2 Samwẹl 21

Devid oter udik kw’Saul usi anạng p’Gibeọn

1 K’okpe kw’uwa Devid ọdạbhẹ ẹvaar, wa okwo f’ididen uning k’Israẹl k’icho mạnna ittaan. Wa Devid ọta ọdwạn Ọvaar Ubinọkpaabyi otena ma udik ngwọ. Ọvaar Ubinọkpaabyi oben bẹ́, "Okwo mvama ubin k’usisi kw’Saul ọttạra ẹnạmma chẹ, sabẹ afhọ anạng p’Gibeọn".

2 Ọvaar Devid oyeri anạng p’Gibeọn, ọkpaak bẹ abẹ. (Wa anạng p’Gibeọn Israẹl nábina, abẹ ade anạng p’Amọr p’arikhi-urik. Wa anạng p’Israẹl kk’achekha bẹ́, abẹ m’atte bẹ ọbọhk abẹ aruk. Okhenka, Saul ọkhạmọ bẹ́ m’ọfhọ bẹ, ukwuru s’uttum-ẹ kha ettem bẹ́, ọkkaana anạng p’Israẹl, ọttạra p’Juda.) 3 Devid ọbạbh anạng p’Gibeọn bẹ́, "M’nsi mbạng nnạng bạnga? M’nsenga yạn nsi efokhu, ọfha abạnga ado okhebh f’Ọvaar Ubinọkpaabyi?"

4 Anạng p’Gibeọn abhin-ẹ bẹ́, "Amạnamba ẹfa kánkhaam bẹ́, annor gol ọttạra silva k’mbọhk s’Saul, oseng k’ẹchọhmfhạr chẹ. Amạnamba ẹfa mámbạra ankhaama bẹ́, amfhọ ọnạng wạnọ-wạnọ k’Israẹl."

Devid n’ọbạra ọbạbh bẹ́, "Mbạng vọ f’abạnga aroru bẹ́ nsi nnạng bạnga?"

5 Abẹ abhina ọvaarnạng bẹ́, "Ọnạng nwọ kw’udimi mạna, ọttọhnọ bẹ́ udimi mạna woowong, amạna ibyi rạnẹ-rạnẹ k’Israẹl kánkhaam. 6 Tte abẹ anạng mạna iva p’iva pabẹ p’ade ajunung, ncho nsenọfa, amfhọ, anjạn apfura pabẹ ma ititikha s’Ọvaar Ubinọkpaabyi, k’Gibea kw’ode ọfhon kw’Saul, ẹma nwọ kw’Ọvaar Ubinọkpaabyi kk’otekha."

Ma wọ ọvaarnạng obeni bẹ́, "Amma m’ntte bẹ ọbọhk otte nnạng bạnga."

7 Wa ọvaarnạng otte Mẹphiboshẹt kw’ọde nnwa kw’Saul ọbọhk uruk akpen, ukwuru echekha ch’Devid ọttạra Jonatan kw’ode nnwa kw’Saul kk’atạkha k’ititikha s’Ọvaar Ubinọkpaabyi. 8 Okhenka, ọvaarnạng ọtạk Armoni, ọttạra Mẹphiboshẹt, p’ade iva afa p’Aiya kw’ode nnwa kw’Rizpa ọmaanẹ ọnạng Saul, ọttạra ajunungva asen p’Mẹrab kw’ode uminanwa kw’Saul ọmaanẹ ọnạng Adriyẹl kw’Barzilayi kw’ubin Mẹholat ofhonu. 9 Ọtạkha bẹ ọnạng anạng p’Gibeọn, abẹ afhọ bẹ, atạkha apfura pabẹ ajạn k’okpecho, k’ititikha s’Ọvaar Ubinọkpaabyi. Wa abẹma anạng asenọfa phyibh ape okpe gwạnọ. Wa abẹ afhọ bẹ k’echedenwu ch’iphya, s’iphya s’abarli itạm.

10 Rizpa kw’ode ọkwanạng-nwa kw’Aiya ọtạk ọvạra-bina ọjẹ k’ẹtakpa ọnạng ẹma oyeni. Tạma ma ọphyakpe tạrr ukpira k’okpe kw’ọrạngkpaang ọtạm apfura mbọ tạtebh, n’ukhubh ọnọhn k’ẹya, ukhubh mkpaten k’irungu, ọfha apyẹ nạngẹ apfura mbọ achi. 11 Okpe kw’Devid ọbhaang udik kw’Rizpa kw’ode ọkwanạng-nwa kw’Aiya, kw’ode oyok kw’Saul kk’usia, 12 Devid ọta ọtạkha akhạbhọ p’Saul ọttạra nnwa kwẹ Jonatan k’anạng p’Jabẹsh-Gilead. (Wa anạng bọ afu apfura pabẹ k’okpe kw’iphya s’Bẹt-Shan, kha ibyi s’uwa aPhilistiya kk’bẹ arena, k’okpe kw’abẹ kk’Saul afha k’Gilboa). 13 Mạnna wọ Devid ọta ọtạkha akhạbhọ p’Saul ọttạra p’nnwa kwẹ Jonatan kạkha. Ọbạra ọtakha akhạbhọ p’anạng p’abẹ kk’afha ajạn apfura pabe.

14 Abẹ annọhng akhạbhọ p’Saul ọttạra p’nnwa kwẹ Jonatan k’epekwur ch’Kish, kw’ode otte kw’Saul, kha Zẹla, k’ẹkhạma ch’Bẹnjamin. Abẹ abạra asi udik kwidede kw’ọvaarnạng ororu. Masẹ abẹ kk’idik nnọ asia, Ubinọkpaabyi ọbhaanga njọhm sabẹ s’isek nnọ.

Mkpong s’aPhilistiya arim

15 Wa anạng p’Israẹl ọttạra p’Philistiya abạra arima ekpong. Devid utim anạng pẹ urima anạng p’Philistiya abẹ, tạrr ẹfa ẹsẹ-ẹ. 16 Ishbi-Bẹnọb, nnwa wạnọ k’ikhaana s’iva p’iva p’Rapha, echo ch’ọkhọhn pfẹ ẹdọhbhọ ikpira adọhbh p’ashẹkẹl arạbh chi, ọbạra utima ọkkangkkang-kkro ọbhakwẹ, oben bẹ́, ẹma m’ọfhọ Devid, 17 Okhenka, Abishayi kw’Zẹruya ofhonu, ọkkaan Devid. Uvun oPhilistiya-nạng nwọ ọfhọ. Ma wọ ajunung p’Devid achekhi bẹ́, "Ọma dạkhẹ mạna abẹ mátwạn ata ekpong, ọfha ọyaantana kw’Israẹl nạng udimi."

18 Ukwu ukpira k’okpe ma, ekpong ẹbạra ẹtto ọttạra anạng p’Philistiya k’Gọb. Ma okpe ngwọ, Sibẹkayi kw’ubin Hushat ọfhọ Saph, kw’ode nnwa wạnọ k’ikhaana s’iva p’iva p’Rapha.

19 K’ekpong edwạkh-ọdwạk ọttạra anạng p’Philistiya k’Gọb, Ẹlhanan kw’Jair kw’ubin Bẹtẹlẹhẹm, ofhonu, ọfhọ Golayat kw’ubin Git, kw’ọkhaam ọkhọhn f’udini masẹ ẹbaanga ch’abẹ n’atima ayok ekpo.

20 K’ekpong ẹdwạkh-ọdwạk ch’etto k’Gat, wa ọkhaam ujunung wạnọ kw’ufu bẹ́ gbuk, kw’ọkhaam nnọhna nsajạnẹ k’ọbọhk kwidede, ọttạra nnọhna nsajạnẹ k’ofhok kwidede. Phyi-phyibh wa ọkhaam nnọhna ẹrạbh ukuma nnebung. Wa ọbạra ode nnwa-mfona kw’Rapha. 21 Masẹ wa unnukhu Israẹl, Jonatan kw’ode nnwa kw’Shimeyi, kw’ode nnwotte kw’Devid, ọfhẹ-ẹ.

22 Wa anạng mbọ annebung ade iva p’iva p’Rapha kw’ubin Gat. Wa Devid ọttạra ajunung pẹ bọ afhọ bẹ.