1 Wa Adam uyim ikwanạng kwẹ, kw'ode Iv abẹ, Iv utima ifhạr, ọmaan Ken. Iv oben bẹ́, "Ọvaar Ubinọkpaabyi kk'aam ọkkaana mmaan ujunungnwa." 2 Wa Iv ọbạra utima ifhạr ọmaan Ebẹl kw'otoru Ken nnạm.

Wa Ebẹl n'utir arạkhạmaan, Ken usi owonu-tọhm.

3 Ukwu ọkhaama okpe kw'Ken utim achidwuk p'owonu kwẹ ọta ọnạng Ọvaar Ubinọkpaabyi ẹnạnga. 4 Ebẹl ọtạkha achedenva p'arạkhạmaan pẹ p'ajibhi ifor usi ẹnạnga. Ọvaar Ubinọkpaabyi orebhi ettem otena Ebẹl ọttạra ẹnạnga chẹ. 5 N'ode Ken ọttạra ẹnạnga chẹ, Ọvaar Ubinọkpaabyi ettem k'ẹ nérebha. Osenga ma, Ken ọdwạkh-ẹ tạrr ọkpạnẹ ititikha.

6 Ọvaar Ubinọkpaabyi n'ọbạbhọ Ken bẹ́, "Mbạng vọ ọdwạkh-ọ? Ode yạn kw'n'akpạnẹ ititikha o? 7 De wạra asi ọkkakwẹ, wạra ettem kaam mérebh abọ? Okhenka, s'nạn ọkkakwẹ násia, ipyibha nạngkha ẹbaan-ọ bẹ́, ẹvạkh-ọ. Ọbaan bẹ́ akhema chẹ."

8 Wa Ken ukwu ọkhaama nttọhna nnwọkka Ebẹl abẹ, oben-ẹ bẹ́, "Kwu amạna anyin k'ẹkpa." Masẹ abẹ aning ma k'ẹkpa o, Ken uvun nnwọkka Ebẹl ọfhọ.

9 Ọvaar Ubinọkpaabyi ọbạbhọ Ken bẹ́, "Nnwakka Ebẹl mo o?"

Ken ọpọhna bẹ́, "Amma kạ́nsong, amma wọ nde okkeri-nnwọkka kwaam sa?"

10 Ọvaar Ubinọkpaabyi oben bẹ́, "Bạng udik gwọ asi maa? Khọhmọ oche kw'isẹ s'nnwakka n'igạma k'isisek iyer-m. 11 Osenga ma, kk'ọ ẹmma-nnaakha, mbạra nkubh-ọ k'isisek s'iwong ẹmma igwo isẹ s'nnwakka kw'afhọ. 12 Okpe kw'atubhu ekpo, apyẹ dạk míjibh ẹnạng-ọ. Ọma ẹyạr ibyi rạnẹ mávạkha, m'ade oseng-nden-nden ma ọyagbin."

13 Ken oben Ọvaar Ubinọkpaabyi bẹ́, "Irem saam ibạrẹ o, iyọhnga oche kw'm'nkke ntọhkha. 14 Chemma kk'aam akhubha ma isisek nna, ọttạra k'ititikha sọ; bạra nde oseng-nden-nden maa ọyagbin, ọnạng kwidede kw'ose-m, m'ọfhọ-m ọfhọ."

15 Okhenka, Ọvaar Ubinọkpaabyi n'obeni Ken bẹ́, "Oche ngwọ sạng! Ọnạng kwidede kw'ọfhọ-ọ, m'ọtạkha irem s'iyọhng sọ nden nsenọfa." Ma wọ Ọvaar Ubinọkpaabyi ofhoru Ken, ọfha ọnạng kwidede kw'ose-ẹ nạng-ẹ ọfhọ. 16 Ma o, Ken ubina k'ititikha s'Ọvaar Ubinọkpaabyi, ottena, ọta uruk k'isek s'Nọd, k'ukhubha kw'okpebhadudon n'uyin k'Iden.

17 Wa Ken uyim ikwanạng kwẹ abẹ, ikwanạng nwọ utima ifhạr ọmaan Ẹnọk. Ma okpe ngwọ, Ken n'usi ofhon. Ukwu okpe ofhon ngwọ eche nnwa kwẹ, Ẹnọk.

18 Wa Ẹnọk ofhonu Irad.

Irad ofhon Mehujayẹl,

Mehujayẹl ofhon Metusayẹl,

Metusayẹl ọbạra ofhon Lamẹk.

19 Wa Lamẹk ọtạk ipanạng afa, oyok wạnọ okpen Ada, nwọkha okpena Zila. 20 Wa Ada ọmaanẹ Jabal, ẹma wọ wa ode otte kw'anạng p'n'aruk k'akkira, abạra atir nten. 21 Nnwọkka kwẹ okpen Jubal, kw'ode otte kw'anạng p'abha ugimangim khikhir, ọttạra ugigeri gạge. 22 Zila ọbạra ọmaan Tubal-Ken, kw'ode otte kw'atepa p'brons ọttạra mbaanga k'akhira-k'akhira. Nnwọkka kw'Tubal-Ken kw'ikwanạng okpen Naama.

23 Wa Lamẹk obeni ipanạng pẹ bẹ́,

"Ada ọttạra Zila,

Abạngama ipanạng paam, akhọhm-m itọhng;

abạngama ipanạng p'Lamẹk, abhaanga ọtọhnga kwaam.

Amma kk'ujunung wạnọ mfha kw'umum-m ọttọhk,

udikkobh kw'usi-m ebhenna, ẹwọ kw'mfhọ.

24 De ọnạng kwidede ọfhọ Ken,

ẹma m'ose irem s'iyọhng s'Ken nden nsenọfa,

okhenka, de ọnạng ọfhọ amma Lamẹk ukwuru udikkobh kw'mfhọ,

ọnạng nwọ m'ose irem s'iyọhng s'ọnạng kw'ọfhọ Ken nden arạbh attaan ukuma chikhamfa."

25 Wa Adam ọbạra uyima ikwanạng kwẹ abẹ, ikwanạng kwẹ utima ifhạr ọmaan ujunungnwa, ukpuẹ-ẹ Sẹt, ọbẹ́, "Ubinọkpaabyi kk'aam nnwa ọdwạkh-ọdwạk ọnạnga kw'oter echo ch'Ebẹl, kw'Ken ọfhọ."

26 Sẹt ọbạra ofhon ujunungnwa, ukpuẹ-ẹ Ẹnọs.

Ma k'okpe ngwọ gwọ kw'anạng atạm eche ch'Ọvaar Ubinọkpaabyi kpukpobha.