2 Samwẹl 14

Absalọm ọkpa nnạm k’Jẹrusalẹm

1 Wa Joab kw’ode nnwa kw’Zẹruya osong bẹ́, ettem ch’ọvaarnạng ining k’Absalọm. 2 Ma wọ Joab ọtọhmọ ọnạng k’Tẹkoa bẹ́, ọta ọtạkha ikwanạng wạnọ kw’odongu-odongu utima ukwu. Joab wa obeni ikwanạng nwọ bẹ́, "Ọma si nkkari bẹ́, aning epokwa. Age ọvạra-bina. Ana bạnọ-bạnọ káfọhnọ. Si masẹ ọnạng kw’kk’epokwa uninga k’iwu-saabhada. 3 Sọhng k’ọvaarnạng ata akpaakh-ẹ idik nna s’mkpaakh-ọ maa." Joab ukwu ọtọhn-ẹ oche kw’m’okpaak.

4 Okpe kw’ikwanạng nwọ kw’ubin Tẹkoa ukpir k’ọvaarnạng, ọrạkha uttima ititikha k’isisek k’ikpukpobha oben bẹ́, "O ọvaarnạng, kkaan-m e!"

5 Ọvaarnạng ọbạbh-ẹ bẹ́, "Mbạng vọ ọphyaang-ọ ẹmma?"

Ikwanạng nwọ ọpọhn-ẹ bẹ́, "Amma nde opokwa; udim kwaam kk’upua. 6 Amma ọtọhmnạng kwọ nkhaam ajunungva afa. Wa abẹ arim ayok abẹ k’owonu k’okpe kw’ọnạng nạnóde kw’ọkkaan bẹ irima. Oyok wạnọ uvun oyok ọfhọ. 7 Mantọmma, efona chaam phyibh n’iwun-m uwuna, n’eben-m bẹ́, ‘Nạng mạna oyok nwọ kw’ọfhọ nnwọkka, ọfha amạna amgba amfhẹ-ẹ, antera echo ch’nnwọkka kw’ọfhọ; ọbạra m’andim-ẹ ẹbochia.’ Maa, sabẹ n’adimi akpen p’nnwa nwọ wạnọ kw’urikh-m o? Sabẹ n’adimi eche ch’udim kwaam ọttạra ẹchọhmfhạr chẹ ma ọyagbin o?"

8 Wa ọvaarnạng obeni ikwanạng nwọ bẹ́, "Sọhng mạna, amma m’nttọhnọ udik ngwọ nnạng-ọ."

9 Tạrr oseng mạma, ikwanạng nwọ kw’ubin Tẹkoa oben-ẹ bẹ́, "Tte aro ọvaar kwaam ubina ọnạng amma ọttạra ẹchọhmfhạr ch’otte kwaam. Tte ọvaarnạng ọttạra ẹvaarchi chẹ nạngẹ ipina ẹkhaam."

10 Ọvaarnạng ọpọhna bẹ́, "De ọnạng kwidede ọphyaang-ọ ẹmma, tim-ẹ kwu. Kwạna abẹ dạk kọ ẹmma máphyaangẹ."

11 Ikwanạng nwọ ọbẹ́, "Tte ọvaarnạng ochekhi k’eche ch’Ọvaar Ubinọkpaabyi, kw’ode Ubinọkpaabyi kwẹ, bẹ́, ẹma ọnạng wạnọ-wạnọ ọbọhk mótte utwukha ẹnạng-fha njọ, ọfha abẹ nạngẹ nnwa kwaam afhọ."

Ọvaarnạng ọpọhna bẹ́, "S’Ọvaar Ubinọkpaabyi urukhu akpen, isisira-naanga s’nnwa kwọ k’isek mítto."

12 Ma o, ikwanạng nwọ oben bẹ́, "Attitte, tte amma ọtọhmnạng kwọ mkpaak ọvaarnạng kwaam udik e."

Ọvaarnạng ubhin-ẹ bẹ́, "Kpaak udik!"

13 Ikwanạng nwọ n’obeni bẹ́, "Asi yạn attọhnọ ipyibha-khira nja atena anạng p’Ubinọkpaabyi? De ọvaarnạng ọkpaakhẹ udik demakwẹ ngwa, ẹma oyeni sạng kw’ọbhạkhẹ upyima ma, s’ọvaarnạng nạn nnwa kwẹ kw’ukhubhu tạm nútima ọkpa nnạm o? 14 Masẹ asi p’abyeng k’isisek p’ọnạng nạn adạkhẹ mókke utima ọkpa nnạm, mạnna wọ m’ampe. Nttọhna s’Ubinọkpaabyi oche ngwọ nídia. Okhenka, ẹma oter oror bẹ́ ọnạng kw’abẹ akhubh-ukhubh ọkpa nnạm otor-ẹ.

15 "Amma kk’nkwua bẹ́, nkwu mkpaak aro kw’ode ọvaarnạng kwaam udik ngwa, ukwuru bẹ́, anạng mbọ kk’asia ojor-m. Amma ọtọhmnạng kwọ kk’nkka bẹ́, ‘De mkpaakhẹ ọvaarnạng udik ngwa, nudusi, m’usi ọttọhk f’mphyem-ẹ ọnạng-m. 16 Nudusi, ọvaarnạng m’ocher-ochera bẹ́, ọkkaana orengi amma ọtọhmnạng kwẹ k’mbọhk s’ujunung kw’n’okhonga bẹ́, ọrạm amma ọttạra nnwa kwaam k’okhebh f’Ubinọkpaabyi ochokhu mạna.’

17 "Ẹgwọ usi amma ọtọhmnạng kwọ nkkẹ bẹ́, ‘Tte ọtọhnga kw’aro ọvaar kwaam okkeri okhebh pfaam, ukwuru bẹ́, aro ọvaar kwaam ode masẹ oseng-eden kw’Ubinọkpaabyi, kw’osong ijibha ọttạra ipyibha. Tte Ọvaar Ubinọkpaabyi, kw’ode Ubinọkpaabyi kwọ uninga abọ.’ "

18 Ma o, ọvaarnạng oben ikwanạng nwọ bẹ́, "Khaam ibhina ch’udik kw’m’mbạbh-ọ maa, kádubh o."

Ikwanạng nwọ ọbẹ́, "Tte aro ọvaar kwaam ọbạbh kadẹ o."

19 Ọvaarnạng ọbạbh bẹ́, "Ọma nákka bẹ́, ọbọhk kw’Joab uning ma udik ngwa?"

Ikwanạng nwọ ubhina bẹ́, "S’ọma aro ọvaar kwaam arukhu akpen, ọnạng wạnọ-wạnọ kw’m’ọkhạmọ udik usi, oyonga kw’aro ọvaar kwaam ọkpaakhẹ, kóde. Akwẹ ode udik ọkka bẹ́, ọtọhmnạng kwọ, Joab, wọ ọtọhn-m bẹ́, nsi udik ngwa. Ẹma wọ ọbạra ọtọhn amma ọtọhmnạng kwọ idik s’mkpaakhẹ maa phyibh. 20 Wa Joab kw’ode ọtọhmnạng kwọ usi oche ngwọ ọfha utima ma ọbhạkhẹ idik ininga. Aro kwaam ọkhaam ekkoji masẹ oseng-eden kw’Ubinọkpaabyi, ẹma osong udik kwidede ma kw’n’otto maa isek nna."

21 Ma wọ ọvaarnạng obeni Joab bẹ́, "Ọbaan ma, m’nsi-usi oche ngwọ. Ọma sọhng ata atima udikkobh nwọ kw’ode Absalọm tima kpa nnạm."

22 Joab otto ukhubha ititikha k’isisek k’ikpukpobha, ọbạra odo ọvaarnạng. Oben bẹ́, "Amma ọtọhmnạng kwọ kk’nsonga bẹ́, kk’ọphyaam nkhaama k’ititikha s’aro ọvaar kwaam chemma, ukwuru s’ọvaarnạng kk’amma ọtọhmnạng kwẹ ephyema chẹ ọnạnga."

23 Ma wọ Joab ubin ofona k’Gẹshur ọta ọtạkha Absalọm utima ọkpa nnạm k’Jẹrusalẹm. 24 Okhenka, ọvaarnạng oben bẹ́, "Absalọm m’ofona k’akhẹ k’ọchọhm, nạn-nóra bẹ, ose ititikha saam." Mạnna wọ kw’Absalọm osengi ofona k’akhẹ k’ọchọhm, ititikha s’Ọvaarnạng núsia.

25 Wa k’Israẹl phyibh, ọnạng kóde kw’abẹ atọhng ajibhada pẹ, masẹ mbọ p’Absalọm. Tạma k’echo tạrr ukpira k’mfhokpatwạkhọ, ọraak kọ́khaam. 26 Wa n’uphyiri isisira sẹ okpe gwạnọ k’cho, ukwuru s’asẹ n’idọhbh-ẹ ọdọhbh. Okpe kwidede kw’uphyiri isisira sẹ, adọhbh p’isisira sẹ n’ikpira ashẹkẹl arạbh jobh, itor k’oche kw’abẹ n’ayoma adọhbh py’ekpo k’ọvaarchọhm.

27 Wa Absalọm ọkhaam ajunungva attaan ọttạra ọkwanạngnwa. Wa ọkwanạngnwa nwọ okpen Tamar, ọbạra ujibh ikwanạng.

28 Wa Absalọm urukhu k’Jẹrusalẹm icho ifa, okhenka, ititikha s’ọvaarnạng nókke ose. 29 Absalọm ọtọhm bẹ́, abe ayeri Joab anạng-ẹ, ọfha ọtọhm-ẹ k’ọvaarnạng. Okhenka, Joab ufhumu eyera njọ. 30 Ma wọ obeni atọhmnạng pẹ bẹ́, "Akkeri, owonu ngwọ kw’Joab kw’uning ọbaanga kwaam, ọkhaam abarli. Asọhng ata akkạmọ kwẹ." Mạnna wọ kw’atọhmnạng p’Absalọm akkạmọ owonu kw’Joab.

31 Joab ofona ọta okhebha Absalọm oben-ẹ bẹ́, "Ukwuru yạn kw’atọhmnạng pọ ata akkạmọ owonu kwaam o?"

32 Absalọm oben Joab bẹ́, "Kker e, amma ntọhmọ ẹkkaabha bẹ́ akwu, ọfha ntọhm-ọ ata abạbh ọvaarnạng bẹ́, ‘Mbạng vọ f’nseng apfẹ mbina k’Gẹshur nkwuna ma o? De wạra nning kha wọ m’ujibh-m ọtạm!’ Masẹ n’nning maa, nnoru bẹ́ nse ititikha s’ọvaarnạng e. Ode kk’mpina k’eden chidede, tte ọfhọ-m."

33 Ma wọ Joab ubin ofona k’ọvaarnạng ọta ọkpaakh-ẹ udik ngwọ. Wa ọvaarnạng oyeri Absalọm kw’ukwu ọrạkha uttima ititikha k’isisek, k’ikpukpobha. Ọvaarnạng ọbaakh-ẹ.