1 K'okpe-bhirada, k'cho kw'ottong attaan, Ọvaar Ubinọkpaabyi ọkpaakhẹ Elija udik, oben bẹ́, "Sọhng ata akhọhkha Ahab ifor sọ, khiri m'ntọhm ọrạngkpaang ọtọhm otebh ma ẹkhạma njọ." 2 Mạnna wọ Elija ofon ọta ọkhọhkha Ahab ifor sẹ.

Ma okpe ngwọ, wa okwo fididen uning k'Samariya, 3 kw'usi Ahab oyeri Obadaya, kw'ode okker-ọtọhm kwẹ. (Wa Obadaya ọkhaam ojora fididen kh'Ovaar Ubinọkpaabyi. 4 K'okpe kw'uwa Jẹzẹbẹl n'ọfhọ asi-ẹyaakha p'Ọvaar Ubinọkpaabyi, Obadaya kk'asi-ẹyaakha arạbh asen ọtạkha ọta udubh k'atakpa afa. Anạng arạbh afa ukuma jobh k'ẹtakpa chidede, n'ọnạng bẹ uchiattọhk ọttạra asi.) 5 Wa Ahab obeni Obadaya bẹ́, "Sọhng ata asenga abaabha ẹkhạma njọ, akpira k'mfhobh-cho ọttạra apekhuma p'idede. Ankke ma anse asạsaarẹ p'm'annạng nnyạnyaang ọttạra mmaam achi aruk akpen, ọfha nạngẹ utirattọhk famạna vạnọ-vạnọ ọbọhk antẹ, ope." 6 Mạnna wọ kw'abẹ abhaangẹ ẹkhạma njọ ch'abẹ akhạmọ bẹ́, abẹ asenga akhạbha. Ahab osenga ofona k'ukhubha gwạnọ, Obadaya ofona ukhubha ngwọkha.

7 Masẹ Obadaya n'osenga ọbaabha, Elija ọttạma abẹ. Obadaya utin-ẹ, ọrạkha uttima ititikha k'ikpukpobha usim-ẹ, oben bẹ́, "Aro kwaam Elija, ọma wọ maa k'udik ọkka?"

8 Elija ubhina bẹ́, "Uwe e, sọhng ata akpaak aro kwọ bẹ́, Elija uning mama e."

9 Obadaya ọbạbh bẹ́, "Ipina chaam ede yạn o, kw'n'aben bẹ́ atạkha amma ọtọhmnạng kwọ, atte ọbọhk anạng Ahab ọfhọ o? 10 K'oche kw'Ọvaar Ubinọkpaabyi, kw'ode Ubinọkpaabyi kwọ urukhu akpen, ẹkhạma kède, ọvaarfhon kọ́bạra ode kw'aro kwaam nạn ọnạng tạm nótọhma bẹ́, abẹ aror-ọ. Okpe kwidede kw'ẹkhạma, ọbạrạ ode ọvaarfhon obeni bẹ́, ma kàde, m'oben abẹ achekhi bẹ́, abẹ kọ ma násia. 11 Ma, ọma n'atọhm amma bẹ́ nta mkpaak aro kwaam bẹ́, ‘ Elija uning mama.’ 12 Masẹ m'mbina nnikhọ ma, amma ibyi s'iguguma s'Ọvaar Ubinọkpaabyi n'abạra itima abọ ifona kạ́nsong. De n'mfon nta mkpaak Ahab bẹ́ kk'ọ nsia, ukwu ukpira maa khọ núsia, m'ofhọ-m ofhọ. Abhaang, amma ọtọhmnạng kwọ ntạm k'idikkobh chaam mkpobha Ọvaar Ubinọkpaabyi o. 13 Aro kwaam, node bẹ́, udik nábhaanga kw'nsi k'okpe kw'Jẹzẹbẹl n'ọfhọ asi-ẹyaakha p'Ọvaar Ubinọkpaabyi? Amma ndubhu asi-ẹyaakha arạbh asen k'atakpa afa, arạbh afa ukuma jobh k'ẹtakpa jạnẹ, arạbh afa ukuma jobh ka njọkha, mbạra nnạng bẹ uchiattọhk ọttạra asi. 14 Ma n'atọhm-m bẹ́, nta mkpaak aro kwaam bẹ́, ‘Elija uning maa’, m'ọfhọ-m ọfhọ!"

15 Elija oben bẹ́, "K'oche kw'Ọvaar Ubinọkpaabyi kw'Ẹfa phyibh kw'amma mkpobh urukhu akpen, k'udik-ọkka, amma m'nkọhkha Ahab ifor saam ọkhọhkha chemma."

16 Wa Obadaya ubin ọta okhebha Ahab ọkpaakh-ẹ udik ngwọ. Ahab o n'ofon ọta okhebha Elija. 17 Masẹ Ahab ose Elija, ọbạbh-ẹ bẹ́, "Ọma wọ ma, ọma ọkhọhr-nạng kw'Israẹl?"

18 Elija ubhina bẹ́, "Amma Israẹl k'ẹkhọhr nạ́ngia, ọma ọttạra ẹchọhmfhạr ch'atte bọ n'atera age Israẹl k'ẹkhọhr e. Abạnga kk'nnyina s'Ovaar Ubinọkpaabyi ayaanga ajẹ, ata akpohba akpatava p'Baal. 19 Ma o, yeri anạng p'Israẹl phyi-phyibh, abẹ akhebh-m k'okpecho kw'Kaamẹl. Abạra atima asi-ẹyaakha mbọ p'Baal, ẹnọhna ukuma arạbh afa ukuma jobh, abạra atima asi-ẹyaakha p'Ashẹra ẹnọhna akwu, p'n'achi ọttọhk k'okpokkro kw'Jẹzẹbẹl."

20 Mạnna wọ Ahab ọtọhmọ ẹkkaabha ọbaabha Israẹl, bẹ́ abẹ ayeri asi-ẹyaakha atobha k'okpecho kw'Kaamẹl. 21 Elija uyin obe anạng mbọ k'ititikha, oben bẹ́, "M'ubhir ukpira yạn, bạrasẹ abạnga asi ẹkka ch'abạnga k'idik nnama ifa o? De Ọvaar Ubinọkpaabyi wọ abạnga makpobha, akpobh-ẹ. Okhenka, ode Baal wọ abạnga makpobha, akpobh-ẹ."

Anạng mbọ akhenka amyi bẹ́ tọọhng.

22 Ma wọ, Elija obeni bẹ bẹ́, "Amma-amma wọ n'nnikhi k'ikhaana s'asi-ẹyaakha p'Ọvaar Ubinọkpaabyi. Okhenka, asi-ẹyaakha p'Baal ade ẹnọhna ukuma arạbh afa ukuma jobh. 23 Anạng mạna mmaam-dim mfa. Tte asi-ẹyaakha p'Baal atekha jạnẹ anạng abẹma oyeni. Tte abẹ achẹk chẹ k'ayaara-k'ayaara anạna k'ommeni, abẹ nạ́ngẹ ekpon age. Amma m'ntạkha ọbhaam-dim nwọkha, ndo wẹ nnạna k'ommeni, ekpon mạ́nge. 24 Abạnga m'ayeri eche ch'ọkha f'abạnga, amma m'mbạra nyeri eche ch'Ọvaar Ubinọkpaayi. Ọnạng kw'oseng k'ekpon ubhina, uyini bẹ́, ẹma wọ kw'abạnga m'akpobha."

Wa anạng mbọ phyibh abeni bẹ́, "Udik kw'akpaakhẹ ma, ujibhi oseng eden."

25 Elija oben asi-ẹyaakha mbọ p'Baal bẹ́, "Masẹ abạngama asaabhẹ-ọsaabh, abạnga achi eden atekha ọbhaam-dim wạnọ, ado wẹ. Abạnga ayeri eche ch'ọkha fabạnga, okhenka, abạnga ekpon káge o." 26 Mạnna wọ abẹ atạk ọbhaam-dim kw'abẹ anạngẹ bẹ, ado.

Abẹ ayeri eche ch'ọkha fabẹ, tạma k'ekpebha tạrr, ukpira k'ẹya, abẹ n'awạmọ k'ẹrạng-k'ẹrạng bẹ́, "O Baal, tọbh mạna ẹmma khadẹ!" Okhenka, bẹ ẹmma nọ́tọbha, bẹ nọ́bạra ubhina. Abẹ atubh mbin abaabha ijabyi sabẹ kk'asia.

27 Ma ẹyachẹ, Elija ọtạm bẹ yuyukhu, ọben bẹ́, "Abạnga ado ayeri-oyeri, ọgba ẹma wọ abạnga n'akpobha! Njanna n'ọkkẹ udik, ayọngu ma, ọyạyạkhẹ wọ, adaadaak, ọta osenga. Njanna n'ọttaabha ọda, oyonga abạnga m'aphyạbh-ẹ." 28 Osenga ma, abẹ ado awạmọ-ọwạmọ, abẹ atima akkangkkang-kkro ọttạra akhọhn ataarẹ abẹma oyeni k'ifor tạrr isẹ ibyenga, otor k'ọche kw'ẹmmaana chabẹ edẹ. 29 Ẹyachẹ njọ eseng, abẹ afona ororo asi ẹyaakha ch'erebhi bẹ tạrr ukpira k'okpe kw'ejafọhna ch'ẹchọhkha. Okhenka, bẹ ẹmma nọ́tọbha, bẹ nọ́bạra ọpọhna, ọnạng kw'ọbạra ọkhọmọ bẹ itọhng kòde.

30 Ma wọ, Elija obeni anạng mbọ phyibh bẹ́, "Abạnga asenga agbaar-m khansẹ." Anạng mbọ asenga agbaar-ẹ. Odo ijabyi s'Ọvaar Ubinọkpaabyi, sabẹ kk'avọhkha. 31 Elija ọtạkha ata jobh-kamfa, ẹta jạnẹ ebe ẹnạng ẹkhạma jạnẹ ch'ẹnạmma ch'Jekọb, kw'Ọvaar Ubinọkpaabyi oseng k'akhẹ oben bẹ́ "Oma m'akpena Israẹl." 32 Utim ata mbọ usi ijabyi k'eche ch'Ọvaar Ubinọkpaabyi, ọbạra ọphyaakhẹ ọgbaarẹ kw'ọmmaam ẹkpa, kw'm'okke ọnwa agbạre p'ididen afa p'achimạma, ọfhạrọ sẹ. 33 Otobha ommeni, ọchẹk ọbhaam-dim nwọ, ọtạkha ọnạna k'ọmmeni mvọ. Oben bẹ bẹ́, "Abạnga age asi k'agbạre annebung tạrr apẹ ifu, abạnga abyenga pyẹ ma ẹnạnga njọ ọttạra k'ommeni."

34 Ọbạra oben bẹ bẹ́, "Abạnga asi adạkhẹ." Wa abẹ asi adạkhẹ.

Oben bẹ́, "Abạnga asi ottonga ikpe ittaan ." 35 Wa asi mbọ afhobhu afhạrọ ijabyi nnọ, abẹ abạra afu k'ọgbaarẹ bẹ́ ttạbh. 36 Masẹ ukpir k'ọkpe kw'ẹjafọhna, Elija kw'ode usi-ẹyaakha osenga obe k'ititikha, ose njọhm oben bẹ́, "O Ọvaar Ubinọkpaabyi, kw'ode Ubinọkpaabyi kw'Abraham, ọttạra Isaak, ọttạra Jekọb akpobh, tte anạng asonga chemma bẹ́, ọma wọ ade Ubinọkpaabyi kw'Israẹl, abẹ abạra asonga bẹ́, amma nde ọtọhmnạng kwọ, kw'n'usi idik phyi-phyibh otor k'nnyina sọ. 37 Bhaanga njọhm saam, o Ọvaar Ubinọkpaabyi, bhaanga njọhm saam, ọfha anạng mba asonga bẹ́, ọma Ubinọkpaabyi wọ ade Ubinọkpaabyi, kw'm'abạra abhakhẹ nttem sabẹ itor-ọ." 38 Mạnna wọ ekpon ch'ibin k'Ọvaar Ubinọkpaabyi ẹsạk ẹkkạmọ ẹja, ọttạra ommeni, ọttạra nta, ọttạra isisek, ẹbạra ẹyạma ẹttaakhẹ asi p'aning k'ọgbaarẹ.

39 Masẹ anạng mbọ phyibh asẹ udik ngwọ, abẹ́ atto ayima ma isisek, agạma aben bẹ́, "Ọvaar Ubinọkpaabyi wọ ode Ubinọkpaabyi kw'ọbaan ikpukpobha! Ọvaar Ubinọkpaabyi wọ ọbaan ikpukpobha!"

40 Wa Elija obeni bẹ bẹ́, " Abạnga avạkha asi-ẹyaakha p'Baal. Abạnga ọnạng wạnọ-wạnọ ọbọhk kátte ọrạbh o!" Mạnna wọ abẹ avạk bẹ́, Elija utima bẹ ọsạkha k'Ipekhuma s'Kishọn, ọfhọ bẹ ma.

41 Elija oben Ahab bẹ́, "Sọhng ata achi, abạra agwo, khiri ọrạngkpaang kwididen nạngkhu umun itum." 42 Ahab ofon bẹ́, ota uchi, ọbạra ogwọ, Elija o, uvura k'okpecho k'Kaamẹl ẹrạng-ẹrạng, ọrạkha ma isek, ọtạkha ititikha oge k'ntaak.

43 Oben ọtọhmnạng kwẹ bẹ́, "Sọhng ata akkeri k'ukhubha kw'ọraanga kwididen." Ofona ọta okkeri.

Oben bẹ́, " Ọttọhk kha kòde e." Elija oben-ẹ k'ikpe isenọfa bẹ́, "Kpa nnạm ata akkeri." 44 Ottong nden nsenọfa, ọtọhmnạng ukwu ọkpaakh-ẹ bẹ́, "Ebona ch'ẹsạk masẹ ọbọhk nạngkhi iyin k'ukhubha kw'ọraanga kwididen e."

Ma wọ Elija obeni bẹ́, "Sọhng ata akpaak Ahab bẹ́, ‘Do ọkpaar kwọ kw'nnyạnyaang n'itwạr ininga, arạbh asạkha ọfha ọrạngkpaang nạ́ng-ọ eden ọkpa.’ " 45 Iwa ebona ipyi k'ọrạngkpaang bẹ́ kkạng, ibum iguma, ọrạngkpaang kwididen ọtạma tạtebh. Ahab ọrạbh ofona k'Jẹzrẹl. 46 Wa ẹfa ch'Ọvaar Ubinọkpaabyi ẹsạk ẹnwa Elija, ọtạkha udikhikpa kwẹ ọkpa k'ọnọhma-wuram kwẹ, ọrạbh oyongu Ahab tạrr, ukpira kha Jẹzrẹl.