1 K'okpe kw'Saul kk'upua, Devid ubina kha s'kk'anạng p'Amalẹk okhema ukwuna, ukwu uninga iwu ifa k'Ziklag. 2 Ottong iwu ittaan, ujunung wạnọ kw'ubin k'ibyibhingasẹ s'Saul ukwu, ọttạra ọvạra f'kk'ọyaakha kk'ifor, ububuma awẹ kha echo. Masẹ ukpir k'ibyi s'Devid uning, otto ukhubha k'isek k'ikpukpobha.

3 Devid ọbọbh-ẹ bẹ́, "Ọma abin mạn akwu maa?"

Ujunung nwọ ubhina bẹ́, "Amma nnạbhọ k'ibyibhingasẹ s'akpongnạng p'Israẹl."

4 Devid ọbạbh-ẹ bẹ́, "Bạng udik gwọ otto? Kpaakh-m"

Ujunung nwọ ọpọhn-ẹ bẹ́, "Akpongnạng saabhada p'Israẹl kk'arạbha k'akpong-chen, saabhada kk'abạra apua. Saul ọttạra nnwa kwẹ Jonatan kk'abạra apua."

5 Ma wọ, Devid ọbạbhọ udikkobh nwọ kw'uttim ẹkkaabha njọ ukwu bẹ́, "Ọma aseng yạn asonga bẹ́, Saul ọttạra nnwa kwẹ Jonatan kk'apua?"

6 Udikkobh nwọ ọpọhna bẹ́, "Amma nta k'okpecho kw'Gilboa, nta nttạma s'Saul kk'uttia ọkpẹkhẹ ọkhọhn pfẹ, ọttạra oche kw'ijaar s'nnyạnyaang n'itwạr, ọttạra ayaar-nnyạnyaang n'akhubh-ẹ ẹkhạm-ẹkhạma. 7 Masẹ ọbhạkhẹ ose-m, oyer-m, nchera mben bẹ́, ‘Kkeri amma maa.’

8 "Ọbạbh-m bẹ́, ‘Ọma ade bạng ọnạng?’

"Amma o n'mpọhn-ẹ bẹ́, ‘Amma mbin Amalẹk.’

9 "Ma wọ, oben-m bẹ́, ‘Twạkhọ gbaar-m, afhọh-m! Khiri n'nning k'mbọhk s'obo maa, n'nttem njẹ iyọhng maa e.’

10 "Amma o, ntwạkhọ mgbaar-ẹ, mfhẹ-ẹ, ukwuru s'nse bẹ́, masẹ k'uttia ma, akpen dạk múruk. Nkwu nwạr-ẹ ivaarkpo s'ukhubh k'echo, ọttạra ọkpọ-ọbọhk kw'oge, ntima nkwu maa bẹ́, nnạng ọma aro kwaam e."

11 Ma wọ Devid ọttạra ajunung pẹ phyibh avạk ọvạra fabẹ k'ifor ayaakhẹ. 12 Abẹ aninga ikwosi-ikwosi, abạra agạma mmạng, ayima okwo tạrr ukpira k'ẹchọhkha, ukwuru obo kw'Saul ọttạra nnwa kwẹ Jonatan, ọttạra kw'anạng p'Ọvaar Ubinọkpaabyi, ọttạra anạng p'Israẹl, ukwuru sabẹ atim ọkkangkkang-kkro afhọ bẹ.

13 Devid ọbạbh ujunung nwọ, kw'utim ekkaabha njọ ukwu bẹ́, "Ọma abin mạn?"

Ujunung nwọ ọpọhna bẹ́, "Amma nde nnwa kw'ukhikhennạng kw'ubin Amalẹk."

14 Ma wọ Devid ọbạbh-ẹ bẹ́, "Usi yạn kw'nạn khọ nójora bẹ́, ayaan ọbọhk kwọ, afhọ ọnạng kw'Ọvaar Ubinọkpaabyi kk'ana obyenga k'echo?"

15 Ma wọ Devid oyeri ujunung kwẹ wạnọ oben bẹ́, "Song ata afhẹ-ẹ!" Osenga ma, uvun-ẹ ọfhọ, ujunung nwọ ope. 16 N'ode s'Devid kk'ẹ obena bẹ́, "Isẹ sọ m'ibhạkhẹ ikpẹkhẹ ọma oyeni, s'kk'ẹmma chọ atima ayaakhẹ bẹ́, ọma kk'ọnạng kw'Ọvaar Ubinọkpaabyi obyeng ana k'echo afha."

17 Devid utim ebomạng nja ọgạma Saul ọttạra nnwa kwẹ Jonatan. 18 Ọnạng ẹfa bẹ́, abẹ akpebhi ajunung p'Juda ebomạng nja ch'uyuk. (Abẹ akkẹrẹ ẹmạng nja k'nnwẹr s'Jasha).

19 "Israẹl o, abạrada pọ kk'apua ayima k'akpecho pọ e!

Kkeri oche kw'afanạng atto e!

20 Abạnga udik ngwa k'Gat kk'akpaak o,

abạnga kwẹ k'akkaden p'Ashkẹlọn kákpaak,

deja, aminava p'aPhilistiya m'aninga kk'ottennebh,

deja, aminava p'akpatwạr-nạng m'asi erobha e.

21 "O akpecho p'Gilboa,

Abạnga abona-si, oseng ọrạngkpaang máse e.

Tte achimạma p'nnạnga nạngẹ adạkhẹ k'iwonu sabạnga iyạmọ,

ukwuru bẹ́, ma wọ abẹ annukhu ọkhọhnkpa kw'ọfa-nạng,

usi ọkhọhnkpa kw'Saul ana p'Ọvaar Ubinọkpaabyi dạk kọ́khaam.

22 Ubin k'isẹ s'anạng p'ape,

ubina k'ẹnạng ch'afa-nạng,

uyuk kw'Jonatan nnạm nọ́kpa.

Ọkkangkkang-kkro kw'Saul mbọhk-mbọhk núkwuna.

23 Masẹ wa Saul ọttạra Jonatan arukhu akpen,

abẹ adaakhẹ anạng idik, abạra asi ọphyaam anạng ayok;

k'obo, abẹ ayok nábạra abhaangẹ.

Wa abẹ agwengi ayọhnga itingi,

abẹ akhaama ẹfa ayọhnga nkke.

24 "Aminava p'Israẹl o,

abạnga agạma Saul e,

kw'n'ọnạng bạnga ọvạra f'okhoru ichi-cho,

kw'utim gol odokhu nnya sabạnga.

25 "Chakhokho o! Kkeri oche kw'afanạng ape k'ekpong e!

Jonatan ope uyima k'akpecho pọ.

26 O Jonatan nnwọkka kwaam, ọma wọ amma n'ngạma e,

ọma wa abạra-m udik aseng eden.

Idạdaakha s'uwa akhaam abamẹ ibạr-ọbạr,

ibạrẹ ọtạm iyọhnga idạdaakha s'ikwanạng.

27 "Kkeri oche kw'afanạng k'attia!

"Ekpongkpo kk'ikhibha bẹ́ phyibh!"