1Avaarnạng 11

Ipanạng p’Sọlọmọn

1 Ayongu ọkwanạngnwa kw’Phero, wa ọvaar Sọlọmọn ode ọnạng kw’ipanạng p’abin ifhon idwạkh-ọdwạk adaakhẹ. Wa ọtạk ipanạng p’Moab, ọttạra p’Ammọn, ọttạra p’Edom, ọttạra p’Sidọn, ọttạra p’Het k’ọbada. 2 Wa ipanạng mbọ abin k’idifhon nnọ s’uwa Ọvaar Ubinọkpaabyi kk’anạng p’Israẹl obena bẹ́, "Abạnga ipanạng k’ifhon nna k’ọbada kátạkha o, ukwuru bẹ́, abẹ m’abhạkhẹ nttem sabạnga ọbhạkhẹ, abạnga akpobha akha pabẹ." Tạrr oseng ma, Sọlọmọn osengi idạdaakha asẹ ọvạkha bẹ ochok. 3 Wa ọkhaam ipanạng ẹnọhna ukuma arạbh chi p’ade iva p’avaarnnạng, ọbạra ọkhaama amina-panạng arạbh chi. Ipanạng mbọ wa atim-ẹ attena apa. 4 K’okpe kw’Sọlọmọn kk’ọtạma, ipanạng pẹ atim-ẹ okpobha akha, asi ettem chẹ phyibh k’Ọvaar Ubinọkpaabyi, kw’ode Ubinọkpaabyi kwẹ dạk núgia, k’oche kw’uwa ettem ch’otte Devid kk’idia. 5 Sọlọmọn okpobh Ashtọrẹt kw’ode ọkha f’ikwanạng f’anạng p’Sidọn, ọttạra Molẹk, f’ode ọkha f’anạng p’Ammọn, f’ukpukhu anạng ukpukhu. 6 Mạnna wọ Sọlọmọn usi ibyibyia-dik k’ititikha s’Ọvaar Ubinọkpaabyi; ettem phyibh nútima ọtwạn Ọvaar Ubinọkpaabyi abẹ, oche kw’uwa otte kwẹ Devid kk’Ubinọkpaabyi abẹ ọtwạna.

7 Wa Sọlọmọn usi ikpukpobha-byi s’ọyaankpa, k’okpecho kw’uning k’ukhubha kw’ududon n’uyin kha Jẹrusalẹm, ọnạng Kẹmọsh kw’ode ọkha f’anạng p’Moab f’ukpukhu anạng ukpukhu, ọbạra usi ọnạng anạng p’Molẹk kw’ode ọkha f’anạng p’Ammọn, f’ukpukhu anạng ukpukhu. 8 Wa usi oche ngwọ ọnạng ipanạng pẹ phyibh p’abin idifhon idwạkh-ọdwạk, p’n’akkạmọ insẹns, abạra afọhnọ nja anạng ikha sabẹ.

9 Wa ettem ipyibhi Ọvaar Ubinọkpaabyi otena Sọlọmọn, ukwuru s’kk’nnạm ọkpa ọvạra Ọvaar Ubinọkpaabyi, kw’ode Ubịnọkpaabyi kw’Israẹl, kw’kk’abẹ uyina nden mfa. 10 Tạrr oseng s’uwa kk’Sọlọmọn eden ọkpa bẹ́ nạngẹ akha okpobh, Sọlọmọn ntọhna s’Ọvaar Ubinọkpaabyi nọ́tạkha. 11 Ma wọ Ọvaar Ubinọkpaabyi obeni Sọlọmọn bẹ́, "Masẹ ode bẹ́ ọmmaana-che kwọ ẹgwọ ma, ọma echekha chaam ọttạra akpebhi paam p’nnạng-ọ náchokha, itwuna kède bẹ́ m’mmaangẹ ẹkhạma nja kakhọ k’mbọhk, nnạng ọnạng wạnọ k’atọhmnạng pọ. 12 Okhenka, amma udik ngwa ma okpe kwọ mạ́nsi, ukwuru atte Devid, m’nsi ẹbhaangẹ k’okpe kw’nnwa kwọ. 13 Tạrr oseng ma, ofhon ngwa phyibh mạ́mmaangẹ. Okhenka, m’nnạng-ẹ ẹkhạma jạnẹ, ukwuru ọtọhmnạng kwaam Devid, ọttạra Jẹrusalẹm kw’kk’ntekha.

Awawunanạng p’Sọlọmọn

14 Wa Ọvaar Ubinọkpaabyi otte Sọlọmọn ọbọhk ọkhaama ọwawunanạng kw’ode Hadad kw’ubin Edom, k’efonamma ch’ọvaarnạng kw’Edom. 15 K’ocheden-kpe, masẹ Devid n’urima anạng p’Edom abẹ, Joab kw’ode ochonạng kw’akpongnạng, kw’kk’ofona bẹ́, ọta ọnnọhnga anạng p’kk’akpua, okpong kha ọfhọ anạng p’Edom phyibh. 16 Wa Joab ọttạra anạng p’Israẹl phyibh abhingi ma k’aphye asajạnẹ, tạrr abẹ afhọ ajunung p’Edom phyibh. 17 Okhenka, Hadad kw’uwa utim ode udikkobh, ọtwạnọ ikhaana rạnẹ s’ibin Edom abẹ, p’uwa ade atọhmnạng p’otte, abẹ arạbh afona Ijip. 18 Abẹ abin k’Midiyan afona kha Paran. Abẹ atạkha ajunung bạnọ ma Paran afona k’Ijip, ata akhebha Phero kw’ode ọvaarnạng kw’Ijip, kw’ọtạk ọchọhm ọttạra isisek ukwu ọttạra k’uchiattọhk ọnạng Hadad.

19 Wa Phero orebhi ettem Hadad abẹ tạrr ọtạkha nnwọkka kw’ọvaarnạng kw’ikwanạng Tahpenes kw’ode ikwanạng kwẹ, ọnạng Hadad k’ọbada. 20 Nnwọkka nwọ kw’Tahpenes, kw’ikwanạng ọmaan-ẹ ujunungnwa kw’okpen Gẹnubat, kw’uwa Tahpenes ọrạkhẹ k’ọvaarter. Ma wọ Gẹnubat urukhu ọttạra iva p’Phero oyeni.

21 Okpe kw’uwa Hadad utim uning k’Ijip, ọbhaang bẹ́ Devid kk’upua otor ab’otte, ọbạra ọbhaanga bẹ́, Joab kw’ode odecho kw’akpongnạng kk’upua ọttạra. Ma wọ Hadad obeni Phero bẹ́, "Tte-m ọbọhk mfona, ọfha mkpa nnạm k’ẹkhạma chaam."

22 Phero n’ọbạbh-ẹ bẹ́, "Mbạng vọ owor-ọ ma ofhon ngwa kw’n’abạra akpa nnạm k’ẹkhạma chọ o?"

Hadad ọpọhna bẹ́, "Ọttọhk sạng, khenka tte-m ọbọhk mfona!"

23 Ubinọkpaabyi ọbạra otte Sọlọmọn ọbọhk ọkhaama ọwawunanạng ọdwạkh-ọdwạk kw’okpen Rẹzọn, kw’ode nnwa kw’Eliyada, kw’uwa ọrạbhọ k’mbọhk s’aro kwẹ Hadadẹzẹr, kw’ode ọvaarnạng kw’Zoba. 24 K’okpe Devid udimi akpongnạng p’Zoba, wa Rẹzọn otobh ikhaana s’ajunung p’acher k’akhẹ, ukwu ode bẹ utim-eden, abẹ akwu aseng afona kha Damaskọs ata uruk, abạra akhaama ẹfa. 25 Wa Rẹzọn ode ọwawunanạng kw’Israẹl k’akpen p’Sọlọmọn phyibh, akwu attạra k’ẹkhọhr ch’uwa Hadad n’ọnạng-ẹ. Wa Rẹzọn ọdạbhẹ Aram, okhenka uwuna Israẹl.

Jẹroboam utim ẹkhọhr otor Sọlọmọn

26 Wa Jẹroboam kw’ode ujunungnwa kw’Nẹbat ọbạra utima ẹkhọr otor ọvaarnạng. Ẹma wa ode ọnạng wạnọ k’ikhaana s’atọhmnạng p’Sọlọmọn, kw’ubin Zẹrẹda, k’ẹkhạma ch’Ephraim, ọkka kwẹ ode opokwa kw’okpen Zeruya.

27 Maa wọ ode oche kw’oten k’ẹkhọhr ch’Jẹroboam utim otor ọvaar Sọlọmọn. Wa Sọlọmọn kk’egbo utubha ọkpa abhaang py’aphyaakhẹ k’udimokpon kw’efhondiden ch’Devid. 28 Wa Jẹroboam ode ujunung kw’ọkhaam emengkka. Masẹ Sọlọmọn ose ọtọhm-jibhada f’udikkobh nwọ usi, ọtạkh-ẹ usi ochonạng kw’atọhmnạng phyibh p’nkhạma s’Josẹph.

29 Ma okpe ngwọ, wa Jẹroboam ubin k’Jẹrusalẹm bẹ́ uyin k’iyaan, Ahija kw’ode usi-ẹyaakha kw’ubin Shilo, kw’oge ọnọhma-wuraam ọbhakwẹ, okhebh-e k’eden. Abẹma anạng afa mạnkkeni atwạnọ ikhaana abina arik ofhon. 30 Ahija ọvạkha ọnọhma-wuraam ọbhakwẹ kw’oge ọyaakhẹ k’akpa-k’akpa k’ibyi jobh-kamfa. 31 Nobeni Jẹroboam bẹ́, "Rengi akpa jobh anạng ọma oyeni, khiri Ọvaar Ubinọkpaabyi, kw’ode Ubinọkpaabyi kw’Israẹl obeni bẹ́, ‘Kker e, amma m’mmaangẹ ofhon ngwa k’mbọhk s’Sọlọmọn, ntạkha nkhạma jobh nnạng-ọ. 32 Okhenka, ukwuru ọtọhmnạng kwaam Devid, ọttạra efhondiden ch’Jẹrusalẹm, ch’kk’ntekha k’ikhaana s’nkhạma s’Israẹl phyibh, ẹma Sọlọmọn m’ọkhaama ẹkhạma jạnẹ. 33 Amma m’nsi oche ngwọ, ukwuru sabẹ kk’nnạm akpa avạr-m, abẹ n’akpobha Ashtọrẹt, kw’ode ọkha f’anạng p’Sidọn ọttạra Kẹmọsh, kw’ode ọkha f’anạng p’Moab, ọttạra Molẹk, kw’ode ọkha f’anạng p’Ammọn, abẹ echo násạkha asenga k’ikpukpobha abamẹ. Abẹ idik s’itor-otor nábạra asia k’ititikha saam. Abẹ akpebhi paam ọttạra nnyina saam nábạra achokha, oche kw’uwa Devid kw’ode otte kw’Sọlọmọn ochokhu.

34 " ‘Okhenka, amma ofhon ngwọ phyibh k’mbọhk s’Sọlọmọn mạ́ntạkha; amma kk’ẹ ẹvaar ndạbha k’akpen pẹ phyibh, ukwuru ọtọhmnạng kwaam Devid, kw’ntek, kw’ochokhu nnyina saam, ọttạra akpebhi paam. 35 Amma m’ntạkhha ofhon ngwọ k’mbọhk s’nnwa kwẹ, nnạng-ọ nkhạma jobh. 36 Amma m’ntạkha ẹkhạma jạnẹ nnạng nnwa kwẹ, ọfha ọyaanttaana kw’ọtọhmnạng kwaam Devid uninga ofona ororo k’ititikha saam k’Jẹrusalẹm, kw’ode efhondiden ch’ntek bẹ́ anạng aninga akpobha eche chaam. 37 Okhenka, node ọma, amma m’ntạkh-ọ, bẹ́ adạbh ibyi abaabh-ọbaabha k’oche kw’ọdaakhọ. Ọma wọ m’ade ọvaarnạng kw’Israẹl. 38 De asi udik kwidede kw’ntọhn-ọ, abạra asạkha echo k’osenga kwọ amma abẹ, abạra asi idik s’itor-otor k’ititikha saam bẹ́, achok akpebhi paam, ọttạra nnyina saam k’oche kw’ọtọhmnạng kwaam Devid usi, amma m’nninga abọ. M’nnạng-ọ ẹkhạma ch’ẹvaar ch’m’ittima arạnga masẹ njọ ch’uwa Devid ọdạbhẹ, m’mbạra ntạkha Israẹl nạng-ọ. 39 Amma m’nạng iva p’iva p’Devid irem ukwuru udik ngwọ, okhenka, asẹ ipimmanitor míninga.’ "

40 Sọlọmọn okhong bẹ́ ọfhọ Jẹroboam, okhenka, Jẹroboam ọrạbhọ ofona k’Ijip, k’ọvaarnạng kw’okpen Shishak, uninga ma tạrr Sọlọmọn ope.

Obo kw’Sọlọmọn

41 Idik idwạkh-ọdwạk s’Sọlọmọn usi phyi-phyibh, ọttạra ekkoji ch’uwa ọkhọhk, abẹ akkẹrẹ sẹ k’nnwẹr s’idik s’ẹtạma s’Sọlọmọn. 42 Wa Sọlọmọn ode ọvaarnạng k’Jẹrusalẹm, ọdạbhẹ Israẹl bẹ́ wạmm k’icho arạbh afa. 43 Wa Sọlọmọn ope otor ab’otte, abẹ annọhng-ẹ k’ẹfhondiden ch’Devid kw’ode otte kwẹ. Rẹhoboam kw’ode nnwa kwẹ, ọtạk ẹvaar ch’otte ọdạbh.