1 Masẹ Rachẹl n'ose bẹ, ifhạr ikhaar-ẹ-ọkhaarẹ, n'utim otor nnwọkka Lea. Ma wọ n'obeni Jekọb bẹ́, "Nạng-m iva o, deja, m'mpope e!"

2 Ma wọ, Jekọb ọdwạkhẹ Rachẹl abẹ, ọbạbh-ẹ bẹ́, "Amma wọ nde Ubinọkpaabyi kw'usi-ọ bẹ́, nạngẹ iva amaanẹ o?"

3 Rachẹl ọbẹ́, "N'ode mạnna, Kkeri Bilha, kw'ode ọtọhmnạng kwaam maa. Yima abẹ, ọfha ọmaan-m iva, ọfha nsenga ma akhẹ ntạma ichimma chaam."

4 Ma wọ, ọtạk ọtọhmnạng kwẹ Bilha, ọnạng Jekọb masẹ ukwanạng kwẹ. Jekọb uyima abẹ, 5 Bilha ukwu utima ifhạr ọmaan ujunungnwa ọnạng Jekọb. 6 Ma wọ Rachẹl okpe nnwa nwọ Dan, ọbẹ́, "Ubinọkpaabyi kk'iponga saam ubua, ọbạra ọbhaanga njọhm saam, ọnạng-m ujunungnwa."

7 Ma wọ Bilha kw'ode ọtọhmnạng kw'Rachẹl ọbạra utima ifhạr ọmaan Jekọb ujunungnwa kw'ottong afa. 8 Rachẹl oben bẹ́, "Amma kk'irima ch'ẹfa nsia ọttạra nnwọkka kwaam Lea, mbạra nkhem-ẹ." Osenga ma, ukpuẹ-ẹ Naphtali.

9 Masẹ Lea ose bẹ́, kk'ọmaan ukuma, n'ọtạk ọtọhmnạng kwẹ, Zilpa ọnạng Jekọb masẹ ikwanạng kwẹ. 10 Zilpa ọmaan Jekọb ujunungnwa. 11 Ma wọ Lea obeni bẹ́, "Maa wọ ọkhaankẹ ode ujibhaada e!" Okpe nnwa nwọ Gad.

12 Wa Zilpa kw'ode ọtọhmnạng kw'Lea, ọmaan Jekọb ujunungnwa kw'ottong afa. 13 Ma wọ, Lea okpe nnwa nwọ Asha, oben bẹ́, "Ettem erebhạm o, s'ayok ipanạng n'abạra n'ayer-m ottennebh."

14 K'okpe kw'iphya s'wit, Reubẹn uyini kha owonu, ọta ose asiseni-kwongu p'abẹ ayeri mandrek*, utima okkena ọkka kwẹ, Lea. Ma wọ, Rachẹl obeni Lea bẹ́, "Totokhạn, mekh-m asiseni-kwongu bạnọ p'nnwa kwọ utim ukwuna."

15 Okhenka, Lea obeni Rachẹl bẹ́, "Udim kwaam kw'kk'aam avạkha ana, khọ nóbenga a? N'abạra atạkha asiseni-kwongu p'nnwa kwaam attạra o?"

Rachẹl oben bẹ́, "Ọbaan ma, de ammekh-m asiseni-kwongu p'nnwa kwọ, ma wọ m'nchera atạkha iyimawu ch'chemma."

16 Osenga ma, masẹ Jekọb ukwun iyina k'ẹchọhkha, Lea ọta okhebh-ẹ, ọkpaakh-ẹ bẹ́, "Chemma n'ode iyimawu chaam e, ukwuru bẹ́, kk'asiseni-kwongu p'nnwa kwaam ntima ndebh chẹ." Ma wọ Jekọb uyim Lea abẹ ma irungu njọ.

17 Ubinọkpaabyi ọbhaanga njọhm s'Lea, ukwu utima ifhạr, ọmaan Jekọb ujunungnwa kw'ottong asen. 18 Lea oben bẹ́, "Ubinọkpaabyi kk'aam ọtaama, ukwuru s'nnạngẹ udim kwaam ọtọhmnạng kwaam, uyima abẹ." Ma wọ, okpe nnwa nwọ Isaka.

19 Lea ọbạra utima ifhạr ọmaan Jekọb ujunungnwa kw'ottong asajạnẹ. 20 Ma wọ Lea obeni bẹ́, "Ubinọkpaabyi kk'aam ẹnạnga chididen ọnạnga. Ẹkpa nja m'mbạr udim kwaam udik, ukwuru bẹ́, kk'ẹ ajunungva asajạnẹ mmaana." Osenga-ma ukpuẹ-ẹ Zẹbulun.

21 Ayongu ma, Lea ọbạra ọmaan ikwanạng, ukpẹ-ẹ Daina.

22 Ma o, Ubinọkpaabyi ukwu ujima Rachẹl, ọbhaanga njọhm sẹ, ọnạng-ẹ ọmaan. 23 Rachẹl utima ifhạr ọmaan ujunung, oben bẹ́, "Ubinọkpaabyi kk'aam ọrạbha k'mkpạr." 24 Ukpẹ-ẹ Josẹph, oben bẹ́, "Tte Ọvaar Ubinọkpaabyi ọttạra-m adạkhẹ ujunungnwa."

25 Masẹ Rachẹl kk'Josẹph ọmaana, Jekọb oben Laban bẹ́, "Tte-m ọbọhk mkpa nnạm k'ọmmaana-fhon kwaam. 26 Nạng-m ipanạng paam ọttạra iva paam p'kk'bẹ abẹ nsenga nsi ọtọhm nnạng-ọ, ntima mfona. Ọma oyeni asong ọtọhm demapfẹ ma f'kk'nsia nnạng-ọ."

27 Okhenka, Laban oben-ẹ bẹ́, "De kk'ọphyaam nkhaama k'akhọ k'ititikha, totokhạn kákpomma afona, khiri kk'ọsẹ mmạra, nsonga bẹ́, Ọvaar Ubinọkpaabyi kk'aam udia ukwuru ọma." 28 Ọbạra oben bẹ́, "Tekh-m ẹphya ch'ọtọhm pfọ ope, khiri m'nnạng-ọ-ọnạng."

29 Jekọb ubhin-ẹ bẹ́, "Ọma asong ọtọhm che ma f'kk'nsia nnạng-ọ, abạra ase ukhira kw'ngwạkhọ itirakpo pyọ, ijibh ẹnạng-ọ. 30 Brasẹ n'nkwu, itirakpo pyọ nẹ́saabha oche kw'apyẹ n'ẹsaabhẹ mantọmma. Ọvaar Ubinọkpaabyi kk-ọ udia k'ọtọhm fidede f'kk'nsia nnạng-ọ. Okhenka, nọ́baana bẹ́, abạra atte-m ọbọhk nta nnor f'ẹchọhmfhạr chaam m'ẹbạra itima iruk akpen o?"

31 Laban ọbạbh-ẹ bẹ́, "M'nnạng-ọ mbạng?"

Jekọb ọpọhn-ẹ bẹ́, "Amma pẹnẹ wạnọ wạnọ k'akhọ ọbọhk nạ́nnora, udik ubungukwẹ kw'nnoru ode bẹ́, m'atte itirakpo pyọ ọbọhk anạng-m nkkeri. 32 Tte mbaana mvu sọ s'n'nkkeri, ntekha ọrạkhạmaan-nwa p'akkẹrẹ-ọkkẹr, ọttạra avukpokha py'ape abhaangẹ, ede ẹtaam chaam.

33 "De ukpir k'okpe kw'm'akwu akkeri itirakpo pyọ, tte udik ọkka kwaam ọkhaama ẹyaakha bẹ́, de ase ọrạkhạmaan-nwa kwidede kw'nạn ifor nọ́kkẹra, ọttạra ivu chidede ch'nạn ẹbhaange nípua k'ikhaana s'nten saam, tạkha bẹ́, mfhu-ufhu."

34 Laban oben bẹ́, "Amma kk'nchera k'udik ọkka bẹ, akwẹ ode oche kw'abeni."

35 Ma iwu njọ jạnẹ, Laban oseng otekha avudim py'akkẹr-ọkkẹr, ọttạra py'epe abhaangẹ, ọttạra avukpokha phyi-phyibh p'akkẹr-ọkkẹr, ọttạra py'epe abhaangẹ, ọttạra ọrạkhạmaan-nwa bina phyi-phyibh, ọtạkha ọnạng iva pẹ bẹ́, abẹ akkeri. 36 Ma wọ ubin osenga kw'iwu ittaan ọttạra iva pẹ, arik Jekọb s'n'okkeri mvu nnọkha s'Laban. 37 Ma wọ Jekọb ọtạk abọhkha akhikhebhi, p'ichi ch'pọpula, ọttạra abọhkha p'ichi ch'almọn, ọttạra p'ichi ch'ede bẹ kwaarr, oboru akpakpa, usi asẹ iwur bẹ gwaang. 38 Ma wọ Jekọb ọtạk abọhkha p'nchi nnọ s'kk'akpakpa obora, uttima ma ibyi s'mvu n'ita igwo asi, ọfha ode bẹ́, k'okpe kw'm'ivura ayok ma ibyi nnọ s'asẹ n'igwo asi, 39 Mvu-nọ asẹ ikkeri achibọhkha mbọ ititikha, asẹ imaan ayok p'akkẹr-ọkkẹr. 40 Ma wọ Jekọb ọbhaangẹ arạkhạmaan-va k'nvu ọkhạm ochok, okhenka, n'usi mbọkha p'arikhi bẹ́, apyẹ ekkeri p'akkẹr-ọkkẹr py'ade p'Laban ititikha. Osenga ma, ẹma n'ọkhaam nten sẹ oyeni, s'nạn adạkhẹ kha nnọ s'Laban níttạra. 41 K'okpe kw'ifor ibin aten-pa p'agwengi ifor ọtạm, Jekọb m'ọtạkha achibọhkha mbọ uyikha k'ọsọhkha, ọfha asẹ ikkeri ma achibọhkha mbọ k'okpe kw'm'ivura ayok. 42 Okhenka, nten s'imạm ifor, sẹ achibọhkha mbọ mọ́khọhkha. Ma wọ, nnọ s'igweng ifor n'ide s'ẹma Jekọb, s'imạm ifor ide s'Laban. 43 Mạnna wọ kw'uwa Jekọb oseng ujibh-ẹ mororo, n'ọkhaam itirakpo k'ọsaabh, ọttạra atọhmnạng p'ipanạng ọttạra p'ajunung, ọttạra akamẹl ọttạra nnyạnyaang.