1 Masẹ Josẹph nạn adạkhẹ ifor sẹ nókke ọvạkha k'ititikha s'atọhmnạng pẹ, orengi ẹmạng ọgạma, ọbẹ́, "Tte ọnạng kwidede ubin-m k'ititikha!" Ma wọ, wa ukhikhennạng ọdwạkh-ọdwạk kw'uning ma okpe kw'Josẹph ọyaakhẹ ifor sẹ ọnạng ivotte pẹ, kòde. 2 Wa Josẹph ọgạm ẹmạng k'ẹrạng tạrr anạng p'Ijip abhaanga, tạrr ẹchọhmfhạr ch'Phero ẹbạra ẹbhaanga ẹmạng ch'ọgạm.

3 Josẹph oben ivotte pẹ bẹ́, "Amma Josẹph wọ ma e! Otte kwaam utim urukhu akpen kạkha o?" Okhenka, wa ivotte pẹ khẹ kákke apọhna ukwuru ojora-khira f'ọvạk bẹ k'ititikha sẹ.

4 Josẹph oben ivotte bẹ́, "Abạnga atwạkhọ agbaar-m k'ifor." Masẹ abẹ atwạkhọ agbaar-ẹ, oben bẹ bẹ́, "Amma wọ nde Josẹph, nnwotte kwabạnga, kw'uwa abạnga akpe anạng aseng-mphya p'Ijip. 5 Tte nttem nạngẹ bạnga ẹmma iphyaangẹ. Abạnga ayok kábạra apyima s'abạnga akpe-m anạng maa, ukwuru bẹ́ Ubinọkpaabyi oben bẹ́ ugim-ugim ọtọhm-m ma, ọfha osenga amma abẹ ọkkaana akpen p'ayokhanạng. 6 N'ode icho ifa maa s'okwo f'ididen uning ma ẹkhạma nja, k'icho isen kha oro, anạng ekpo mátubh, abẹ mábạra aphya. 7 Okhenka, wa Ubinọkpaabyi ugim-ugim ọtọhm-m maa bé, nkkaana nchok abạnga ma mba bạnọ akpen maa ọyagbin, ọfha mbạra nnạng bạnga ẹnnaanga chididen.

8 "Ma o, abạnga ma asạng asi, Ubinọkpaabyi wọ wa ọtọhm-m ma. Usi-m bẹ́ nde ọvaar kw'ajukwa p'Phero phyibh, ọttạra aro kw'ọchọhm kwẹ, ọttạra ọdạbhẹ kw'anạng p'Ijip phy-phyibh. 9 Abạnga akpa nnạm ẹbhạr-ẹbhạrẹ, ata akpaak otte kwaam bẹ́, Nnwa kwọ Josẹph ọtọhmọ ẹkkaabha okken-ọ bẹ́, ‘Ubinọkpaabyi kk'aam ẹvaar ch'Ijip phyi-phyibh ọnạnga. Okpe kákhibhi, jekha akwu akhebh-m kha ibyi s'nning. 10 Ọma otte kwaam, ọttạra iva pọ, ọttạra iva p'iva pọ, ọttạra itirakpo pyọ, ọttạra ẹkhaama chọ phyibh, m'aruk k'ukhubha kw'Goshẹn, ọfha annuk ambaanga ayok. 11 Ma Goshẹn wọ mạnkker-ọ, ukwuru bẹ́ okwo f'ididen utim uning kha oro. Nạn mạnna núdia, ọma ọttạra ẹchọhmfhạr chọ, ọttạra itirakpo pyọ phyibh m'atto okpor.’

12 "Abạnga ma phyibh ọttạra nnwọkka kwaam Bẹnjamin kk'asia bẹ́ k'udik ọkka, amma Josẹph wọ n'mkpaak bạnga abẹ maa. 13 Abạnga akpaak otte kwaam abạrada-hira p'nkhaam k'Ijip, abạra akpaakh-ẹ udik kwidede kw'abạnga kk'asia. Abạnga asọhng ẹbhạr-ẹbhạrẹ, ata atạkha otte kwaam akwu."

14 Ma wọ, Josẹph ọgaar nnwọkka Bẹnjamin, abẹ abaakha ayok nttem, agạma. 15 Wa Josẹph ọgạm ẹmạng utima ọbaakha ivotte pẹ phyibh. Masẹ kk'usia mạnna, ma wọ ivotte pẹ n'akhaam ottembạr akpaak abẹ idik.

16 Masẹ ẹgạma njọ ikpir k'ọvaarter kw'Phero bẹ́ ivotte pa Josẹph kk'akwua k'Ijip, wa akwẹ orebhi Phero ọttạra anạng pẹ phyibh ettem. 17 Phero oben Josẹph bẹ́, Kpaak ivatte pọ bẹ́, Udik kw'abạnga m'asi ode bẹ́, abạnga m'atạkha ekpo pyabạnga anạna itirakpo pyabạnga, ọfha abạnga abhạna k'ẹkhạma ch'Kenaan, 18 abạnga abạra atima atte kwabạnga, ọttạra ichọhmfhạr sabạnga akwu k'Ijip. Amma m'nnạng bạnga ukhubha kw'isisek ijibhi ọtạm, ọfha abạnga akhaama ekpo k'ọsaabh ma.

19 Bạra kpaak bẹbẹ́, "Udik kw'abạnga m'asi ode bẹ́, ‘Abạnga atạkha ijaar sididen s'nnyạnyaang n'itwạr ma k'Ijip, atima ata atạkha iva pabạnga, ọttạra ipanạng pabạnga, ọttạra atte kwabạnga, atima akwu. 20 Tte udik kw'oten k'ẹkhaama chabạnga nạngẹ bạnga ẹmma ọphyaangẹ, ukwuru bẹ́, ukhubha kw'isisek ijibhi ọtạm k'Ijip, ọkhaam abạnga ma.’ "

21 Mạnna wọ wa iva p'Jekọb asi udik kwidede kw'abẹ atọhnọ bẹ. Josẹph ọnạngẹ ivotte pẹ akpaar p'ẹbhạr pididen, otor k'ẹfa ch'ọvaar Phero kk'ọnạnga, ọbạra ọnạng bẹ uchiattọhk f'abẹ m'achi k'eden. 22 Ọnạngẹ ọnạng-ọnạng ọvạra ọbhapfhẹ, oyongu Bẹnjamin kw'ọnạng-ẹ ashẹkẹl arạbh chi p'silva, ọttạra ọvạra ọdwạkh-ọdwạk akhira asen. 23 Wa Josẹph ọtạk nnyạnyaang-dim jobh s'itọhk ẹkka-kpo p'Ijip, ọttạra nnyạnyang-pa jobh s'itọhk agwu ọttạra brẹd, ọttạra uchiattọhk ọdwạkh-ọdwạk f'otte m'uchi k'eden. 24 Ma wọ, masẹ kk'bẹ ekpo mbyọ okhebha phyibh, oben abẹ asọhng. Masẹ abẹ abin osenga, oben bẹ bẹ́, "Abạnga ẹkhọr k'eden kasi o!"

25 Ma o, abẹ abina k'Ijip akwu akhebha otte kwabẹ Jekọb k'ẹkhạma ch'Kenaan. 26 Masẹ abẹ akwu akpira, abẹ akpaak otte, bẹ́, "Attitte o, Josẹph utim urukhu akpen kạkha e! Ẹma wọ n'ọdabhẹ Ijip phyibh e!" Jekọb okkon-ẹ, udik ngwọ nọ́tạkha masẹ udik ọkka. 27 Okhenka, masẹ abẹ n'akpaakhẹ udik kwidede kw'Josẹph kk'bẹ ọkpaakha, ọbạra ose ijaar sididen s'nnyạnyaang n'itwạr s'Josẹph kk'ọtọhmọ bẹ́, akwu atạkhẹ atima afona k'Ijip, ifor ikpọkhọ Jekọb 28 Ma wọ Jekọb obeni bẹ́, "Akwẹ ode udik ọkka e, nnwa kwaam Josẹph utim urukhu akpen kạkha e. Oyonga m'nta k'Ijip nta nsiẹ-ẹ bạrasẹ mpe."