1 Ma okpe ngwọ, wa Amaraphẹl wọ ode ọvaarnạng kw'Shina, Ariyok ode ọvaarnạng kw'Ẹlasa, Kedor-laomer ode ọvaarnạng kw'Ẹlam, Tidal ọbạra ode ọvaarnạng kw'Goyim.

2 Wa avaarnạng mbọ phyibh n'akwu afhunu ẹfa, ata arima ekpong ọttạra avaarnạng asen adwạkh-ọdwạk. Avaarnạng mbọ asen p'uwa ayok ata arima bẹ abẹ, akpen,

Bera, ọvaarnạng kw'Sodom,

Birasha, ọvaarnạng kw'Gọmọra,

Shinab, ọvaarnạng kw'Adama,

Shẹmebẹr, ọvaarnạng kw'Zeboyim,

ọttạra ọvaarnạng kw'Bẹla, kw'ọbạra okpen Zoar.

3 Wa avaarnạng mbọ asen akwu afhunu ẹfa, abẹ ata arima ekpong k'ipekhuma s'Sidim, kw'ode Ọraanga kw'Unung. 4 Wa avaarnạng mbọ aning isekh-isek kw'Kedor-laomer k'icho jobh-kamfa, okhenka, abẹ n'afhumu ẹvaar chẹ k'icho kw'ottong jobh-kanttaan.

5 Ukwu ukpira icho sọnachi, Kedor-laomer ọttạra avaar mbọkha p'akhaam abẹ ẹgbạkha, abẹ akwu arima ekpong ọttạra avaarnạng mbọkha p'nạn adạkhẹ náchera bẹ́, aninga isekh-isek kwẹ. Abẹ akhema ẹkhạma ch'Rephayim, ch'ining k'ukhubha kw'Ashtẹrọt-Karnayim, abẹ abạra akhema ẹkhạma ch'Zuz ch'ining k'Ham, ọttạra ẹkhạma ch'Ẹm, k'ukhubha kw'Shavẹ-Kiriyatayim. 6 Abẹ abạra ata akhema anạng p'ẹkhạma ch'Họr, p'arukhu k'akpecho p'Seir, abẹ akhubhu bẹ tạrr akpira Ẹl-Paran, kw'ọbaang k'ibyi s'anạng nạn nárukha. 7 Masẹ abẹ akpir ma, abẹ akpa nnạm k'Ẹn-Mishpat, kw'ọbạra ode Kadẹsh, abẹ abạra ata akhema anạng p'ẹkhạma ch'Amalẹk, ọttạra ẹkhạma ch'Amọr ch'irukhu k'ukhubha kw'Hazazọn-Tamar.

8 Ma wọ, ọvaarnạng mbọ asen p'adạbhẹ Sodom, ọttạra Gọmọra, ọttạra Adama, ọttạra Zeboyim, ọttạra Bẹla (kw'ode Zoar), abin ata abe ekpong k'ipekhuma s'Sidim, 9 arima avaarnạng mbọkha annebung abẹ, p'ade ọvaar Kedor-laomer kw'ọdạbhẹ Ẹlam, ọttạra Tidal kw'ọdạbhẹ Goyim, ọttạra Amaraphẹl kw'ọdạbhẹ Shina, ọttạra Ariyok, kw'ọdạbhẹ Ẹlasa, kw'uyini bẹ, avaarnạng annebung abe k'ukhubha gwạnọ, mbọkha asen abe k'ukhubha ngwọkha, bẹ abẹ arima ayok abẹ.

10 Wa ipekhuma nnọ s'Sidim ikhaam ape p'afhu ọttạra ana p'abạng-ọbạnga abạra apyi bẹ kkạng. K'okpe kw'avaar p'Sodom ọttạra Gọmọra arạbhọ, ayok bạnọ atto ma ape mbọ, mbọkha arạbh atena k'akpecho. 11 Wa avaarnạng mbọ annebung avạk aSodom ọttạra aGọmọra ẹkhaama chabẹ phyi-phyibh, ọttạra ichiakpo pyabẹ phyibh ana, abẹ atima afona. 12 Wa abẹ agba avạkha Lọt kw'ode nnwa kw'nnwọkka kw'Abram, kw'uwa urukhu k'Sodom k'okpe kw'ekpong njọ etto, ọttạra ẹkhaama chẹ atima afona.

13 Ma okpe ngwọ, ọnạng wạnọ kw'uwa ọrạbhọ ekpong ọnnaanga, ukwu ọkpaak Abram kw'ode oHiburu-nạng bẹ́, abẹ kk'Lọt avạkha k'ẹmmạri. Ma okpe ngwọ, Abram wa urukhu ọbaanga nchi s'Mamrẹ kw'ubin Amọr, ọttạra ivọkka pẹ anạng afa p'akpen Ẹshkọl ọttạra Anẹr, p'uwa ade ayok-ikhaana pẹ. 14 Masẹ Abram ọbhaang bẹ, abẹ kk'Lọt kw'ode nnwa kw'nnwọkka avạkha k'ibira atima afona, oyeri akpongnạng pẹ p'akke irima. Akpongnạng mbọ ade anạng p'ammaan ma ọchọhm kwẹ, abạra aruk abẹ. Akpongnạng mbọ wa ade anạng nnạbh chi ukuma chikhantaan. Wa Abram utim akpongnạng mbọ pẹ ukhubh anạng p'avạk Lọt tạrr abẹ akpira Dan. 15 Ukwu ukpira k'irungu, Abram ọbhaangẹ akpongnạng pẹ k'ikhaana k'ikhaana, abẹ abaabha awawunanạng p'abẹ age ngekha. Abẹ arima bẹ abẹ, abẹ akhubhu bẹ tạrr akpira k'ẹkhạma ch'Hoba, k'ukhubha kw'Damaskọs. 16 Osenga ma, Abram ọvạkha anạng mbọma ekpo ọna py'abẹ atạk kk'Sodom ọttạra Gọmọra, ọbạra utima Lọt, ọttạra ekpo pyẹ phyibh, ọttạra ipanạng p'abẹ avạk k'ibira, ọttạra anạng adwạkh-ọdwạk p'abẹ abạra avạkha k'ibira, ukwuna.

17 Masẹ Abram n'ukwun-ukwuna s'kk'ọvaar Kedor-laomer ọttạra avaarnạng mbọkha p'aning abẹ okhema k'ekpong, ọvaarnạng kw'Sodom uyin k'iyaan ọta okhebh-ẹ k'ipekhuma s'Shavẹ, ch'ede "Ipekhuma s'Ọvaarnạng."

18 Ma wọ, Mẹlkizẹdẹk, kw'ode ọvaarnạng kw'Salẹm, ọbạra ode ọfọhnẹja kw'Ubinọkpaabyi kw'Ọyọhng, wa utim brẹd ọttạra atwuk okkena Abram. 19 Ẹma Mẹlkizẹdẹk, odo Abram, oben bẹ́,

"Tte Ubinọkpaabyi kw'Ọyọhng,

kw'ọdạbhẹ idik phyibh,

kw'ọbạra oyok ẹrạng ọttạra isek,

odo ọma, Abram.

20 Tte ẹtọhnga iyima ẹnạng

Ubinọkpaabyi kw'Ọyọhng, kw'ọdạbhẹ idik phyibh,

kw'kk'ọ ẹfa ọnạnga

ch'atim akhema awawuna-nạng pọ."

Ma o, Abram ọtạkha ekpo pidede p'utim k'ekpong ukwuna, otobha k'ibyi jobh. Ọtạkha ukwung gwạnọ ma, ọnạng Mẹlkizẹdẹk.

21 Ma wo, ọvaarnạng kw'Sodom n'obeni Abram bẹ́, "Ọma tạkha ekpo pidede p'atim k'ekpong akwuna, tte ayokhanạng phyibh p'atim k'ekpong akwuna obọhk nạng-m."

22 Abram ubhin ọvaarnạng kw'Sodom bẹ́, "Amma kk'nchekha k'ititikha s'Ọvaar Ubinọkpaabyi kw'Ọyọhng, kw'ọbạra oyok ẹrạng ọttạra isek bẹ́, 23 ọttọhk vạnọ vạnọ f'ode pfọ, f'm'ntạkha ọtạkha kòde, tạma k'ẹnaanga-dikhi tạrr ukpira k'ndikhi s'ekpo py'mfhok pọ, ọfha kwạna nạng akwu aben bẹ́, ujibhada Abram ubin k'mbọhk sọ. 24 Amma ọttọhk fidede pfọ, f'amma m'ntạkh-ọtạkha kòde, oyongha uchiattọhk f'anạng paam kk'achia, ọttạra okhebh f'anạng p'ator-m ekpong. Tte Anẹr, ọttạra Ẹshkọl, ọttạra Mamrẹ, atạkha okhebh fabẹ."