nwọ bẹ́, "Ben Joab bẹ́, tte udik ngwọ nạng-ẹ ẹmma ọphyaangẹ, khiri ẹkpong ch’ẹfhọ ọnạng, m’ẹbạra ẹfhọ ọnạng ọdwạkh-ọdwạk. Tte ọkpọhkhọ ifor ofona ororo urima efhon-diden nwọ abẹ, udimi wẹ. Tima idik nna ge Joab nttem."

26 Masẹ ikwanạng kw’Uriya ọbhaang bẹ́ udim kwẹ kk’upua, ọgạma, ọbạra utima nkwuna sẹ. 27 Masẹ okpe kw’utim nkwuna kk’ottonga, Devid ọta ọtạkh-ẹ ukwuna k’akhẹ k’ọchọhm, ukwu ode ikwanạng kwẹ, ọmaan-ẹ ujunungnwa. Okhenka, usisi nwọ kw’Devid Ọvaar Ubinọkpaabyi ettem nórebha.