1 K'okpe ma, wa ọkhaam udik kw'uyini ottena owonu kw'grep kw'Nabọt kw'ubin Jẹzrẹl. Wa owonu ngwọ uning k'ofhon kw'Jẹzrẹl ọbaanga ọvaarter kw'Ahab, kw'ode ọvaarnạng kw'Samariya. 2 Iwu jạnẹ, Ahab obeni Nabọt bẹ́, "Masẹ owonu kwọ kw'grep uning ọbaanga ọvaarter kwaam, tte ntạkha kwẹ ọfha ntima ntubh ekpo ẹdwạkh-ọdwạk. M'nnang-ọ owonu kw'grep kw'ujibh ọtạm, ọbạra ọdaakh-ọ bẹ́, akpe-m kwẹ okpe, m'ndebh kwẹ k'ẹphya chidede ch'ẹbaan."

3 Okhenka, wa Nabọt ubhin Ahab bẹ́, "Ọvaar Ubinọkpaabyi m'óchera bẹ́, ntạkha okhebh f'ab'otte paam, nnạng-ọ."

4 Wa Ahab utim ifor-dọhbha, ọttạra idwạdwạkhọ asẹ ọbhạna, ukwuru sẹ Nabọt kw'ubin Jẹzrẹl, kk'obena bẹ́, "Khọ okhebh f'ab'otte paam mạ́nnạng." Ahab ọta uyima k'ibhikha ọbhạkhẹ okkeri udimokpon ọbạra ufhum uchiattọhk chichi.

5 Masẹ Jẹzẹbẹl kw'ode ikwanạng kwẹ ukwu, ọbạbh-ẹ bẹ́, "Bạng udik gwọ ọphyaang-ọ ẹmma, kw'afhumu uchiattọhk o?"

6 Ahab ubhin-ẹ bẹ́, "Mbeni Nabọt kw'ubin Jẹzrẹl bẹ́, ‘Kpe-m owonu kwọ kw'grep de kk'ọdaakha, m'nnạng-ọ owonu ọdwạkh-ọdwạk ntima ntero ngwọ." Okhenka, oben bẹ́, ‘Khọ owonu kwaam kw'grep mạ́nnạng.’ "

7 Jẹzẹbẹl kw'ode ikwanạng kwẹ, oben bẹ́, "Ọma sạng ade ọvaarnạng kw'Israẹl o? Bina k'ibhikha achi uchiattọhk! Rebh ettem. M'ntạkha owonu ngwọ kw'grep kw'Nabọt kw'ubin Jẹzrẹl, nnạng-ọ."

8 Wa ikwanạng nwọ utima eche ch'Ahab ọkkẹr nkkaabha, oyemma ẹnọhna ch'Ahab ma nkkaabha nnọ, ọtọhm okkena adencho ọttạra adennạng p'arukhu k'ofhon-diden wạnọ, Nabọt abẹ. 9 Ọkkẹrẹ ma nkkaabha nnọ bẹ́,

"Abạnga atobha ayok atạkha iwu ch'abạnga m'aninga okwo, abạnga anạng Nabọt ininga ch'ẹbạr-udik k'ngekha kw'anạng. 10 Abạnga atạkha anạng-ajaakha afa achok ẹyạr akkeri Nabọt ititikha, tte anạng mbọ afa abaar-ẹ idik aben bẹ́, kk'Ubinọkpaabyi ọttạra avaarnạng ọsaakha, Osenga ma, abạnga atim-ẹ ayin k'iyaan atọbh-ẹ nta afhọ."

11 Wa adencho ọttạra adennạng mbọ p'arukhu k'ofhon-diden gwạnọ Nabọt abẹ, asi ator k'ẹkkaabha ch'Jẹzẹbẹl kk'ọkkẹra ọtọhm bẹ. 12 Abẹ atạkha iwu ch'abẹ m'anininga okwo, abẹ atạkha ininga ch'ẹbạr-udik k'ngekha kw'anạng, anạng Nabọt. 13 Mạnna kw'anạng ajaakha mbọ afa akwu aninga ẹyạr akkeri Nabọt ititikha. Abẹ abaar-ẹ idik m'ititikha s'anạng bẹ́, Nabọt kk'Ubinọkpaabyi ọttạra avaarnạng ọsaakha ẹ." Ma wọ abẹ atim-ẹ ayin k'iyaan s'ofhon-diden, abẹ atọbh-ẹ nta afhọ. 14 Wa abẹ atọhm ẹkkaabha anạng Jẹzẹbẹl bẹ́, "Abẹ kk'Nabọt nta atọbha, afhọ."

15 Jẹzẹbẹl ọbhaang ẹkkaabha njọ bẹẹẹ abẹ kk'Nabọt nta atọbha afhọ, oben Ahab bẹ́, "Bina ata atạkha owonu kw'grep kw'Nabọt kw'ubin Jẹzrẹl, kw'ufhum-ọ kpekpe, akhaama. K'akpen dạk kóde, kk'upua e." 16 Masẹ Ahab ọbhaang bẹ́, Nabọt kk'upua, ubina ofhona k'owonu kw'grep kw'Nabọt kw'ubin Jẹzrẹl bẹ́, ọta tạkha kwẹ ọkhaama.

17 Ma wọ, Ọvaar Ubinọkpaabyi ọkpaak Elija kw'ubin Tishbẹ ọtọnga oben bẹ́: 18 "Sọhng ata akhebha Ahab kw'ode ọvaarnạng kw'Israẹl kw'ọdạbhẹ Samariya. Uning k'owonu kw'grep kw'Nabọt, ọta ọtạkha kwẹ ọkhaama. 19 Ben-ẹ bẹ́, ‘Ma wọ ode udik kw'Ọvaar Ubbinọkpaabyi ọkpaakhẹ: Kk'ọnạng afha, atạkha ọtọhk fẹ. M'ibyi nnọ s'mpfa nttaakhẹ isẹ s'Nabọt, ma kw'mpfa m'bạra ittaakhẹ isẹ sọ, k'udik-ọkka, isẹ sọ e!’ "

20 Ahab oben Elija bẹ́, "Kw'uyini bẹ́, ọma ọwawuna-nạng kwaam kk'aam arora ase o!"

Elija ubhina bẹ́, "Kk'ọ nsia e, ukwuru s'kk'ifor sọ akpia anạng ibyibya k'ititikha s'Ọvaar Ubinọkpaabyi. 21 Ọvaar Ubinọkpaabyi obeni bẹ́, ‘M'nnạng-ọ irem. M'ndima iva p'iva pọ, mbạra ndimi okpong-nnạm-nwa kw'ujunug kwidede k'echọhmfạr ch'Ahab k'Israẹl, ode ubira ọbạra ubira núdia. 22 M'nsi ẹchọhmfạr chọ ede masẹ ẹchọhmfạr ch'Jẹroboam, kw'ode nnwa kw'Nẹbat, ọttạra ẹchọhmfạr ch'Baasha, kw'ode nnwa kw'Ahija, ukwuru sẹ kk'idwạdwạkhọ saam agbọkha, abạra atima anạng p'Israẹl eden abẹ asi ẹkhọngkwuru.’

23 "Udik kw'oten Jẹzẹbẹl, Ọvaar Ubinọkpaabyi oben bẹ́, ‘Mpfa m'nchi Jẹzẹbẹl ọbaanga odumokpon k'Jẹzrẹl.’

24 "Mpfa rọ m'nchi ọnạng kwidede kw'ode kw'Ahab kw'ope k'ofhon-diden, ọnọhn f'ẹrạng m'bạra ichi ọnạng kw'ope m'ẹkhạma njọ."

25 (Wa ọnạng tạma núninga, kw'okpe ifor sẹ ọnạng ibyibya k'ititikha s'Ọvaar Ubinọkpaabyi, masẹ Ahab, kw'Jẹzẹbẹl kw'ode ikwanạng kwẹ n'ọchọma. 26 Wa usi idik s'ibạk anạng, n'okpobha akha, masẹ anạng p'Amọr, p'iwa Ubinọkpaabyi ukhubhu k'ititikha s'anạng p'Israẹl.)

27 Masẹ Ahab ọbhaang atim mbọ, ọyaakhẹ ọvạra fẹ f'ifor, oge ọvạra-bina ọbạra utim uchiattọhk. Uyima ọvạra-bina apyẹ, ọbạra osenga ikwosi ọbaabha.

28 Ma wọ, Ọvaar Ubinọkpaabyi okpaakhẹ Elija kw'ubin Tishbẹ bẹ́: 29 "Kk'asia oche kw'Ahab k'ifor sẹ okhoma kha khaam k'ititikha o? Masẹ kk'ifor okhoma, ọkhạnkhạmọ dạk mạ́ntọhm k'okpe kwẹ. Okhenka, m'nnạng ẹchọhmfạr chẹ ọkhạnkhạmọ k'okpe kw'nnwa kwẹ ọdạbhẹ."