1 Wa abẹ atekhi Josẹph bẹ́, "Atte ọmmẹ-ẹmma e." Josẹph ubina ọttạra ajunungva pẹ afa, Manasẹ ọttạra Ephraim, ọta ose otte Jekọb kha Goshẹn. 2 Masẹ abẹ atekhi Jekọb bẹ, "Nnwa kwọ Josẹph k'ukwua bẹ ukwu usi-ọ," mạnna wọ kw'Israẹl okhong ubina k'ibhikha ch'uyim, uninga ẹyạr.

3 Ma wọ, Jekọb n'obeni Josẹph bẹ́, "Ubinọkpaabyi kw'ẹfa phyibh uyini-okhebh-m k'Luz, kha Kenaan, odo-m 4 ọbạra oben-m bẹ́, ‘Amma m'nạng-ọ iva k'ọsaabh, m'nsi-ọ ade ofhon ubungukwẹ, mbạra nạng-ọ isisek nna, ide sọ, ọttạra s'iva pọ tạrr ipimmanitor.’

5 "Mantọhmma, iva mba afa p'afhonu k'Ijip brasẹ amma n'nkwu, Ephraim ọttạra Manasẹ, m'abạra ade paam, oche kw'Reubẹn, ọttạra Simeọn ade. 6 Iva adwạkh-ọdwạk p'm'afhon bọ m'ade pọ. Iva mbọ p'ade pọ m'atạkha okhebh pf'ebochia chabẹ k'Efrem, ọttạra Manasẹ. 7 Ikwosi saam ikhenka ide bẹ, s'mbin k'Padan-Aram nkwuna, wa Rachẹl ope k'eden s'antim aning k'osenga k'Kenaan, kw'ọbaang Ẹphrat. Ma wọ, wa nnọng-ẹ k'eden ọkhaan-ọkhaan ch'Ẹphrat (kw'ode Bẹtẹlẹhẹm)."

8 Ma wọ, masẹ Israẹl ose iva p'Josẹph, ọbạbh bẹ, "Bạng anạng bọ khạkha o?"

9 Josẹph ubhina otte bẹ́, "Attitte, iva p'Ubinọkpaabyi ọnạng-m bọ ma e."

Ma wọ, Jekọb n'obeni bẹ́, "Tima bẹ kwu, ọfha nyọbh bẹ itta."

10 Ma okpe ngwọ, Jekọb k'ọtạma, dạkhẹ iyaan k'nóse. Ma wọ, Josẹph utim iva mbọ afa ọtwukhọ ọgbaara otte k'ifor, otte ọbaakh bẹ ettem, usima be.

11 Masẹ kk'Israẹl ọbaakha, n'ọbhạkhẹ oben Josẹph bẹ, "Amma ichen nạnchokha bẹ́, mạmbạra nse ititikha sọ, mạntọhmma, ititikha sọ mạnkkeni sạng s'nse, Ubinọkpaabyi kk'usia bẹ, tte mbạra nse iva pọ."

12 Osenga ma, Josẹph n'ọrạbh iva mbọ k'ntaak s'otte, utima bẹ uttima ititikha k'isek ma ititikha s'Jekọb. 13 Ma wọ, Josẹph ọvạk Ephraim k'udimbọhk kwẹ, kw'ode ọkwabọhk kw'Jekọb, ọbạra ọvạkha Manasẹ k'ọkwabọhk kwẹ, kw'ode udimbọhk kw'Jekọb, ọtwukhọ bẹ ọbaanga otte k'ifor. 14 Okhenka, wa Jekọb udir mbọhk sẹ ọnạna iva mbọ k'ncho. Ọnạn Ephraim kw'ode nnwannwa, udimbọhk, ọnạn Manasẹ kw'ode odennạng ọkwabọhk.

15 Osenga ma, ọyọhbh Josẹph itta, ọbẹ,

"Tte Ọvaar Ubinọkpaabyi kw'ab'otte paam

Abraham, ọttạra Isaak akpobh,

Ubinọkpaabyi kw'khaam okkera

k'akpen paam phyibh tạrr ukpira ma,

16 tte itọhmọ,

s'khaam ikkaana,

k'ipyibha ch'idede,

ido iva mba.

Tte iva mba akpena ache pabẹ abhina kakhaam,

tte abẹ abạra akpena ache pabẹ abhina,

k'ab'otte paam, Abraham, ọttạra Isaak,

tte abẹ asaabh ayọng-ọyọnga ma ọyagbin."

17 Masẹ wa Jekọb n'ọyọhbh iva mbọ itta, Josẹph ose bẹ, udimbọhk kw'otte ọnạn Ephraim k'echo, ettem khẹ nerebha. Ma wọ n'ubin bẹ, ọta udira ọbọhk kw'otte ọnạn Ephraim k'echo bẹ, ọnạna Manasẹ. 18 Ma wọ, Josẹph oben otte bẹ, "Mma e, aro kwaam, oyok nwa wọ ode ocheden, nạna udimbọhk kwọ kakhẹ k'echo."

19 Otte ufhum, oben bẹ́, "Nnwa kwaam, ọttan-m mạma e, nsong ma bẹ́, iva p'iva p'Manasẹ m'ade ẹkhạma ch'ididen ch'm'iyin eche. Ayongu ma, Efrem m'ọkhaama ẹfa ọyọhnga Manasẹ, iva p'iva pẹ m'ade idifhon s'isaabh-ọsaabh."

20 Ma wọ, Jekọb ọyọhbhọ iva mbọ itta ma iwu njọma, oben bẹ e

"Anạng p'Israẹl m'atima eche chọ n'anạngẹ anạng idia.

Tte Ubinọkpaabyi ọnạng-ọ uwujibh ọttạra ottennebh k'oche kw'ọnạngẹ Ephraim ọttạra Manasẹ."

Ma wọ, usi Efrem ode odennạng ọnạng Manasẹ.

21 Ma wọ, Jekọb n'obeni Josẹph bẹ́, "Ebowu chaam nạnk'efora, okhenka, tte Ọvaar Ubinọkpaabyi uninga bạnga abẹ, ọbạra utima bạnga ọkpa nnạm k'isek s'ab'atte. 22 Ọma wọ n'ade ocho, kw'ayok, mạnnạng-ọ isisek nnọ s'ikpechowọna s'nvạk anạng p'Amọr nna, s'nnim bẹ abẹ ọttạra ọkkangkkang-kkro kwaam ọttạra uyuk kwaam."