1 Wa Abraham ọkhaam oyok kw'okpen Kẹtura.

2 Ẹma wọ ọmaan-ẹ Zimran, ọttạra Jọkshan, ọttạra Medan, ọttạra Midiyan, ọttạra Ishbak, ọttạra Shua.

3 Jọkshan wa ode otte kw'Sheba ọttạra Dedan; iva p'iva p'Dedan ade abAshur, ọttạra abạLẹtush, ọttạra abạLeum.

4 Ajunungva p'Midiyan ade Ẹpha, ọttạra Ẹphẹr, ọttạra Hanọk, ọttạra Abida, ọttạra Ẹlda. Iva mbọ phyibh wa abẹ ade iva p'iva p'Kẹtura.

5 Wa Isaak okkem ẹkhaama phyibh ch'Abraham ope urik. 6 Okhenka, Abraham wa utim ẹkhaama chẹ ẹdwạkh-ọdwạk ọbhaangẹ iva mbọkha phyibh, p'ayok pẹ, oben abẹ akhạm aruk atena k'ukhubha kw'okpebha-dudon n'uyin, ọfha abẹ arik Isaak ẹbhaang.

7 Phyi-phyibh wa Abraham urukhu icho arạbh asenọttaan ukuma chi. 8 Ma wọ, Abraham ọjẹ ikpongannạm-yọhng sẹ, ukwu ope k'atạm otor anạng pẹ p'kk'apua. 9 Wa Isaak ọttạra Ishimayẹl annọhng otte kwabẹ, Abraham, k'ẹtakpa-pe ch'ining k'Makpẹla, ọbaanga Mamrẹ, k'isisek s'Ẹphrọn, kw'ode nnwa kw'Zoha kw'ubin Het. 10 Wa Abraham odebhi isisek nnọ k'mbọhk s'anạng p'Het. Wa abẹ annọhng Abraham ma ibyi nnọ rạnẹ s'uwa abẹ annọhng ikwanạng kwẹ Sara.

11 Masẹ Abraham kk'upua, Ubinọkpaabyi odo nnwa kwẹ Isaak, kw'uwa n'urukhu ọbaanga Beer-Lahai-Roi.

12 Maa wọ ode efonamma ch'Ishimayẹl, kw'Abraham ofhonu k'ntaak s'Hagar kw'ubin Ijip, kw'uwa ode ubira kw'Sara.

13 Maa wọ ode ache p'iva p'Ishimayẹl k'oche kw'ofhonu bẹ:

Nẹbayọt, ọttạra Kẹda, ọttạra Adbẹl, ọttạra Mibsam,

14 ọttạra Mishma, ọttạra Duma, ọttạra Masa,

15 ọttạra Hadad, ọmaana Tẹma, ọttạra Jetur, ọttạra Naphish, ọttạra Kẹdẹma.

16 Maa wọ ode ajunungva p'Ishimayẹl, p'adạbhẹ nkhạma jobh-kamfa, s'ikpen ache ibhina k'avaar-va pabẹ, ator k'ukhira kw'abẹ arukhu k'ibyibhingasẹ sabẹ. 17 Phyi-phyibh wa Ishimayẹl urukhu icho arạbh asajạnẹ ukuma chikhamfa, brasẹ n'ope otor anạng pẹ p'kk'apua. 18 Wa iva p'iva pẹ arukhu tạma k'ukhubha kw'Havila tạrr akpira k'ukhubha kw'Shur, ọbaanga erem ch'Ijip, s'n'aben bẹ, afona k'ukhubha kw'Ashur. Wa abẹ arukhu k'iwawuna attra ivotte pabẹ phyibh.

19 Maa wọ ode efonamma ch'Isaak, kw'ode nnwa kw'Abraham.

Wa Abraham ofhonu Isaak. 20 K'okpe kw'uwa Isaak ode icho arạbh afa, ọtạk Rẹbẹka k'ọbada. Rẹbẹka ode nnwa kw'Bẹtuẹl kw'ubin Aram kw'Padan-Aram, ọbạra ode nnwọkka kw'Laban.

21 Wa Rẹbẹka nnwa nọ́maana, ma wọ, Isaak ose njọhm ọnạng Ọvaar Ubinọkpaabyi k'echo ch'Rẹbẹka. Ọvaar Ubinọkpaabyi ọbhaanga njọhm sẹ, usi Rẹbẹka utima ifhạr. 22 Wa iva afa p'aning-ẹ k'ẹfhạr n'arima ayok abẹ. Ma wọ, Rẹbẹka ọbạbhọ bẹ́, "Bạng udik gwọ okhebh mama o?" Ma wọ, ororu udik ngwọ ọbạbh Ọvaar Ubinọkpaabyi.

23 Ọvaar Ubinọkpaabyi ubhin-ẹ bẹ́,

"Nkhạma mfa rọ ining-ọ ma ẹfhạr,

nkhạma nnọ mfa s'ining-ọ ma ẹfhạr, kwạna m'ibhaangẹ ayok,

ẹkhạma jạnẹ m'ẹkhaama ẹfa ẹyọhnga oyok,

ẹkhạma ch'ichi eden ẹmmaana m'iruk k'isekhisek kw'ẹkhạma ch'isạsạkhẹ."

24 Masẹ okpe ukpir kw'm'ọmaan, ajunungva agbagba afa bọ aning-ẹ k'ẹfhạr. 25 Ocheden-nwa kw'uyini okhor-okhor, ọbạra ọkhaama iphyạbha k'ifor masẹ ẹnọhmakpa ch'ede iphyạbha-iphyạbha. Ma wọ, abẹ akpẹ-ẹ Ẹsau. 26 Masẹ ocheden kk'uyina, nnwọkka ọbạra uyin, ọkpạna Ẹsau k'ifokkukkọhrọ. Ma wọ, abẹ akpẹ-ẹ Jekọb. Wa Isaak n'ode icho arạbh attan, k'okpe kw'uwa Rẹbẹka ọmaanẹ agbagba mbọ.

27 Masẹ iva mbọ kk'abạra, Ẹsau ode ọnạng kw'okke ẹgbaji, ọbạra ode ọnạng kw'n'ọnwa ẹkpa. Okhenka, Jekọb ẹma ode ọnạng kw'udiri akpen, kw'n'ọkhọhng eter-kwora. 28 Ẹma Isaak wa ọdaakhẹ ẹkpaten chichi, osenga ma, Ẹsau kw'ode ọgbajinạng ukwu ọdaakh-ẹ idik, okhenka, Jekọb wa ọdaakhẹ Rẹbẹka.

29 Iwu jạnẹ s'uwa Jekọb n'ọwọhn uchiattọhk, Ẹsau ukwun ẹgbaji okwo apfẹ, s'apfẹ kk'ẹ ọkhaama tạrr ifor imạm-ẹ. 30 Ma wọ, obeni Jekọb bẹ́, "Kperi idibhi-khorada njọ náng-m ẹbhạr-ẹbhạrẹ, khiri okwo kkhaam ọfha!" Abẹ asenga ma, ayeri Ẹsau bẹ́, Edom, (kw'uyini ekhora).

31 Jekọb ubhin-ẹ bẹ́, "Ọma chi eden nạng-m edennạng chọ ch'ocheden-nwa."

32 Ẹsau n'ubhin-ẹ bẹ́, "Bạng ọttọhk vọ okpen echeden s'okwo n'oben bẹ, ọdwạng-m achen ma o?"

33 Okhenka, Jekọb oben-ẹ bẹ́, "Ọma chi eden chekhi bẹ, m'anạng-m edennạng chọ bạra." Ma wọ, Ẹsau ochekhi, ọtạkha edennạng chẹ ọnạng Jekọb.

34 Ma wọ, Jekọb ọtạk brẹd, ọttạra k'ẹbọhnga-dibhi ọnạng Ẹsau uchi, ọbạra ogwo asi, brasẹ n'ubin ofona. Mạnna wọ kw'uwa Ẹsau oseng unnukhu edennạng chẹ ch'ocheden-nwa.